ຂ່າວຫຼ້າສຸດ

ເບິ່ງບ້ານເຂົາ ເອົາບົດຮຽນ - ໂດຍ: ວິເສດ ສະແຫວງສຶກສາ : ​ກຳ­ປູ­ເຈຍ ເຢຍ​ລະ​ມັນ

422 09 ມ.ກ. 2017 ຫົວຂໍ້ຂ່າວອື່ນໆ

ປັດ­ຈຸ­ບັນ ທາງ​ການ​ກຳ­ປູ­ເຈຍ ພວມ​ອອກ­ແຮງພະ​ເດັດ​ເສິກ​ກັນ​ກັບ​ຄົນ​ຕ່າງ­ປະ­ເທດ​ທີ່​ເຂົ້າ​ໄປ​ວ່າຈ້າງ​ໃຫ້​ແມ່­ຍິງ​ກຳ­ປູ­ເຈຍ​ຖື­ພາ​ມານ ຫຼື ອັນ​ທີ່​ເອີ້ນວ່າ “ອູ້ມ​ບຸນ” ໃຫ້​ຄູ່ມ​ຜົວ​ເມຍ​ຕ່າງ­ປະ­ເທດ​ທີ່​ຕ້ອງການ​ລູກ ແຕ່​ບໍ່​ຕ້ອງ­ການ​ຖື­ພາ​ມານ​ເອງ ເລື່ອງ​ນີ້​ຈະໃຫ້​ລາຍ​ລະ­ອຽດ​ໃນ​ຄໍ​ລຳ​ປະ­ຈຳ​ວັນ​ນີ້ ແລະ ແຖມດ້ວຍ​ເລື່ອງ​ຜູ້­ໂດຍ­ສານ​ຂີ້​ເມົາ​ອາ​ລະ​ວາດ​ຢູ່​ເທິງ​ຍົນ ສາຍ​ການ­ບິນ​ກອນ​ດໍ (Condor) ຂອງ​ເມັກ​ຊີ​ໂກ ເຖິງ​ຂັ້ນ​ຕ້ອງ​ໄດ້​ລົງ​ຈອດ​ສຸກ​ເສີນ ຂ່າວ​ນີ້​ມາ​ຈາກເຢຍ​ລະ​ມັນ.

ທີ່ ກຳ­ປູ­ເຈຍ: ຂ່າວ​ຮ້ອນ​ຂ່າວ​ໃຫຍ່​ຈາກ​ກຳ​ປູເຈຍ ທີ່​ພິມ​ລົງ​ໃນ​ໜັງ­ສື­ພິມ​ເດິ​ເນ​ເຊິນ ສະ­ບັບ​ວັນ​ທີ 21 ເດືອນ​ພະ­ຈິກ​ນີ້ ແມ່ນ​ກ່ຽວ​ກັບ​ທາງ​ການ​ກຳ​ປູເຈຍ ເຄື່ອນ​ໄຫວ​ເລີກ​ຮື້​ຂະ​ບວນ​ການ​ວ່າ​ຈ້າງ​ຢ່າງຜິດ​ກົດ­ໝາຍ​ໃຫ້​ແມ່­ຍິງ​ກຳ­ປູ­ເຈຍ​ຖື­ພາ​ມານ ຫຼື ອູ້ມບຸນ​ແທນ​ຄູ່​ຜົວ​ເມຍ​ຕ່າງ­ປະ­ເທດ​ທີ່​ຕ້ອງ­ການ​ລູກ.. ຕົວ​ການ​ກໍ່​ເຫດ​ເລື່ອງ​ນີ້​ໄດ້­ແກ່ນາງ ແທມ​ມີ ເດ​ວິດ​ຊາກ (Tammy Davis Charles) ອາ­ຍຸ 49 ປີ ຄົນ​ອົດ​ສະ​ຕຣາ​ລີ ຜູ້­ກ່ຽວ​ຖືກ​ເຈົ້າ​ໜ້າ­ທີ່​ຕຳຫຼວດ​ກຳ­ປູ­ເຈຍ​ຈັບ​ກຸມ​ພ້ອມໆ​ກັບ​ຜູ້​ຮ່ວມ​ມື​ຄົນ​ກຳ​ປູເຈຍ ອີກ​ສອງ​ຄົນ ໃນ​ວັນ​ທີ 18 ເດືອນ​ພະ­ຈິກ​ນີ້ ທີ່ນະ­ຄອນ­ຫຼວງ​ພະ­ນົມ​ເປັນ ນາງ ແທມ​ມີ ເຂົ້າ​ໄປ​ພັກອາ­ໄສ​ຢູ່​ກຳ­ປູ­ເຈຍ ຈາກ​ປະ­ເທດ​ໄທ​ໄດ້​ປີ​ປາຍ​ແລ້ວ ພາຍ­ຫຼັງ​ທາງ​ການ​ໄທ​ເປີດ​ບັ້ນ​ກວດ​ລ້າງ​ຂະ​ບວນການ​ອູ້ມ​ບຸນ ໃນ​ລັກ­ສະ­ນະ​ການ​ຄ້າ​ເມື່ອ​ຕົ້ນ​ປີ 2015 ຢູ່​ກຳ­ປູ­ເຈຍ ນາງ ແທມ​ມີ ໄດ້​ຕິດ­ຕໍ່​ແມ່­ຍິງ​ກຳ­ປູ­ເຈຍ ຈຳ­ນວນ 2-3 ຄົນ ໃຫ້​ຖື­ພາ​ມານ​ແທນ ບັນ­ດາ​ຄູ່ຜົວ​ເມຍ​ຢູ່​ປະ­ເທດ​ອົດ​ສະ​ຕຣາ​ລີ ໃນ​ນັ້ນ 9 ຄົນ ໄດ້ຕັ້ງ​ທ້ອງ​ແລ້ວ ຂ່າວ​ບອກ​ວ່າ ນາງ ແທມ​ມີ ແມ່​ຄ້າເດັກໃນ​ທ້ອງ ​ເກັບ​ຄ່າ​ເປັນ​ເງິນ 50 ພັນ​ໂດ​ລາ​ສະ­ຫະລັດ ຕໍ່​ເດັກ​ໜຶ່ງ​ຄົນ​ທີ່​ເກີດ​ມາ​ຈາກ​ຄູ່​ຜົວ​ເມຍ​ທີ່​ຕ້ອງການ​ລູກ ສ່ວນ​ແມ່­ຍິງກຳ­ປູ­ເຈຍ​ນັ້ນ ຈະ​ໄດ້​ຮັບ​ເງິນແຕ່ 10 ຫາ 12 ພັນ​ໂດ​ລາຕໍ່​ເດັກ­ນ້ອຍ​ໜຶ່ງ​ຄົນ​ທີ່ຄອດ​ອອກ​ມາ ໃນ​ເວ­ລາ​ເລື່ອງ​ນີ້​ຕົກ​ເປັນຂ່າວ​ຢູ່​ນັ້ນ ນາງ ແທມ​ມີ ຖືກ​ສົ່ງ​ໂຕ​ຂຶ້ນ​ສານ​ໃນ​ຄະ­ດີ​ຄ້າ​ມະ­ນຸດ ໂທດ​ນີ້​ເມື່ອ​ຕັດ­ສິນ​ວ່າ​ມີ​ຄວາມ​ຜິດ​ແທ້ ນາງ ແທມມີ ກໍ່ຈະ​ຖືກ​ຈຳ​ຄຸກ​ສູງ​ສຸດ​ສອງ​ປີ ໃນ​ຕົ້ນ​ເດືອນ​ພະຈິກ​ປີ​ນີ້ ທາງ​ການ​ກຳ­ປູ­ເຈຍ ໄດ້​ອອກ​ຄຳ​ສັ່ງ​ຫ້າມການ​ອູ້ມ​ບຸນ ແລະ ກຳ­ນົດການ​ກະ­ທຳ​ດັ່ງ­ກ່າວ ເປັນໂທດ​ຄະ­ດີ​ຄ້າ​ມະ­ນຸດ ທ່ານ​ລັດ­ຖະ­ມົນ­ຕີ​ກະ­ຊວງ​ສາທາ​ລະ­ນະ​ສຸກ ກຳ­ປູ­ເຈຍ ເປັນ​ຜູ້​ລົງ​ລາຍ​ເຊັນໃສ່​ຄຳສັ່ງ​ດັ່ງ­ກ່າວ ແນວ­ໃດ​ກໍ່​ດີ ຂ່າວ​ຍັງ​ບອກ​ຕື່ມ​ວ່າ ໃນ​ກຳ­ປູ­ເຈຍ​ມີ​ຕາງ­ໜ້າ​ເຄື່ອນ​ໄຫວ​ວ່າ​ຈ້າງ​ແມ່ຍິງ​ກຳ­ປູ­ເຈຍ​ອູ້ມ​ບຸນຢູ່​ປະ­ມານ 50 ຄົນ ຊຶ່ງ​ໃນ​ທີ່​ສຸດ ກໍ່​ຈະ​ຖືກ​ເລີກ​ຮື້​ຈາກ​ທາງ​ການ​ຂອງ​ປະ­ເທດ​ນີ້ ແນ່ນອນ​ເລື່ອງ​ນີ້​ຖື​ວ່າ​ເປັນ​ໄພ​ໃກ້​ຕົວ ເມື່ອກ່ອນ​ປະ­ເທດໄທ ເປັນ​ສູນ​ອູ້ມ​ບຸນ​ໃຫຍ່​ທີ່​ສຸດ ແຕ່​ດຽວ­ນີ້​ຖືກ​ປາບໜັກ ບັງ­ຄັບ​ໃຫ້​ບັນ­ດາ​ຕົວ​ການ​ຄ້າ​ມະ­ນຸດ​ດ້ວຍ​ຮູບການນີ້​ຕະ­ເຫຼີດ​ໄປ​ປະ­ເທດ​ໃກ້​ຄຽງ ເລື່ອງ​ນີ້​ລາວພວກ​ເຮົາ​ຕ້ອງ​ມີ​ວິ­ທີ​ປ້ອງ​ກັນ​ໄວ້​ລ່ວງ​ໜ້າ​ຈະ​ດີ​ກວ່າ​ແກ້.

ທີ່ ສ ເຢຍ​ລະ​ມັນ: ຂ່າວ DPA ຂອງ​ເຢຍ​ລະ​ມັນ ໃຫ້​ຊາບ​ໃນ​ວັນ​ທີ 10 ເດືອນ​ພະ­ຈິກ​ນີ້​ວ່າ ມີ​ເຫດຮ້າຍ​ເກີດ​ຂຶ້ນ​ກັບ​ສາຍການ­ບິນ​ຈາກ​ປະ­ເທດ​ເມັກ​ຊິໂກ ສູ່​ນະ­ຄອນ​ແຝຼງ​ເຝີດ ເຢຍ​ລະ​ມັນ ນັ້ນ​ກໍ່​ຄື​ ມີ​ຄົນໂດຍ­ສານ​ສັນ­ຊາດ​ອັງ­ກິດ ອາ­ຍຸ 34 ປີ ເມົາ​ໜັກ ແລ້ວ​ອາ​ລະ​ວາດ​ໃນ​ເຮືອ​ບິນ ຂີ້​ເມົາ​ຄົນ​ນີ້​ເລີ່ມ​ແກ້ໂສ້ງ​ເປືອຍ​ໂຕ ຕ່ອຍ​ຕີ​ພະ­ນັກ­ງານ​ຊາຍ​ປະ­ຈຳ​ເຄື່ອງບິນ ແລະ ຂູ່​ວ່າ​ຊິ​ຍ່ຽວ​ຫົດ​ເຄື່ອງ​ບິນ ຂົ່ມ­ຂູ່​ເດັກນ້ອຍ​ລູກ​ຜູ້­ໂດຍ­ສານ ​ອອກ​ຄຳ​ສັ່ງ​ໃຫ້​ພະ­ນັກ­ງານເອົາ​ເຫຼົ້າ​ມາ​ໃຫ້​ເຂົາ ເມື່ອ​ຖືກ​ປະ­ຕິ­ເສດ​ເຂົາ​ແຮງ​ອາລະ​ວາດ​ໃຫຍ່​ຈົນ​ຜູ້​ຂັບ​ເຮືອບິນ​ຕ້ອງ​ເອົາ​ຍົນ​ລົງຈອດ​ສຸກ​ເສີນ​ທີ່​ເດີ່ນ​ບິນ​ລັດ​ຝະ​ລໍ​ຣິ​ດາ ສ ອາ​ເມ​ຣິກາ ຊາຍ​ຂີ້​ເມົາ​ຖືກ​ຈັບ​ສົ່ງ​ຂຶ້ນ​ສານ ແລະ ​ມີ​ໂທດ​ຈຳຄຸກ​ສູງ​ສຸດ​ຊາວ​ປີ ທາງ​ບໍ­ລິ­ສັດ​ການ­ບິນ​ກອນ​ດໍ ໄດ້ຟ້ອງ​ໃຫ້​ເຂົາ​ຈ່າຍ​ຄ່າເສຍ​ຫາຍ​ຈາກ​ການ​ລົງ​ຈອດສຸກ​ເສີນ ໃນເຮືອ​ບິນ​ນີ້​ມີ​ຄົນ​ໂດຍ­ສານ 141 ຄົນ.

ຂ່າວທີ່ກ່ຽວຂ້ອງ