ຂ່າວຫຼ້າສຸດ

ເບິ່ງບ້ານເຂົາ ເອົາບົດຮຽນ - ໂດຍ: ວິເສດ ສະແຫວງສຶກສາ : ສປ ​ຈີນ ແອັດ​ສະປາຍ ສສ ຫວຽດ­ນາມ

411 04 ມ.ກ. 2017 ຫົວຂໍ້ຂ່າວອື່ນໆ

ພົບ​ກັນ​ໃນ​ບັນຍາກາດ​ປີ​ໃໝ່​ໄຊ​ງາມ​ແຫ່ງ​ປີ 2017 ນີ້ ມີ​ຂ່າວ​ໜ້າ​ສົນໃຈ​ມາ​ແລກປ່ຽນ​ກັບ​ເພື່ອນ​ຜູ້​ອ່ານ​ແຟນ​ຄໍ​ລຳ “ເບິ່ງ​ບ້ານ​ເຂົາ​ເອົາ​ບົດຮຽນ” ຄື: ຂ່າວ​ກ່ຽວ​ກັບ​ທາງ​ການ ສປ ​ຈີນ​ ວາງ​ແຜນ​ເຮັດ​ການປະຕິວັດ​ຫ້ອງ​ນ້ຳລັດຖະບານ ແອັດ​ສະປາຍ ກຳນົດ​ມາດ​ຕະການ​ປັບ​ຂຶ້ນ​ພາສີ ແລະ ເລື່ອງ ​ສສ ຫວຽດນາມ ​ເຮັດ​ການ​ສຳ​ຫຼວດ​ກ່ຽວ​ກັບ​ຄຸນະພາບ​ຂອງແພດ-​ໝໍ​ຢູ່​ລະດັບ​ທ້ອງຖິ່ນ.

ທີ່ ​ສປ ຈີນ: ຂ່າວ​ຕ່າງປະເທດ​ໃນ​ວັນ​ທີ 29 ເດືອນ​ທັນວາ ປີ​ທີ່​ຫາກໍ່​ຜ່ານ​ໄປ​ນີ້ ໃຫ້​ຮູ້​ວ່າ: ທາງການ ​ສປ ຈີນ ມີ​ແຜນ​ທຸ່ມງົບປະມານ​ລົງທຶນ​ພັດທະ​ນາ​ຫ້ອງ​ນ້ຳ ທັງ​ຢູ່​ພາຍ​ໃນ​ອາຄານ​ບ້ານ​ເຮືອນ ແລະ ຫ້ອງ​ນ້ຳ​ສາທາລະນະ ເພື່ອ​ກຳຈັດ​ຊື່​ສຽງ​ທີ່ບໍ່​ຄ່ອຍ​ດີ​ກ່ຽວ​ກັບ​ຫ້ອງ​ນ້ຳ ເປົ້າ​ໝາຍ​ທີ່​ເປັນ​ຈຸດ​ພັດທະ​ນາ​ນັ້ນ ກໍ່​ຄືຢູ່​ບັນດາ​ເຂດ​ແຄວ້ນ​ຕ່າງໆ ແລະ ວ່າການ​ລົງທຶນ​ຍົກລະດັບ​ຫ້ອງ​ນ້ຳ​ສູ່​ຄຸນະພາບ​ໃໝ່ ຈະ​ປະກອບສ່ວນ​ເຮັດ​ໃຫ້​ເສດຖະກິດ​ເຕີບ​ໃຫຍ່​ຂຶ້ນ ຈາກ​ຂະແໜງ​ການທ່ອງທ່ຽວ ທາງການ​ຈີນ​ເອງຮັບ​ຮູ້​ດີ​ວ່າ ຜ່ານ​ມາ​ລະດັບ​ຫ້ອງ​ນ້ຳ​ຢູ່ ​ສປ ຈີນ ຍັງບໍ່​ສົມ​ຄູ່​ກັບ​ເປົ້າ​ໝາຍ​ການ​ພັດທະນາ​ທ່ອງ​ທ່ຽວດ້ານ​ອື່ນໆ.

ສຳລັບ​ແຕ່​ປີ 2016 ເຖິງ​ປີ 2020 ເມັດ​ເງິນ​ທີ່ຈະ​ຖອກ​ເທ​ເຂົ້າ​ໃນ​ອຸດສາຫະກຳ​ທ່ອງ​ທ່ຽວ​ນັ້ນ​ມີເຖິງ 2 ພັນ​ຕື້​ຢວນ (ເທົ່າ​ກັບ 290 ຕື້​ໂດ​ລາ​ສະຫະລັດ) ເຊິ່ງ​ຄາດ​ວ່າ​ຈະ​ຊ່ວຍ​ເຮັດ​ໃຫ້ ຈີ​ດີ​ພີ ຕໍ່​ປີ ເພີ່ມຂຶ້ນ​ກວ່າ 14% ໂດຍ​ການ​ລົງທຶນ​ໂດຍ​ກົງ​ເຂົ້າ​ໃນອຸດສາຫະກຳ​ທ່ອງ​ທ່ຽວ ບັນດາ​ຕົວ​ເມືອງ​ອຸດ​ສາຫະ​ກຳ​ເກົ່າໆ​ທີ່​ກາງ​ຕໍ່​ຊັບພະຍາກອນ​ທຳ​ມະ​ຊາດ ໂດຍ​ສະເພາະແມ່ນໃນ​ເຂດ​ພາກ​ເໜືອ​ ຈະ​ໄດ້​ຮັບແຮງ​ກະ​ຕຸ້ນ​ໃຫ້​ພັດທະນາ​ການທ່ອງທ່ຽວ ໂດຍ​ລັດຖະ​ບານ​ຈະ​ໄດ້​ລົງທຶນ​ສ້າງ​ພື້ນຖານ​ຕົວແບບ​ການທ່ອງ​ທ່ຽວ​ກ່ອນ ໃນ​ປັດຈຸບັນ ບັນດາ​ຕົວ​ເມືອງ​ອຸດສາ​ຫະ​ກຳ​ທີ່​ໃຊ້​ພະລັງງານ​ຖ່ານ​ຫີນ​ ພວມ​ສຸມ​ໃສ່ຫັນ​ເໝືອງແຮ່​ເກົ່າ​ໃຫ້​ກາຍເປັນ​ສວນ​ສາ​ທາ​ລະນະ.

ທີ່ ແອັດ​ສະ​ປາຍ (ສະ​ເປນ): ໃນ​ຕົ້ນເດືອນ​ທັນວາ ປີ​ນີ້ ລັດຖະບານ​ແອັດ​ສະ​ປາຍ​ ໄດ້ວາງ​ນະໂຍບາຍ​ປັບ​ຂຶ້ນ​ພາສີ​ເພື່ອເພີ່ມ​ລາຍ​ຮັບ​ໃຫ້ໄດ້ 7,5 ຕື້ເອີ​ໂຣ (ປະມານ 7,9 ຕື້ໂດ​ລາ​ສະຫະລັດ) ເຊິ່ງ​ຈະ​ຊ່ວຍ​ໃຫ້​ຕົວ​ເລກ​ຂາດທຶນ​ງົບປະມານຂອງປະເທດ​ຫຼຸດ​ລົງ​ມາ​ຢູ່​ປະມານ 3,1% ພາຍ​ໃນປີ 2017 ຕາມ​ການ​ສະເໜີ​ຂອງ​ສະຫະພາບ​ເອີ​ຣົບ.

ໃນ​ປີ 2016 ຕົວ​ເລກ​ຂາດ​ດຸນ​ງົບປະມານ​ຂອງແອັດ​ສະ​ປາຍ ​ແມ່ນ 4,6% ຈຳນວນ​ລາຍ​ຮັບ 7,5 ຕື້​ເອີ​ໂຣ ທີ່​ຈະ​ບັນລຸ​ນັ້ນມີ​ພູດ​ລະອຽດ​ດັ່ງນີ້ ຄື: 4,3 ຕື້​ເອີ​ໂຣ ຈາກ​ການ​ເກັບ​ພາສີ​ອຸດສາຫະກຳ ແລະ ສ່ວນ​ເຫຼືອ​ນັ້ນ​ແມ່ນ​ພາສີ​ຢາສູບ ທາດເຫຼົ້າ ແລະ ເຄື່ອງດື່ມ​ປະເພດ​ນ້ຳຫວານ ນອກ​ນັ້ນກໍ່​ຍັງ​ຈະ​ມີ​ລາຍຮັບ​ຈາກ​ການ​ປັບ​ໃໝ​ການ​ກະທຳ​ຜິດ​ຕໍ່​ກົດໝາຍພາສີ.

ທີ່ ​ສສ ຫວຽດນາມ: ໜັງສືພິມ​ວຽງ​ຈັນ​ທາມ ສະບັບ​ວັນ​ທີ 15 ເດືອນ​ທັນວາ ປີ 2016 ໃຫ້​ຮູ້​ກ່ຽວກັບ​ຜົນ​ການ​ສຳ​ຫຼວດ​ຄຸນະພາບ​ຂອງ​ແພດ​ໝໍ​ໃນຂັ້ນ​ທ້ອງຖິ່ນ​ຫວຽດນາມ ​ວ່າ: ມີ​ພຽງ 3% ຂອງຈຳນວນ​ແພດ​ໝໍ​ທັງ​ໝົດ​ທີ່​ສາມາດ​ບົ່ງ​ພະຍາດ 5 ຊະນິດ​ຖືກຕ້ອງ​ຢ່າງ​ຄົບ​ຖ້ວນ ພະຍາດ 5 ຊະນິດທີ່​ມີ​ທົ່ວໆ​ໄປ​ນັ້ນ​ແມ່ນ ​ພະຍາດ​ຖອກທ້ອງ ປອດບວມ ປອດ​ແຫ້ງ ຄວາມດັນເລືອດ ແລະ ເບົາຫວານ ປະເພດ 2: ການ​ສຳ​ຫຼວດ​ຄັ້ງ​ນີ້​ແມ່ນ​ເພື່ອປັບປຸງ​ຄຸນະພາບ​ຂອງ​ແພດ​ໃນ​ຂັ້ນ​ທ້ອງຖິ່ນ​ໃຫ້​ສູງ​ຂຶ້ນ.

ຂ່າວທີ່ກ່ຽວຂ້ອງ