ຂ່າວຫຼ້າສຸດ

ເບິ່ງບ້ານເຂົາ ເອົາບົດຮຽນ - ໂດຍ: ວິເສດ ສະແຫວງສຶກສາ : ສປ ຈີນ ສ ເກົາ­ຫຼີ

410 30 ທ.ວ. 2016 ຫົວຂໍ້ຂ່າວອື່ນໆ

ມື້­ນີ້​ມີ​ເລື່ອງ​ກ່ຽວ​ກັບ​ກະ­ແສ​ຕ້ານ​ການ​ດູດ​ເອົາ​ບີ​ໝີ ​ມາ​ປຸງ​ແຕ່ງ​ເປັນ​ຢາ​ປົວ​ພະ­ຍາດ​ຢູ່ ສປ ຈີນ ແລະ ເລື່ອງ​ກ່ຽວ​ກັບ​ມາດຕະ­ການ​ຄວບ​ຄຸມ​ຄົນ​ໂດຍສານ​ທາງ​ອາ­ກາດ​ຢູ່ ສ ເກົາ­ຫຼີ.

ທີ່ ສປ ຈີນ: ເລີ່ມ​ແຕ່​ຕົ້ນ​ປີ​ນີ້​ໄດ້​ມີ​ຂ່າວ​ກ່ຽວ​ກັບການ­ເຄື່ອນ­ໄຫວ​ຂອງ​ມູນ​ນິ­ທິ​ຄົນ​ຮັກ​ສັດ​ຢູ່​ນະ­ຄອນຫຼວງ​ປັກ​ກິ່ງ ສປ ຈີນ ເພື່ອ​ນຳ­ໄປ​ສູ່​ການ​ເກືອດ​ຫ້າມດູດ​ເອົາ​ບີ​ໝີ​ເປັນໆ ​ມາ​ປຸງ​ແຕ່ງ​ຢາ​ປົວ​ພະ­ຍາດ​ຕາມ​ຕຳ­ລາ​ບູ­ຮານ ​ທີ່​ປະ­ຕິ­ບັດ​ກັນ​ມາ​ຫຼາຍ­ເຊັ່ນ­ຄົນ​ແລ້ວ ຂ່າວ​ບອກ​ວ່າ: ໃນ​ຕົ້ນ​ປີ​ນີ້​ທາງ​ມູນ​ນິ­ທິ​ຄົນ​ຮັກ​ສັດໄດ້​ເຮັດ​ການ​ສຳ​ຫຼວດໂດຍ​ຕັ້ງ​ຄຳ​ຖາມ​ຄົນ​ທົ່ວ​ໄປ ຈຳ­ນວນ 1.800 ຄົນ ກ່ຽວ​ກັບ​ການ​ດູດ​ເອົາ​ບີ​ໝີເປັນໆ​ມາ​ປຸງ​ເປັນ​ຢາ ແລະ ພົບ​ວ່າ​ຫຼາຍ​ກວ່າ 80% ຂອງ​ຜູ້​ຖືກ​ສຳ­ພາດ​ເຫັນ​ດີ​ໃຫ້​ເກືອດ​ຫ້າມ​ດູດເອົາ​ບີ​ໝີ​ຢ່າງ​ເດັດ­ຂາດ ເພາະ​ເປັນ​ການ​ທໍ­ລະ­ມານສັດ​ຢ່າງ​ໂຫດ­ຮ້າຍ​ປ່າ​ເຖື່ອນ.

ລາຍ​ລະ­ອຽດ​ກ່ຽວ​ກັບ​ຜົນ​ຂອງ​ການ​ສຳ​ຫຼວດ​ມີດັ່ງ­ນີ້: 97% ເຫັນ​ວ່າ​ ອຸດ­ສາ­ຫະ­ກຳ​ທີ່​ດູດ​ເອົາ​ບີ​ໝີມາ​ປຸງ​ເປັນ​ຢາ​ນັ້ນ​ໂຫດ​ຫ້ຽມ​ທີ່​ສຸດ 83,9% ສະໜັບ​ສະ​ໜູນ​ໃຫ້​ເກືອດ​ຫ້າມ​ການ​ກະ­ທຳ​ດັ່ງ­ກ່າວໂດຍ​ທັນ­ທີ​ທັນ­ໃດ​ໂລດ 70% ຂອງ​ຜູ້​ຖືກ​ສຳ­ພາດ ບອກ​ວ່າ: ພວກ​ຕົນ​ບໍ່​ເຄີຍ​ນຳ​ໃຊ້​ຜະ­ລິດ​ຕະ​ພັນ​ທີ່​ມີສ່ວນ​ຜະ­ສົມ​ຂອງ​ບີ​ໝີ​ຈັກ​ເທື່ອ​ເລີຍ ແລະ ໃຫ້​ຄຳໝັ້ນ​ສັນ­ຍາ​ ວ່າ​ຈະສືບ­ຕໍ່​ບໍ່​ຊື້​ຜະ­ລິດ​ຕະ​ພັນ​ຊະ­ນິດ​ນີ້ຢ່າງ​ເດັດ­ຂາດ​ໃນ​ອະ­ນາ­ຄົດ.

ກ່ອນ​ໜ້າ​ນັ້ນ ຮ້ານ​ຂາຍ​ຢາ​ປົວ​ພະ­ຍາດ​ຫຼາຍຮ້ອຍ​ແຫ່ງ​ໃນ​ຫຼາຍ​ຕົວ​ເມືອງ​ທົ່ວ ສປ ຈີນ ກໍ່​ໄດ້​ຮ່ວມພະ­ລັງ​ກັນ​ປະ­ຕິ­ເສດ​ບໍ່ຈຳ­ໜ່າຍ​ຢາ​ທຸກ​ຊະ­ນິດ​ທີ່​ມີສ່ວນ​ປະ­ສົມ​ບີ​ໝີ ຊາວ​ຈີນ​ມີ​ຄວາມ​ເຊື່ອ​ມາ​ແຕ່​ບູຮານ​ນະ​ການ​ກ່ຽວ​ກັບ​ຄຸນ­ຄ່າ​ທາງ​ຢາ​ຂອງ​ບີໝີ​ວ່າ ສາ­ມາດ​ປິ່ວ​ປົວ​ພະ­ຍາດ​ນາໆ​ຊະ­ນິດ ເປັນ​ຢາ​ໄລ່ເລືອດໄລ່​ລົມ ປົວ​ຟົກ​ຊ້ຳ ພະ­ຍາດ​ປອດ ຕັບ ແລະ ອື່ນໆ.

ໝີ​ທີ່​ລ້ຽງ​ໄວ້​ເພື່ອ​ດູດ​ເອົາ​ບີ​ນັ້ນ​ຖືກ​ຂັງ​ໄວ້​ຄອກແຄບໆເປັນ​ເວ­ລາ​ສິບໆ​ປີ ແລະ ໄດ້​ຮັບ​ຄວາມເຈັບ​ປວດ​ແສນ​ສາ­ຫັດ​ເວ­ລາຖືກ​ດູດ​ເອົາ​ບີ ຂະ​ບວນການ​ຕ້ານ​ການ​ດູດ​ເອົາ​ບີ​ໝີ​ມາ​ປຸງ​ຢາ​ນັ້ນ​ເລີ່ມ​ກໍ່​ໂຕ​ຂຶ້ນ​ແຮງ​ໃນ​ປີ 2012 ເມື່ອ​ບໍ­ລິ­ສັດ​ປຸງ​ແຕ່ງ​ຢາຟູ​ຈ້ຽນ (Fujian Guizhentang Pharmaceutical Company) ຂຶ້ນ​ແຜນ​ນຳ​ໃຊ້​ບີ​ໝີ​ເປັນ​ສ່ວນ​ປະສົມ​ຢາ​ຢ່າງ​ເປັນ​ທາງການ ເລີ່ມ​ແຕ່​ເວ­ລາ​ນັ້ນ​ເປັນຕົ້ນ​ມາ ບັນ­ດາ​ນັກ​ເຄື່ອນ​ໄຫວ​ເພື່ອ​ປົກ​ປ້ອງ​ສິດ­ທິຂອງ​ສັດ​ໄດ້​ຊຸກ­ຍູ້​ໃຫ້​ຄະ­ນະ​ກຳ­ມະ­ການກວດ­ກາຄວາມ​ໝັ້ນ­ຄົງ​ຈີນ ສະ­ກັດ​ກັ້ນ​ບໍ່​ໃຫ້​ບໍ­ລິ­ສັດ​ດັ່ງ­ກ່າວໄດ້​ຮັບ​ອະ­ນຸ­ຍາດ​ຈົດ​ທະ­ບຽນ ທາງ​ບໍ­ລິ­ສັດ​ປຸງ​ແຕ່ງຢາ​ປົວ​ພະ­ຍາດຟູ​ຈ້ຽນ ຕອບ​ໂຕ້​ຄືນ​ດ້ວຍ​ການ​ປະກາດ​ໃຫ້​ບັນ­ດາ​ຊ່ຽວ­ຊານ​ໄປ​ພິ­ສູດ​ເບິ່ງ​ສະ­ພາບຂອງ​ບີ​ໝີ​ທີ່​ລ້ຽງ​ໄວ້​ດູດ​ເອົາ​ນ້ຳ­ບີ ເພື່ອ​ຢືນ­ຢັນ​ວ່າ: ໝີ​ບໍ່​ໄດ້​ຖືກ​ກັກ​ຂັງ​ຢູ່​ສະ­ພາບ​ແອ​ອັດ ທາງ​ຝ່າຍ​ນັກເຄື່ອນ​ໄຫວ​ມີ​ຄຳ​ເຫັນ​ຕ້ານ​ຄືນ​ວ່າ: ມັນ​ເປັນ​ພຽງສາກລະ­ຄອນ​ສະ­ແດງ​ເພື່ອ​ຕົບ​ຕາ​ຊ່ຽວ­ຊານ​ຊື່ໆ ທີ່ບໍ່​ແມ່ນ​ຄວາມ​ຈິງ​ກ່ຽວ​ກັບ​ສະ­ພາບ​ການ​ເປັນ​ຢູ່​ຂອງໝີ​ເຫຼົ່າ­ນັ້ນ​ແທ້ໆ.

ທີ່ ສ ເກົາ­ຫຼີ: ແຕ່​ປີ​ກາຍ​ຮອດ​ປີ​ນີ້ ສາຍ​ການ­ບິນຂອງ​ຫຼາຍໆ​ປະ­ເທດ​ໄດ້​ພົບ​ກັບ​ບັນ­ຫາ​ຄົນ​ໂດຍ­ສານອາ​ລະ​ວາດ​ຢູ່​ໃນເຄື່ອງ​ບິນ ເຖິງ​ຂັ້ນ​ບາງ​ຖ້ຽວ​ບິນຕ້ອງ​ໄດ້​ລົງ​ຈອດ​ສຸກ​ເສີນ ການ​ປະ­ພຶດ​ແບບ​ອັນ​ຕະພານ​ຂອງ​ຜູ້­ໂດຍ­ສານ​ນັ້ນ ​ສ່ວນ​ຫຼາຍເກີດ​ຈາກ​ເຫດຜົນ​ບໍ່​ພໍ­ໃຈ​ສ່ວນ​ຕົວ ແລະ ສ່ວນ​ໜຶ່ງ​ແມ່ນ​ຈາກ​ອາການ​ເມົາ​ເຫຼົ້າ.

ຫວ່າງ​ມໍ່ໆມານີ້ ສາຍ​ການ­ບິນ ສ ເກົາ­ຫຼີ ທີ່​ບິນຈາກ​ຫວຽດ­ນາມ ໄປ​ສູ່ ສ ເກົາ­ຫຼີ ກໍ່​ປະ​ເຊີນ​ກັບເຫດ­ການ​ອາ​ລະ​ວາດ​ຂອງຜູ້­ໂດຍ­ສານ​ຂັ້ນ​ຮ້າຍແຮງ ແຕ່​ຂ່າວ​ບໍ່​ໄດ້​ໃຫ້​ລາຍ​ລະ­ອຽດ ຈາກ​ເຫດການ​ຄັ້ງ​ນີ້ ທາງ​ສາຍ​ການ­ບິນ​ຈະ​ເພີ່ມ​ມາດ​ຕະການຄວບ​ຄຸມ​ຜູ້­ໂດຍ­ສານ​ທີ່​ປະ­ພຶດ​ບໍ່​ເໝາະ​ສົມ ດ້ວຍ​ການ​ຊ໋ອດ​ໄຟ­ຟ້າ ເພື່ອ​ຢຸດ­ຕິ​ການ​ກະ­ທຳ​ວຸ້ນວາຍ ແລະ ເປັນ​ອັນ­ຕະ­ລາຍ​ດັ່ງ­ກ່າວ ນີ້​ຄື​ມາດ​ຕະການ​ທີ່​ມີ​ລັກ­ສະ­ນະ​ເດັດ­ຂາດ​ກວ່າ​ທີ່​ໃຊ້​ຢູ່​ໃນ​ສາຍການ­ບິນ​ອື່ນໆ​ທີ່​ເຄີຍ​ປະ­ຕິ­ບັດ​ມາ.

ຂ່າວທີ່ກ່ຽວຂ້ອງ