ເບິ່ງບ້ານເຂົາ ເອົາບົດຮຽນ - ໂດຍ: ວິເສດ ສະແຫວງສຶກສາ : ສສ ຫວຽດ­ນາມ ​ໄທ

458 28 ທ.ວ. 2016 ຫົວຂໍ້ຂ່າວອື່ນໆ

ມື້­ນີ້​ມີ​ສອງ​ຂ່າວ​ສຳ­ຄັນ​ຈາກ ​ຫວຽດ­ນາມ ຄື: ເລື່ອງ​ຜູ້­ນຳ​ຂອງ​ປະ­ເທດ​ນີ້​ ຮຽກ­ຮ້ອງ​ໃຫ້​ທົ່ວ​ສັງ­ຄົມ ຮ່ວມ​ມື​ກັນ​ຕ້ານ​ຢາ​ເສບ​ຕິດ ຕໍ່​ໃສ່​ເລື່ອງ​ການ​ຈັບກຸມ​ຜູ້​ລັກ­ລອບ​ນຳ​ເຂົ້າ­ໝາກ​ກະ­ໂພກ ແລະ ບັ້ງ­ໄຟດອກ ສຸດ​ທ້າຍ​ແມ່ນ​ເລື່ອງ​ແຜນ​ເພີ່ມ​ກຳ­ລັງ​ຕຳ ຫຼວດ​ຈະ­ລາ­ຈອນ ​ເພື່ອ​ຮັກ­ສາ​ຄວາມ​ປອດ​ໄພ​ໃນຍາມ​ບຸນ­ປີ­ໃໝ່​ສາ­ກົນ​ຢູ່ ​ໄທ.

ທີ່ ສສ ຫວຽດ­ນາມ: ແຫຼ່ງ​ຂ່າວ​ຈາກ Vietnam News ໃຫ້​ຮູ້​ໃນ​ວັນ​ທີ 26 ເດືອນ​ທັນ­ວາ​ນີ້​ວ່າ: ທ່ານ ຫງວ​ຽນ ​ຊວນ ​ຟຸກ ນາ­ຍົກ­ລັດ­ຖະ­ມົນ­ຕີ​ຫວຽດນາມ ໄດ້​ເປັນ​ປະ­ທານ​ກອງ​ປະ­ຊຸມ​ທາງ­ໄກ (Tele-conference) ກ່ຽວ​ກັບ​ບັນ­ຫາ​ຄວບ​ຄຸມ​ຢາເສບຕິດ ໂດຍ​ທ່ານ​ໄດ້​ຮຽກ­ຮ້ອງ​ໃຫ້​ທົ່ວ​ສັງ­ຄົມທົ່ວ​ລະບົບ​ການ­ເມືອງ ​ຮ່ວມ​ແຮງ​ຮ່ວມ​ໃຈ​ກັນ​ຕ້ານ​ອາ​ຊະຍາ​ກຳ​ທີ່​ເກີດຈາກ​ບັນ­ຫາ​ຢາ​ເສບ​ຕິດ ທີ່​ໄດ້​ສ້າງ​ບັນຫາ​ສັບ­ສົນ​ໃນ​ສັງ­ຄົມ ທ່ານ​ບອກ​ວ່າ: ອາ​ຊະ​ຍາ​ກຳທີ່​ພົວ­ພັນ​ກັບ​ຢາ​ເສບ​ຕິດ​ຍັງ​ບໍ່ທັນ​ຫຼຸດ­ຜ່ອນ​ລົງ​ເທື່ອ ທັງໆ​ທີ່​ມີ​ມາດ​ຕະ­ການ​ລົງ­ໂທດ​ຢ່າງ​ເດັດ­ຂາດ​ຕໍ່​ຜູ້ກະ­ທຳ​ຜິດ ສ່ວນ​ບັນ­ຫາ​ການ​ເສບ​ຢາ​ເສບ​ຕິດ​ໃນກຸ່ມ​ຊາວ​ໜຸ່ມ​ນັ້ນ​ມີ​ທ່າ​ອຽງ​ທີ່​ເພີ່ມ​ຂຶ້ນ ໂດຍ​ສະເພາະແມ່ນ​ໃນ​ບັນ­ດາ​ຕົວ​ເມືອງ​ໃຫຍ່ໆ ເຊັ່ນ: ນະຄອນ​ຫຼວງ​ຮາ​ໂນ້ຍ ນະ­ຄອນ​ໂຮ​ຈິ​ມິງ ບິງ​ເດືອງ ດົງ​ໄນ ແລະ ວຸ່ງ​ເຕົ່າ ເຊິ່ງ​ຖ້າ​ບໍ່​ມີ​ວິ­ທີ​ການ​ແກ້​ໄຂ​ທີ່ເດັດ­ຂາດ ແລະ ເຂັ້ມ­ແຂງ​ແລ້ວ ບັນ­ຫາ​ຢາ​ເສບຕິດ​ກໍ່​ຈະ​ເພີ່ມ​ຄວາມ​ເປັນ​ອັນ­ຕະ­ລາຍ​ຢ່າງ​ໜັກໜ່ວງ​ຂຶ້ນ​ຕື່ມ ທ່ານ​ນາ­ຍົກ​ເວົ້າ​ວ່າ: ຢາ​ເສບ​ຕິດຊະ­ນິດ​ໃໝ່ໆ​ນັ້ນ​ມີ​ທັງ​ຖືກ​ລັກ­ລອບ​ນຳ​ເຂົ້າ ແລະ ມີ​ທັງ​ທີ່​ຜະ­ລິດ​ເອົາ​ເອງ​ຢູ່​ກະ​ໂຕ​ນະ­ຄອນ­ຫຼວງ​ຮາ​ໂນ້ຍ.

ອີກ​ຂ່າວ​ໜຶ່ງ​ກ່ຽວ​ກັບ​ຫວຽດ­ນາມ ແມ່ນ​ເລື່ອງເຈົ້າ​ໜ້າ­ທີ່​ຕຳ­ຫຼວດ​ຈະ­ລາ­ຈອນ​ຢູ່​ແຂວງ​ເງ​ອານ ສາ­ມາດ​ຢຶດ​ບັ້ງ​ພຸ ແລະ ບັ້ງ­ໄຟ­ດອກ ໄດ້​ຈຳ­ນວນ 270 ກິ​ໂລ ແລະ ໝາກ​ກະ­ໂພກ​ອີກ 100 ກິ​ໂລ ວັດ­ຖຸ​ຈຳ­ນວນ​ນີ້​ຖືກ​ລັກ­ລອບ​ນຳ​ເຂົ້າ​ຈາກ​ຕ່າງ​ປະ ເທດ ກໍ­ລະ­ນີ​ທີ​ໜຶ່ງ​ເກີດ​ຂຶ້ນ​ຢູ່​ຕາມ​ເສັ້ນ­ທາງ​ຫຼວງແຫ່ງ​ຊາດ ເລກ 48 ຄື: ເຈົ້າ​ໜ້າ­ທີ່​ຕຳ­ຫຼວດ​ໄດ້​ຢຸດລົດ​ຕູ້ ແລະ ຄົ້ນ​ພົບ​ບັ້ງພຸ ແລະ ບັ້ງ­ໄຟ­ດອກ​ຊະ­ນິດຕ່າງໆ​ທີ່​ຜະ­ລິດ​ຢູ່ ສປ ຈີນ ແລະ ມີ​ນ້ຳ­ໜັກ​ປະມານ 270 ກິ​ໂລ ສ່ວນ​ກໍ­ລະ­ນີ​ທີ​ສອງ​ນັ້ນ ​ເກີດຂຶ້ນຢູ່​ເສັ້ນ­ທາງ​ຫຼວງ ເລກ 1 ເຂດ​ເມືອງ​ດຽນ​ເຈົ່າ ຕາແສງ​ດຽນ​ອານ ບ່ອນ​ທີ່​ເຈົ້າ​ໜ້າ­ທີ່​ຕຳ­ຫຼວດ​ໄດ້​ຢຶດໝາກ​ກະ­ໂພກ ໄດ້ປະ­ມານ 100 ກິ​ໂລ ທີ່​ເຊື່ອງ​ໄວ້ໃນ 3 ແກ໋ດ​ໃຫຍ່​ຢູ່​ລົດ​ຕູ້​ຄັນ​ໜຶ່ງ.

ທີ່ ປະ­ເທດ​ໄທ: ໜັງ­ສື­ພິມ​ ວຽງ​ຈັນ ​ທາມ (Vientiane Times) ສະ­ບັບ​ວັນ​ທີ 21 ເດືອນ​ທັນວາ​ນີ້ ໃຫ້​ຊາບ​ວ່າ: ທາງ​ການໄທ ​ມີ​ແຜນ​ຈັດ​ວາງກຳ­ລັງ​ຕຳ­ຫຼວດ​ກວ່າ 100.000 ຄົນ ເພື່ອ​ຮັກ­ສາຄວາມ​ປອດ​ໄພ​ໃນ​ໄລ­ຍະ​ປີ​ໃໝ່​ສາ­ກົນ ນັບ​ແຕ່​ວັນ​ທີ 31 ເດືອນ​ທັນ­ວາ​ປີ​ນີ້ ຫາ​ວັນ​ທີ 3 ມັງ­ກອນ ປີ 2017.

ເຈົ້າ​ໜ້າ­ທີ່​ຕຳ­ຫຼວດ​ຈະ​ສົມ­ທົບ​ກັບ​ທະ­ຫານ ແລະ ພະ­ນັກ­ງານ​ລັດ​ທີ່​ກ່ຽວ­ຂ້ອງ​ປະ­ຈຳ­ການ​ຕາມ​ປ້ອມ ແລະ ອອກ​ສາ­ລະ​ເວຕາມ​ບັນ­ດາ​ຈຸດ​ທີ່​ມີ​ຄວາມສ່ຽງ​ສູງ ນອກ­ຈາກ​ນັ້ນ ຍັງ​ໄດ້​ປຸກ­ລະ­ດົມ​ຂະ​ບວນການ​ຝາກ​ເຮືອນ​ໄວ້​ນຳ​ເຈົ້າ​ໜ້າ­ທີ່​ຕຳ­ຫຼວດ​ທາງ ການ​​ຍັງ​ໄດ້​ອອກ​ຄຳ​ສັ່ງ​ໃຫ້​ເຈົ້າ​ໜ້າ­ທີ່​ຮັກ­ສາຄວາມ​ປອດ​ໄພ​ຊ່ວຍ ແລະ ອຳ­ນວຍ​ຄວາມ​ສະດວກ​ໃຫ້​ຜູ້​ທີ່​ເດີນ­ທາງກັບ​ບັນ­ດາ​ແຂວງ ເພື່ອ​ສະຫຼອງ​ປີ​ໃໝ່ ພ້ອມ​ດຽວ​ກັນ​ກໍ່​ໃຫ້​ຕັ້ງ​ປ້ອມ​ກວດ­ກາ ແລະ ຢຸດ​ຜູ້​ດື່ມ​ເມົາ​ແລ້ວ​ຂັບຜູ້​ໃດ​ເມົາ​ແລ້ວຂັບ​ຂີ່ ຈະ​ຖືກ​ຢຶດ​ໃບ​ຂັບ​ຂີ່ ແລະ ຖືກ​ກັກ​ລົດ​ໄວ້​ຈົນ​ກວ່າແລ້ວ​ປີ​ໃໝ່​ຈຶ່ງ​ຈະ​ໄດ້​ລົດ​ຄືນ ເພື່ອ​ແກ້​ໄຂ​ເຫດ​ສຸກເສີນ​ຢ່າງ​ທັນການ​ໃນ​ໄລ­ຍະ​ປີ​ໃໝ່​ສາ­ກົນ​ນີ້ ທາງການ​ໄດ້​ຈັດ​ຕັ້ງ​ໜ່ວຍ​ປະ­ຕິ­ບັດ​ການ​ໄວ ສ່ວນ​ຜູ້ຈະ​ເດີນ­ທາງ​ໄປ​ຕ່າງ­ປະ­ເທດ​ໃນ​ໄລ­ຍະປີ​ໃໝ່​ນັ້ນ ​ກໍ່ຈະ​ຕ້ອງ​ໄດ້​ຜ່ານ​ຫຼາຍ​ຂັ້ນ​ຕອນ​ກວດ­ກາ​ຂຶ້ນ​ຕື່ມ.

ຂ່າວທີ່ກ່ຽວຂ້ອງ