ເບິ່ງບ້ານເຂົາ ເອົາບົດຮຽນ - ໂດຍ: ວິເສດ ສະແຫວງສຶກສາ : ສປ ຈີນ ກຳ​ປູເຈຍ ສສ ຫວຽດ­ນາມ

422 28 ທ.ວ. 2016 ຫົວຂໍ້ຂ່າວອື່ນໆ

ໃນ​ໄລ­ຍະ​ໃກ້ໆ​ປີ​ໃໝ່​ສາ­ກົນ​ນີ້ ມີ​ຂ່າວ​ກ່ຽວ​ກັບການ​ເຄັ່ງ​ລະ­ບຽບ​ກົດ­ໝາຍ​ຢູ່​ບາງ​ປະ­ເທດ​ ມາ­ສະເໜີ​ທ່ານ​ຜູ້​ອ່ານ ເຊັ່ນ: ການ​ຕັດ­ສິນ​ຈຳ​ຄຸກ​ອະ­ດີດປະ­ທານ​ມະ­ຫາ­ວິ­ທະ­ຍາ­ໄລ ຢູ່ ສປ ຈີນ ການ​ຈັບກຸມ​ຜູ້​ຄ້າ­ຂາຍ​ຊິ້ນ​ສ່ວນ​ສັດ­ປ່າ​ທີ່​ຫວງ​ຫ້າມ ຢູ່­ ກຳ​ປູເຈຍ ແລະ ການ​ລົງ­ໂທດ​ກຸ່ມ​ລັກ­ລອບ​ນຳ​ເຂົ້າ​ນ້ຳມັນ ຢູ່ ສສ ຫວຽດ­ນາມ.

ທີ່ ສປ ຈີນ: ຂ່າວ​ຈາກ​ໜັງ­ສື­ພິມ ຈາຍ​ນາ ເດລີ  (China Daily) ໃຫ້​ຮູ້​ໃນ​ວັນ​ທີ 22 ເດືອນ​ທັນ­ວານີ້​ວ່າ: ເວີນ ປິນ (Wen Pin) ອະ­ດີດ​ປະ­ທານ​ມະຫາ​ວິ­ທະ­ຍາ­ໄລ​ສຳ­ຄັນ​ແຫ່ງ​ໜຶ່ງ​ຢູ່​ແຂວງ​ຈຽງ​ຊີ (JiangXi) ຖືກ​ສານ​ຕັດ­ສິນ​ຈຳ​ຄຸກ​ເປັນ​ເວ­ລາ 12 ປີ ໃນ​ຄະ­ດີ​ຮັບ​ສິນ​ບົນ ນີ້​ແມ່ນ​ຜົນ​ການ​ຕັດ­ສິນ​ຄັ້ງ​ທີສອງ ສ່ວນ​ການ​ຕັດ­ສິນ​ຄັ້ງ​ທີ​ໜຶ່ງ​ໃນ​ເດືອນ​ທັນ­ວາ ປີ 2015 ນັ້ນ ເວິນ ປິນ ໄດ້​ຮັບ​ໂທດ​ຈຳ​ຄຸກ​ຕະ­ຫຼອດຊີ­ວິດ ຄະ­ດີ​ຮັບ​ສິນ​ບົນ​ຂອງ​ປະ­ທານ​ມະ­ຫາ​ວິ­ທະ­ຍາໄລ​ຄົນ​ນີ້​ມີ​ລັກ­ສະ­ນະ​ຕໍ່​ເນື່ອງ ເປັນຂັ້ນ​ຕອນ​ຄັກ­ແນ່ ສານ​ສູງ​ແຂວງ​ຈຽງ​ຊີ ຍັງ​ໄດ້​ຕັດ­ສິນ​ຢຶດ​ຊັບ​ສິນຂອງ​ຜູ້​ກະ­ທຳ​ຜິດ​ທີ່​ມີ​ມູນ​ຄ່າ 1 ລ້ານ​ຢວນ (ປະ­ມານ 143,874 ໂດ​ລາ​ສະ­ຫະ­ລັດ) ແລະ ເກັບ​ກູ້​ຄືນ​ສິນບົນ​ທີ່​ເຂົາ​ຮັບ ເຊິ່ງ​ເປັນ​ເງິນ​ຫຼາຍ​ສະ­ກຸນ ມີ​ມູນ​ຄ່າ 19,7 ລ້ານ​ຢວນ (ເທົ່າ​ກັບ 2,8 ລ້ານ​ໂດ​ລາ​ສະຫະ​ລັດ) ນອກ​ນັ້ນ ມີ​ບັດ​ຊື້​ສິນ­ຄ້າ​ໃນ​ມູນ​ຄ່າ 24.000 ຢວນ ໂມງ​ຍີ່­ຫໍ້ Cartier ລາ­ຄາ 38.600 ຢວນ.

ທີ່ ກຳ­ປູ­ເຈຍ: ອີງ​ຕາມ​ຂ່າວ​ຊິວ​ຮົວ​ຈາກ​ນະ­ຄອນຫຼວງ​ພະ­ນົມ​ເປນ ທາງ​ການ​ກຳ­ປູ­ເຈຍ ໄດ້​ເປີດ­ເຜີຍ​ລາຍ​ລະ­ອຽດ​ກ່ຽວ​ກັບ​ຈຳ­ນວນ​ງາ​ຊ້າງ ກະ­ດູກ​ສັດ­ປ່າ​ຊະ­ນິດ​ຕ່າງໆ ແລະ ເກັດ­ລິ່ນ ທີ່​ຢຶດໄດ້​ຢູ່​ທ່າ­ເຮືອ​ພະ­ນົມ​ເປນ ເຊິ່ງ​ລວມ​ມີ​ນ້ຳ­ໜັກ​ທັງໝົດ 1,58 ໂຕນ ສິນ­ຄ້າ​ຜິດ​ກົດ­ໝາຍ​ທີ່​ຢຶດ​ໄດ້​ມີ ງາຊ້າງ 640 ງາ ນ້ຳ­ໜັກ 1,36 ໂຕນ ກະ­ດູກ​ສັດ­ປ່າ 82 ກິ​ໂລ ເກັດ­ລິ່ນ 137 ກິ​ໂລ ແລະ ຫາງ​ຊ້າງແຫ້ງ 4,9 ກິ​ໂລ ເຄື່ອງ​ຜິດ​ກົດ­ໝາຍ​ເຫຼົ່າ​ນີ້​ຖືກ​ຊຸກເຊື່ອງ​ໄວ້​ໂກນ​ໄມ້​ທ່ອນ ບັນ­ທຸກ​ໄປ​ຈາກ​ປະ­ເທດ​ໂມຊຳ​ບິກ ຢູ່​ທະ­ວີບ​ອາ​ຟຣິ​ກາ ເຈົ້າ​ໜ້າ­ທີ່​ກ່ຽວ­ຂ້ອງຂອງ​ກຳ­ປູ­ເຈຍ ຮູ້​ຂ່າວ​ການ​ລັກ­ລອບ​ນຳ​ເຂົ້າ​ຊິ້ນສ່ວນ​ສັດ­ປ່າ​ຄັ້ງ​ນີ້​ນຳໜ່ວຍ​ງານ​ສືບ​ລັບ NGO ຂອງ​ຫ້ອງ­ການ​ປະ­ສານ​ງານ ອົງ­ການ​ພາ­ສີ​ສາ­ກົນ ໃນ​ປັດ­ຈຸ­ບັນ ທາງ​ການ​ກຳ­ປູ­ເຈຍ ກຳ­ລັງ​ສອບ ສວນ​ກ່ຽວ​ກັບ​ຈຸດ​ທີ່​ເປັນ​ເປົ້າ​ໝາຍ​ປາຍ­ທາງ​ຂອງສິນ­ຄ້າ​ຜິດ​ກົດ­ໝາຍ​ດັ່ງ­ກ່າວ ໃນ​ເດືອນ​ສິງ­ຫາ​ປີ​ນີ້ ເຈົ້າ​ໜ້າ­ທີ່​ກຳ­ປູ­ເຈຍ ປະ­ຈຳ​ທ່າ­ເຮືອ ສີ​ຫາ​ນຸ​ວິນ ກໍ່​ສາ­ມາດ​ຢຶດ​ງາ​ຊ້າງນ້ຳ­ໜັກ​ປະ­ມານ 613 ກິ​ໂລ ຈາກ​ອາ​ຟຣິ​ກາ ທີ່​ຊຸກ­ເຊື່ອງ​ໄວ້​ຕູ້​ບັນ­ຈຸ​ແກ່ນສາ­ລີ.

ທີ່ ສສ ຫວຽດ­ນາມ: ຂ່າວ​ຈາກ​ແຂວງ​ກວາງ​ນິນ ສສ ຫວຽດ­ນາມ ໃຫ້​ຮູ້​ຫວ່າງ​ບໍ່​ດົນ​ມາ​ນີ້​ວ່າ: ສານແຂວງ​ດັ່ງ­ກ່າວ​ໄດ້​ຮັບຟັງ​ການ​ໃຫ້­ການ​ຂອງ​ຜູ້ຮ່ວມ​ຫົວ​ໃນ​ຄະ­ດີ​ລັກ­ລອບ​ນຳ​ເຂົ້າ​ນ້ຳ­ມັນ​ເຖື່ອນ ຈຳ­ນວນ 7.700 ໂຕນ ຜູ້​ຕິດ​ແຮ້ວ​ຄະ­ດີ​ລວມ​ມີ 12 ຄົນ ໃນ​ນັ້ນ ມີ​ທັງ​ອະ­ດີດ​ອຳ­ນວຍ​ການ​ໃຫຍ່​ບໍ­ລິ­ສັດການ​ຄ້າ​ນ້ຳ­ມັນ ດົງ​ທັບ (Dong Thap) ອະ­ດີດອຳ­ນວຍ​ການ​ບໍ­ລິ­ສັດ​ຮ່ວມ​ຂົນ­ສົ່ງ​ພາກ​ຕາ­ເວັນອອກ ແລະ ອະ­ດີດ​ເຈົ້າ​ໜ້າ­ທີ່​ພາ­ສີ ຂະ​ບວນ​ການຕັດ­ສິນ​ຄະ­ດີ​ນີ້​ມີ​ຂຶ້ນ​ແຕ່​ເດືອນ​ມັງ­ກອນ​ປີ​ນີ້ ໂດຍ​ຫົວໂປ່​ສອງ​ຄົນ​ທີ່​ເອີ່ຍ​ຊື່​ໃນ​ເບື້ອງ​ຕົ້ນ​ນັ້ນ​ຖືກ​ຕັດ­ສິນຈຳ​ຄຸກ​ຜູ້​ລະ 19 ປີ ແລະ ຜູ້​ອື່ນໆ​ກໍ່​ໄດ້​ຮັບ​ໂທດ​ໜັກ-ເບົາ​ຕາມ​ລຳ­ດັບ ຄະ­ດີ​ນີ້​ເກີດ​ຂຶ້ນ​ລະ­ຫວ່າງ​ປີ 2011-2012 ໂດຍ​ພວກ​ກ່ຽວ​ໄດ້​ປອມ​ແປງ​ເອ­ກະສານ​ເພື່ອ​ລັກ­ລອບ​ນຳ​ເຂົ້າ​ນ້ຳ­ມັນ ແລະ ສົ່ງ​ອອກຂາຍ​ຕໍ່​ຕ່າງ­ປະ­ເທດ ​ເພື່ອ​ຊອກ​ກຳ­ໄລ​ເຂົ້າ­ຖົງ.

ຂ່າວທີ່ກ່ຽວຂ້ອງ