ເບິ່ງບ້ານເຂົາ ເອົາບົດຮຽນ - ໂດຍ: ວິເສດ ສະແຫວງສຶກສາ : ​ໄທ ສປ ຈີນ

459 22 ທ.ວ. 2016 ຫົວຂໍ້ຂ່າວອື່ນໆ

ຂ່າວ​ໃຫຍ່​ທີ່​ຢາກ​ໃຫ້​ບ້ານ​ເຮົາ​ເບິ່ງ​ໄວ້​ເປັນ​ບົດຮຽນ ມີ​ຢູ່​ສອງ​ເລື່ອງ ຄື: ໜຶ່ງ ເລື່ອງ​ທາງ​ການ​ໄທ ຮຽກ­ຮ້ອງ​ໃຫ້​ນັກ​ທ່ອງ​ທ່ຽວຕ່າງ­ປະ­ເທດ​ບໍ່​ໃຫ້​ຊື້​ສິນຄ້າ​ປອມ ແລະ ສອງ ແມ່ນ​ຂ່າວ​ທາງ​ການ​ແຂວງ ຢູ​ນານ ສປ ຈີນ ດຳ­ເນີນ​ການ​ກວດ​ສອບ​ເພື່ອ​ລົງວິໄນ​ພະ­ນັກ­ງານ​ທີ່​ລະ­ເມີດ​ລະ­ບຽບ​ການ​ຕ່າງໆ.

ທີ່ ປະ­ເທດ​ໄທ: ໜັງ­ສື­ພິມ ເດິ​ເນ​ເຊິນ (The Nation) ສະ­ບັບ​ວັນ​ທີ 19 ເດືອນ​ທັນ­ວາ​ນີ້ ໄດ້​ໃຫ້ຮູ້​ວ່າ: ກະ­ຊວງ​ການ​ຄ້າ​ໄທ​ໄດ້​ຂໍ​ຮ້ອງ​ໃຫ້​ບັນ­ດາ​ສະຖານ​ທູດ​ຕ່າງ­ປະ­ເທດ​ໃນ​ໄທ ​ໃຫ້​ຄວາມ​ຮ່ວມ​ມື​ໃນຂະ​ບວນ​ການ “ຢຸດ­ຕິ​ສິນ­ຄ້າ​ປອມ” ທີ່​ເນັ້ນ​ຊັກຊວນນັກ​ທ່ອງ​ທ່ຽວ​ບໍ່​ໃຫ້​ຊື້​ສິນ­ຄ້າ​ປອມ ທາງ​ກະ­ຊວງການ​ຄ້າ​ໄທ​ ໄດ້​ໝາຍ​ໝັ້ນ​ຄັ້ນ​ມື​ທີ່​ຈະ​ກວດ­ກາ​ຢ່າງເຄັ່ງ​ຄັດ​ ບັນ­ດາ​ຜູ້ຄ້າ​ສິນ­ຄ້າ​ປອມ ແລະ ຈະ​ສືບສາວ​ປະ­ຫວັດ​ການ​ເສຍ​ພາ­ສີ​ຂອງ​ພວກ​ເຂົາ­ເຈົ້າ.

ທ່ານ ທົດ​ສາ​ພອນ ແດນ​ສຸ​ພັດ ຫົວ­ໜ້າ​ກົມ​ຊັບສິນ​ທາງ​ປັນ­ຍາ ມີ​ຄຳ​ເຫັນ​ວ່າ: ໃນ​ໄລ­ຍະ​ປີ​ໃໝ່​ສາກົນ​ປີ​ນີ້ ທາງ​ກົມ​ຈະ​ປຸກ­ລະ­ດົມ​ນັກ​ທ່ອງ​ທ່ຽວ​ບໍ່​ໃຫ້ຊື້​ສິນ­ຄ້າ​ປອມ ທັງ​ນີ້ກໍ່​ເພື່ອ​ປ້ອງ​ກັນ​ບໍ່​ໃຫ້​ປະ­ເທດໄທ ​ເສຍ­ຊື່​ສຽງ​ຍ້ອນ​ມີ​ການ​ຄ້າ­ຂາຍ​ສິນ­ຄ້າດັ່ງ­ກ່າວ ທ່ານ​ກ່າວ​ຕື່ມ​ວ່າ: ທາງ​ກົມ​ຈະ​ຮ່ວມ​ມື​ກັບ​ບັນ­ດາສະ­ຖານ­ທູດ ເພື່ອ​ເຕືອນ​ນັກ​ທ່ອງ​ທ່ຽວ​ຈາກ​ແຕ່​ລະປະ­ເທດ​ກ່ຽວ­ຂ້ອງ​ບໍ່​ໃຫ້​ຊື້​ສິນ­ຄ້າ​ປອມ​ໃນ​ຂະ­ນະທ່ອງ​ທ່ຽວ​ຢູ່​ໄທ ເພາະ​ມັນ​ເປັນ​ການ​ກະ­ທຳ​ທີ່​ຜິດກົດ­ໝາຍ ນອກ­ຈາກ​ນັ້ນ ລັດ­ຖະ­ບານໄທ​ ຍັງ​ຈະ​ຕິດຕັ້ງ​ປ້າຍ​ປະ­ກາດ​ເຕືອນ​ຢູ່​ຕາມ​ສະ­ຖານ­ທີ່​ທ່ອງ​ທ່ຽວຕ່າງໆ ກໍ່​ຄືໃນ​ສະ­ຖານ­ທີ່​ສຳ­ຄັນ ເພື່ອ​ເຕືອນ​ບັນດາ​ລູກຄ້າ ແລະ ຊາວ​ຄ້າ­ຂາຍ​ບໍ່​ໃຫ້​ຊື້-ບໍ່​ໃຫ້​ຂາຍສິນ­ຄ້າ​ປອມ​ເດັດ­ຂາດ ປ້າຍ​ປະ­ກາດ​ເຕືອນ​ຈະ​ຕິດຕັ້ງ​ຕາມ​ສະ­ໜາມ​ບິນ ສະ­ຖາ­ນີ​ລົດ­ໄຟລົດ ​ໂດຍສານ​ສາ­ທາ­ລະ­ນະ​ທົ່ວ​ໄປ ຄຳ­ເຕືອນ​ຈະ​ຂຽນ​ເປັນພາ­ສາ​ໄທ ແລະ ພາ­ສາ​ອັງ­ກິດ ແລະ ໃນ​ບາງບ່ອນເປັນ​ພາ­ສາ​ຈີນ.

ທາງ​ກົມ​ຊັບ​ສິນ​ທາງ​ປັນ­ຍາ​ໄທ​ ໄດ້​ສົມ­ທົບ​ກັບກົມ​ເກັບ​ລາຍ​ຮັບ ເພື່ອ​ວາງ​ມາດ​ຕະ­ການ​ລົງ­ໂທດຜູ້​ຄ້າ​ສິນ­ຄ້າ​ປອມ ໂດຍທາງ​ກົມ​ສອບ​ສວນ​ບັນ­ດາບຸກ­ຄົນ​ທີ່​ມີ​ປະ­ຫວັດ​ລະ­ເມີດ​ລະ­ບຽບ​ການ​ເສຍ​ພາສີ ຖ້າ​ພົບ​ວ່າ​ມີ​ການ​ລະ­ເມີດ​ກົດ­ໝາຍ​ແທ້ ພວກເຂົາ​ກໍ່​ຈະ​ຖືກ​ລົງ­ໂທດ​ຢ່າງ​ໜັກ ເພື່ອ​ເຮັດ​ໃຫ້​ຂະບວນ​ການ​ຕ້ານ​ສິນ­ຄ້າ​ປອມ​ຂະ­ຫຍາຍ​ໄປ​ທົ່ວ​ຂອບເຂດ​ຂອງ​ປະ­ເທດ ທາງ​ກົມ​ຊັບ​ສິນ​ທາງ​ປັນ­ຍາ ​ໄດ້ສະ­ເໜີ​ໃຫ້​ພະ­ນັກ­ງານ​ຂະ­ແໜງ­ການ​ຄ້າ​ໃນ​ແຕ່​ລະ​ແຂວງ​ ຕິດ­ຕາມ​ຢ່າງ​ໃກ້­ຊິດ​ຂະບວນ​ການ​ຄ້າ­ຂາຍ ສິນ­ຄ້າ​ປອມ ນອກ­ຈາກ​ນັ້ນ ທາງ​ກົມ​ຍັງ​ຈະ​ໄດ້ຮ່ວມ​ພະ­ລັງ​ກັບ​ບັນ­ດາ​ເຈົ້າ​ຂອງ​ລິ​ຂະ​ສິດ​ສິນ­ຄ້າ ເຈົ້າ​ໜ້າ­ທີ່​ຕຳ­ຫຼວດ ແລະ ໜ່ວຍ​ງານ​ຄວາມ​ໝັ້ນຄົງ​ພາຍ​ໃນ ເພື່ອ​ກວດ­ກາ​ສະ­ຖານ­ທີ່​ມີ​ການ​ຄ້າຂາຍ​ສິນ­ຄ້າ​ປອມ ເຊັ່ນ: ຕະ­ຫຼາດ​ຂາຍ­ເຄື່ອງ​ເກົ່າ ແລະ ຂາຍ​ສິນ­ຄ້າ​ລາ­ຄາ​ຖືກ ນີ້​ເປັນ​ຄຳ­ເຕືອນ​ທີ່​ນັກທ່ອງ​ທ່ຽວ ກໍ່​ຄືຄົນ​ລາວ​ເຮົາ​ທີ່​ເດີນ­ທາງ​ໄປປະ­ເທດໄທ ​ຕ້ອງ​ໄດ້​ລະ­ມັດ­ລະ­ວັງ ແລະ ມີ​ສະ­ຕິ​ເວ­ລາ​ຈັບຈ່າຍ​ຊື້​ສິ່ງ​ຂອງ ເພື່ອ​ຫຼີກ​ເວັ້ນ​ສິນ­ຄ້າ​ປອມ ເຊິ່ງ​ຈະກາຍ­ເປັນເລື່ອງ​ຜິດ​ກົດ­ໝາຍ ພ້ອມ​ດຽວ​ກັນ ກໍ່​ຢ່າລັກ­ລອບ​ສິນ­ຄ້າ​ປອມ​ເຂົ້າ​ໄປ​ປະ­ເທດ​ໄທ​ ເດັດ­ຂາດ.

ທີ່ ສປ ຈີນ: ອີງ​ຕາມ​ແຫຼ່ງ​ຂ່າວ​ຈາກ​ຂ່າວ­ສານລາຍ​ວັນ​ຂອງ​ແຂວງ​ຢູ​ນານ ສປ ຈີນ (Yunnan Daily Press Group) ໜັງ­ສື­ພິມ ເດິ​ເນ​ເຊິນ (The Nation) ສະ­ບັບ​ວັນ​ທີ 16 ເດືອນ​ທັນ­ວາ​ນີ້ ໄດ້​ໃຫ້​ຮູ້​ວ່າ: ນັບ​ແຕ່​ເດືອນ​ມັງ­ກອນ ຫາ ເດືອນ​ຕຸລາ ປີ​ນີ້ ຫ້ອງ­ການ​ກວດ­ກາ​ວິ­ໄນ​ຂອງ​ແຂວງ​ຢູນານ ​ໄດ້​ສອບ​ສວນ​ກໍ­ລະ­ນີ​ລະ­ເມີດ​ວິ­ໄນ ຈຳ­ນວນ 318 ກໍ­ລະ­ນີ ທີ່​ພົວ­ພັນ​ກັບພະ­ນັກ­ງານ ຈຳ­ນວນ 411 ຄົນ ທີ່​ຝ່າ­ຝືນ​ລະ­ບຽບ​ການ​ຕ່າງໆ​ຂອງ​ລັດ​ຖະບານ​ກາງ ປະ­ເພດ​ການ​ກະ­ທຳ​ຜິດ​ ລວມ​ມີ: ການ ຈ່າຍ​ເງິນ​ນະ­ໂຍ­ບາຍ ການ​ສະ­ໜອງ​ດ້ານ​ວັດ­ຖຸ ແລະ ສະ­ຫວັດ­ດີ​ການ​ແບບ​ຜິດ​ກົດ­ໝາຍ ການຮັບ​ສິນ​ບົນ ແລະ ຂອງ­ຂວັນ ແລະ ການ​ເດີນ­ທາງທ່ອງ​ທ່ຽວ​ໂດຍ​ໃຊ້​ງົບ­ປະ­ມານ​ຂອງ​ລັດ.

ຂ່າວທີ່ກ່ຽວຂ້ອງ