ຂ່າວຫຼ້າສຸດ

ເບິ່ງບ້ານເຂົາ ເອົາບົດຮຽນ - ໂດຍ: ວິເສດ ສະແຫວງສຶກສາ : ​ອິນ​ໂດ​ເນ​ເຊຍ ສປ ຈີນ

414 21 ທ.ວ. 2016 ຫົວຂໍ້ຂ່າວອື່ນໆ

ພົບ​ກັນ​ວັນ​ນີ້ ມີ​ເລື່ອງ​ມາດ​ຕະ­ການ​ແກ້​ໄຂ​ບັນຫາ​ຄົນ​ຂໍ­ທານ​ຢູ່​ອິນ​ໂດ​ເນ​ເຊຍ ຕໍ່​ໃສ່​ເລື່ອງ​ທີ່​ໜ້າສົນ­ໃຈ​ໃນ ສປ ຈີນ ກ່ຽວກັບ​ຄວາມ​ພະ­ຍາ­ຍາມຂອງ​ຮ້ານ​ຂາຍ​ຢາ​ປົວ​ພະ­ຍາດ ​ໃນ​ການ​ຢຸດ­ຕິ​ການຂາຍ​ຢາ​ທີ່​ປຸງ​ດ້ວຍ​ບີ​ໝີ.

ທີ່ ອິນ​ໂດ​ເນ​ເຊຍ: ຂ່າວ​ນີ້​ເກີດ​ຂຶ້ນ​ແຕ່​ກາງ​ປີ 2015 ແຕ່​ເຫັນ​ວ່າ​ຄວນ​ເບິ່ງ​ໄວ້​ເປັນ​ບົດ­ຮຽນ ເພາະຢູ່​ບ້ານ​ເຮົາ ການ​ແກ້​ໄຂບັນ­ຫາ​ຄົນ​ຂໍ­ທານ​ກໍ່​ເປັນເລື່ອງ​ໜັກ​ໃຈ​ພໍ​ສົມ­ຄວນ ຢູ່​ອິນ​ໂດ​ເນ​ເຊຍ ຂ່າວບອກ​ວ່າ: ທາງ​ການ​ນະ­ຄອນ­ຫຼວງ​ຈາ​ກາ​ຕາ ໄດ້ຮ່ວມ​ມື​ກັບ​ກຳ­ລັງ​ຕຳ­ຫຼວດເພື່ອ​ກວດ​ລ້າງ​ຄົນ​ຂໍທານ ຄົນ​ຂ້າງ​ຖະ­ໜົນ ກໍ່​ຄືກຸ່ມ​ຄົນ​ທີ່​ຈັດ​ເຂົ້າ​ປະເພດ​ສ້າງ​ບັນ­ຫາ​ແກ່​ສັງ­ຄົມ ເຊິ່ງ​ຂຽນ​ໂຕ​ຫຍໍ້​ວ່າ PMKS.

ທາງ​ການ​ນະ­ຄອນ­ຫຼວງ​ຈາ​ກາ​ຕາ ແລະ ກອງບັນ­ຊາ​ການ​ຕຳ­ຫຼວດ ໄດ້​ເຊັນ​ບົດ​ບັນ­ທຶກ​ຄວາມເຂົ້າ­ໃຈ​ນຳ​ກັນ ກ່ຽວ​ກັບ​ການຮ່ວມ​ມື​ນີ້ ອິນ​ໂດ​ເນເຊຍ ມີ​ກົດ­ໝາຍ​ຕ້ານ​ການ​ຄ້າ​ມະ­ນຸດ ສະ­ບັບ​ເລກ ທີ 21/2007 ກົດ­ໝາຍ​ໄດ້​ກຳ­ນົດ​ໃຫ້​ເຈົ້າ​ໜ້າ­ທີ່​ຕຳ ຫຼວດ​ມີ​ສິດ​ສືບ­ສວນ-ສອບ​ສວນ​ກ່ຽວ​ກັບ​ການ​ກະທຳ​ທີ່​ເປັນ​ການ​ລະ­ເມີດ​ກົດ­ໝາຍ​ດັ່ງ­ກ່າວ.

ທ່ານ ມາ­ສະ​ໂຣ ຄານ (Masro Khan) ຫົວໜ້າ​ຫ້ອງ­ການ​ກິດ­ຈະ­ການ​ສັງ­ຄົມ​ຂອງ​ນະ­ຄອນຫຼວງ​ຈາ​ກາ​ຕາ ມີ​ຄຳ​ເຫັນ​ກ່ຽວກັບ​ເລື່ອງ​ນີ້​ວ່າ: ການ​ຮ່ວມ​ມື​ສອງ​ຝ່າຍ​ນີ້​ຈະ​ເພີ່ມ​ຂີດ​ຄວາມ​ສາມາດ​ໃຫ້​ແກ່​ຫ້ອງ­ການ​ໃນ​ການ​ຕິດ­ຕາມ​ກຸ່ມ​ຄົນ​ທີ່ເປັນ​ຫົວໂປ່​ຊັກ​ໄຍ​ຢູ່​ເບື້ອງ​ຫຼັງ ​ທີ່​ສັ່ງ​ຄົນ​ຂໍ­ທານ​ເຂົ້າໄປ​ນະ­ຄອນ­ຫຼວງ​ຈາ​ກາ​ຕາ ຄຳ​ເຫັນ​ຂອງ​ທ່ານ​ຫົວໜ້າ​ຫ້ອງ­ການ​ກິດ­ຈະ­ການສັງ­ຄົມ​ນີ້​ຊີ້​ໃຫ້​ເຫັນ​ວ່າ ກຸ່ມ​ຄົນ​ຂໍ­ທານ​ໃນ​ນະ­ຄອນ­ຫຼວງ​ຂອງ​ອິນ​ໂດ​ເນ​ເຊຍ​ນັ້ນ ​ໄດ້​ຖືກ​ບົ່ງ​ການ​ໂດຍ​ກຸ່ມ​ຄ້າ​ມະ­ນຸດ ດັ່ງ­ນັ້ນ ຈຶ່ງຈຳ­ເປັນ​ຕ້ອງ​ມີ​ກຳ­ລັງ​ຕຳ­ຫຼວດ​ເຂົ້າ​ມາ​ຊ່ວຍ ແລະ ມີ​ຄວາມ​ຈຳ­ເປັນ​ຕ້ອງ​ໄດ້​ກຳ­ນົດ​ໂທດ​ໜັກໆ​ສຳ­ລັບບັນ­ດາ​ຫົວ​ໂປ່ເຫຼົ່າ­ນັ້ນ.

ທີ່ ສປ ຈີນ: ເລີ່ມ​ແຕ່​ປີ 2013 ເປັນ­ຕົ້ນ​ມາ ຮ້ານ​ຂາຍ​ຢາ​ຈຳ­ນວນ​ຫຼວງ­ຫຼາຍ ​ໄດ້​ໂຮມ​ພະ­ລັງກັນ​ເປັນ​ໜຶ່ງ​ດຽວ ເພື່ອ​ຕ້ານການ​ກະ­ທຳ​ທີ່​ເປັນການ​ທາ­ລຸນ​ຕໍ່​ສັດ ໂດຍ​ສະ­ເພາະແມ່ນ​ການ​ດູດເອົາ​ບີ​ໝີ​ ມາ​ປຸງ​ເປັນ​ຢາ​ປົວ​ພະ­ຍາດ ຂ່າວ​ບອກ​ວ່າ: ໃນເບື້ອງ​ຕົ້ນ​ມີ​ຮ້ານ​ຂາຍ​ຢາ ຈຳ­ນວນ 150 ຮ້ານ ທີ່​ເມືອງ​ເຈິງ​ຕູ (Chengdu) ໄດ້​ພ້ອມ​ກັນ​ຢຸດ​ຈຳໜ່າຍ​ຢາ​ປົວ​ພະ­ຍາດ​ທຸກຊະ­ນິດ​ທີ່​ບັນ­ຈຸ​ຝຸ່ນ​ບີ​ໝີ ທັງ​ນີ້ກໍ່​ເພື່ອ​ເປັນ​ສັນ­ຍານ​ປຸກ­ລະ­ດົມ​ການ​ເຄື່ອນໄຫວ​ຂອງ​ບັນ­ດາ​ນັກ​ປົກ​ປ້ອງ​ສິດ­ທິ​ຂອງ​ສັດ ຕ້ານການ​ດູດ​ເອົາ​ບີ​ຈາກ​ໝີ​ເປັນໆ.

ກ່ອນ​ໜ້າ​ນັ້ນ ຄື: ໃນ​ປີ 2012 ຮ້ານ​ຂາຍ​ຢາຈຳ­ນວນ​ຫຼາຍ​ກວ່າ 100 ຮ້ານ ທີ່​ເມືອງ​ເຊິນ​ຢາງ (Shenyang) ເມືອງ​ຊູ​ໄຮ (Zhuhai) ແລະ ເມືອງ​ອື່ນໆ ​ຕ່າງກໍ່​ໃຫ້​ຄຳ​ໝັ້ນ​ສັນ­ຍາ​ຢ່າງ​ເດັດດ່ຽວ​ວ່າ ຈະ​ຢຸດ​ຈຳ­ໜ່າຍ​ຢາ​ປົວ​ພະ­ຍາດ​ທີ່​ໃຊ້​ບີ​ໝີ ເປັນສ່ວນ​ປະ­ສົມ ໃນ​ທີ່​ສຸດ​ຈຳ­ນວນ​ຮ້ານ​ຂາຍ​ຢາທີ່​ປະ­ຕິ­ເສດ​ການ­ຈຳ­ໜ່າຍ​ຢາ​ປະ­ສົມ​ບີ​ໝີ​ກໍ່​ເພີ່ມຂຶ້ນ​ເປັນ​ຈຳ­ນວນ​ຫຼາຍ​ກວ່າ 260 ຮ້ານ ນີ້​ແມ່ນ​ສະຖິ​ຕິ​ເມື່ອ 3 ປີ​ກ່ອນ​ໜ້າ​ນີ້ ຢູ່ ສປ ຈີນ ບີ​ໝີ​ໃຊ້​ເປັນສ່ວນ​ປະ­ກອບ​ຢາ­ພື້ນ­ເມືອງ​ຢ່າງ​ແຜ່​ຫຼາຍ ເພື່ອ​ປິ່ນ ປົວ​ອາ­ການ​ໄຂ້ພະ­ຍາດ​ຕັບ ຫົວ­ໃຈ ແລະ ອື່ນໆ ໝີ​ທີ່​ລ້ຽງ​ໄວ້​ເພື່ອ​ດູດ​ເອົາ​ບີ​ນັ້ນ​ຖືກ​ຂັງ​ໄວ້​ກົງ​ເຫຼັກນ້ອຍໆ​ເປັນ​ເວ­ລາ 10 ປີ.

ຂ່າວທີ່ກ່ຽວຂ້ອງ