ຂ່າວຫຼ້າສຸດ

ເບິ່ງບ້ານເຂົາ ເອົາບົດຮຽນ - ໂດຍ: ວິເສດ ສະແຫວງສຶກສາ : ສປ ຈີນ ອົດ​ສະ​ຕຣາ​ລີ ອິນ​ເດຍ

363 21 ທ.ວ. 2016 ຫົວຂໍ້ຂ່າວອື່ນໆ

ຄໍ​ລຳ​ປະ­ຈຳ​ວັນ​ນີ້ ມີ​ເລື່ອງ​ຮ້ອນໆ​ຈາກ​ນະ­ຄອນ­ຫຼວງ​ປັກ​ກິ່ງ ສປ ຈີນ ກ່ຽວ​ກັບ​ມາດ​ຕະ­ການ​ຈັດ­ການ​ກັບ​ໝອກ​ຄວັນ​ທີ່​ພວມ​ປົກ​ຄຸມ​ຢູ່​ທີ່​ນະ­ຄອນ­ຫຼວງ ຕໍ່​ໃສ່​ເລື່ອງ​ສານ ອົດ​ສະ​ຕຣາ​ລີ ຕັດ­ສິນ​ຈຳ​ຄຸກ 36 ປີ ໃນ​ໂທດ​ຄາດ​ຕະ​ກຳ ສຸດ​ທ້າຍ​ແມ່ນ​ຂ່າວ​ກ່ຽວ​ກັບ​ມາດ​ຕະ­ການ​ຈຳ­ກັດ​ການ​ຂາຍ​ເຫຼົ້າ​ຢູ່ອິນ​ເດຍ.

ທີ່ ສປ ຈີນ: ຂ່າວ​ຕ່າງ­ປະ­ເທດ ​ໃນ​ວັນ​ທີ 17 ເດືອນ​ທັນ­ວາ​ນີ້ ໃຫ້​ຊາບ​ວ່າ: ເປັນ​ຄັ້ງ​ທຳ​ອິດ​ໃນ​ປີ​ນີ້ ທີ່​ນະ­ຄອນ­ຫຼວງ​ປັກ​ກິ່ງ ໄດ້​ປະ­ກາດ​ແຈ້ງເຕືອນ​ໄພ​ສີ­ແດງ​ກ່ຽວ​ກັບ​ໝອກ​ຄວັນ​ມົນ​ລະ​ພິດທາງ​ອາ­ກາດ ​ທີ່​ເລີ່ມ​ມີ​ຂຶ້ນ​ໃນ​ອາ­ທິດ​ຜ່ານ​ມາ ແລະ ແກ່­ຍາວ​ເປັນ​ເວ­ລາ 5 ວັນ ນອກ­ຈາກ​ນະ­ຄອນຫຼວງ​ແລ້ວ ກໍ່​ຍັງ​ມີ​ອີກ 22 ຕົວ​ເມືອງ​ທາງ​ພາກເໜືອ​ຂອງ​ປະ­ເທດ ​ທີ່​ອອກ​ປະ­ກາດ​ແຈ້ງ​ເຕືອນ​ໃນລະ­ດັບ​ສູງ​ເຊັ່ນ​ກັນ ໄປ​ພ້ອມໆ​ກັບ​ຄຳ­ເຕືອນ ທາງການ​ນະ­ຄອນ­ຫຼວງ ແລະ ບັນ­ດາ​ຕົວ​ເມືອງ​ທີ່​ມີ​ບັນຫາ​ໝອກ​ຄວັນ​ ຍັງ​ໄດ້​ນຳ​ໃຊ້​ມາດ​ຕະ­ການ​ອັນ​ຈຳເປັນ​ສຳ­ລັບ​ການ​ແລ່ນ​ລົດ​ສ່ວນ​ຕົວ ຄື: ໃຫ້​ບາ​ມື້ແລ່ນ​ຕາມ​ເລກ​ທະ­ບຽນ​ລົດ (ຄູ່-ຄີກ) ປະ­ກາດ​ຢຸດການ­ເຄື່ອນ­ໄຫວ​ຜະ­ລິດ​ຂອງ​ໂຮງ­ງານ​ອຸດ​ສາ​ຫະກຳ ສະ­ກັດ​ກັ້ນ​ການ​ປິວ​ກະ­ຈາຍ​ຂອງຄວັນ​ຝຸ່ນ ຢຸດການ​ກໍ່­ສ້າງ ແລະ ຮຽກ­ຮ້ອງ​ໃຫ້​ທຸກ​ຄົນ​ຢູ່​ພາຍ​ໃນເຮືອນ ນອກ​ນັ້ນ ຍັງ​ໄດ້​ກຳ­ນົດ​ໂທດ​ໜັກ​ສຳ­ລັບ​ຜູ້ລະ­ເມີດລະ­ບຽບ​ການ​ປົກ​ປັກ​ຮັກ­ສາ​ສິ່ງ​ແວດລ້ອມ.

ທີ່ ອົດ​ສະ​ຕຣາ​ລີ: ຫວ່າງ​ມໍ່ໆມານີ້ ມີ​ຂ່າວ​ເດັ່ນດັງ​ມາ​ຈາກ​ປະ­ເທດ​ອົດ​ສະ​ຕຣາ​ລີ ກ່ຽວ​ກັບ​ການຕັດ­ສິນ​ຈຳ​ຄຸກ 36 ປີ ໃນຄະ­ດີ​ຄາດ​ຕະ​ກຳ ​ທີ່​ເກີດຂຶ້ນແຕ່​ປີ 2014 ທີ່​ລັດ​ນິວ​ຊາວ​ເວວ ອົດ​ສະ​ຕຣາລີ ຜູ້​ຕ້ອງ​ໂທດ​ຊື່­ວ່າ​ ນາງ ວິ​ເກນ ເຮນ ອາ­ຍຸ 49 ປີ ເລື່ອງ​ມີ​ຢູ່​ວ່າ ນາງ ມິ​ເກນ ເຮນ ຄາດ​ຕະ​ກອນ​ໂຫດຄົນ​ນີ້​ ໄດ້​ເຂົ້າ​ເຮັດ​ວຽກ​ເປັນ​ແພດ​ປະ­ຈຳ​ເຮືອນ​ພັກຄົນ​ຊະ­ລາ​ແຫ່ງໜຶ່ງ ທີ່​ລັດ​ນິວ​ຊາວ​ເວວ ພາຍ­ຫຼັງທີ່​ໄດ້​ອອກ​ຈາກ​ວຽກ​ປະ­ເພດ​ດຽວ​ກັນ​ນີ້ ຢູ່​ລັດ​ວິ​ໂຕເຣຍ ຍ້ອນ​ມີ​ຜູ້​ຂັດ­ຂ້ອງ​ຕໍ່​ການ​ປະ­ພຶດຂອງ​ນາງ ຢູ່ເຮືອນ​ພັກ​ຄົນ​ເຖົ້າ​ບ່ອນ­ເກີດ​ເຫດ​ຮ້າຍ​ນີ້ ນາງ ມິເກນ ເຮນ ຮັບ­ຜິດ­ຊອບ​ບົວ­ລະ­ບັດ​ເບິ່ງ­ແຍງ​ແມ່­ເຖົ້າສອງ​ຄົນ ຊື່ ມາ​ຣີ ດາ​ຣັບ ອາ­ຍຸ 82 ປີ ແລະ ອິ​ສາແບວ ສະ​ເປັນ​ເຊີ ອາ­ຍຸ 77 ປີ ຢູ່​ມາ​ມື້­ໜຶ່ງ​ເກີດ​ມີປາກ​ສຽງ​ລະ­ຫວ່າງ​ແມ່­ເຖົ້າ​ສອງ​ຄົນ​ກັບ​ນາງ ມິ​ເກນ ຍ້ອນ​ຜູ້­ກ່ຽວ​ປະ­ພຶດ​ຕົວ​ບໍ່​ດີ ແມ່ ມາ​ຣີ ດາຣັບ ຈົ່ມ ແລະ ດ່າ​ວ່າ ນາງ ມິ​ເກນ ທີ່​ບໍ່​ເອົາ​ຄີມ​ທາຕຸ່ມ​ຄັນ​ມາ​ໃຫ້ ສ່ວນ​ແມ່­ເຖົ້າ ອີ​ຊາ​ແບວ ສະ​ເປັນເຊີ ນັ້ນ​ຈົ່ມ​ວ່າ ນາງ​ແພດ​ຄົນ​ນີ້​ບໍ່​ພາ­ເຂົ້າ​ຫ້ອງ​ນ້ຳ ຕໍ່​ຄຳ​ຈົ່ມ​ວ່າ​ດັ່ງ­ກ່າວ ນາງ​ແພດ ມິເກນ ໄດ້​ໃຊ້​ເຂັມສີດ​ຢາ​ພິດ​ຂ້າ​ແມ່­ເຖົ້າ​ທັງ​ສອງ​ເຖິງ​ແກ່​ຊີ­ວິດ ສານລັດນິວ​ຊາວ​ເວວ ເອີ້ນ​ການ​ຄາດ​ຕະ​ກຳ​ຄັ້ງ​ນີ້​ວ່າ ໂຫດ­ຮ້າຍ ແລະ ມີ​ການ​ວາງ​ແຜນ​ໄວ້​ລ່ວງ​ໜ້າ​ຢ່າງຄັກ­ແນ່ ຂ່າວ​ຄາດ​ຕະ​ກຳ​ໂຫດ​ຄັ້ງ​ນີ້​ເກີດ​ຂຶ້ນ​ພາຍຫຼັງ​ມີ​ການ​ຄາດ​ຕະ​ກຳ​ຄົນເຖົ້າ​ອີກ​ສອງ ຄົນ​ຢູ່​ເຮືອນ​ພັກ​ຜູ້​ເຖົ້າ​ແຫ່ງ​ອື່ນ​ໃນ​ລັດ​ດຽວ​ກັນ​ນີ້ ເຊິ່ງ​ຜູ້​ກໍ່​ເຫດໄດ້​ຖືກ​ຕັດ­ສິນ​ໂທດ​ຈຳ​ຄຸກ​ໄປ​ແລ້ວ 40 ປີ.

ທີ່ ອິນ​ເດຍ: ຂ່າວ​ຕ່າງ­ປະ­ເທດ ​ໃນ​ວັນ​ທີ 19 ເດືອນ​ທັນ­ວາ​ນີ້ ໃຫ້​ຮູ້​ວ່າ: ສານ​ສູງ​ອິນ​ເດຍ ​ໄດ້​ອອກຄຳ​ສັ່ງ​ໃຫ້​ເຈົ້າ​ໜ້າ­ທີ່ກ່ຽວ­ຂ້ອງ​ຢຸດ​ການ​ອອກ​ໃບ​ອະນຸ​ຍາດ​ຂາຍ­ເຄື່ອງ​ດື່ມ​ປະ­ເພດ​ມຶນ­ເມົາ ​ເລາະ​ລຽບຕາມ​ເສັ້ນ­ທາງ​ຫຼວງ ສຳ­ລັບ​ບັນ­ດາ​ຮ້ານທີ່​ໄດ້​ຮັບອະ­ນຸ­ຍາດ​ແລ້ວ​ກໍ່​ໃຫ້​ຢຸດ ແລະ ປິດ​ຮ້ານ​ພາຍ​ໃນຕົ້ນ​ປີ­ໜ້າ ຕໍ່​ໄປ​ຮ້ານ​ທີ່​ຈະ​ມີ​ສິດ​ຈຳ­ໜ່າຍ​ເຄື່ອງ​ດື່ມປະ­ເພດ​ເຫຼົ້າໄດ້​ ຕ້ອງ​ຕັ້ງ​ຫ່າງ​ຈາກ​ແຄມ​ທາງ​ຫຼວງ 500 ແມັດ ມາດ​ຕະ­ການ​ນີ້​ມີ​ເປົ້າ​ໝາຍ​ຫຼຸດ­ຜ່ອນອຸ­ບັດ​ຕິ​ເຫດ​ຍ້ອນ​ເມົາ​ແລ້ວ​ຂັບ.

ຂ່າວທີ່ກ່ຽວຂ້ອງ