ຂ່າວຫຼ້າສຸດ

ເບິ່ງບ້ານເຂົາ ເອົາບົດຮຽນ - ໂດຍ: ວິເສດ ສະແຫວງສຶກສາ : ມາ​ເລ​ເຊຍ ອົດ​ສະຕຣາ​ລີ ອິນ​ໂດ​ເນ​ເຊຍ

405 16 ທ.ວ. 2016 ຫົວຂໍ້ຂ່າວອື່ນໆ

ຄໍ​ລຳ​ປະ­ຈຳ​ວັນ​ນີ້​ຈະ​ພາ​ທ່ານ​ຜູ້​ອ່ານ​ໄປ​ຮູ້­ຈັກ​ກັບມາດ​ຕະ­ການ​ຂອງ​ທາງ​ການ​ມາ​ເລ​ເຊຍ ໃນ​ການປົກ​ປ້ອງ​ສະ­ກຸນ​ເງິນແຫ່ງ​ຊາດ ຕໍ່​ໃສ່​ເລື່ອງ ອົດ​ສະຕຣາ​ລີ ເຄັ່ງ​ສະ­ໜາມ­ຮົບ​ຕ້ານ​ການ​ກໍ່​ການ​ຮ້າຍ ແລະ ປິດ​ທ້າຍ​ກັບ​ເລື່ອງ ອິນ​ໂດ​ເນ​ເຊຍ ອອກ​ກົດໝາຍ​ອະ­ນຸ​ຮັກ​ປ່າ­ໄມ້.

ທີ່ ມາ​ເລ​ເຊຍ: ຂ່າວ​ຕ່າງ­ປະ­ເທດ ​ໃນ​ວັນ​ທີ 6 ເດືອນ​ທັນ­ວາປີ​ນີ້ ໃຫ້​ຮູ້​ວ່າ: ທະ­ນາ­ຄານ​ກາງ­ຂອງມາ​ເລ​ເຊຍ​ ໄດ້​ປະ­ກາດມາດ​ຕະ­ການ​ເພີ່ມ​ການ​ນຳໃຊ້​ສະ­ກຸນ​ເງິນ​ແຫ່ງ​ຊາດ (ຣິງ​ກິດ-Ringgit)  ແລະ ຫຼຸດ​ຄວາມ​ສ່ຽງ​ຂອງ​ຣິງ​ກິດ​ໃນ​ການ​ແລກ­ປ່ຽນ​ກັບເງິນ​ໂດ​ລາ​ສະ­ຫະ­ລັດ ພາຍ​ໃຕ້​ມາດ​ຕະ­ການ​ໃໝ່​ນີ້ ບັນ­ດາ​ຜູ້​ປະ­ກອບ​ການ​ສົ່ງ​ອອກ​ທັງ​ໝົດ​ຕ້ອງ​ຫັນລາຍ​ຮັບ ຈຳ­ນວນ 75% ຂອງ​ລາຍ​ຮັບ​ທັງ​ໝົດ ຈາກ​ການ​ສົ່ງ​ອອກ​ເປັນ​ສະ­ກຸນ​ເງິນ​ຣິງ​ກິດ ນັບ​ແຕ່ວັນ​ທີ 5 ເດືອນ​ພະ­ຈິກ ປີ 2017.

ໃນ​ປັດ­ຈຸ­ບັນ ບັນ­ດາ​ຜູ້​ສົ່ງ​ອອກ​ຕ້ອງ​ໄດ້​ໂອນ​ເງິນລາຍ​ຮັບ​ເຂົ້າ​ປະ­ເທດ (ມາ​ເລ​ເຊຍ) ພາຍ​ໃນ 3 ເດືອນ ພາຍ­ຫຼັງ​ສຳ­ເລັດທຸ­ລະ​ກຳ​ທັງ​ໝົດ ໂດຍ​ອະນຸ​ຍາດ​ໃຫ້​ໂອນ​ເປັນ​ເງິນ­ຕາ​ຕ່າງ­ປະ­ເທດ​ໄດ້ ສະ­ນັ້ນ ບັນ­ດາ​ຜູ້​ສົ່ງ​ອອກ​ສ່ວນ​ໃຫຍ່​ຈຶ່ງ​ມັກ​ຈະຮັກ­ສາ​ສະກຸນ​ເງິນ​ໂດ​ລາ​ໄວ້​ທະ­ນາ­ຄານ ຍ້ອນ​ວ່າ​ເງິນ​ໂດ​ລາ ຈະ​ເພີ່ມ​ຄ່າ​ຂຶ້ນ​ໃນ​ໄລ­ຍະ​ຍາວ ແຕ່​ພັດ​ເຮັດ​ໃຫ້​ຄ່າເງິນ​ຣິງກິດ​ອ່ອນ​ລົງ ໃນ​ອັດ­ຕາ 3,72% ນັບ​ແຕ່​ປີ 2015 ເປັນ­ຕົ້ນ​ມາ.

ນອກ­ຈາກ​ຂໍ້​ກຳ­ນົດ​ໃຫ້​ຫັນ​ລາຍ​ຮັບ​ຈາກ​ການສົ່ງ​ອອກ​ເປັນ​ສະ­ກຸນ​ເງິນ​ຣິງ​ກິດ​ແລ້ວ ທະ­ນາ­ຄານມາ​ເລ​ເຊຍ​ ຍັງ​ໄດ້​ຈຳ­ກັດຈຳ­ນວນ​ເງິນ­ຕາ​ຕ່າງ​ປະເທດ​ທີ່​ອະ­ນຸ­ຍາດ​ໃຫ້​ບັນ­ດາ​ບໍ­ລິ­ສັດ​ສ່ວນ​ບຸກ­ຄົນນຳ​ໃຊ້​ ເພື່ອ​ການ​ລົງ­ທຶນ​ຢູ່​ພາຍ​ໃນ ແລະ ຢູ່​ຕ່າງປະເທດ ຄື: ໃນ​ມູນ​ຄ່າ 50 ລ້ານ​ຣິງ​ກິດ ສຳ­ລັບ​ການຈັດ​ຕັ້ງ ແລະ 1 ລ້ານ​ຣິງ​ກິດ ສຳ­ລັບ​ການ​ລົງ­ທຶນຂອງ​ສ່ວນ​ບຸກ­ຄົນ (1 ໂດ​ລາ​ສະ­ຫະ­ລັດ ແລກ​ໄດ້ 3,16 ຣິງ​ກິດ ອັດ­ຕາ​ແລກ­ປ່ຽນ​ປີ 2012).

ທີ່ ອົດ​ສະ​ຕຣາ​ລີ: ຕາມ​ຂ່າວ​ໜັງ­ສື­ພິມ ເດິ​ ເນເຊິນ (The Nation) ປະ­ຈຳ​ວັນ​ທີ 2 ເດືອນ​ທັນ­ວານີ້ ພວກ​ເຮົາ​ຮູ້​ວ່າ​ທາງການ​ອົດ​ສະ​ຕຣາ​ລີ ​ໄດ້​ຮັບຮອງ​ເອົາ​ມາດ​ຕະ­ການ​ທາງ​ກົດ­ໝາຍ ເພື່ອ​ເພີ່ມຄວາມ​ເຂັ້ມ­ແຂງ ແລະ ເດັດ­ຂາດ​ໃນ​ການ​ລົງ­ໂທດຜູ້​ກໍ່​ການ​ຮ້າຍ​ທີ່​ມີ​ຄວາມ​ເປັນ​ອັນ­ຕະ­ລາຍ​ສູງ ມາດຕະ­ການ​ດັ່ງ­ກ່າວ​ແມ່ນ​ທ່ານ​ນາ­ຍົກ­ລັດ­ຖະ­ມົນ­ຕີ​ອົດສະ​ຕຣາ​ລີ​ເປັນ​ເຈົ້າ​ການ​ສະ­ເໜີ​ອອກ​ແຕ່​ເດືອນ​ກໍລະ​ກົດ​ຜ່ານ​ມາ.

ທ່ານ ໄມ​ເຄິນ ຄີ​ແນນ (Michael Keenan) ລັດ­ຖະ­ມົນ­ຕີ​ກະ­ຊວງ​ຍຸ­ຕິ​ທຳ​ອົດ​ສະ​ຕຣາ​ລີ ມີ​ຄຳເຫັນ​ກ່ຽວ​ກັບ​ເລື່ອງ​ນີ້​ວ່າ: ມາດ​ຕະ­ການ​ທາງ​ກົດໝາຍ​ນີ້ ​ຈະ​ຊ່ວຍ​ເພີ່ມ​ຂີດ​ຄວາມ​ສາ­ມາດ​ຂອງ​ບັນດາ​ໜ່ວຍ​ງານ​ຮັກ­ສາ​ຄວາມ​ໝັ້ນ­ຄົງ​ ໃນ​ການ​ສືບ­ຕໍ່ຄຸມ​ຂັງ​ຜູ້​ທີ່​ມີ​ຄວາມ​ຜິດ​ໃນ​ການ​ກໍ່​ການ​ຮ້າຍ​ທີ່​ຮ້າຍແຮງ ອົດ​ສະ​ຕຣາ​ລີ ຈະ​ບໍ່​ອະ­ນຸ­ຍາດ​ໃຫ້​ຜູ້​ກະ­ທຳຜິດ​ໜ້າ​ໃດ​ລອດ​ພົ້ນປາກ​ຄຸກ​ອອກ​ໄປ​ເພື່ອ​ອາ​ລະວາດ​ ສ້າງ​ຄວາມ​ເສຍ​ຫາຍ​ແກ່​ເພື່ອນ​ຮ່ວມ​ຊາດ.

ທີ່ ອິນ​ໂດ​ເນ​ເຊຍ: ໃນ​ຕົ້ນ​ເດືອນ​ທັນ­ວາ​ນີ້ ອິນໂດ​ເນ​ເຊຍ ໄດ້​ອອກ​ກົດ­ໝາຍ​ອະ­ນຸ​ຮັກ​ເຂດ​ປ່າ­ໄມ້ ຕາມ​ບໍ­ລິ­ເວນ​ທີ່​ເປັນ​ບຶງ ເປັນ​ທາມ ແລະ ໜອງ ເພື່ອ​ໃຫ້​ກາຍ­ເປັນ​ປ່າ​ທີ່​ສົມ­ບູນ​ແບບ ນອກ­ຈາກ​ນີ້ ຍັງ​ໄດ້​ອອກ​ຄຳ​ສັ່ງ​ໃຫ້​ບໍ­ລິ­ສັດ​ຕ່າງໆ​ທີ່​ມີ​ສ່ວນເຮັດໃຫ້​ປ່າ­ໄມ້​ເສື່ອມ​ໂຊມ​ຮັບ­ຜິດ­ຊອບ​ຟື້ນ​ຟູ​ປ່າ​ຄືນ.

ບັນ­ດາ​ບໍ­ລິ­ສັດ​ທີ່​ເປັນ​ຕົວ​ການ​ທຳ­ລາຍ​ປ່າ ໄດ້­ແກ່ບໍ­ລິ­ສັດ​ຜະ­ລິດ​ເຈ້ຍ ແລະ ບໍ­ລິ­ສັດ​ບໍ່​ແຮ່ ນອກ­ຈາກນັ້ນ ກໍ່​ຍັງ​ມີ​ບັນ­ຫາການ​ຖາງ​ປ່າ​ເພື່ອ​ສັບ­ຊ່າວ​ເນື້ອທີ່​ສຳ­ລັບ​ປູກ­ຝັງໃນ​ແຕ່​ລະ​ປີ ອິນ​ໂດ​ເນ​ເຊຍ ​ໄດ້​ປະເຊີນ​ກັບ​ບັນ­ຫາ​ໄຟ​ປ່າ​ທີ່​ກໍ່­ໃຫ້­ເກີດ​ໝອກ​ຄວັນ ສ້າງມົນ​ລະ​ພິດ​ທາງ​ອາ­ກາດ ທັງ​ທຳ­ລາຍ​ຊັບ​ສິນ ແລະ ຊີ­ວິດ​ຂອງ​ປະ­ຊາ­ຊົນ.

ຂ່າວທີ່ກ່ຽວຂ້ອງ