ຂ່າວຫຼ້າສຸດ

ເບິ່ງບ້ານເຂົາ ເອົາບົດຮຽນ - ໂດຍ: ວິເສດ ສະແຫວງສຶກສາ : ຍີ່­ປຸ່ນ ສສ ຫວຽດ­ນາມ ອິນ​ເດຍ

503 14 ທ.ວ. 2016 ຫົວຂໍ້ຂ່າວອື່ນໆ

ຄໍ​ລຳ​ປະ­ຈຳ​ວັນ​ນີ້ ມີ​ເລື່ອງ​ການ​ໃຊ້​ແອັບ (App) ເພື່ອ​ຊ່ວຍ​ໃຫ້​ຄົນ​ຕ່າງ­ປະ­ເທດ​ໃນ​ນະ­ຄອນ­ຫຼວງ​ໂຕກຽວ​ ປະເທດຍີ່­ປຸ່ນ ຮູ້​ລະ­ບຽບ​ການຖິ້ມ​ຂີ້​ເຫຍື້ອ ບັນ­ຫາ​ການ​ຢຶດຊັບ​ສິນ​ທີ່​ໄດ້​ຈາກ​ການ​ສໍ້​ລາດ​ບັງ​ຫຼວງ​ຢູ່ ສສ ຫວຽດ­ນາມ ແລະ ສຸດ​ທ້າຍ​ແມ່ນ​ແຜນ​ເກັບ “ພາສີ​ນິ­ເວດ” ສຳ­ລັບ​ລົດ​ບັນ­ທຸກ​ທີ່​ແລ່ນ​ເຂົ້າ​ນະ­ຄອນຫຼວງ​ນິວ​ເດລີ ອິນ​ເດຍ.

ທີ່ ຍີ່­ປຸ່ນ: ໜັງ­ສື­ພິມ​ວຽງ​ຈັນ​ທາມ (Vientiane Times) ສະ­ບັບ​ວັນ​ທີ 12 ເດືອນ​ທັນ­ວາ ປີ​ນີ້ ໄດ້​ສະເໜີ​ຂ່າວ​ທີ່​ໜ້າ​ສົນ­ໃຈກ່ຽວ​ກັບ​ທາງ​ການ​ເຂດ​ປົກຄອງ “ຊຸ​ກິ​ນາ​ມິ” ໜຶ່ງ​ໃນ 23 ເຂດ​ປົກ­ຄອງ​ຂອງນະ­ຄອນ­ຫຼວງ​ໂຕ​ກຽວ ໄດ້​ນຳ​ໃຊ້ແອັບ​ພລິ​ເຄ​ເຊິນ ຫຼື  “ແອັບ- App” ເພື່ອ​ເຜີຍ­ແຜ່​ກົດ​ລະ­ບຽບ​ການ​ຖິ້ມ​ຂີ້ເຫຍື້ອ​ໃຫ້​ຊາວ​ຕ່າງ­ປະ­ເທດ​ທີ່​ຂຶ້ນ​ກັບ​ການ​ຄຸ້ມ​ຄອງຂອງ​ເຂດຮັບ​ຊາບ ແລະ ປະ­ຕິ­ບັດ​ຢ່າງ​ເປັນ​ເອ­ກະພາບ ແອັບ (App) ສື່­ສານ​ມື​ຖື​ດັ່ງ­ກ່າວ​ເຮັດ​ເປັນພາ­ສາ​ອັງ­ກິດ ຈີນ ແລະ ເກົາ­ຫຼີ ໂດຍ​ໄດ້​ເວົ້າ​ລະ ອຽດ​ກ່ຽວ​ກັບ​ຕາ­ຕະ­ລາງ​ການ​ເກັບ​ຂີ້​ເຫຍື້ອ ແລະ ການ​ແຍກ​ປະ­ເພດ​ຂີ້​ເຫຍື້ອ.

ທາງ​ຫ້ອງ­ການ​ອຳ­ນາດ​ການ​ປົກ­ຄອງ​ເຂດ ຊຸ​ກິນາ​ມິ ໄດ້​ມີ​ຄວາມ​ພະ­ຍາ­ຍາມ​ຢ່າງ​ຕັ້ງ­ໜ້າ​ໃນ​ການຫຼຸດ­ຜ່ອນ​ຈຳ­ນວນ​ຂີ້ເຫຍື້ອ​ລົງ ໃນ​ສົກ​ປີ 2015 ຈຳນວນ​ຂີ້​ເຫຍື້ອ/ຄົນ/ມື້​ ໃນ​ເຂດ​ນີ້​ມີ​ພຽງ 490 ກຣາມ ເຊິ່ງ​ໜ້ອຍ​ທີ່​ສຸດ​ໃນ​ຈຳ­ນວນ​ເຂດ​ປົກ­ຄອງ 23 ເຂດ ໃນ​ໂຕ​ກຽວ ແລະ ຕຳ­ແໜ່ງ​ນີ້ ເຂດ ຊຸ​ກິ​ນາ​ມິ ໄດ້ຄອງ​ມາ​ເປັນ​ເວ­ລາ 5 ປີ​ລຽນ­ຕິດ​ແລ້ວ! ແອັບ ຊ່ວຍ​ແນະ­ນຳຊາວ​ຕ່າງ­ປະ­ເທດ​ກ່ຽວ​ກັບ​ການ​ຖິ້ມຂີ້​ເຫຍື້ອ​ນີ້​ໄດ້​ດຳ­ເນີນ​ມາ​ເປັນ​ເວ­ລາ 2 ປີ​ແລ້ວ ທີ່ຕ້ອງ​ມີ​ແອັບ​ດັ່ງ­ກ່າວ​ກໍ່​ເພາະ­ວ່າ​ ຊາວຕ່າງ­ປະ­ເທດທີ່​ອາ­ໄສ​ຢູ່​ໃນ​ຄຸ້ມ​ນີ້​ສົນ­ໃຈ​ຖາມ​ໄຖ່​ກ່ຽວ​ກັບ​ລະ­ບົບການ​ເກັບ​ມ້ຽນ​ຂີ້​ເຫຍື້ອ.

ທີ່ ສສ ຫວຽດ­ນາມ: ແຫຼ່ງ​ຂ່າວ​ຫວຽດ­ນາມ (Vietnam News) ໃຫ້​ຊາບ​ໃນ​ວັນ​ທີ 10 ເດືອນທັນ­ວາ​ນີ້​ວ່າ: ໃນ 10 ປີ­ຜ່ານ­ມາ ທາງ​ການ​ຫວຽດນາມ ​ສາ­ມາດ​ຢຶດ​ໄດ້​ພຽງ 10% ຂອງ​ຊັບ​ສິນ​ທີ່​ໄດ້ມາ​ຈາກ​ຄະ­ດີ​ສໍ້​ລາດ​ບັງ​ຫຼວງເກືອບ 1.900 ເລື່ອງ ເຊິ່ງ​ມີ​ມູນ​ຄ່າ 60 ພັນ​ຕື້​ດົງ (ປະ­ມານ 2,65 ຕື້​ໂດລາ​ສະ­ຫະ­ລັດ) ຕົວ​ເລກ​ນີ້​ໄດ້​ມາ​ຈາກ​ການ​ເປີດເຜີຍ​ຂອງ​ທ່ານ ໂງ​ແມງ​ຮຸ່ງ ຮອງ​ຫົວ­ໜ້າ​ຫ້ອງ­ການຕ້ານ​ການ​ສໍ້​ລາດ​ບັງ​ຫຼວງ​ ທີ່​ຂຶ້ນ​ກັບ​ຄະ­ນະ​ກຳ​ມະການ​ກວດ­ກາ​ຂອງ​ລັດ­ຖະ­ບານ.

ທ່ານ ຮຸ່ງ ກ່າວ​ວ່າ: ຜົນ­ສຳ­ເລັດ​ໃນ​ການ​ຢຶດ​ຊັບສິນ​ນີ້​ໄດ້​ມາ​ຈາກ​ຄວາມ​ພະ­ຍາ­ຍາມ​ຢ່າງ​ຕັ້ງ­ໜ້າຂອງ​ລັດ­ຖະ­ບານ ແຕ່​ກໍ່​ຖືວ່າ​ຍັງ​ເຮັດ​ໄດ້​ໜ້ອຍ​ທີ່​ສຸດເນື່ອງ​ຈາກ​ວ່າ­ ການ​ຕິດ­ຕາມ​ກວດ­ກາ​ຊັບ​ສິນ​ຂອງພະ­ນັກ­ງານ​ນັ້ນ​ຍັງ​ເຮັດ​ບໍ່​ເປັນ​ປົກ­ກະ­ຕິ ຜົນຕາມ​ມາກໍ່​ຄື​ວ່າ​ ສ່ວນ​ຫຼາຍ​ການ​ຄົ້ນ​ພົບ ແລະ ຕັດ­ສິນ​ຄະ­ດີສໍ້​ລາດ​ບັງ​ຫຼວງ​ນັ້ນ ​ມັກ​ຈະ​ມີ​ຂຶ້ນ​ພາຍ­ຫຼັງ​ມັນ​ໄດ້ສ້າງ​ຄວາມເສຍ​ຫາຍ​ພໍ­ແຮງ​ແລ້ວ ບັນ­ຫາ​ນີ້​ຢາກຄ້າຍໆ​ກັບ​ຢູ່​ເມືອງ​ລາວ​ເຮົາ​ນໍ.

ທີ່ ອິນ​ເດຍ: ຂ່າວ​ເກົ່າ​ຈາກ​ໜັງ­ສື­ພິມ ຈາຍ​ນາ ເດລີ (China Daily) ແຕ່​ທ້າຍ​ປີ 2015 ໄດ້​ລາຍງານ​ກ່ຽວ​ກັບ​ແຜນ​ຂອງທາງ​ການ​ນະ­ຄອນ­ຫຼວງນິວ​ເດລີ ໃນ​ການ​ເກັບ​ພາ­ສີ​ລົດ​ບັນ­ທຸກ​ທີ່​ແລ່ນ​ເຂົ້ານະ­ຄອນ­ຫຼວງ ເອີ້ນ​ວ່າ: “ພາ­ສີ​ນິ­ເວດ” (Ecotax) ຖ້າ​ເວົ້າ​ໃຫ້​ແຈ້ງໆ​ກໍ່​ຄື​ ເກັບ​ຄ່າ​ສ້າງ​ມົນ​ລະ​ພິດ​ທາງອາ­ກາດ​ຫັ້ນ​ລະ.

ຂໍ້​ຄິດ​ໃນ​ການ​ເກັບ​ພາ­ສີ​ນີ້​ມາ​ຈາກ​ສານ​ສູງ​ສຸດອິນ​ເດຍ ມູນ​ຄ່າ​ການ​ເກັບ​ນັ້ນ​ຢູ່​ໃນ​ລະ­ຫວ່າງ 700 ຣູ​ປີ (10,7 ໂດ​ລາ​ສະ­ຫະ­ລັດ) ຫາ 1.300 ຣູ​ປີ ຕໍ່ 1 ຖ້ຽວ/ຄັນ ສຳ­ລັບ​ລົດ​ບັນ­ທຸກ​ການ​ຄ້າ ສ່ວນ​ລົດ​ບັນທຸກ​ເຄື່ອງ­ໃຊ້​ປະ­ຈຳ​ຊີ­ວິດ ອາ­ຫານ ລົດ­ເມ​ໂດຍສານ ລວມ​ທັງ​ລົດ​ໂຮງ­ໝໍ​ນັ້ນ ​ບໍ່​ໄດ້​ຈ່າຍ​ພາ­ສີ​ນິ­ເວດ ການ​ເກັບ​ພາ­ສີ​ນີ້​ເຮັດ​ທົດ​ລອງ​ເປັນ​ເວ­ລາ 4 ເດືອນກ່ອນ ສ່ວນເງິນ​ທີ່​ເກັບ​ໄດ້​ທາງ​ຫ້ອງ­ການ​ປົກ­ຄອງນະ­ຄອນ­ຫຼວງ​ນິວ​ເດລີ​ ເປັນ​ຜູ້​ຄຸ້ມ​ຄອງ​ນຳ​ໃຊ້.

ຂ່າວທີ່ກ່ຽວຂ້ອງ