ຂ່າວຫຼ້າສຸດ

ເບິ່ງບ້ານເຂົາ ເອົາບົດຮຽນ - ໂດຍ: ວິເສດ ສະແຫວງສຶກສາ : ຫວຽດ­ນາມ ມາ​ເລ​ເຊຍ ອົດ​ສະ​ຕຣາ​ລີ

449 13 ທ.ວ. 2016 ຫົວຂໍ້ຂ່າວອື່ນໆ

ມື້­ນີ້​ພວກ​ເຮົາ​ພາ­ກັນ​ໄປ​ເບິ່ງ​ທາງ​ການ​ຫວຽດນາມ ​ເພີ່ມ​ຈຳ­ນວນ​ຖ້ຽວ​ລົດ​ຂົນ­ສົ່ງ​ໂດຍ­ສານ​ເພື່ອຕ້ອນ­ຮັບ​ປີ​ໃໝ່​ສາ­ກົນ 2017 ນະ­ໂຍ­ບາຍ​ປະ­ຢັດຮັດ​ສາຍ­ແອວ​ຢູ່​ມາ​ເລ​ເຊຍ ແລະ ເລື່ອງ​ການ​ຍົກເວັ້ນ​ວີ​ຊາ​ຢູ່ອົດ​ສະ​ຕຣາ​ລີ ເພື່ອ​ດຶງ​ດູດ​ນັກ​ລົງ­ທຶນ ແລະ ແຮງ​ງານ​ຕ່າງ­ປະ­ເທດ​ລະ­ດັບ​ມື​ອາ­ຊີບ.

ທີ່ ສສ ຫວຽດ­ນາມ: ແຫຼ່ງ​ຂ່າວ​ຕ່າງ­ປະ­ເທດ (ຈາກ​ໜັງ­ສື­ພິມ​ວຽງ​ຈັນ​ທາມ) ໃຫ້​ຮູ້​ໃນ​ວັນ​ທີ 12 ເດືອນ​ທັນ­ວາ​ນີ້​ວ່າ: ສູນ​ຄຸ້ມຄອງ​ການ​ຂົນ­ສົ່ງ​ຜູ້ໂດຍ­ສານ​ນະ­ຄອນ​ໂຮ່​ຈິ​ມິງ ມີ​ແຜນ​ເພີ່ມ​ການ​ຂົນສົ່ງ​ຜູ້­ໂດຍ­ສານ​ທາງ​ລົດ​ຂຶ້ນ​ຕື່ມ​ເຖິງ 1.048 ຖ້ຽວ ຕາມ​ເສັ້ນ­ທາງ​ໃຫຍ່​ຂອງ​ນະ­ຄອນ ຈຳ­ນວນ 17 ສາຍ ນັບ​ແຕ່​ວັນ​ທີ 31 ເດືອນ​ທັນ­ວາ​ທ້າຍ​ປີ​ນີ້ ຫາວັນ​ທີ 2 ເດືອນ​ມັງ­ກອນ ປີ 2017 ເພື່ອ​ຮອງ​ຮັບການ​ເດີນ­ທາງ​ຂອງ​ຜູ້­ໂດຍ­ສານ​ໃນ​ໂອ­ກາດ​ບຸນ​ປີໃໝ່​ສາ­ກົນ.

ທາງ​ການ​ນະ­ຄອນ​ໂຮ່​ຈິ​ມິງ ​ຖື​ວ່າ­ການ​ເພີ່ມ​ຖ້ຽວໂດຍ­ສານ​ຂຶ້ນ​ຈະ​ຊ່ວຍ​ຮັບ­ປະ­ກັນ​ຄວາມ​ປອດ​ໄພ ແລະ ຄວາມ​ສະ­ດວກສະ­ບາຍ​ໃຫ້​ແກ່​ຜູ້­ໂດຍ­ສານ ແລະ ໄດ້​ຮຽກ­ຮ້ອງ​ໃຫ້​ໜ່ວຍ​ງານ​ບໍ­ລິ­ການ​ລົດ​ໂດຍສານ​ມີ​ການ​ກະ­ກຽມ​ເປັນ​ຢ່າງ​ດີ ໃນ​ກໍ­ລະ­ນີ​ຈຳ­ນວນຜູ້­ໂດຍ­ສານ​ໄດ້​ພຸ່ງ​ສູງ​ຂຶ້ນ​ຢ່າງ​ກະ­ທັນ­ຫັນ ​ກໍ່​ຕ້ອງກຽມ­ພ້ອມ​ເພີ່ມ​ຈຳ­ນວນ​ລົດ­ເມ​ບໍ­ລິ­ການ​ຂຶ້ນ​ຕື່ມ ສສ ຫວຽດ­ນາມ ໃຫ້​ຄວາມ​ສຳ­ຄັນ​ເປັນ​ພິ­ເສດ​ໃນການ​ນຳ​ໃຊ້​ລົດ​ໂດຍ­ສານ​ມວນ​ຊົນ​ທີ່​ມີ​ຄວາມ​ສະດວກ​ສະ­ບາຍ​ກວ່າ ໄປ​ພ້ອມໆ​ກັບການ​ຫຼຸດ­ຜ່ອນການ​ໃຊ້​ລົດ​ສ່ວນ​ຕົວ​ລົງ​ເທື່ອ​ລະ​ກ້າວ.

ທີ່ ມາ​ເລ​ເຊຍ: ຂ່າວ​ນີ້​ອ່າວ​ເກົ່າ ແຕ່​ເປັນ​ບົດຮຽນ​ທີ່​ດີ​ສຳ­ລັບ​ການ​ປະ­ຢັດ​ຮັດ​ສາຍ­ແອວ ເພື່ອຄວາມ​ເຂັ້ມ­ແຂງ ແລະ ໝັ້ນ­ຄົງ​ຂອງ​ເສດ­ຖະ­ກິດແຫ່ງ​ຊາດ ນັບ​ແຕ່​ຕົ້ນ​ປີ 2014 ມາ ທາງ​ການ​ມາເລ​ເຊຍ ​ໄດ້​ເອົາ​ມາດ​ຕະ­ການ​ຕົວ​ຈິງ​ເພື່ອ​ຫຼຸດ­ຜ່ອນການ​ໃຊ້​ຈ່າຍ​ຟູມ​ເຟືອຍ ເຊິ່ງ​ມີ​ທັງ​ໝົດ 11 ຂໍ້ ໃນນັ້ນ ລວມ​ມີ​ທັງ​ການ​ຕັດ​ເງິນ​ນະ­ໂຍ­ບາຍ​ພັກ­ຜ່ອນຂອງ​ພະ­ນັກ­ງານ​ອາ­ວຸ­ໂສ ພ້ອມ​ທັງ​ມີ​ການ​ຕັດ​ເງິນນະ­ໂຍ­ບາຍ​ເພື່ອ​ຄວາມ​ສະ­ດວກ​ສະ­ບາຍ​ອື່ນໆ​ລົງ ລະ­ຫວ່າງ​ແຕ່ 50 ຫາ 100 ຣິງ​ກິດ (ທຽບ­ໃສ່​ມູນຄ່າ​ເງິນ​ໂດ​ລາ​ແມ່ນ​ແຕ່ 16 ຫາ 33 ໂດ​ລາ​ສະ­ຫະລັດ) ຫຼື ເທົ່າ​ກັບ 30% ຂອງ​ເງິນ​ນະ­ໂຍ­ບາຍ​ທີ່ພະ­ນັກ­ງານ​ຂັ້ນ​ສູງໄດ້​ຮັບ.

ບໍ່​ພຽງ​ແຕ່​ເທົ່າ​ນັ້ນ ລັດ­ຖະ­ບານ​ມາ​ເລ​ເຊຍ ​ຍັງໄດ້​ຕັດ​ງົບ­ປະ­ມານ​ຄ່າ​ໄຟ­ຟ້າ​ຂອງ​ບັນ­ດາ​ກະ­ຊວງ ສຳ­ນັກ­ງານ ອົງ­ການ​ຂອງລັດ​ລົງ 5% ທ່ານ​ນາຍົກ​ລັດ­ຖະ­ມົນ­ຕີ ມາ​ເລ​ເຊຍ ມີ​ຄຳ​ເຫັນ​ຕື່ມ​ກ່ຽວກັບ​ມາດ​ຕະ­ການ​ປະ­ຢັດ​ນີ້​ວ່າ: ລັດ­ຖະ­ບານ​ຍັງ​ຈະເຄັ່ງ​ຄັດ​ກ່ຽວ​ກັບ​ການ​ແຕ່ງ­ຕັ້ງ​ບັນ­ດາ​ທີ່​ປຶກ­ສາໂຄງ­ການ​ຕ່າງໆ​ຂອງ​ລັດ­ຖະ­ບານ ເພື່ອ (ຕາມ​ຄຳເຫັນ​ຂອງ​ຜູ້​ຂຽນ) ບໍ່​ໃຫ້​ຊິ້ນເປືອງ​ຈຳ­ນວນ​ຄົນ ແລະ ການ​ໃຊ້​ຈ່າຍ​ງົບ­ປະ­ມານ​ຂອງ​ລັດ.

ທີ່ ອົດ​ສະ​ຕຣາ​ລີ: ເມື່ອ​ປະ­ມານ 2-3 ປີ​ປາຍ​ກ່ອນໜ້າ​ນີ້ (ຕາມ​ຂ່າວ VTT 15/10/2014) ລັດ​ຖະບານ​ອົດ​ສະ​ຕຣາ​ລີ ໄດ້ກຳ­ນົດ​ແຜນ​ງານ​ຜ່ອນ­ຜັນວີ​ຊາ ຈຳ­ນວນ 457 ສະ­ບັບ ສຳ­ລັບ​ແຮງ​ງານຕ່າງ­ປະ­ເທດ​ທີ່​ມີ​ຄວາມ​ຊຳ­ນານ​ງານ ທັງ​ນີ້​ກໍ່​ເພື່ອໃຫ້​ປະ­ເທດ​ມີ​ຂີດ​ຄວາມ​ສາ­ມາດ​ໃນ​ການ​ແຂ່ງ­ຂັນຂຶ້ນ​ຕື່ມ.

ແຜນ​ງານ​ຜ່ອນ­ຜັນ​ການ​ອອກ​ວີ​ຊາ​ນີ້​ ມີ​ເປົ້າ​ໝາຍສ້າງ​ຄວາມ​ສະ­ດວກ​ສະ­ບາຍ​ໃຫ້​ຂະ­ແໜງ​ທຸ­ລະກິດ​ອົດ​ສະ​ຕຣາ​ລີ ໃນການ​ວ່າ​ຈ້າງ​ແຮງ​ງານ​ຕ່າງປະ­ເທດ​ທີ່​ມີ​ຄວາມ​ຊຳ­ນານ​ງານ ແຕ່​ກໍ່​ຕ້ອງ​ເປັນໄປ​ຕາມ​ເງື່ອນ­ໄຂ​ທີ່​ວ່າ ການ​ວ່າ​ຈ້າງ​ດັ່ງ­ກ່າວນັ້ນ ແມ່ນ​ເພື່ອ​ທົດ​ແທນ​ບ່ອນ​ທີ່​ຍັງ​ຂາດ­ເຂີນ​ແຮງ​ງານສີ­ມື​ທີ່​ຈຳ­ເປັນ ແລະ ຕ້ອງ​ບໍ່​ໃຫ້​ກາຍ­ເປັນ​ພາ­ລະແບກ​ຫາບ​ສຳ­ລັບການ​ບໍ­ລິ­ຫານ​ທຸ­ລະ​ກິດ​ທີ່​ກ່ຽວຂ້ອງ.

ຂ່າວທີ່ກ່ຽວຂ້ອງ