ເບິ່ງບ້ານເຂົາ ເອົາບົດຮຽນ - ໂດຍ: ວິເສດ ສະແຫວງສຶກສາ : ​ສະ­ຫະ­ລັດ ໄທ

465 12 ທ.ວ. 2016 ຫົວຂໍ້ຂ່າວອື່ນໆ

ຄໍ​ລຳ​ປະ­ຈຳ​ວັນ​ນີ້ ມີ​ເລື່ອງ​ການ​ປັບ​ໃໝ​ພໍ່­ຄົວ​ຄົນຝຣັ່ງ ​ຢູ່​ສະ­ຫະ­ລັດ ຍ້ອນ​ຄວາມ​ປະ­ໝາດ​ໃນ​ການ​ຄົວອາ­ຫານ ຕໍ່​ໃສ່​ທິດທາງ​ສົ່ງ­ເສີມ​ການ­ທ່ອງ­ທ່ຽວຂອງ​ໄທ ເພື່ອ​ເຈາະ​ຕະ­ຫຼາດ​ໃໝ່.

ທີ່ ສະ­ຫະ­ລັດ​ອາ​ເມ​ຣິ​ກາ: ຂ່າວ​ຈາກ​ໜັງ­ສື­ພິມ ເດິ​ເນ​ເຊິນ (The Nation) ສະ­ບັບ​ໜຶ່ງ​ທີ່​ອອກ​ໃນເດືອນ​ພະ­ຈິກ ຜ່ານ​ມາ ໃຫ້​ຮູ້​ວ່າ: ທ່ານ ດາ​ນຽນ ບູ​ລູດ (Daniel Boulud) ພໍ່­ຄົວ​ຊື່​ດັງ​ຄົນ​ຝຣັ່ງ ທີ່​ມີ​ກິດ­ຈະ­ການ​ຮ້ານ​ອາ­ຫານ​ຢູ່​ນິວ​ຢອກ ຖືກ​ປັບ ໃໝ​ເປັນ​ເງິນ 1,3 ລ້ານ​ໂດ​ລາ​ສະ­ຫະ­ລັດ ຍ້ອນ​ປະໝາດ​ຂາດ​ຄວາມ​ລະ­ມັດ­ລະ­ວັງ.

ເຫດ­ການ​ທີ່​ກາຍ­ເປັນ​ຄະ­ດີ​ນີ້​ເກີດ​ຂຶ້ນ​ແຕ່​ເດືອນກຸມ­ພາ ປີ 2015 ພຸ້ນ ຄື: ທ້າວ ແບ​ຣີ ເບຣດ (Barry Brett) ພ້ອມ​ດ້ວຍພັນ​ລະ​ຍາ​ທີ່​ເປັນ​ລູກຄ້າ​ຮ້ານ​ອາ­ຫານ​ຂອງ​ພໍ່­ຄົວ ດາ​ນຽນ ໄດ້​ພາ­ກັນໄປ​ຮັບ​ປະ­ທານ​ອາ­ຫານ​ຢູ່​ຮ້ານ​ດັ່ງ­ກ່າວ ທ້າວ ແບ​ຣີ ຄ້ຽວ​ອາ­ຫານ​ໄປ​ບໍ່​ໄດ້​ພໍ­ຄາວ​ກໍ່​ຮູ້­ສຶກ​ມີ​ວັດ­ຖຸ​ແຂງໆຄາ​ຢູ່​ຄໍ​ອ່າງ​ຍ່າງ ເຂົາ​ຮີບ​ປົບ­ຕາຍ​ອອກ​ຈາກ​ຮ້ານອາ­ຫານ​ໄປ​ໂດຍ​ໄວ ຜົນ​ຈາກ​ການ​ພິ­ສູດ​ຢູ່​ໂຮງ­ໝໍພົບ​ວ່າ ​ມີ​ເສັ້ນ​ເຫຼັກ​ແລບໆ ຍາວ​ປະ­ມານ 2,5 ຊັງ​ຕີ​ແມັດ ປັກ​ຮູ​ຄໍ​ຜູ້­ກ່ຽວ.

ຕາມ​ຄຳ​ເຫັນ​ຂອງ​ນັກ​ກົດ­ໝາຍ​ປະ­ຈຳ​ໂຕ​ທ້າວ ແບ​ຣີ ເສັ້ນ​ເຫຼັກ​ທີ່​ວ່າ​ນັ້ນ​ເປັນ​ອັນ­ຕະ­ລາຍ​ເຖິງ​ແກ່ຄວາມ​ຕາຍ ຖ້າ​ຖອນ​ອອກ​ບໍ່​ທັນ ສານ​ນະ­ຄອນ​ນິວຢອກ ​ຕັດ­ສິນ​ຄວາມ​ຜິດ​ຂອງ​ພໍ່­ຄົວ ດາ​ນຽນ ວ່າ: ຂາດ​ຄວາມ​ລະ­ມັດ­ລະ­ວັງ ອັນ​ເປັນ​ເຫດ​ໃຫ້ຄົນ​ອື່ນເສຍ​ຫາຍ ທ້າວ ແບ​ຣີ ຜູ້​ເຄາະ​ຮ້າຍ​ກືນ​ເສັ້ນ​ເຫຼັກປົນ​ອາ­ຫານ​ນັ້ນ​ໄດ້​ຮັບ​ເງິນ​ຄ່າ​ເສຍ​ຫາຍ 3 ແສນໂດ​ລາ ຝ່າຍ​ເມຍຜູ້​ເສຍ​ຫາຍ​ໄດ້ 11 ພັນ​ໂດ​ລາ ເຫຼືອ​ນັ້ນ​ເປັນ​ພູດ​ຂອງ​ທາງ​ການ.

ທາງ​ທະ­ນາຍ­ຄວາມ​ປະ­ຈຳ​ຮ້ານ​ອາ­ຫານບອກວ່າ: ທາງ​ຮ້ານ​ອາ­ຫານ​ຈະ​ອຸ­ທອນ ຍ້ອນ​ວ່າ​ບໍ່ແມ່ນ​ຄວາມ​ຕັ້ງ­ໃຈ​ຂອງ​ທາງຮ້ານ ເສັ້ນ​ເຫຼັກ​ທີ່​ຕົກຄ້າງ​ຢູ່​ອາ­ຫານ​ນັ້ນ​ແມ່ນ​ເສັ້ນ​ຝອຍ​ເຫຼັກ​ທີ່​ໃຊ້​ຂັດ​ໝໍ້ ແລະ ວ່າ​ທ້າວ ແບ​ຣີ ຜູ້​ເຄາະ​ຮ້າຍ​ນັ້ນ​ລໍ­ຖ້າ​ຈົນຮອດ 4 ວັນຈຶ່ງ​ໄປ​ໂຮງ­ໝໍ ເລື່ອງ​ນີ້​ຄວນ​ເປັນ​ອຸ​ທາຫອນ​ສຳ­ລັບ​ຜູ້​ຂາຍ​ອາ­ຫານ​ສຸກ​ຢູ່​ບ້ານ​ເຮົາ ຄັ້ງ​ໜຶ່ງຜູ້​ຂຽນ​ພົບ​ເຫຼັກ​ຕະ­ປູເຂົ້າ​ໝ້ຽງ​ກັບ​ນ້ຳ​ສີ​ປົນ​ເຂົ້າຫຼາມ ດີ​ແຕ່​ເຫັນ​ກ່ອນ.

ທີ່ ປະ­ເທດ​ໄທ: ໄທ ເປັນ​ປະ­ເທດ​ໜຶ່ງ​ທີ່​ກາງ​ຕໍ່ລາຍ​ຮັບ​ຈາກ​ການ­ທ່ອງ­ທ່ຽວ ຄາດ​ວ່າ​ໃນ​ປີ 2016 ນີ້ ນັກ​ທ່ອງ​ທ່ຽວ​ຕ່າງ­ປະ­ເທດ​ທີ່​ເຂົ້າ​ໄປ​ໄທ​ນັ້ນ ​ຈະບັນ­ລຸ​ເຖິງ 33,8 ລ້ານ​ຄົນ ສຳ­ລັບ​ປີ 2017 ທາງການ​ໄທ ​ຕັ້ງ​ເປົ້າ​ໝາຍ​ຕ້ອນ­ຮັບ​ນັກ​ທ່ອງ​ທ່ຽວຕ່າງປະ­ເທດ ໃຫ້​ໄດ້ 37,3 ລ້ານ​ຄົນ ໃນ 7 ປີ­ຜ່ານ­ມາ ອຸດ­ສາ­ຫະ­ກຳ​ການ­ທ່ອງ­ທ່ຽວ​ໄທ ​ເຕີບ​ໃຫຍ່​ໃນ​ລະດັບ 13% ຕໍ່​ປີ ລາຍ​ຮັບ​ຈາກ​ການ­ທ່ອງ­ທ່ຽວ​ນັ້ນ ກວມ​ເອົາ 11% ຂອງ ຈີ​ດີ​ພີ ແຕ່​ສິ່ງ​ທີ່​ເປັນຫ່ວງ​ຂອງ​ທາງ​ການ​ໄທ ​ໃນ​ປັດ­ຈຸ­ບັນ ກໍ່​ຄືອຸດສາຫະ​ກຳ​ທ່ອງ​ທ່ຽວ​ຍັງ​ກາງ​ຕໍ່​ຈຳ­ນວນ​ນັກ​ທ່ອງ​ທ່ຽວຈີນ​ຢ່າງ​ໜັກ­ໜ່ວງ ຖ້າ​ບັງ­ເອີນ​ວ່າ​ຈຳ­ນວນ​ນັກທ່ອງ​ທ່ຽວ​ຈີນ​ຫຼຸດ​ລົງ ມັນ​ກໍ່​ຈະ​ສົ່ງ​ຜົນ​ກະ­ທົບ​ຢ່າງໜັກ​ຕໍ່​ເສດ­ຖະ­ກິດ ດັ່ງ­ນັ້ນ ໃນ­ຕໍ່­ໜ້າ ອຸດ­ສາ­ຫະ­ກຳທ່ອງ​ທ່ຽວ​ໄທ ​ຈະ​ສ້າງ​ຕະ­ຫຼາດ​ທ່ອງ​ທ່ຽວຫຼາຍ​ຂົ້ວ ໂດຍ​ໃຫ້​ຄວາມ​ສົນ­ໃຈ​ຕະ­ຫຼາດ​ທ່ອງ​ທ່ຽວ​ອິນ​ເດຍ ແລະ ອິນ​ໂດ​ເນ​ເຊຍ ທີ່​ມີ​ລະ­ດັບ​ການ​ເຕີບ​ໃຫຍ່ ທາງ​ເສດ­ຖະ­ກິດ​ທີ່​ໝັ້ນ­ຄົງ.

ອີກ 15 ປີ​ຕໍ່­ໜ້າ ອິນ​ເດຍ ຈະ​ມີ​ປະ­ຊາ­ກອນ​ຫຼາຍທີ່​ສຸດ​ໃນ​ໂລກ ລື່ນ ສປ ຈີນ ນອກ­ຈາກ​ນັ້ນ ໄທ ຍັງຈະ​ເນັ້ນ​ການ­ທ່ອງ­ທ່ຽວເພື່ອ​ຮັກ­ສາ​ສຸ­ຂະ­ພາບ ໂດຍເນັ້ນ​ຕະ­ຫຼາດ​ປະ­ເທດ​ທີ່​ມີ­ຄ່າ​ໃຊ້​ຈ່າຍຮັກ­ສາ​ສຸ​ຂະພາບ​ສູງ ເຊັ່ນ: ຝຣັ່ງ ເຢຍ​ລະ​ມັນ ອົດ​ສະຕຣາ​ລີ ກໍ່​ຄືປະ­ເທດ​ທີ່​ມີ​ລະ­ບົບ​ປິ່ນ­ປົວ​ຫຼ້າ­ຫຼັງ ນອກ​ນັ້ນ ກໍ່​ຍັງ​ຈະ​ດຶງ​ດູດ​ກຸ່ມ​ສ້າງ​ຟີມ­ຮູບ­ເງົາ​ຈາກ​ຕ່າງ​ປະເທດ ໂດຍ​ສ້າງສະ­ຖານ­ທີ່​ບັນ­ເທີງ ສວນ​ສາ​ທາ​ລະນະ​ທີ່​ຈົບ­ງາມ ກໍ່​ຄືການ​ຈັດ​ລາຍ­ການ​ກີ­ລາ​ນັດ​ສຳຄັນ​ລະ­ດັບ​ສາ­ກົນ ແລະ ພາກ​ພື້ນ ເພື່ອ​ດຶງ​ດູດແຂກ​ຕ່າງ­ປະ­ເທດ.

ຂ່າວທີ່ກ່ຽວຂ້ອງ