ຮູ້ພາສາລາວ ມື້ລະຄຳ : ຫອຍຕາມຄາດ

463 09 ທ.ວ. 2016 ຫົວຂໍ້ຂ່າວອື່ນໆ

ເປັນ​ຄຳ​ສຸພາສິດ​ເກົ່າ​ຂອງລາວ ທີ່​ຖອດ​ອອກ​ມາ​ຈາກ​ນິທານ​ສຽວສະຫວາດ ຈຶ່ງ​ມີຄວາມ​ໝາຍ​ເລິກ​ເຊິງ ຫອຍ ຊື່ສັດ​ເລືອ​ຄານ​ທີ່​ອາໄສ​ຢູ່​ນ້ຳ​ຫ້ວຍ, ຮ່ອງ, ຄອງ, ບຶງ, ນາ ​ແລະ ​ແມ່ນ້ຳ​ຕ່າງໆ ແລະ ຄາດ ແປ​ວ່າ ຮອຍ, ຮ່ອງ​ແຂ້ວ ຫຼື​ລູກ​ຄາດ​ຢູ່​ນາ. ສຳລັບ​ຄວາມ​ໝາຍ​ທາງອ້ອມ, ຫອຍ ໄດ້​ມາ​ປຽບທຽບ​ໃສ່​ຄົນ​ທີ່​ບໍ່​ເປັນ​ໂຕ​ຂອງ​ໂຕ​ເອງ, ຄົນບໍ່​ມີຄວາມ​ຮູ້, ຄົນ​ເກາະ​ຫ້ອຍ​ກິນ​ນຳ​ຜູ້​ອື່ນ. ຫອຍ​ຕາມ​ຄາດ ຈຶ່ງ​ເປັນ​ຄຳ​ສຸພາສິດຕິຕຽນ, ວິຈານ​ຄວາມ​ບໍ່​ດີ, ການ​ຍອມ​ເປັນ​ທາດ​ຜູ້​ອື່ນ ແລະ ມີ​ຄວາມໝາຍ​ໃກ້​ຄຽງ​ກັບຊົ້ນ​ຂີ້​ແຫ້​ຜູ້​ອື່ນ, ຫາຍໃຈ​ຮ່ວມ​ຮູດັງຜູ້​ອື່ນ, ກິນ​ນ້ຳ​ຍ້ອຍ​ສອກ​ຄົນ​ອື່ນ... ເພື່ອ​ຂະຫຍາຍ​ຄວາມ​ໝາຍ​ຂອງ​ຄຳ​ສຸພາສິດ​ນີ້​ໃຫ້​ກວ້າງ​ອອກ ອາຈານ ​ທອງຄຳ ອ່ອນ​ມະນີ​ສອນ ໄດ້​ຂຽນກອນ​ໜຶ່ງ​ໄວ້​ວ່າ:

ຕົວຢ່າງ:

ເປັນ​ຄົນ​ຄັນ​ບໍ່​ກ້າ                ຕາ​ຕ່ຳ​ຕອມ​ເຫງົາ

ເຂົາ​ຊິ​ເອົາ​ໄປ​ຂາຍ               ຂົ່ມ​ຄຸມ​ແຂງ​ໃຊ້

ຈູງ​ດັງ​ໄປ​ເປັນ​ຂ້ອຍ              ຄື​ຫອຍ​ຕາມ​ຄາດ

ຂາດ​ຄວາມ​ເປັນ​ມະນຸດ​ນີ້          ສັກ​ສີ​ຄົນ​ຫຼົ່ນ​ຖິ້ມ ຊິ​ໄປ​ຍິ້ມ​ໃສ່​ລີງ ແລ​ນໍ!

ຄຳ​ສຸພາສິດ​ນີ້ ສາມາດ​ໃຊ້​ໃນ​ຊີວິດ​ປະຈຳ​ວັນ​ໄດ້​ຕາມ​ກໍລະນີເໝາະ​ສົມ.

ຂ່າວທີ່ກ່ຽວຂ້ອງ