ຂ່າວຫຼ້າສຸດ

6 ສ ຕ້ອນຮັບ 2 ທັນວາ

782 09 ທ.ວ. 2016 ຫົວຂໍ້ຂ່າວອື່ນໆ

ເນື້ອ​ໃນ​ຄຳ​ຂວັນ​ເວົ້າ                     ໃສ່​ຊື່ວ່າ: 6 ສ

ນະຄອນຫຼວງ​ວາງ​ລົງ                    ແນບນຳ​ແນ​ຊີ້

ໃຫ້​ປວງ​ຊົນ​ເສີມ​ສ້າງ                     ຂະ​ບວນ​ການ​ພົ້ນ​ເດັ່ນ

ເປັນ​ຜົນງານ​ອາບ​ເອ້                     ວິໄລ​ເຫຼື້ອມ​ທົ່ວ​ນະຄອນ

ສ ສະຫງົບ ຂັ້ນ​ຕົ້ນ                     ສຳຄັນ​ຍິ່ງ​ເປັນ​ກົກ

ຄວາມ​ຢູ່​ເຢັນ​ເປັນ​ສຸກ                    ໝູ່​ມານ​ບໍ່​ມາ​ໃກ້

ສ ສະອາດ ຊາວ​ວຽງ​ຈັນ​ເຮົາ​ໄດ້            ອະນາໄມ​ບ້ານ​ຊ່ອງ

ຕາມ​ຕະຄອງ​ຮ່ອງນ້ຳ                    ທາງ​ດັ້ນ​ດຸ່ງ​ເດີນ

ສ ສີຂຽວ ແຕ່ງ​ແຕ້ມ                    ວິໄລ​ເລີດ​ໂສພາ

ປູກ​ໝູ່​ໄມ້-ມວນ​ມາລາ                   ສະຫງ່າ​ງາມ​ເງົາ​ແຍ້ມ

ສ ສະຫວ່າງ ສີໃສ​ແຈ້ງ                  ແສງ​ໄຟ​ແຍງ​ເຍືອງ​ສ່ອງ

ທ້ອງ​ຖະໜົນ​ແຕ່​ລະ​ເສັ້ນ                  ສີສັນ​ເຫຼື້ອມ​ຮຸ່ງ​ປະກາຍ

ສ ສີວິໄລ ຮຸ່ງ​ກ້າວ                     ຈະເລີນ​ມັ່ງ​ມູນ​ມີ

ເສດຖະກິດ​ຂະຫຍາຍ​ດີ                   ບໍ່​ຂາດ​ເຄືອງ​ຄາ​ແຄ້ນ

ສ ສະ​ເໜ່ ຍິ່ງ​ໜັກ​ແໜ້ນ                  ຊາວ​ໂລກາ​ຮັກ​ຫໍ່

ຈູມ​ຈໍ່​ຫອມ​ກິ່ນ​ກົ້ວ                       ເບີຍ​ແຍ້ມ​ພຸ່ງ​ກະຈວນ

6 ສ ຮັບ​ຕ້ອນ                         ວັນ​ສ້າງຕັ້ງ ​ສປປ ລາວ

ວັນ​ທີ 2 ເດືອນ​ທັນວາ                   ສະຫງ່າ​ງາມ​ໃສ​ແຈ້ງ

41 ປີ ສີ​ແສງ​ກ້າ                       ປະຊາຊົນ​ຊ້ອຍ​ຊື່ນ

ຍິ້ມ​ຍື່ນ​ຍໍ​ຍົກຍ້ອງ                       ສະຫຼອງ​ນ້ອມ​ອວຍພອນ ແທ້ນາ.

ຂ່າວທີ່ກ່ຽວຂ້ອງ