ຂ່າວຫຼ້າສຸດ

ເບິ່ງບ້ານເຂົາ ເອົາບົດຮຽນ - ໂດຍ: ວິເສດ ສະແຫວງສຶກສາ : ​ມາ​ເລ​ເຊຍ ຫວຽດ­ນາມ

406 07 ທ.ວ. 2016 ຫົວຂໍ້ຂ່າວອື່ນໆ

ພົບ​ກັນ​ມື້­ນີ້ ມີ​ເລື່ອງ​ທາງ​ການ​ຂອງ​ມາ​ເລ​ເຊຍ ເຮັດ​ໜ້າ­ທີ່​ຕິດ­ຕາມ​ຄຸ້ມ​ຄອງ​ບັນ­ດາ​ສາ​ສະ​ດາ​ຈານ (ຄູ-ອາ­ຈານ​ສອນ​ສາ­ສະ­ໜາ) ຕໍ່​ໃສ່​ມາດ​ຕະ­ການຫວຽດ­ນາມ ໃນ​ການ​ປັບ​ໃໝ​ໜ່ວຍ​ງານ​ບໍ­ລິ­ການສື່­ສານ​ໂທລະ​ຄົມ­ມະ­ນາ­ຄົມ​ທີ່​ລະ­ເມີດ​ກົດລະ­ບຽບ.

ທີ່ ມາ​ເລ​ເຊຍ: ໜັງ­ສື­ພິມ​ເດິ​ເນ​ເຊິນ (The Nation) ສະ­ບັບ​ວັນ​ທີ 9 ເດືອນ​ພະ­ຈິກ ຜ່ານ​ມາ ໃຫ້​ຮູ້​ວ່າ: ເຈົ້າ​ໜ້າ­ທີ່​ຕຳ­ຫຼວດ​ໄດ້​ເຮັດ​ໜ້າ­ທີ່​ຕິດຕາມ​ກວດ­ກາ​ບັນ­ດາ​ຄູ-ອາ­ຈານ​ທີ່​ສອນ​ວິ­ຊາ​ສາສະ­ໜາ ລວມ​ທັງ​ໂຮງ­ຮຽນ​ສາ­ສະ­ໜາ​ຕ່າງໆ ເພື່ອຊອກຫາ​ຮ່ອງ­ຮອຍ​ການ​ພົວ­ພັນ​ກັບ​ກຸ່ມ​ຫົວ​ຮຸນແຮງ​ທາງ​ສາ­ສະ­ໜາ ກໍ່​ຄືສາ­ສະ­ໜາ​ອິດ​ສະ​ລາມ.

ທ່ານ ອັກ​ຄະ​ມັດ ເອນ ມູ​ຮຳ ມາ​ດີ (Ahmad  El Huham mady) ຊ່ຽວ­ຊານ​ກ່ຽວ​ກັບ​ລັດ­ທິ​ກໍ່ການ​ຮ້າຍ ບອກ​ວ່າ: ມາດຕະ­ການ​ຕິດ­ຕາມ​ຄວບຄຸມ​ດັ່ງ­ກ່າວ​ມີ​ຄວາມ​ຈຳ­ເປັນ​ທີ່​ສຸດ ເພາະ​ຄູ-ອາຈານ​ສອນ​ວິ­ຊາ​ສາ­ສະ­ໜາ​ນັ້ນ​ມີ​ອິດ​ທິ​ພົນ​ທາງດ້ານ​ຈິດ­ໃຈ​ຕໍ່​ເຫຼົ່າ​ນັກ­ຮຽນ ທ່ານ​ບອກ​ວ່າ: ບັນ­ຫານີ້​ມີ​ຕົວ­ຢ່າງ​ມາ​ຫຼາຍ​ແລ້ວຄື: ນັກ­ຮຽນ​ສາ­ສະ­ໜາຈຳ­ນວນ​ໜຶ່ງ​ຍອມ​ເຮັດທຸກ​ສິ່ງ​ທຸກ​ຢ່າງ​ຕາມ​ຄວາມຕ້ອງ­ການ​ຂອງ​ອາ­ຈານ​ສອນ ແລະ ກໍ່​ມີ​ອາ­ຈານຈຳ­ນວນ​ໜຶ່ງ​ທີ່​ສາ­ມາດ​ຊັກ​ຊວນ​ໃຫ້​ນັກ­ຮຽນເຮັດແນວ​ບໍ່​ດີ.

ເຈົ້າ​ໜາ້​ທີ່​ຕຳ­ຫຼວດ​ມາ​ເລ​ເຊຍ​ ໄດ້​ຕິດ­ຕາມ​ຢ່າງໃກ້­ຊິດ​ບັນ­ຫາ​ຜູ້­ນຳ​ທາງ​ສາ­ສະ­ໜາ ບັນ­ດາ​ຜູ້­ນຳພາ​ພິ­ທີ­ກຳ​ຢູ່​ຕາມ​ມັດ​ສະຢິດ (ໂບດ​ສາ­ສະ­ໜາ​ອິດສະ​ລາມ) ກໍ​ຄືຕາມ​ສຳ­ນັກ­ງານ​ສາ­ສະ­ໜາ ກ່ອນໜ້າ​ນີ້​ເຄີຍ​ມີ​ອາ­ຈານ​ສາ­ສະ­ໜາ​ຢູ່​ໂຮງ­ຮຽນສາ​ສະໜາ​ມຸດ​ສະ​ລິມຢູ່​ເກ​ດາ ເດີນ​ໄປ​ເຂົ້າ​ຮ່ວມ​ກຸ່ມ​ລັດອິດ​ສະ​ລາມ​ຢູ່​ປະ­ເທດ​ຊີ​ຣີ ແລະ ຖືກ​ຂ້າ​ຕາຍ​ໃນ​ປີ 2014 ໃນ​ປັດ­ຈຸ­ບັນ ບັນ­ດາ​ນັກ­ຮຽນ​ໃນ​ໂຮງ­ຮຽນ​ດັ່ງກ່າວ​ຍັງ​ສະ­ແດງ​ຄວາມ​ເຄົາ­ລົບ​ບູ­ຊາ​ອາ­ຈານ​ຄົນນັ້ນ​ຢູ່ ແລະ ຕ້ອງ­ການ​ເດີນ​ຕາມຮອຍ​ຂອງ​ເຂົາ ແນວ­ໃດ​ກໍ່​ດີ ທ່ານ​ຜູ້​ຊ່ຽວ­ຊານ​ກ່ຽວ​ກັບ​ລັດ­ທິ​ກໍ່​ການຮ້າຍ ບອກ​ວ່າ: ບໍ່​ສາ­ມາດ​ຈະ​ຊີ້​ຂາດ​ວ່າ ​ໂຮງ­ຮຽນໃດ​ໜຶ່ງ ເປັນ­ຕົ້ນ ການ​ຊັກ​ຊວນ​ໃຫ້​ນັກ­ຮຽນ​ຫຼົງ​ຜິດ ເຂົ້າ​ຮ່ວມ​ກຸ່ມ​ຫົວ​ຮຸນ​ແຮງ​ຂອງ​ລັດ­ທິ​ລັດ​ອິດ​ສະລາມ (ໄອ​ສິດ) ເພາະ​ໃນ​ປັດ­ຈຸ­ບັນ​ນີ້​ຊາວ​ໜຸ່ມ​ມາເລ​ເຊຍ​ ສາ­ມາດ​ເຂົ້າ​ເຖິງ​ແຫຼ່ງ​ຂໍ້​ມູນ​ຈາກ​ກຸ່ມ​ໄອ​ສິດງ່າຍ​ທີ່​ສຸດ ສະ­ຖິ­ຕິ​ຂອງ​ທາງ​ການ​ຕຳ­ຫຼວດ​ມາ​ເລເຊຍ ໃຫ້​ຮູ້​ວ່າ: ນັບ​ແຕ່​ປີ 2013 ເຖິງ​ປີ 2015 ປະມານ 80% ຂອງ​ຜູ້​ທີ່​ຖືກ​ຈັບ​ກຸມ​ ຍ້ອນ​ມີ​ສ່ວນ​ພົວພັນ​ກັບ​ກຸ່ມ​ໄອ​ສິດ​ນັ້ນ​ມີ​ອາ­ຍຸ​ຕ່ຳ​ກວ່າ 40 ປີ ແລະ ພວກ​ເຂົາ​ທັງ​ໝົດ​ໄດ້​ສະ­ໝັກ​ເຂົ້າ​ຮ່ວມ​ກຸ່ມ​ໂດຍທາງ​ອອນ​ລາຍ (Online) ທ່ານ ອັກ​ຄະ​ມັດ ມີ​ຄຳເຫັນ​ຖິ້ມ​ທ້າຍ​ວ່າ: ມາ​ເລ​ເຊຍ​ຄວນ​ສ້າງ­ຕັ້ງ​ໜ່ວຍງານ​ປ້ອງ​ກັນ​ຄວາມ​ປອດ​ໄພ​ຂອງ​ລະ­ບົບ​ອິນ​ເຕີເນັດ ​ເພື່ອ​ກຳ­ຈັດອິດ​ທິ​ພົນ​ຈາກ​ການ​ໂຄ­ສະ­ນາ​ຂອງ​ກຸ່ມ​ໄອ​ສິດ.

ທີ່ ສສ ຫວຽດ­ນາມ: ແຫຼ່ງ​ຂ່າວ​ຕ່າງ­ປະ­ເທດ​ໃນທ້າຍ​ເດືອນ​ພະ­ຈິກ ຜ່ານ​ມາ ໃຫ້​ຮູ້​ວ່າ: ທາງ​ກະຊວງ​ຖະ­ແຫຼງ​ຂ່າວ ແລະ ສື່­ສານຫວຽດ­ນາມ ໄດ້ດຳ­ເນີນ​ການ​ປັບ​ໃໝ​ບັນ­ດາ​ບໍ­ລິ­ສັດ​ໂທລະ​ຄົມ​ມະນາ​ຄົມ ເຊັ່ນ: ບໍ­ລິ­ສັດ ຫວຽດ​ເທລ ວິນ​ໂຟນ ໂມບາຍ​ໂຟນ ຫວຽດ​ນາມໂມ​ບາຍ ແລະ ຈີ​ເທລ (GTel) ເປັນ​ຈຳ­ນວນ​ເງິນ​ທັງ​ໝົດ 1 ຕື້​ດົງ (ເທົ່າ​ກັບ 45.000 ໂດ​ລາ​ສະ­ຫະ­ລັດ) ຍ້ອນ​ລະ­ເມີດ​ເວ­ລາສຳ­ລັບ​ການ​ໂຄ­ສະ­ນາ ແລະ ການ​ຫຼຸດ​ລາ­ຄາ​ຄ່າບໍ­ລິ­ການ.

ຕາມ​ດຳ­ລັດ​ເລກ​ທີ 25 ຂອງ​ລັດ­ຖະ­ບານ ທີ່​ປະກາດ​ໃຊ້​ໃນ​ປີ 2011 ນັ້ນ ເວ­ລາ​ທີ່​ອະ­ນຸ­ຍາດ​ໃຫ້​ບໍລິ​ສັດ​ປະ­ກອບ​ການ​ໂຄ­ສະ­ນາ​ຊອກ​ລູກ​ຄ້າ ແລະ ການ​ຫຼຸດ​ລາ­ຄາ​ຄ່າ​ໃຫ້​ບໍ­ລິ­ການ​ນັ້ນ​ຕ້ອງ​ບໍ່​ກາຍ 90 ວັນ​ຕໍ່​ປີ ສ່ວນ​ການ​ໂຄ­ສະ­ນາ​ພິ­ເສດ​ນັ້ນ​ຕ້ອງ​ບໍ່​ໃຫ້ກາຍ 45 ວັນ ການ​ຫຼຸດ​ລາ­ຄາ​ຄ່າ​ບໍ­ລິ­ການ ແລະ ສິນ­ຄ້າ​ນັ້ນ ຕ້ອງ​ບໍ່​ຫຼຸດ 50% ຂອງ​ມູນ​ຄ່າ​ປົກ­ກະ­ຕິຂອງ​ສິນ­ຄ້າ ແລະ ຄ່າ​ບໍ­ລິ­ການ ທາງ​ການ​ໄດ້​ທຳການ​ປັບ​ໃໝ​ກໍ່​ຍ້ອນ​ວ່າ ບັນ­ດາ​ຫົວ­ໜ່ວຍ​ປະ­ກອບການ​ເຫຼົ່າ­ນັ້ນ​ ໄດ້​ລະ­ເມີດ​ເວ­ລາ​ທີ່​ໄດ້​ອະ­ນຸ­ຍາດ​ສຳລັບ​ການ​ໂຄ­ສະ­ນາ ກໍ່​ຄືການ​ຫຼຸດ​ລາ­ຄາ​ສິນ­ຄ້າ ແລະ ຄ່າ​ບໍ­ລິ­ການ ທັງໆ​ທີ່​ທາງ​ການ​ໄດ້​ກ່າວ​ເຕືອນມາ​ເປັນ​ເວ­ລາ​ຫຼາຍ​ຄັ້ງ​ແລ້ວ.

ຂ່າວທີ່ກ່ຽວຂ້ອງ