ເບິ່ງບ້ານເຂົາ ເອົາບົດຮຽນ - ໂດຍ: ວິເສດ ສະແຫວງສຶກສາ : ​ກາ​ນາ​ດາ ສສ ຫວຽດ­ນາມ

418 07 ທ.ວ. 2016 ຫົວຂໍ້ຂ່າວອື່ນໆ

ຄໍ​ລຳ​ປະ­ຈຳ​ວັນ​ນີ້ ມີ​ເລື່ອງ​ກ່ຽວ​ກັບ​ທາງ​ການປະ­ເທດກາ​ນາ​ດາ ໄດ້​ສ້າງ­ຕັ້ງ​ໜ່ວຍ​ງານ​ປ້ອງ​ກັນການ​ຂ້າ​ຕົວ​ຕາຍ​ຂອງ​ພົນ­ລະ­ເມືອງ ແລະ ສຸດ​ທ້າຍກ່ຽວ​ກັບ​ການ​ຈັບ​ກຸມ​ຜູ້​ຂົນ­ສົ່ງ​ສິນ­ຄ້າ​ຊະ­ນິດ​ທີ່​ເປັນອັນ­ຕະ­ລາຍ​ຕໍ່​ສັງ­ຄົມ ທີ່ ສສ ຫວຽດ­ນາມ.

ທີ່ ກາ​ນາ​ດາ: ແຫຼ່ງ​ຂ່າວ​ຕ່າງ­ປະ­ເທດ​ໃນ​ຂ້ອນທ້າຍ​ຂອງ​ເດືອນ​ພະ­ຈິກ​ຜ່ານ​ມາ ໃຫ້​ຊາບ​ວ່າ: ທ່ານ​ນາງ ເຈນ ຟິນ​ພອດ (Jane Philpott) ລັດຖະ​ມົນ­ຕີ​ກະ­ຊວງ​ສາ­ທາ­ລະ­ນະ​ສຸກ ກາ​ນາ​ດາ ໄດ້​ປະ­ກາດ​ຢ່າງ​ເປັນ​ທາງ​ການ​ກ່ຽວ​ກັບ​ການ​ຕົກລົງຂອງ​ລັດ­ຖະ­ບານ​ກາ​ນາ​ດາ ໃນ​ການ​ສ້າງ­ຕັ້ງໜ່ວຍ​ງານ​ແຫ່ງ​ຊາດ ເພື່ອ​ປ້ອງ​ກັນ​ບັນ­ຫາ​ການຂ້າ​ຕົວ​ຕາຍ​ຢູ່​ໃນ​ປະ­ເທດ.

ທ່ານ​ລັດ​ຖະ​ມັນ​ຕີ​ ໄດ້​ໃຫ້​ລາຍ​ລະ­ອຽດ​ຕື່ມ​ວ່າ: ໜ່ວຍ​ງານ​ດັ່ງ­ກ່າວ​ຈະ​ຊ່ວຍ​ພົນ­ລະ­ເມືອງ​ກາ​ນາດາ​ທຸກ​ເພດ​ທຸກ​ໄວ ແລະ ຈາກ​ທຸກ​ເງື່ອນ­ໄຂ​ທາງສັງ­ຄົມ ​ເຂົ້າ​ເຖິງ​ການ​ບໍ­ລິ­ການ​ຂອງ​ໜ່ວຍ​ງານເພື່ອ​ຊ່ວຍ​ເຂົາ­ເຈົ້າ​ໃຫ້​ພົ້ນ​ຈາກ​ຄວາມ​ພະ­ຍາ­ຍາມຂ້າ​ຕົວ​ຕາຍ.

ຂ່າວ​ໃຫ້​ຮູ້​ຕື່ມ​ວ່າ: ລັດ­ຖະ­ບານ​ກາ​ນາ​ດາ ​ໄດ້​ວາງງົບ­ປະ­ມານ ຈຳ­ນວນ 2 ລ້ານ​ໂດ​ລາ​ກາ​ນາ​ດາ (ເທົ່າ​ກັບ 1,5 ລ້ານ​ໂດລາ​ສະ­ຫະ­ລັດ) ເຂົ້າ​ໃນໂຄງ­ການ​ດັ່ງ­ກ່າວ ​ທີ່​ມີ​ອາ­ຍຸ​ການ­ເຄື່ອນ­ໄຫວ 5 ປີ ໜ່ວຍ​ງານ​ແຫ່ງ​ຊາດ​ເພື່ອ​ປ້ອງ​ກັນ​ການ​ຂ້າ​ຕົວຕາຍ​ນີ້​ ມີ​ກົນ​ໄກ​ຮ່ວມ​ມື​ກັບ​ຫຼາຍ​ກວ່າ 30 ອົງ­ການຈັດ​ຕັ້ງ​ຊຸມ​ຊົນ ຮູບ​ການການ­ເຄື່ອນ­ໄຫວກໍ່​ຄື ​ນຳໃຊ້​ເຄື່ອງ­ມື​ເຕັກ​ໂນ​ໂລຊີ​ທັນ​ສະ­ໄໝ​ໃນ​ການ​ສົ່ງ​ຂໍ້ຄວາມ​ໂອ້​ລົມ​ໃຫ້​ຄຳ​ປຶກ­ສາ​ຫາ­ລື​ ໂດຍ​ຜ່ານ​ເຄືອຂ່າຍ​ໜ່ວຍ​ບໍ­ລິ­ການ​ໃຫ້​ຄຳ​ປຶກ­ສາ​ຫາ­ລື​ລະ­ດັບເຂດ ແຂວງ ແລະ ທ້ອງ­ຖິ່ນ ​ໃນ​ທົ່ວ​ປະ­ເທດ.

ເມື່ອ​ແຜນ­ການ​ພັດ­ທະ­ນາ​ໜ່ວຍ​ງານ​ດັ່ງ­ກ່າວສຳ­ເລັດ​ສົມ­ບູນ​ແບບ​ພາຍ​ໃນ​ປີ 2017 ພົນ​ລະເມືອງ​ທັງ​ໝົດ​ທີ່​ມີ​ບັນ­ຫາ​ໃນລະ­ດັບ​ໂສ​ສຸດ​ໂສ​ສ້ຽງກັບ​ຊີ­ວິດ ຈະ​ສາ­ມາດ​ເຂົ້າ​ເຖິງ​ການ​ບໍ­ລິ­ການ​ໂດຍ​ບໍ່ໄດ້​ເສຍ​ຄ່າ​ຕະ­ຫຼອດ 24 ຊົ່ວ­ໂມງ ຢູ່​ທຸກ​ຈອກທຸກແຈ​ຂອງ​ປະ­ເທດ ໜ່ວຍ​ງານ​ຮັບ­ປະ­ກັນ​ການ​ຮັກ­ສາຄວາມ​ລັບ​ໃຫ້​ສ່ວນ​ບຸກ­ຄົນ ກາ​ນາ​ດາ​ມີ​ເຄືອ​ຂ່າຍສາຍ​ດ່ວນ​ແຈ້ງຄວາມ​ສິ້ນ​ຫວັງ (The Canadian Distress Line Network) ເຊິ່ງ​ໄດ້​ຮັບການ​ສ້າງ­ຕັ້ງ​ຂຶ້ນ​ກ່ອນ​ໜ້າ​ແລ້ວ ແລະ ໄດ້ສຳ­ເລັດບັ້ນ​ທົດ​ລອງ​ໃນ 3 ແຂວງ​ຂອງ​ປະ­ເທດ ເຊັ່ນ: ແຂວງ​ບຼິດ​ທິດໂຄ​ລຳ​ເບຍ ອອນ​ເບີ​ທາ ແລະ ອອນເທຣິ​ໂອ ເຄືອຂ່າຍ​ນີ້​ແມ່ນ​ກົນ​ໄກ​ຮ່ວມ​ມື​ແຫ່ງ​ຊາດຂອງ​ບັນ­ດາ​ອົງ​ການ­ຈັດ­ຕັ້ງ ​ທີ່​ເຮັດ​ໜ້າ­ທີ່​ແກ້​ໄຂບັນ­ຫາ​ທາງ​ຈິດ­ໃຈ​ຂອງ​ພົນ­ລະ­ເມືອງ​ທີ່​ເປັນ​ຊະນວນ​ໃຫ້​ຂ້າ​ຕົວ​ຕາຍໃນ​ແຕ່​ລະ​ປີ ​ເຄືອ​ຂ່າຍ​ນີ້​ໄດ້ແກ້​ໄຂ​ບັນ­ຫາ​ຂ້າ​ຕົວ​ຕາຍ​ຫຼາຍ​ກວ່າ 75.000 ກໍລະ​ນີ ດ້ວຍການ​ໂທ ການ​ສົ່ງ​ຂໍ້­ຄວາມ ການ​ໃຫ້ການ​ປຶກ­ສາ​ຫາ­ລື​ຫຼາຍ​ກວ່າ 650.000 ຄັ້ງ.

ທີ່ ສສ ຫວຽດ­ນາມ: ໜັງ­ສື­ພິມ​ວຽງ​ຈັນ​ທາມ  (Vientiane Times) ສະ­ບັບ​ວັນ​ທີ 28 ເດືອນພະ­ຈິກ ຜ່ານ​ມາ ໄດ້​ເວົ້າ​ກ່ຽວກັບ​ການ​ຈັບ​ກຸມ​ຜູ້ຂົນ­ສົ່ງ​ງູ​ເຫົ່າ​ຢູ່​ຫວຽດ­ນາມ ຂ່າວ​ໃຫ້​ລາຍ​ລະ­ອຽດວ່າ: ເຈົ້າ​ໜ້າ­ທີ່​ຕຳ­ຫຼວດ​ຫວຽດ­ນາມ​ ສາ­ມາດ​ຈັບກຸມ​ຜູ້ຂົນ​ຍ້າຍ​ງູ​ເຫົ່າ ຈຳ­ນວນ 120 ໂຕ ນ້ຳ­ໜັກ 220 ກິ​ໂລ ຈາກ​ແຂວງ​ດັກ​ນົງ ໄປ​ນະ­ຄອນ​ໂຮ່​ຈີ​ມິງ ງູ​ທັງ​ໝົດ​ຖືກ​ຊຸກ­ເຊື່ອງ​ໄວ້ກັບ​ຢາງ 15 ກັບ ຜູ້​ຂັບ​ລົດໂດຍ­ສານເຊິ່ງ​ມີ​ຜູ້­ໂດຍ­ສານ​ຮ່ວມ​ທາງ​ນຳ 4 ຄົນນັ້ນ​ຖືກ​ຈັບ​ກຸມ ເຂົາ​ສາ­ລະ­ພາບ​ວ່າ: ໄດ້​ຖື​ກວ່າຈ້າງໃຫ້​ນຳ​ສົ່ງ​ງູ​ເຫົ່າ​ທີ່​ມີ​ຕົ້ນ​ທາງ​ແຕ່​ແຂວງວິງ​ຟຸກ ທາງ​ພາກ​ເໜືອ​ ໄປ​ນະ­ຄອນ​ໂຮ່​ຈີ​ມິງ ສສ ຫວຽດນາມ ໄດ້​ອອກ​ກົດ​ລະ­ບຽບ​ຫ້າມ​ຂົນ­ສົ່ງ​ສິນ­ຄ້າ​ທີ່ເປັນ​ໄພ​ອັນ­ຕະ­ລາຍ​ຕໍ່​ຄົນ​ໃນ​ພາ­ຫາ​ນະ​ສາ​ທາ​ລະນະ.

ຂ່າວທີ່ກ່ຽວຂ້ອງ