ຂ່າວຫຼ້າສຸດ

ປ້ຳ­ນ້ຳ­ມັນ ແລະ ການ​ບໍ­ລິ­ການ​ປິ່ນ​ອ້ອມ - ໂດຍ : ທິດ​ດີ

848 07 ທ.ວ. 2016 ນານາສາລະ

ສອງ​ສາມ​ປີມາ​ນີ້ ຜູ້​ຂຽນ​ສັງເກດ​ເວ­ລາ​ມີ​ໂອກາດ​ໄປ​ປະ­ຕິ­ບັດ​ໜ້າ­ທີ່​ຢູ່​ຕ່າງ​ແຂວງ... ບໍ່​ວ່າ​ຈະ​ຂຶ້ນເໜືອ​ລົງ​ໃຕ້ ເຫັນ​ວ່າ​ທຸ­ລະກິດ​ປ້ຳ­ນ້ຳ­ມັນ​ເຟື່ອງ​ຟູ​ທີ່​ສຸດ ເວົ້າ​ແນວ​ນີ້​ບໍ່​ໝາຍ​ຄວາມ​ວ່າ​ຢູ່​ນະ­ຄອນ­ຫຼວງ ບໍ່​ຫຼາຍ ບໍ່​ແມ່ນ​ນໍ? ຢູ່​ນະ­ຄອນ­ຫຼວງ ປ້ຳ­ນ້ຳ­ມັນແຂ່ງກັນເລື່ອງ​ທຸ­ລະ​ກິດ​ບໍ­ລິ­ການ​ປິ່ນ​ອ້ອມ ເຊັ່ນ: ຮ້ານອາ­ຫານ ຮ້ານ​ສະ­ດວກ​ຊື້ ຮ້ານ​ກາ­ເຟ...

ອາ­ທິດ​ຜ່ານ​ມາ​ນີ້ ມີ​ໂອ­ກາດ​ລົງ​ໄປ​ໃຕ້ ປາ­ກົດວ່າ ​ອອກ​ຈາກ​ນະ­ຄອນ­ຫຼວງ​ກໍ່​ເຫັນ​ການ​ກໍ່­ສ້າງ​ປ້ຳນ້ຳ­ມັນ​ຈາກ​ຫຼາຍ​ບໍ­ລິ­ສັດ​ພວມ​ດຳ­ເນີນ​ຢ່າງ​ຫຼວງຫຼາຍ​ພາຍ​ມາກ​ແທ້ໆ ເມື່ອ​ເປັນ​ເຊັ່ນ​ນີ້​ຜູ້​ຂຽນ​ກໍ່​ສັງເກດ​ຜ່ານ​ການ​ເຂົ້າ​ໃຊ້​ບໍ­ລິ­ການ​ຫ້ອງ​ນ້ຳ ປາ­ກົດວ່າ ຫ້ອງ​ນ້ຳ​ສະ­ອາດ​ຖືກ​ເອົາ­ໃຈ­ໃສ່​ເກືອບ​ວ່າ 80% ຍິ່ງ​ກວ່າ​ນັ້ນ ຍັງ​ມີ​ຮ້ານ​ສະ­ດວກ​ຊື້ ຮ້ານ​ອາ­ຫານ ຮ້ານ​ກາ­ເຟ ປາ­ກົດຕົວ​ຂຶ້ນ​ແບບ​ດຽວ​ກັນ​ກັບ​ຢູ່​ນະຄອນ​ຫຼວງ ມີ​ມາດ­ຕະ­ຖານ​ສ່ຳ​ດຽວ​ກັນ ອັນ​ນີ້​ຖື​ວ່າເປັນ​ຈຸດ​ດີ​ຂອງ​ຄົນ​ເດີນ­ທາງ ແລະ ທ່ອງທ່ຽວ​ທີ່ເຂົ້າ​ໄປ​ໃຊ້​ບໍ­ລິ­ການ ແລະ ມັນ​ກໍ່​ເປັນ​ການ​ຍົກ​ລະດັບ​ປ້ຳ­ນ້ຳ­ມັນ​ໃນ​ປະ­ເທດ​ເຮົາ​ໃຫ້​ທຽບ​ທັນ​ກັບ​ປະເທດ​ອາ​ຊຽນດ້ວຍ​ກັນ.

ແຕ່​ນີ້​ຕໍ່​ໄປ​ການ​ແຂ່ງ­ຂັນ​ຂອງ​ປ້ຳ­ນ້ຳ­ມັນ​ທັງຫຼາຍ ບໍ່​ແມ່ນ​ແຕ່​ຈະ​ເນັ້ນ​ເລື່ອງ​ພະ­ນັກ­ງານ​ຂາຍນ້ຳ­ມັນ ໃນ​ການ​ບໍ­ລິ­ການການ­ບີບ​ນ້ຳ­ມັນ​ເຕັມ​ຕາມອັດ­ຕາ​ອີກ​ແລ້ວ ມັນ​ຈະ​ກວມ​ໄປ​ເຖິງ​ຫ້ອງ​ນ້ຳ​ສະອາດ... ຮ້ານ​ສະ­ດວກ​ຊື້ ຮ້ານ​ອາ­ຫານ​ຕາມ​ສັ່ງ

ແລະ ຮ້ານ​ກາ­ເຟ​ຍີ່­ຫໍ້​ລະ­ດັບ​ໂລກ... ຫາກ​ປ້ຳໃດ​ບໍ່​ມີ​ສິ່ງ​ເຫຼົ່າ​ນີ້ ຈະ​ຖືກ​ປ້ຳ​ອື່ນ​ດຶງ​ລູກ​ຄ້າໄປ​ໃນ​ທີ່ສຸດ ອັນ​ນີ້​ຜູ້​ຂຽນ​ເຫັນ​ກັບຕາ​ໃນ​ການ​ເດີນ­ທາງ​ຄັ້ງນີ້.

ເວົ້າ​ເລື່ອງ​ປ້ຳ­ນ້ຳ­ມັນ ແລະ ຫ້ອງ​ນ້ຳ​ສະ­ອາດ​ນີ້ ປະ­ເທດ​ເພື່ອນ​ບ້ານ​ເຂົາ​ອອກ​ຂໍ້​ບັງ­ຄັບ​ວ່າ​ ເວ­ລາສ້າງ​ປ້ຳ­ນ້ຳ­ມັນ​ຕ້ອງ​ມີຫ້ອງ​ນ້ຳ​ສະ­ອາດ ບໍ່​ຊັ້ນ​ເຂົາບໍ່​ອະ­ນຸ­ຍາດ​ໃຫ້​ສ້າງ... ເວົ້າ​ແນວ​ນີ້​ບໍ່​ໝາຍ​ຄວາມວ່າ ບ້ານ​ເຮົາ​ຈະ​ບໍ່​ມີ​ນໍ? ຜ່ານ​ການ​ເດີນ­ທາງກໍ່ເຫັນ​ວ່າ​ມີ​ແຕ່​ບາງ​ປ້ຳ​ຂີ້­ຮ້າຍ​ໂພດ... ບໍ່​ເອົາ­ໃຈ­ໃສ່ ແລະ ປັບ­ປຸງ​ແກ້​ໄຂ​ເລີຍ ເປັນ​ສາ­ເຫດ​ໃຫ້​ລູກ​ຄ້າຫັນ​ໄປ​ຊື້​ບໍ­ລິ­ການ​ປ້ຳອື່ນ ອັນ​ນີ້​ເປັນ​ເລື່ອງ​ທີ່​ເຈົ້າຂອງ​ປ້ຳນ້ຳ­ມັນ​ທັງ­ຫຼາຍ​ຄວນ​ໄດ້​ຄຳ­ນຶງ ບໍ່​ຄວນຖື​ເບົາ​ນໍ?.

ສາ­ມາດ​ເວົ້າ​ໄດ້​ວ່າ ຕະ­ຫຼາດ​ນ້ຳ­ມັນ​ບ້ານ​ເຮົາຂະ­ຫຍາຍ­ຕົວ​ໄວ​ຫຼາຍ ເຖິງ​ແມ່ນ​ວ່າ​ເປັນ​ການ​ນຳເຂົ້າ 100% ແຕ່​ຕະ­ຫຼາດ​ກໍ່ເຕີບ​ໂຕ​ຂຶ້ນ​ໄປ​ເລື້ອຍໆ ໃນ​ການ​ເຕີບ​ໂຕ​ນັ້ນ ບັນ­ດາ​ຄູ່​ແຂ່ງ​ຈາກ​ປະ­ເທດເພື່ອນ​ບ້ານ​ກໍ່​ເຂົ້າ​ມາ​ລົງ­ທຶນ​ສ້າງ​ປ້ຳ­ນ້ຳ­ມັນ​ກັນ​ພໍສົມ­ຄວນ ສະ­ນັ້ນ ການ​ຕໍ່­ສູ້​ກັນ​ລະ­ຫວ່າງ​ນັກ​ລົງທຶນ​ພາຍ​ໃນ ແລະ ຕ່າງ­ປະ­ເທດ ​ເປັນ​ສິ່ງ​ທີ່​ຫຼີກ​ລ້ຽງບໍ່​ໄດ້ ສະ­ນັ້ນ ປ້ຳ­ນ້ຳ­ມັນທີ່​ເປັນ​ຂອງ​ນັກ​ລົງ­ທຶນພາຍ​ໃນ ​ຈຶ່ງ​ຈຳ­ເປັນ​ຕ້ອງ​ໄດ້​ປັບ­ປຸງ​ແກ້​ໄຂ​ໜ້າ​ວຽກບໍ­ລິ­ການ​ຂອງ​ຕົນ​ໃຫ້​ນັບ​ມື້​ນັບ​ດີ​ຂຶ້ນ ຖ້າ​ບໍ່​ຢາກສ່ຽງຕໍ່​ການ​ລົ້ມ​ລະ­ລາຍ.

ໃຜ​ຈະ​ຄອງ​ຕະ­ຫຼາດ... ໃຜ​ຈະ​ລົ້ມ​ລະ­ລາຍ​ ຄົງ​ຢູ່ທີ່​ການ​ບໍ­ລິ­ການ​ປິ່ນ​ອ້ອມ ບໍ່​ແມ່ນ​ຊິ​ຂາຍ​ນ້ຳ­ມັນຢ່າງ​ດຽວ.

ຂ່າວທີ່ກ່ຽວຂ້ອງ