ຂ່າວຫຼ້າສຸດ

ຮູ້ພາສາລາວ ມື້ລະຄຳ : ເຜິ້ງ​ແຜ່ນ​ດຽວ

439 07 ທ.ວ. 2016 ຫົວຂໍ້ຂ່າວອື່ນໆ

ສຳ­ນວນ​ປຽບ­ທຽບ ມີ​ຄວາມ​ໝາຍ​ບໍ່​ກົງ​ຕາມ​ຕົວ​ອັກ­ສອນ ເປັນ​ຄຳ​ນາມ​ວະ­ລີ​ຈາກ​ການ​ປະ­ສົມ​ຄຳ​ລະ­ຫວ່າງ ເຜິ້ງ ໝາຍ​ເຖິງ ໄຂ­ມັນ​ຂອງ​ຮັງ​ເຜິ້ງ​ທີ່​ນຳ​ມາ​ເຮັດ​ທູບ​ທຽນ ຊຶ່ງ​ເປັນ​ພູມ​ປັນ­ຍາ​ຂອງ​ຄົນ​ລາວ​ມາ​ແຕ່​ເຄົ້າ ແລະ ແຜ່ນ​ດຽວ ກໍ​ເປັນ​ຄຳ​ປະ­ສົມ ໝາຍ​ເຖິງ ກ້ອນ​ເຜິ້ງ​ຮ້ອນ​ທີ່​ລະ­ລາຍ​ແລ້ວ ນຳ​ມາ​ຖອກ​ໃສ່​ໃສ່​ຈານ ຈຶ່ງ​ກາຍ­ເປັນ​ແຜ່ນ. ດ້ານ​ຄວາມ​ໝາຍ​ທາງ​ອ້ອມ​ແມ່ນ​ໝາຍ​ເຖິງ ບ່າວ​ສາວ​ທີ່​ແຕ່​ດອງ​ກັນ​ແລ້ວ​ກໍ​ກາຍ­ເປັນ​ຜົວ​ເປັນ​ເມຍ​ຄອບ­ຄົວ​ດຽວ​ກັນ. ພໍ່​ແມ່​ພີ່­ນ້ອງ​ສອງ​ຝ່າຍ​ກໍ​ກາຍ­ເປັນ​ພີ່­ນ້ອງ​ດຽວ​ກັນ​ອີກ. ເຜິ້ງ​ແຜ່ນ​ດຽວ ມີ​ຄວາມ​ໝາຍ​ດຽວ​ກັບ​ທອງ​ແຜ່ນ​ດຽວ ຈຶ່ງ​ພົບ​ເຫັນ​ໃຊ້​ກ່າວ​ເວົ້າ​ໃນ​ພິ­ທີ​ສູ່­ຂວັນ​ກິນ​ດອງ​ສະ­ເພາະ.

ໃນ​ຊີ­ວິດ​ປະ­ຈຳ​ວັນ ກໍ​ພົບ​ເຫັນ​ໃຊ້​ເວ­ລາ​ບ່າວ​ສາວ​ແອ່ວ​ກັນ​ໃໝ່ ເພື່ອ​ສະ­ແດງ​ຄວາມ​ຫວັງ​ຕັ້ງ­ໃຈ​ໄວ້. ໃນ​ວັນ­ນະ­ຄະ­ດີ​ລາວ​ເກົ່າ​ກໍ​ພົບ​ເຫັນ​ໃຊ້​ໃນ​ຄຳ​ຜະ­ຫຍາ​ເຊັ່ນ​ກັນ.

ຕົວ­ຢ່າງ:

ນ້ອງ​ບໍ່​ໄດ້​ຄຶດ​ຫຼີກ­ເວັ້ນ       ອ້າຍ​ພີ່​ພໍ​ຍາມ

ນ້ອງ​ຢາກ​ທົງ​ທຽມ​ບາ        ດັ່ງ​ເງົາ​ທຽມ​ຂ້າງ​ຂ້າງ

ນ້ອງ​ຢາກ​ຕີ​ຕົນ​ເຂົ້າ          ທຽມ​ຕົນ​ຕິດ­ຕໍ່

ນ້ອງ​ຢາກ​ຫຼອມ​ຫຼໍ່​ໄວ້        ເປັນ​ເຜິ້ງ​ແຜ່ນ​ດຽວ ອ້າຍ​ເອີຍ

ໃນ​ທາງ​ພາ­ສາ​ສາດ ເຜິ້ງ​ແຜ່ນ​ດຽວ ເອີ້ນ​ວ່າ ຄຳ​ປຽບ­ທຽບ (metaphor) ຫຼື​ຄຳ​ສັນ­ຍະ­ລັກ (Symbol word) ທີ່​ບໍ່​ມີ​ຄວາມ​ໝາຍ​ກົງ​ກັບ​ຕົວ​ອັກ­ສອນ ຈຶ່ງ​ສ້າງ​ຮູບ​ພາບ​ເປັນ​ໄນ​ໄດ້​ເລິກ​ເຊິງ​ຫຼາຍ.

ຂ່າວທີ່ກ່ຽວຂ້ອງ