ຂ່າວຫຼ້າສຸດ

ເບິ່ງບ້ານເຂົາ ເອົາບົດຮຽນ - ໂດຍ: ວິເສດ ສະແຫວງສຶກສາ : ​ອິນ​ໂດ​ເນ​ເຊຍ ສປ ຈີນ ມຽນ​ມາ

525 30 ພ.ຈ. 2016 ຫົວຂໍ້ຂ່າວອື່ນໆ

ຄໍ​ລຳ​ປະ­ຈຳ​ວັນ​ນີ້ ມີ​ເລື່ອງ​ການ​ຈັບ​ກຸມ​ຄົນ​ລັກລອບ​ຕັດ​ໄມ້​ຢູ່​ອິນ​ໂດ​ເນ​ເຊຍ ມາດ​ຕະ­ການ​ດ້ານ​ກົດໝາຍ​ຂອງ ສປ ຈີນ ໃນການ​ຄຸ້ມ​ຄອງ​ອຸດ­ສາ­ຫະ­ກຳຮູບ­ເງົາ ແລະ ສຸດ​ທ້າຍແມ່ນ​ຂ່າວ​ກ່ຽວ​ກັບ​ຄະ­ດີໝິ່ນ­ປະ­ໝາດ​ສາ­ສະ­ໜາ​ຢູ່ມຽນ​ມາ.

ທີ່ ອິນ​ໂດ​ເນ​ເຊຍ: ໜັງ­ສື­ພິມ​ວຽງ​ຈັນ​ທາມ ສະບັນ​ວັນ​ທີ 25 ເດືອນ​ຕຸ­ລາ ປີ​ນີ້ ມີ​ຂ່າວ​ຍ່ອຍ​ກ່ຽວ​ກັບການ​ຈັບ​ກຸມ​ຜູ້​ລັກ­ລອບຕັດ​ໄມ້​ສອງ​ຄົນ​ຢູ່​ແຂວງຣຽວ (Riau) ອິນ​ໂດ​ເນ​ເຊຍ ຜູ້​ຕິດ​ຄະ­ດີ​ສອງ​ຄົນ​ນັ້ນ​ຮູ້ເປັນ​ຊື່​ຫຍໍ້​ວ່າ YD ແລະ SF ທັງ​ສອງ​ລັກ­ລອບຕັດ​ໄມ້​ລຽບ​ຕາມ​ເສັ້ນ­ທາງ​ຫຼວງ ​ຜ່ານ​ບ້ານ​ເມັງກາປັນ (Mengkapan) ຫົວ­ໜ້າ​ເຈົ້າ​ໜ້າ­ທີ່​ຕຳ­ຫຼວດ ຊື່ ເຣດ​ສະ­ຕິ​ກາ ໃຫ້​ລາຍ​ລະ­ອຽດ​ວ່າ ຜູ້​ກະ­ທຳ​ຜິດທັງ​ສອງ​ຖືກ​ຈັບ​ໄດ້​ໃນ​ຂະ­ນະ​ເຈົ້າ​ໜ້າ­ທີ່​ເຄື່ອນ​ໄຫວປາບ​ປາມ ໄມ້​ທີ່​ຢຶດ​ໄດ້​ນັ້ນ​ແມ່ນ​ຊະ­ນິດ​ລາ­ຄາ​ແພງ ຊື່ ປູ​ນັກ (Punak) ຈຳ­ນວນ 4 ແມັດ​ກ້ອນ ຕັດເປັນ​ທ່ອນ​ນ້ອຍໆ ເຄື່ອງ­ມື​ອື່ນ​ທີ່​ຢຶດ​ໄດ້​ກໍ່​ມີ ຈັກ​ສະຕິນ ແລະ ລົດ­ຖີບ​ສອງ​ຄັນ​ທີ່​ປັບ​ຮູບ​ປະ­ພັນ​ເປັນ​ລໍ້​ບັນທຸກ​ໄມ້​ຈາກ​ປ່າ​ເລິກ ຂ່າວ​ບໍ່​ໄດ້​ບອກ​ວ່າ­ການ​ລົງໂທດ​ນັ້ນ​ໜັກ​ເບົາ​ສ່ຳ​ໃດ ແຕ່​ຖ້າ​ທຽບ​ກັບ​ການ​ລັກລອບ​ຕັດ​ໄມ້​ໃນ​ປ່າ ກໍ່​ຄືການ​ລັກ­ລອບ​ສົ່ງ​ອອກ​ໄມ້​ຢູ່ປະ­ເທດ​ເຮົາແລ້ວ ​ຄະ­ດີ​ຢູ່​ອິນ​ໂດ​ເນ​ເຊຍ​ນີ້​ຖືວ່າ​ນ້ອຍທີ່​ສຸດ ແຕ່​ພວກ​ເຂົາ​ຖື​ວ່າ​ສຳ­ຄັນ​ລະ­ດັບ​ເປັນ​ຂ່າວສາ­ກົນ ​ໃຫ້​ໂລກ​ຊາບ​ກ່ຽວ​ກັບ​ຄວາມ​ເດັດ­ຂາດ​ຂອງເຈົ້າ​ໜ້າ­ທີ່ຕຳ­ຫຼວດ​ບ້ານ​ເພິ່ນ.

ທີ່ ສປ ຈີນ: ໃນ​ວັນ​ຈັນ ວັນ​ທີ 7 ເດືອນ​ພະ­ຈິກ ປີ​ນີ້ ທາງ​ການ ສປ ຈີນ ໄດ້​ຮັບ­ຮອງ​ເອົາ​ກົດ­ໝາຍຄຸ້ມ​ຄອງ​ອຸດ­ສາ­ຫະ­ກຳຮູບ­ເງົາ ເພື່ອ​ຮັບ­ປະ­ກັນ​ກຽດ ສັກ​ສີ ແລະ ຜົນ​ປະ­ໂຫຍດ​ແຫ່ງ​ຊາດ ກໍ່​ຄືເພື່ອ​ເສີມຂະ­ຫຍາຍ​ຄຸນ­ຄ່າ​ທີ່​ເປັນ​ພື້ນ­ຖານ​ຂອງລະ­ບອບ​ສັງຄົມ​ນິ­ຍົມ ເພີ່ມ​ພູນ​ຄູນ​ສ້າງ​ຄວາມ​ອຸ­ດົມ­ສົມ­ບູນ​ທາງດ້ານ​ຈິດ­ໃຈ ແລະ ຊີ­ວິດ​ວັດ­ທະ­ນະ­ທຳ​ຂອງ​ທົ່ວ​ປວງຊົນ ທັງ​ເປັນ​ການ​ສ້າງ​ພື້ນ­ຖານ​ດ້ານ​ລະ­ບຽບ​ການ ໃນ​ການ​ພັດ­ທະ­ນາ​ອຸດ­ສາ­ຫະ­ກຳ​ຮູບ­ເງົາ ນອກ­ຈາກໄດ້​ກຳ­ນົດ​ເປົ້າ​ໝາຍສົ່ງ­ເສີມ​ແລ້ວ ກົດ­ໝາຍ​ຍັງ​ໄດ້ວາງ​ຂໍ້​ຫ້າມ​ຫຼາຍໆ​ປະ­ການ ເຊັ່ນ: ຫ້າມ​ສ້າງ​ຮູບເງົາ​ທີ່​ມີ​ເນື້ອ​ໃນ​ຂັດ​ກັບ​ລັດ​ຖະ​ທຳ​ມະ­ນູນ ແລະ ກົດໝາຍ ​ທຳ­ລາຍ​ຄວາມ​ເປັນ​ເອ­ກະ​ພາບ ອະ­ທິ­ປະ​ໄຕ ແລະ ຜືນ​ແຜ່ນ­ດິນ​ອັນ​ຄົບ​ຖ້ວນ​ແຫ່ງ​ຊາດ ເປີດ­ເຜີຍຄວາມລັບ​ຂອງ​ຊາດ ທຳ­ລາຍ​ຄວາມ​ສະ­ຫງົບ ກຽດ ສັກ​ສີ ຜົນ​ປະ­ໂຫຍດ​ຂອງ​ຊາດ ກໍ່​ຄືເນື້ອ​ໃນ​ທີ່​ເປັນຊະ​ນວນ​ກໍ່­ໃຫ້­ເກີດ​ມີ​ລັດ­ທິກໍ່​ການ​ຮ້າຍ ແລະ ນິ­ຍົມການ​ໃຊ້​ຄວາມ​ຮຸນ​ແຮງ ກົດ­ໝາຍ​ຍັງ​ໄດ້​ກຳ­ນົດຫ້າມ​ບໍ­ລິ­ສັດ​ຮູບ­ເງົາ​ຈີນ ​ວ່າ​ຈ້າງ ຫຼື ຮ່ວມ​ມື​ກັບ​ບໍລິ​ສັດ​ຮູບ­ເງົາ​ຕ່າງ­ປະ­ເທດ ຊຶ່ງ​ມີ​ທັດ­ສະ­ນະ​ເປັນ​ອັນຕະ​ລາຍ​ຕໍ່​ກຽດ ​ສັກ​ສີ ເປັນ​ໄພ​ຕໍ່​ສະ­ຖຽນ​ລະ​ພາບທາງ​ສັງ­ຄົມ ແລະ ຄວາມ​ຮູ້­ສຶກ​ທາງ​ດ້ານ​ຈິດ­ໃຈຂອງ​ປະ­ຊາ­ຊົນ​ຈີນ ບໍ­ລິ­ສັດ​ຮູບ­ເງົາ​ໃດຝ່າ­ຝືນ​ຂໍ້​ຫ້າມນີ້​ຈະ​ຖືກ​ປັບ​ໃໝ​ເປັນ​ເງິນ​ໃນ​ມູນ​ຄ່າ 5 ທົບ​ເທົ່າ​ຂອງຈຳ­ນວນ​ເງິນ​ທີ່​ໄດ້​ຈາກ​ທຸ­ລະ​ກິດ​ພິມ​ຮູບ­ເງົາ​ທີ່​ຜິດກົດ­ໝາຍ​ນັ້ນໆ ຂໍ້​ຫ້າມ​ອື່ນໆ​ໄດ້​ກຳ­ນົດ​ຕື່ມ​ວ່າ ຫ້າມສ້າງຮູບ­ເງົາ​ທີ່​ມີ​ເນື້ອ​ໃນ​ລະ­ເມີດ​ນະ­ໂຍ­ບາຍ​ແຫ່ງຊາດ​ ຕໍ່​ສາ­ສະ­ໜາ ຫ້າມ​ແຜ່​ຂະ­ຫຍາຍ​ລັດ­ທິ​ບູ­ຊາບຸກ­ຄົນ ການ​ເຊື່ອ​ຖື​ງົມ­ງວາຍ ກໍ່​ຄືການ​ໝິ່ນ​ປະໝາດ ແລະ ການ​ໃສ່​ຮ້າຍ​ປ້າຍ​ສີ​ຄົນ​ອື່ນ.

ທີ່ ມຽນ​ມາ: ໜັງ­ສື­ພິມ​ເດິ​ເນ​ເຊິນ (The Nation) ສະ­ບັບ​ວັນ​ທີ 10 ເດືອນ​ພະ­ຈິກ ປີ​ນີ້ ໄດ້​ສັງລວມ​ຄະ­ດີ​ຄົນ​ຕ່າງ­ປະ­ເທດ​ທີ່​ມີ​ພຶດ­ຕິ​ກຳ​ໝິ່ນ​ປະໝາດ​ສາ­ສະ­ໜາ​ໃນ​ມຽນ​ມາ​ ທີ່​ເກີດ​ຂຶ້ນ​ແຕ່​ປີ 2014 ເຖິງ​ປັດ­ຈຸ­ບັນ ໂດຍ​ເລີ່ມ​ຈາກ​ຄະ­ດີ​ນັກ​ທ່ອງ​ທ່ຽວ ອີຕາ​ລີ ຖືກ​ເນ­ລະ­ເທດ​ໃນ​ວັນ​ທີ 8 ເດືອນ​ພະ­ຈິກ​ນີ້ ຍ້ອນ​ສັກ​ລາຍ​ຮູບ​ພະ​ໃສ່​ຂາ​ຊ້າຍ ຄະ­ດີ​ແບບ​ດຽວກັນ​ນີ້​ເຄີຍ​ເກີດ​ຂຶ້ນ​ໃນເດືອນ​ກໍ­ລະ­ກົດ​ປີ​ນີ້​ ກັບ​ນັກທ່ອງ​ທ່ຽວ ​ແອດ​ສະ​ປາຍ ແລະ ກັບ​ນັກ​ທ່ອງ​ທ່ຽວ ກາ​ນາ​ດາ ໃນ​ປີ 2014 ທັງ​ສອງ​ຖືກ​ເນ­ລະ­ເທດ​ໂດຍໄວ ໃນ​ປີ 2015 ຄົນ​ນິວ​ຊີ​ແລນ ເຈົ້າ​ຂອງ​ບາ​ເຄື່ອງດື່ມ​ຖືກ​ຈັບ​ກຸມ ແລະ ຮັບ​ໂທດ​ຕິດ​ຄຸກ 10 ເດືອນ ທັງ​ຖືກບັງ­ຄັບ​ໃຊ້​ແຮງ​ງານ​ໜັກ ຍ້ອນ​ໃຊ້​ຮູບ​ພະ​ໂຄສະ​ນາ​ຂາຍ­ເຄື່ອງ​ດື່ມ​ປະ­ຈຳ​ຮ້ານ ແລະ ໃນ​ເດືອນຕຸ­ລາ​ປີ​ນີ້ ນັກ​ທ່ອງ​ທ່ຽວໂຮນ​ລັງ ກໍ່​ຖືກ​ລົງ­ໂທດ​ຈຳຄຸກ 3 ເດືອນ ບວກ​ກັບ​ອອກ­ແຮງ​ງານ​ໜັກ​ ຍ້ອນ​ພະຍາດ​ມື​ໄວ ​ໄປ​ລັກ​ຖອດ​ສາຍ​ເຄື່ອງ​ຂະ­ຫຍາຍ​ສຽງບົດ​ໄຫວ້​ພະ​ໃນ​ວັດ​ແຫ່ງ​ໜຶ່ງ​ ທີ່​ເມືອງ​ມັນ​ດາ​ເລ.

ຂ່າວທີ່ກ່ຽວຂ້ອງ