ຂ່າວຫຼ້າສຸດ

ເບິ່ງບ້ານເຂົາ ເອົາບົດຮຽນ - ໂດຍ: ວິເສດ ສະແຫວງສຶກສາ : ​ອິນ​ໂດ​ເນ​ເຊຍ ຝຣັ່ງ

478 29 ພ.ຈ. 2016 ຫົວຂໍ້ຂ່າວອື່ນໆ

ມື້­ນີ້​ໄປ​ເບິ່ງ​ແຜນ​ພັດ­ທະ­ນາ​ການ­ທ່ອງ­ທ່ຽວໂດຍເອົາ​ບ້ານ​ເປັນ​ໜ່ວຍ​ສຳ­ຄັນ​ຢູ່​ປະ­ເທດ​ອິນ​ໂດ​ເນ​ເຊຍ ແລ້ວ​ຕໍ່​ໃສ່​ເລື່ອງ​ຄົນ​ຫົວ​ໃສ ແຕ່​ໃຈ​ຄົດ ຫວັງ​ຕົບ​ຕາທາງ​ການເພື່ອ​ເອົາ​ເງິນ ເລື່ອງ​ນີ້​ເກີດ​ຂຶ້ນ​ຢູ່​ປະ­ເທດຝຣັ່ງ.

ທີ່​ ອິນ​ໂດ​ເນ​ເຊຍ: ຂ່າວ​ຕ່າງ­ປະ­ເທດ​ໃນ​ທ້າຍເດືອນ​ພະ­ຈິກ​ນີ້​ໃຫ້​ຮູ້​ວ່າ: ລັດ­ຖະ­ບານ​ອິນ​ໂດ​ເນ​ເຊຍ ໄດ້​ກຳ­ນົດ​ແຜນ​ສົ່ງ­ເສີມ​ກິດ​ຈະ​ການ­ທ່ອງ­ທ່ຽວ​ຂັ້ນຊຸມ​ຊົນ​ລະ­ດັບ​ບ້ານ ເພື່ອ​ດຶງ​ດູດ​ນັກ​ທ່ອງ​ທ່ຽວ​ເຂົ້າໄປ​ຈົກ​ເງິນ​ໃຊ້​ຈ່າຍ​ເພີ່ມ​ລາຍ​ຮັບ​ໃຫ້ຊາວ­ບ້ານ​ໂດຍກົງ ທັງ​ເປັນ​ການ​ຊອກ​ວຽກ​ເຮັດ​ງານ​ທຳ​ໃຫ້​ຊາວຊົນ­ນະ­ບົດ​ຫ່າງ​ໄກ​ສອກ­ຫຼີກ​ອີກ​ດ້ວຍ ໃນ​ໄລ­ຍະ​ຜ່ານມານັ້ນ ການ​ພັດ­ທະ­ນາ​ທ່ອງ​ທ່ຽວ​ຢູ່​ອິນ​ໂດ​ເນ​ເຊຍ ມັກ​ຈະ​ເນັ້ນ​ແຕ່​ສະ­ຖານ­ທີ່​ສຳ­ຄັນ ກໍ່​ຄືຕາມ​ຕົວເມືອງ​ໃຫຍ່ໆ ຍັງ​ບໍ່​ທັນ​ໄດ້ຂຸດ​ຄົ້ນ​ນຳ​ໃຊ້​ກຳ­ລັງ​ບົ່ມຊ້ອນ​ທີ່​ຕິດ​ພັນ​ກັບ​ວິ­ຖີ​ຊີ­ວິດ​ຕົວ​ຈິງ​ຂອງ​ສັງ­ຄົມ​ຊາວ­ບ້ານ ແຜນ​ພັດ­ທະ­ນາ​ການ­ທ່ອງ­ທ່ຽວ​ຂັ້ນ​ບ້ານ​ນີ້ ທາງການ​ຈະ​ເນັ້ນ​ການ­ທ່ອງ­ທ່ຽວ​ນິ­ເວດ​ທີ່​ຖື​ເອົາ​ຄວາມງາມ ຄວາມ​ສົດ­ໃສ​ໄຮ້​ພິດ​ຂອງ​ທຳ​ມະ​ຊາດ ແລະ ອັນ​ທີ​ສອງແມ່ນ​ຄວາມ​ເປັນ​ພິ­ເສດ​ທີ່​ເກີດ​ຂອງ​ວັດທະ­ນະ​ທຳ​ພື້ນ­ຖານ​ຂອງ​ແຕ່​ລະ​ບ້ານ​ເປັນ­ຕົ້ນ​ຕໍ ບ້ານທີ່​ຈະ​ເປັນ​ເປົ້າ​ໝາຍ​ພັດ­ທະ­ນາ​ການ­ທ່ອງ­ທ່ຽວ​ແບບຊຸມ​ຊົນ​ມີ​ສ່ວນ​ຮ່ວມ ແລະ ຄຸ້ມ​ຄອງ​ນີ້ ແມ່ນ​ເນັ້ນໃສ່​ບັນ­ດາ​ບ້ານ​ໃນ​ເຂດ​ທີ່​ຫຼ້າ­ຫຼັງ​ເປັນ​ສຳ­ຄັນ​ ໃນແຜນ­ການ​ນີ້ ທາງ​ກະ­ຊວງ​ທ່ອງ​ທ່ຽວ​ອິນ​ໂດ​ເນ​ເຊຍ ໃຊ້ງົບ­ປະ­ມານ​ທັງ​ໝົດ 89 ພັນ​ຕື້​ຣູ​ເປຍ (1 ໂດ​ລາ ແລກ​ໄດ້ 9.380 ຣູເປຍ ອັດ­ຕາ​ແລກ­ປ່ຽນ​ປີ 2012) ສຳ­ລັບ​ການ​ພັດ­ທະ­ນາ​ໂຄງ​ລ່າງ​ການ­ທ່ອງ­ທ່ຽວ​ຂັ້ນບ້ານ ນັບ​ແຕ່​ປີ 2017 ເປັນ­ຕົ້ນ​ໄປ ທ່ານ ອັກ​ຄະ​ມັດ ເອ​ຣາ​ນີ ຢູ​ສະ​ຕິກ​ກາ (Ahmad Erani yustika) ຫົວ­ໜ້າ​ກົມ​ພັດ­ທະ­ນາ ແລະ ສົ່ງ­ເສີມ ສິດ​ເປັນ​ເຈົ້າຂອງ​ບ້ານກະ­ຊວງ​ທ່ອງ​ທ່ຽວ​ ມີ​ຄຳເຫັນ​ວ່າ ​ໂຄງ​ພັດ­ທະ­ນາ​ການ­ທ່ອງ­ທ່ຽວ​ນີ້​ມີ​ຈຸດ​ປະສົງ​ສົ່ງ­ເສີມ​ກຳ­ລັງ​ບົ່ມ​ຊ້ອນ​ດ້ານການ­ທ່ອງ­ທ່ຽວ​ທີ່​ມີ​ເອ­ກະ­ລັກ​ຂອງ​ແຕ່​ລະ​ພື້ນ​ທີ່ເຂດ​ແຄວ້ນ ເພາະລຳ­ພັງ​ແຕ່​ປະ­ຊາ­ຊົນ​ເອງ​ນັ້ນ​ພວກ​ເຂົາ​ບໍ່​ຮູ້​ກ່ຽວ​ກັບກຳ­ລັງ​ບົ່ມ​ຊ້ອນ​ດັ່ງ­ກ່າວ ບໍ່​ວ່າ​ຈະ​ເປັນ​ທາງ​ທຳ​ມະຊາດ ກໍ່​ຄືວັດ­ທະ­ນະ­ທຳ ຕົວ­ຢ່າງບ້ານ​ໃດ​ມີ​ຄວາມອຸ­ດົມ­ສົມ­ບູນ​ດ້ານ​ແຫຼ່ງນ້ຳ ເຊັ່ນ: ຫ້ວຍ ຮ່ອງ ຄອງ ບຶງ ພວກ​ເຮົາ​ກໍ່​ຈະ​ເນັ້ນ​ການ​ພັດ­ທະ­ນາ​ບ້ານ​ດັ່ງກ່າວ​ເປັນ​ເຂດ​ທ່ອງ​ທ່ຽວ​ນິ­ເວດ-ທ່ອງ​ທ່ຽວ​ທຳມະຊາດ ທຶນ​ພັດ­ທະ­ນາ​ການ­ທ່ອງ­ທ່ຽວ​ຂັ້ນ​ບ້ານ​ຈະ​ນຳໃຊ້​ເພື່ອ​ສ້າງ­ຕັ້ງ​ກຸ່ມ​ປະ­ກອບ​ການ (ທຸ­ລະ​ກິດ) ການປັບ­ປຸງ​ຂອດ​ບໍ­ລິ­ການ​ໃຫ້​ໄດ້​ມາດ­ຕະ­ຖານ ແລະ ການ​ພັດ­ທະ­ນາ​ໂຄງ​ລ່າງ ເຊັ່ນ: ເຮືອນ​ພັກ ໂຮງແຮມ ສູນ​ຜະ­ລິດ​ເຄື່ອງ​ຫັດ­ຖະ­ກຳ​ສີ­ໄມ້­ລາຍ­ມື​ເປັນສິ່ງ​ລະ​ລຶກ ແລະ ອື່ນໆ ຕາມ​ແຜນ​ແຕ່​ລະ​ບ້ານ​ເປົ້າໝາຍ​ຈະ​ໄດ້​ກ້ອນ​ທຶນຈຳ­ນວນ 1 ຕື້​ຮູ​ເປຍ (ປະ­ມານ 9 ຮ້ອຍ​ລ້ານ​ປາຍ​ກີບ).

ທີ່​ປະ­ເທດ​ຝຣັ່ງ: ຂ່າວ​ຈາກ​ໜັງ­ສື­ພິມ​ເດິ​ເນ​ເຊິນ (The Nation) ສະ­ບັບ​ວັນ​ທີ 23 ເດືອນ​ພະ­ຈິກ​ນີ້ ໃຫ້​ຊາບ​ວ່າ ຕຳ­ຫຼວດຝຣັ່ງ​ ໄດ້​ຈັບ​ກຸມ​ນາງ ໂລ​ຣາ ກວນຈະ​ລິ (Laura Quandgli) ອາ­ຍຸ 24 ປີ ຖານຫຼອກ​ລວງ​ທາງ​ການ​ວ່າ​ຕົນ​ຖືກ​ບາດ­ເຈັບ​ຈາກການ​ກໍ່​ການ​ຮ້າຍ​ໃນ​ທ້າຍ​ປີ 2015 ແລ້ວ​ຂໍ​ຄ່າ​ຊົດເຊີຍ ນາງ ໂລ​ຣາ ຄົນ​ນີ້​ຫົວ​ໃສ​ພິ­ລຶກ ຄື: ນາງ​ໄດ້​ຕົບຕາ​ເຈົ້າ​ໜ້າ­ທີ່​ດ້ວຍ​ການ­ພັນ­ບາດ​ແຜ​ຢູ່​ແຂນ ພ້ອມທັງ​ສ້າງ​ໃບ­ຢັ້ງ­ຢືນ​ແພດ​ປອມ​ວ່າ​ນາງ​ມີ​ບາດ­ແຜ​ແທ້ ແຕ່​ສຸດ​ທ້າຍ​ທາງ​ການ​ກໍ່​ພົບວ່າ​ນາງ​ຂີ້​ຕົວະ ຮູບ​ບາດ­ແຜ​ນັ້ນ​ນາງ​ໂຫຼດ​ເອົາ​ຈາກ​ອິນ​ເຕີ​ເນັດ ສຸດ​ທ້າຍ​ນາງ​ຜູ້​ຫວັງ​ລວຍ​ຄົນ​ນີ້​ກໍ່​ຖືກ​ຕັດ­ສິນ​ຈຳ​ຄຸກເປັນເວ­ລາ 1 ປີ.

ຂ່າວທີ່ກ່ຽວຂ້ອງ