ຂ່າວຫຼ້າສຸດ

ລະ­ວັງ​ໂຈນ​ຍາມ​ບຸນ - ໂດຍ : ດັ້ນ​ກີບ​ເມກ

1.007 28 ພ.ຈ. 2016 ນານາສາລະ

ທຸກ​ສັງ­ຄົມ​ຍ່ອມ​ມີ​ທັງ​ຄົນ​ດີ ແລະ ບໍ່​ດີ​ປົນ​ກັນ​ຢູ່ ໃນ​ສັງ­ຄົມ​ບ້ານ​ເຮົາ​ກໍ່​ເຊັ່ນ​ດຽວ​ກັນ ດັ່ງ­ນັ້ນ ຢູ່​ໃນໄລ­ຍະ​ນີ້​ເປັນ​ໄລ­ຍະ​ທີ່​ມີປາງ​ບຸນ​ຕ່າງໆ ຈິ່ງ​ຢາກ​ໃຫ້ຫຼາຍ​ຄົນ​ມີ​ສະ­ຕິ​ລະ­ວັງ​ຕົວ​ໄວ້ ເພາະ​ພວກ​ທີ່​ຈ້ອງຫາ​ລັກ​ຂອງ​ຄົນ​ອື່ນ ​ມັກ​ສວຍ­ໂອ­ກາດ​ຍາມຄົນ​ເຮົາມີ​ບຸນ​ສິນ​ກິນ​ທານ ຫຼື ມີ​ງານ ຜູ້​ຄົນ​ສວ່ານ­ສົນ​ໄປມາ​ນັ້ນ ພວກ​ໂຈນ​ຈະ​ໄດ້​ໂອ­ກາດ​ລົງ­ມື​ລັກ​ຊັບ​ສິນມີ­ຄ່າ ກໍ່­ໃຫ້­ເກີດ​ຄວາມ​ສູນ​ເສຍ​ຫຼາຍ​ຄັ້ງ ຖ້າ​ພວກເຮົາ​ເຜີ​ຂາດ​ສະ­ຕິ.

ເວົ້າ​ເລື່ອງ​ຄົນ​ຂີ້­ລັກ​ພວກ​ນີ້ມີ​ນິ­ໄສ​ຄອຍ​ຈ້ອງມອງ​ແຕ່​ຫາ​ຊ່ອງ​ທາງ​ລັກ​ຂອງ​ຄົນ​ອື່ນ ໂດຍ​ບໍ່​ຄິດຢາກ​ປະ­ກອບ​ອາ­ຊີບ​ໃດໆ ເຊິ່ງ​ອາດ​ເອີ້ນ​ວ່າ​ມັນເປັນ​ນິ­ໄສ  ແຕ່​ຜູ້​ຂຽນ​ກໍ່​ບໍ່​ແນ່​ໃຈ​ວ່າ​ມັນ​ເປັນ​ພັນ­ທຸກຳ​ໄດ້ ຫຼື ບໍ່? ຢ່າງ­ໃດ​ກໍ່​ຕາມ ພວກ​ເຮົາ​ຕ້ອງ​ມີສະ­ຕິ​ລະ­ວັງ​ໂຕ ກ່ອນ​ອອກ​ຈາກ​ເຮືອນ​ໄປ​ເຮັດ​ວຽກ ຫຼື ເດີນ­ທາງ​ໄກໄປ​ຮ່ວມ​ບຸນ​ທາງ​ໃດ​ກໍ່​ຕາມ ຄວນກວດ­ກາ​ເບິ່ງ​ຄວາມ​ປອດ​ໄພ​ພາຍ​ໃນ​ເຮືອນ​ຊານໃຫ້​ລະ­ອຽດ ເຊັ່ນ: ການ​ລ໊ອກ​ປະ­ຕູໃສ່​ກຸນ­ແຈ ຕ້ອງ​ຮັບ­ປະ­ກັນ​ພໍ​ສົມ­ຄວນ ພ້ອມ​ນີ້ ເວ­ລາ​ໄປວຽກ ຫຼື ຮ່ວມ​ບຸນ​ສິນ​ກິນ​ທານ ​ກໍ່​ຄວນ​ມີ​ສະ­ຕິ​ລະ­ວັງ​ໂຕຕື່ມ ການ​ໃສ່­ເຄື່ອງ​ປະ­ດັບ​ທີ່​ມີ­ຄ່າ ແລະ ກະ­ເປົາເງິນ ຄວນ​ຈັດ​ໄປໃຫ້​ເໝາະ​ສົມ ແລະ ຄິດ​ວ່າ​ປອດໄພ ເພາະ​ທີ່​ຜ່ານ​ມາ​ປາ­ກົດ​ມີ​ບົດ­ຮຽນ “​ຊັບ​ໂຕ​ເອງ ຂ້າ​ໂຕ​ເອງ​” ມາ​ຫຼາຍ​ລາຍ  ເຊິ່ງ​ການທີ່​ບາງ​ຄົນແຕ່ງ​ໂຕ​ໃຊ້​ເຄື່ອງ​ປະ­ດັບ​ລາ­ຄາ​ແພງ​ນັ້ນ ມັນ​ເປັນການ​ເພີ່ມ​ກິ​ເຫຼດ​ໃຫ້​ແກ່​ພວກ​ບໍ່​ຫວັງ​ດີ ເຊັ່ນ: ມີ​ບາງ​ງານ​ດອງ ເມື່ອ​ເລີກ​ງານ​ພາ­ກັນ​ກັບ​ບ້ານ ປາ­ກົດ​ວ່າ​ມີ​ພວກ​ໂຈນ​ດັກ​ປຸ້ນ​ຈີ້​ເອົາ​ກ່ອນ​ຮອດເຮືອນ ເຖິງ​ແມ່ນ​ວ່າ​ຈະ​ຂີ່​ລົດ​ໃຫຍ່​ກໍ່​ຕາມ ແຕ່​ກໍ່ຍັງ​ເສຍ​ຫຼ່ຽມ​ໃຫ້​ໂຈນ​ທີ່​ວາງ​ແຜນ​ເປັນ​ລະ­ບົບ​ໄວ້ກ່ອນ​ແລ້ວ.

ເວົ້າ​ເລື່ອງ​ໂຈນ ຫຼື ພວກ​ຂີ້­ລັກ​ປຸ້ນ​ຈີ້​ນີ້ ກໍ່​ເພື່ອຢາກ​ໃຫ້​ທຸກ​ຄົນ​ມີ​ສະ­ຕິ​ຮອບ​ຄອບ​ເວ­ລາ​ເດີນ­ທາງ ຫຼື ກ່ອນ​ອອກ​ຈາກ​ເຮືອນ ໂດຍ​ສະ­ເພາະກະ​ແມ່ນຄົນ​ໃກ້​ໂຕ ຫຼື ຢູ່​ເຮືອນ​ໃກ້​ກັນ ກໍ່​ຄວນ​ສ້າງ​ຄວາມສຳ­ພັນ​ອັນ​ດີ​ຕໍ່​ກັນ ເພາະ​ບາງ​ຄັ້ງ​ພວກ​ໂຈນ​ຂີ້­ລັກກະ​ບໍ່​ແມ່ນ​ຄົນ​ອື່ນ​ໄກ ແຕ່​ແມ່ນ​ຄົນ​ໃກ້​ຕົວ​ເຮົາ​ເອງ ເພາະ​ເຂົາ​ຈະ​ຮູ້​ຄວາມ​ເຄື່ອນ​ໄຫວ​ຂອງ​ເຮົາ​ດີ ຈຶ່ງລົງ­ມື​ລັກ​ງັດ​ແງະ​ໄດ້​ສະ­ດວກ ແລະ ພວກ​ນີ້​ເມື່ອເຄີຍ​ລົງ­ມື​ເຮັດ​ແລ້ວ​ຈະ​ໄດ້​ໃຈ ແລະ ບໍ່​ຄິດ​ຊອກວຽກ​ເຮັດ ໂດຍ​ຄອຍ​ແຕ່​ຊອກ​ຫາ​ໂອ­ກາດ​ຂີ້­ລັກຢ່າງ​ດຽວ ເພາະ​ມັນ​ໄດ້​ມາ​ໄວ ເຖິງ​ແມ່ນ​ວ່າ​ມັນສ່ຽງ​ກໍ່​ຕາມ.

ສະ­ຫຼຸບ​ວ່າ: ການ­ຈັດ­ຕັ້ງ​ກ່ຽວ­ຂ້ອງ​ທັງ​ທ້ອງ­ຖິ່ນ ແລະ ສະ​ຖາ​ບັນ​ຄອບ­ຄົວກໍ່​ຄວນ​ໄດ້​ໃຊ້​ວິ­ທີ​ຕັກເຕືອນ​ສະ­ຕິ​ ປະ­ຊາ­ຊົນ​ໃຫ້​ມີ​ສະ­ຕິ​ຮອບ​ຄອບ ຫຼື ຕ້ອງ​ໄດ້​ອົບ­ຮົມ​ບຸກ­ຄົນ​ດັ່ງ­ກ່າວ​ໃຫ້​ຮູ້­ຈັກ​ດີ-​ຊົ່ວ ຮູ້­ຈັກຖືກ-ຜິດ ແລະ ພ້ອມ​ກັນ​ນັ້ນ​ກໍ່​ນຳ​ໃຊ້​ກົດ­ໝາຍ ປາບ​ປາມ​ຄື​ກັນ ພວກ​ເຮົາ​ຕ້ອງ​ຖື​ສຳ­ຄັນ​ການ​ຢູ່ຮ່ວມ​ກັນ​ໃນ​ສັງ­ຄົມເອື້ອ­ເຟື້ອ​ເພື່ອ​ແຜ່ ແລະ ໃຊ້ຄຳ​ເວົ້າ​ດີ​ຕໍ່​ກັນ ເຄົາ­ລົບ​ກັນ​ໃນ​ຖາ­ນະ​ເປັນ​ມະ­ນຸດຄື​ກັນ ບໍ່​ບຽດ­ບຽນ​ກັນ ກໍ່​ຖື​ວ່າ​ສັງ­ຄົມ​ນັ້ນ​ຈະ­ເລີນວັດ­ທະ­ນາ​ແລ້ວ!.

ຂ່າວທີ່ກ່ຽວຂ້ອງ