ຂ່າວຫຼ້າສຸດ

ຊອກ​ຮູ້​ທິດ​ສະ​ດີ​ເສດ­ຖະ­ກິດ - ໂດຍ: ດັ້ນ​ກີບ​ເມກ

952 25 ພ.ຈ. 2016 ນານາສາລະ

ບົດ​ນີ້​ຜູ້​ຂຽນ​ໄດ້​ຍົກ​ເອົາ​ທິດ​ສະ​ດີ​ທັງ​ສອງ​ຄ້າຍ ທຶນ​ນິ­ຍົມ ແລະ ສັງ­ຄົມ​ນິ­ຍົມ​ ມາ​ທຽບ​ໃຫ້​ເຫັນ​ຈຸດຕ່າງ​ກັນ ເພື່ອ​ເປັນ​ແງ່​ຄິດແລກ­ປ່ຽນ​ທັດ­ສະ­ນະແກ່​ຜູ້​ຕິດ­ຕາມ​ຄໍ​ລຳ​ເຮົາ ທ່ານ​ຜູ້​ອ່ານ​ທີ່​ເຄີຍ​ຮຽນ ຫຼື ອ່ານ​ທິດ​ສະ​ດີ​ເສດ­ຖະ­ສາດ​ ອາດ​ຮູ້­ຈັກ ອາ​ດຳ ສະ​ມິດ (Adam smith) ໄດ້​ດີ ເພາະ​ເຂົາ­ເຈົ້າໄດ້​ຂຽນ​ຕຳ­ລາ​ດັງ​ໄວ້​ໜຶ່ງ​ເຫຼັ້ມ ຄື: ຄວາມ​ມັ່ງ​ຂອງປະ­ເທດ​ຊາດ (The wealth of Nations) ເຊິ່ງ​ມີ​ອົງ​ປະ­ກອບ​ສຳ­ຄັນ ຄື:

1. ກົນ​ໄກ​ຕະ­ຫຼາດ​ ໝາຍ​ເຖິງ​ພາ­ວະ​ທີ່​ລາ­ຄາ​ສິນຄ້າ​ໃນ​ຕະ­ຫຼາດ​ມີ​ການ​ປ່ຽນ­ແປງ​ຂຶ້ນ​ລົງ​ຕາມ​ແຮງ ຜັກ​ດັນ​ຂອງ​ສິນ­ຄ້າ​ທີ່​ຜູ້​ຊື້​ຕ້ອງ­ການ (ອຸ​ປະ­ສົງ) ແລະ ຈຳ­ນວນ​ສິນ­ຄ້າ​ທີ່​ຜູ້​ຂາຍ​ຕ້ອງ­ການ​ຂາຍ (ອຸປະ­ທານ) ເວົ້າ​ແບບ​ຫຍໍ້​ຄື​ວ່າ ການ​ແຂ່ງ­ຂັນ​ຂອງພໍ່­ຄ້າ​ກັນ​ເອງ​ນັ້ນ​ອາດ​ກໍ່­ໃຫ້­ເກີດ​ມືທີ່​ເບິ່ງ​ບໍ່​ເຫັນແຊງ​ເຂົ້າ​ມາ (Invisible hand) ທີ່​ສ້າງ​ປະໂຫຍດ​ແກ່​ຕົນ ແລະ ເຫັນ­ແກ່ຄວາມ​ໂລບ​ເປັນ​ທີ່ຕັ້ງ.

2. ບໍ່​ມີ​ການ​ແຊກ​ແຊງ​ຈາກ​ລັດ­ຖະ­ບານ ນັ້ນ​ຄືໃຊ້​ລະ­ບົບ (Laissez Faire) ໃຫ້​ມີ​ການ​ແຂ່ງຂັນ​ກັນ​ຢ່າງ​ເສລີ ລັດ­ຖະ­ບານ​ພຽງ​ຮັກ­ສາ​ຄວາມສະ­ຫງົບ​ຮຽບ​ຮ້ອຍ​ຂອງ​ບ້ານ​ເມືອງ ແຕ່​ຢ່າ​ລືມ​ວ່າ ການ​ແຂ່ງ­ຂັນ​ຢ່າງ​ເສລີ​ນີ້ ການ​ຜູກ­ຂາດ​ກໍ່​ໂຜ່​ມາ ຫຼິ້ນບົດ­ບາດ​ແນ່­ນອນ.

3. ອາ​ດຳ​ ສະ​ມິດ ບອກ​ວ່າ ໃຫ້​ເອ­ກະ​ຊົນ​ມີ​ກຳມະ​ສິດ​ໃນ​ຊັບ​ສິນ (Private property) ຄື: ໃຫ້​ເສລີ­ພາບ​ແກ່​ເອ­ກະ​ຊົນ ຜູ້​ຂຽນ​ຂໍ​ສະ­ຫຼຸບ​ຂໍ້​ດີບາງ​ປະ­ການ​ດັ່ງ­ນີ້: ເຮັດ​ໃຫ້​ເກີດ​ພັດ­ທະ­ນາ​ການເສດ­ຖະ­ກິດ​ຢ່າງ​ວ່ອງ­ໄວ ການ​ທຳ​ງານ​ມີ​ປະ­ສິດທິ​ພາບ ເຮັດ​ໃຫ້​ເກີດ​ມີ​ການ​ຄິດ​ຄົ້ນ​ສິ່ງ​ໃໝ່​ຢູ່​ຕະຫຼອດ​ເວ­ລາ ແຕ່​ລະ­ບົບ​ເສດ­ຖະ­ກິດ​ທຶນ​ນິ­ຍົມ​ກໍ່​ມີຂໍ້​ເສຍ​ໃນ​ໂຕ​ເຊັ່ນ​ກັນຄື: ເກີດບັນ­ຫາ​ຄວາມ​ເຫຼື່ອມລ້ຳ​ຕ່ຳ​ສູງ ເຊັ່ນພວກ​ເຮົາ​ຈະ​ໄດ້​ຍິນ​ຄຳ​ວ່າ: ລວຍ​ກະ​ຈຸກ-​ຈົນ​ກະ­ຈາຍ ແລະ ຢ່າ​ລືມ​ວ່າ ​ເສດ​ຖະກິດແບບ​ທຶນ​ນິ­ຍົມ ​ເນັ້ນ​ສ້າງ​ຄວາມ​ຈະ­ເລີນ​ທາງເສດ­ຖະ­ກິດ ​ຈົນ​ລືມ​ຄິດ​ເຖິງ​ບັນ­ຫາ​ຂອງ​ສິ່ງ​ແວດລ້ອມ.

ຜູ້​ຂຽນ​ໄດ້​ອ່ານ​ເຫັນ​ບົດ​ຂຽນ​ຂອງ ເລີດ ໄຊ​ຊະນະ ເລື່ອງ: ເສດ­ຖະ­ສາດ​ຂອງ​ທ່ານ​ມາກ ​ບໍ່​ມີ​ຍາມພົ້ນ​ສະ​ໃໝ ​ລົງໃນ​ວາ­ລະ­ສານ​ໂຄ­ສະ­ນາ ​ເດືອນ​ເມສາ 2015 ຈຶ່ງ​ຂໍ​ຍົກ​ມາ​ທຽບ​ປະ­ກອບ​ແງ່​ຄິດ​ດັ່ງ­ນີ້ ທ່ານ ມາກ ເປັນ​ຄົນ​ທຳ​ງານ​ວິ­ໄຈ​ແບບ​ນັກວິ​ທະຍາ​ສາດ ຫາ​ຫຼັກ​ຖານ​ພິ­ສູດ​ຕາມ​ພາ­ວະ​ຄວາມເປັນ​ຈິງ ທ່ານ ​ມາກ ວິ­ເຄາະ​ທຶນ​ນິ­ຍົມ​ວ່າ​ ມີ​ຄວາມຂັດ​ແຍ່ງ​ໃນ​ຕົວ​ລະ­ບົບ​ໂຄງ​ສ້າງ ​ນຳ­ໄປ​ສູ່​ເສດ​ຖະກິດ​ຕົກ­ຕ່ຳ ຫຼື ວິ​ກິດ ​ເພາະ​ທຶນ​ນິ­ຍົມ​ແມ່ນ​ລວມ​ສູນທຶນ​ຂະ­ໜາດ​ໃຫຍ່​ຕົກ​ຢູ່​ໃນ​ກຳ­ມື​ຂອງນາຍ­ທຶນ ມີ​ຂໍ້ຂັດ​ແຍ່ງ​ລະ­ຫວ່າງ​ເຈົ້າ​ຂອງ​ທຶນ ແລະ ກຳ​ມະກອນ ພ້ອມ​ນີ້ ມາກ ​ຍັງ​ໄດ້​ວິ­ເຄາະ​ເນັ້ນ​ວ່າ ຄົນ​ຈົນສ່ວນ​ໃຫຍ່ຈຳ­ນວນ​ນ້ອຍ​ເທົ່າ​ນັ້ນ​ທີ່​ນັບ​ມື້​ຮັ່ງ­ມີຂຶ້ນ... ທີ່​ຍົກ​ທິດ​ສະ​ດີ​ຂຶ້ນ​ມາ​ນີ້​ກໍ່​ເພື່ອ​ຢາກ​ໃຫ້​ຜູ້ອ່ານ​ຈຳ­ແນກ​ໄດ້​ວ່າ ທິດ​ສະ​ດີ​ທຶນ​ນິ­ຍົມ​ນັ້ນ​ບໍ່ແມ່ນ​ດີ​ໝົດ ມີ​ຫຼາຍ​ຈຸດ​ບົກ­ພ່ອງ ສະ­ນັ້ນ ພວກ​ເຮົາຈຶ່ງ​ເຫັນ​ຫຼາຍ​ປະ­ເທດ​ເຂົາ​ນຳ​ໃຊ້​ທິດ​ສະ​ດີ​ມາກ ເຂົ້າ​ມາ​ປະ­ສົມ​ປະ­ສານ​ໃນ​ການ​ພັດ­ທະ­ນາ​ປະ­ເທດ ເຊິ່ງ​ໂດດ​ເດັ່ນ​ແມ່ນ​ທ່ານ ຫຼີ ກວນ​ຢູ ອະ­ດີດ​ຜູ້­ນຳສິງ­ກະ­ໂປ ຫຼື ວ່າປະ­ເທດ​ຈຳ­ນວນ​ໜຶ່ງ​ໝູນ​ໃຊ້​ທິດສະ​ດີ​ການ​ຕະ­ຫຼາດ​ຂອງ​ທຶນ​ນິ­ຍົມ ແຕ່​ໃຫ້​ຢູ່​ພາຍໃຕ້​ການ​ນຳ­ພາ​ຂອງ​ລັດ ຫຼື ມີ​ສີ­ສັນ​ສະ­ເພາະ​ຂອງປະ­ເທດ​ຕົນ ເຊິ່ງ​ປະ­ສົບ​ຜົນ­ສຳ­ເລັດ​ເປັນ​ຢ່າງ​ສູງ ສະ­ຫຼຸບ​ວ່າ ທິດ​ສະ​ດີ​ກໍ່​ຄື​ທິດ​ສະ​ດີ​ນໍ? ແຕ່​ຜົນ​ສຳເລັດ​ນັ້ນ​ແມ່ນ​ພາກ​ປະ­ຕິ­ບັດ​ຕົວ​ຈິງ.

ນຳ​ສະ­ເໜີ​ເພື່ອ​ເປັນ​ການ​ແລກ­ປ່ຽນ​ນໍ?.

ຂ່າວທີ່ກ່ຽວຂ້ອງ