ໃນ​ທີ່​ສຸດ​ກໍ່​ຕົກ​ເປັນ​ກຳ​ຂອງ​ຜູ້​ປາກ​ບໍ່​ເປັນ

<p style="text-align: justify;"> ໂດຍ: ຊຽງ​ເອງ</p> <p style="text-align: justify;"> ຄື​ດັ່ງ​ຮູ້​ກັນ​ດີ​ແລ້ວ​ວ່າ ນະ­ຄອນ­ຫຼວງ​ວຽງ​ຈັນ​ຂອງ​ພວກ​ເຮົາພວມ​ກຳ­ລັງ​ມີ​ການ​ຂະ­ຫຍາຍ­ຕົວທາງ​ດ້ານ​ການ​ສ້າງ­ສາພັດ­ທະ­ນາ​ເສດ­ຖະ­ກິດ-ສັງ­ຄົມ ຄື​ດັ່ງ​ຕົວ​ເມືອງ​ໃຫຍ່​ປະ­ເທດຕ່າງໆ​ໃນຂົງ­ເຂດ​ນີ້ ແລະ ໃນ​ໂລກ ເວົ້າ​ສະ­ເພາະ​ໄລ­ຍະ​ນີ້ແມ່ນ​ເພື່ອ​ສ້າງ​ສິ່ງ​ຮອງ​ຮັບ​ໃນ​ການ​ເຂົ້າ​ຮ່ວມເປັນ​ພາ­ຄີ​ຂອງປະ­ຊາ​ຄົມ​ເສດ­ຖະ­ກິດ​ອາ​ຊຽນ ເຊິ່ງ​ຈະ​ມີ​ຂຶ້ນ​ໃນ​ອີກ​ໜຶ່ງ​ປີ​ກວ່າຕໍ່­ໜ້າ​ນີ້.</p> <p style="text-align: justify;"> ແຕ່​ໃນ​ຂະ­ນະ​ດ້ານ​ອື່ນ​ພວມ​ມີ​ການ​ຫ້າງ​ຫາ​ກະ­ກຽມ​ຢ່າງຕັ້ງ­ໜ້າ​ນັ້ນ ທາງ​ດ້ານ​ການ​ຄົມ­ມະ­ນາ­ຄົມ​ທີ່​ເປັນ​ປາຍ​ແຫຼມທາງ​ເສດ­ຖະ­ກິດ​ກໍ່​ມີ​ການ​ບຸກ​ທະ­ລຸ​ໃຫ້​ໄດ້ ໂດຍ​ສະ­ເພາະ​ການກໍ່­ສ້າງ​ຖະ­ໜົນ​ຫົນ­ທາງ​ໃໝ່ ການ​ປັບ­ປຸງ​ປົວ­ແປງ​ເພື່ອ​ການເຊື່ອມ​ໂຍງ​ທົ່ວ​ປະ­ເທດ​ກໍ່​ຄ່ອຍ​ບັນ­ລຸ​ເທື່ອ​ລະກ້າວ ເວົ້າ​ສະເພາະການ​ຈະ­ລາ­ຈອນ​ໃນ​ຕົວ​ເມືອງ​ກໍ່​ເປັນ​ວຽກ​ໜຶ່ງ​ເບິ່ງ​ຜິວເຜີນ​ຄື​ວ່າ​ເປັນ​ບັນ­ຫາ​ນ້ອຍ ແຕ່​ຕົວ​ຈິງ​ແລ້ວ​ບໍ່​ເປັນ​ແນວ​ນັ້ນມັນ​ເປັນ​ບັນ­ຫາ​ໃຫຍ່ ທັງ​ເປັນ​ໜ້າ​ຕາ​ຂອງ​ປະ­ເທດຊາດ​ບ້ານເມືອງ​ອີກ​ດ້ວຍ ຈະ​ເອີ້ນ​ວ່າ​ບັນ­ຫາ​ນ້ອຍ​ແຕ່​ກໍ່​ເປັນ​ບັນ­ຫາ​ທີ່​ມີຊີ­ວິດ​ຊີ­ວາ​ກໍ່​ວ່າ​ໄດ້ ເບິ່ງຈັ່ງ​ໜຶ່ງ​ກໍ່​ຄື​ວ່າ​ເປັນ​ການ​ວັດ­ແທກ​ເຖິງລະ­ດັບ​ຝີ​ມື​ຂອງ​ຜູ້​ບໍ­ລິ­ຫານ​ທີ່​ຮັບ­ຜິດ­ຊອບ​ວ່າ​ຈະ​ເອົາ​ບັນ­ຫາ​ນີ້ຢູ່​ໝັດ ຫຼື ບໍ່ ເນື່ອງ​ຈາ​ກວ່າ​ຈຳ­ນວນ​ປະ­ລິ­ມານ​ລົດ​ໂອ​ໂຕ​ໃນຕົວ​ເມືອງ​ໄດ້​ເພີ່ມ​ຂຶ້ນ​ເລື້ອຍໆ ພ້ອມ​ກັນ​ນັ້ນ​ປາ­ກົດ​ວ່າ​ປ້າຍລົດ​ຂອງ​ປະ­ເທດ​ບ້ານ​ໃກ້​ເຮືອນ​ຄຽງ​ກໍ່​ເພີ່ມ​ປະ­ລິ­ມານ​ການເຂົ້າ​ມາທ່ຽວ ຫຼື ມາ​ເຮັດ​ທຸ­ລະ​ກຳ​ເພີ້ມ​ຂຶ້ນ.</p> <p style="text-align: justify;"> ໃນ​ສາຍ­ຕາ​ຫຼາຍ​ທ່ານ​ເຫັນ​ວ່າ ​ວຽກ​ງານ​ການ​ປັບ­ປຸງ​ການຈະ­ລາ­ຈອນ​ກໍ່​ໄດ້​ຖືກ​ເອົາ­ໃຈ­ໃສ່​ເປັນພິ­ເສດ ດັ່ງ​ຈະ​ເຫັນ​ໄດ້ການ​ເຮັດ​ທຸກ​ວິ­ທີ​ທາງ​ເພື່ອ​ລະ­ບາຍ​ລົດ​ໃຫ້​ມີ​ຄວາມ​ຄ່ອງ​ຕົວຂຶ້ນ ນັບ​ທັງປັບ­ປຸງ​ເລື່ອງ​ໄຟ​ອຳ­ນາດ ​ໄປ​ເຖິງ​ການ​ຮື້​ຖອນ​ສິ່ງກີດ​ກັນ​ທີ່​ໄຮ້​ປະ­ໂຫຍດ ນອກ­ຈາກ​ນີ້​ເຈົ້າ​ໜ້າ­ທີ່ກ່ຽວ­ຂ້ອງ​ກໍ່​ຈັດກິດ­ຈະ­ກຳ​ປູກ​ຈິດ​ສຳ­ນຶກ​ແກ່​ມະ­ຫາ­ຊົນ ​ເພື່ອ​ການ​ມີ​ສະ­ຕິ​ໃນການ​ຂັບ​ຂີ່​ຕໍ່​ການໃຊ້​ລົດ​ໃຊ້​ຖະ­ໜົນ ດັ່ງ​ຈະ​ເຫັນ​ໄດ້​ແຜ່ນ​ປ້າຍໂຄ­ສະ­ນາ​ຜ່ານ​ທາງ​ແຜ່ນ​ພັບ ເຜີຍ­ແຜ່​ທາງ​ໜ້າໜັງ­ສື­ພິມ ວິທະ​ຍຸ ໂທລະ­ພາບ ແລະ ອື່ນໆ ແຕ່​ປານ​ນັ້ນ​ອຸ­ບັດ​ຕິ​ເຫດ​ຍັງ​ບໍ່ຫຼຸດ​ປະ­ລິ­ມານ ເຊິ່ງແນ່­ນອນ​ວຽກ​ດັ່ງ­ກ່າວ​ກໍ່​ຈະ​ຕ້ອງ​ເດີນ​ໜ້າຕໍ່​ໄປ.</p> <p style="text-align: justify;"> ສິ່ງ​ທີ່​ປາ­ກົດ​ເຫັນບາງ​ອຸ­ບັດ​ຕິ​ເຫດ​ເກີດ​ຂຶ້ນ ​ໂດຍ​ໄກ​ຕາ​ເຈົ້າໜ້າ­ທີ່ ໂດຍ​ສະ­ເພາະ​ຍາມ​ວິ­ການ ຄື: ອຸ­ບັດ​ຕິ​ເຫດ​ໄປ​ຕຳ​ເອົາປ້າຍ​ກາງ​ທາງ​ກັ້ນ​ລະ­ຫວ່າງ​ເລນ ຕຳ​ເອົາ​ຫົວ​ມຸມ​ປ່ອນ​ປູກດອກ​ໄມ້ ຕຳ​ເອົາ​ສວນ​ວົງ­ວຽນ ແລະ ປ້າຍ ບາງ​ກໍ່​ຕຳ​ໄຟແດງ ປ້າຍ​ຈະ­ລາ­ຈອນ ເສົາ​ໄຟ­ຟ້າ ເຊິ່ງ​ຍົກ​ພຽງເທົ່າ​ນີ້​ກໍ່ຮູ້​ວ່າ ຄວາມ​ອ່ອນ­ແອ​ຂອງ​ການ​ປະ­ຕິ­ບັດ​ກົດ​ລະ­ບຽບ​ຈະ­ລາຈອນ ແມ່ນ​ມີ​ສູງ​ ເມື່ອ​ເຫັນເປັນ​ເຊັ່ນ​ນີ້​ ຜູ້​ຄົນ​ທຽວ​ທາງ​ຕ່າງ​ກໍ່ຄັນ​ແຂ້ວ ແລະ ເວົ້າ​ເປັນ​ສຽງ​ດຽວ​ກັນ​ວ່າ “ມັນ​ໂພດ” ຕ້ອງເອົາ​ເລື້ອງ ຕ້ອງ​ປັບ­ໄໝ ຕ້ອງ​ໃຫ້​ສ້ອມ­ແປງ​ສິ່ງ​ເປ່​ເພ​ຄືນ ບໍ່​ສົມ­ຄວນ​ເລີຍ​ຈະ​ຕ້ອງ​ມາ​ຕຳ​ສິ່ງ​ກໍ່­ສ້າງ​ເພື່ອ​ອຳ­ນວຍຄວາມ​ສະ­ດວກ​ແກ່​ການ​ເດີນ­ທາງ ເພາະ​ມັນ​ປາກ​ບໍ່​ເປັນ ແລະ ກໍ່​ຫຼີກ​ບໍ່​ເປັນ ບາງ​ຄົນ​ກໍ່​ວ່າ ​ມັນ​ບໍ່​ມີ​ຕາ​ບໍ? ກໍ່​ມີ​ລະ​ບໍ​ຈຶ່ງຕຳ​ຖືກ ຍ້ອນ​ມາວ​ລາຍ ຕໍ່​ໄປ​ຄວນ​ມີ​ການ​ຕິດ​ຕັ້ງ​ກ້ອງວົງຈອນ​ປິດ​ຕາມ​ສີ່​ແຍກ ​ເພື່ອ​ຕິດ­ຕາມ​ຄົນ​ປະ­ໝາດ ເພື່ອ​ຈຳກັດອຸ­ບັດ​ຕິ​ເຫດ​ໃຫ້​ໜ້ອຍ​ລົງ​ກໍ່​ຈະດີ​ແທ້.</p>