ຂ່າວຫຼ້າສຸດ

ໂລກ​ຮ້ອນ​ເພາະ​ໄຟ​ສາມ​ກອງ

1.698 10 ມ.ກ. 2014 ນານາສາລະ

<p style="text-align: justify;"> <strong>ໂດຍ: ດັ້ນ​ກີບ​ເມກ</strong></p> <p style="text-align: justify;"> ເມື່ອ​ເວົ້າ​ເຖິງ​ໄຟ​ແລ້ວ ຄົນ​ທົ່ວ​ໄປ​ຄົງ​ຄິດ​ໄດ້​ໂລດວ່າ: ມັນ​ຕ້ອງ​ຮ້ອນ​ແຜດເຜົາ​ໄໝ້​ທຸກ​ສິ່ງ​ທີ່ຂວາງໜ້າ ຖ້າ​ຫາ​ກວ່າ​ໄຟ​ນັ້ນ​ມີກຳ­ລັງ​ແຮງ ຜົນ​ເສຍ​ຫາຍ​ກໍ່​ໃຫຍ່​ຫຼວງ​ຍິ່ງ ຖ້າ​ໄຟ​ສາມ​ກອງທີ່ເວົ້າ​ນີ້​ຫາກ​ມີ​ຢູ່​ໃນ​ໃຈ​ຄົນຜູ້​ໃດ ​ຍ່ອມ​ເຮັດ​ໃຫ້​ໂລກ​ນີ້​ເພີ່ມຄວາມ​ຮ້ອນ​ຫຼາຍ​ຂຶ້ນ ບູ­ຮານ​ເຄີຍສອນ​ຄູ່​ຜົວ​ເມຍ​ເມື່ອ​ຕອນທີ່​ແຕ່ງ­ດອງ​ກັນ​ໃໝ່​ວ່າ ໄຟ​ໃນ​ບໍ່​ໃຫ້​ອອກ ໄຟ​ນອກ​ບໍ່​ໃຫ້​ເຂົ້າ ນີ້​ໝາຍຄວາມ​ວ່າ​ ສິ່ງ​ທີ່​ເກີດ​ຂຶ້ນ​ຢູ່​ໃນ​ເຮືອນ​ຕ້ອງ​ແກ້​ໄຂ​ພາຍໃນ​ຄອບ­ຄົວ ​ເຊັ່ນ​ດຽວ​ກັນ​ກັບ­ໄຟ (ບັນ­ຫາ) ທີ່​ເກີດ​ຢູ່​ນອກເຮືອນ ບູ­ຮານ​ລາວ​ກໍ່​ສອນ​ບໍ່​ໃຫ້​ນຳ​ເຂົ້າ​ມາ​ໃນ​ເຮືອນ.</p> <p style="text-align: justify;"> ໂລກ​ຂອງ​ມະ­ນຸດ​ທຸກ​ມື້­ນີ້​ບໍ່​ພຽງ​ແຕ່​ມີ​ອາ­ກາດ​ທີ່​ຮ້ອນ​ອົບເອົ້າ​ຢ່າງ​ດຽວ ແຕ່​ໃນ​ຈິດ​ໃຈ­ຄວາມ​ຄິດຂອງ​ມະ­ນຸດ​ເອງ​ກໍ່​ຍິ່ງຮ້ອນ ເພາະ​ມັນ​ເປັນ​ຍຸກ​ຂອງ​ການ​ແຂ່ງ­ຂັນ ຖ້າ​ເວົ້າ​ໃນ​ແງ່ຂອງ​ເສດ­ຖະ­ກິດ-ການ​ຄ້າ ມັນ​ກໍ່​ແມ່ນ​ສົງ­ຄາມ​ເລື່ອງ​ປາກທ້ອງ​ນີ້​ເອງ ເຊິ່ງ​ການ​ແຂ່ງ­ຂັນ​ທີ່​ໃຜໆ​ກໍ່​ຕັ້ງ­ທ່າ​ບຸກໜ້າ​ໄປເລື້ອຍໆ ​ແບບ​ນີ້​ຈຶ່ງ​ເກີດ​ມີ​ບັນ­ຫາ​ຕາມ​ມາ ເຊັ່ນ: ການ​ຜະ­ລິດເກີນ​ຄວາມ​ຈຳ­ເປັນ ຈຸດ​ນີ້ໂຕ​ມະ­ນຸດ​ເອງ​ຕ້ອງ​ບໍ່​ລືມ​ວ່າ ຊັບພະ­ຍາ­ກອນ​ທຳ​ມະ​ຊາດ​ບາງ​ຊະ­ນິດ​ບໍ່​ສາ­ມາດ​ຈະ​ນຳ​ເອົາ​ມາຜະ­ລິດ​ໃໝ່​ໄດ້​ອີກ ໝົດ​ແລ້ວ​ກໍ່​ໝົດ​ເລີຍ ແຕ່​ຄວາມ​ຕ້ອງ­ການຂອງ​ມະ­ນຸດ​ພັດ​ບໍ່​ພໍ ​ຍິ່ງ​ເພີ່ມ​ຂຶ້ນເລື້ອຍໆ ດັ່ງ­ນັ້ນ ໂຕ​ມະ­ນຸດເອງ​ຕ້ອງ​ຫັນ​ກັບ​ມາ​ເບິ່ງ​ຕົນ​ເອງ​ຄື ຄວນ​ຈະ​ມີ​ສະ­ຕິ​ຮູ້​ເທົ່າ​ທັນໃນການ​ຜະ­ລິດ​ໃຫ້​ມັນ​ເກີດ​ຄວາມ​ສົມ​ດຸນ​ກັບ​ທຳ​ມະ​ຊາດ ໝາຍ​ຄວາມ​ວ່າ ​ຄົນ​ຢູ່​ໄດ້​ ທຳ​ມະ​ຊາດຍັງ​ດີ ໂດຍ​ຫຼີກ­ເວັ້ນ​ຄົນ​ຢູ່ລອດ ແຕ່​ທຳ​ມະ​ຊາດ​ມອດ​ມ້ວຍ.</p> <p style="text-align: justify;"> ທຸກ​ມື້­ນີ້​ຈິດ­ໃຈ​ຂອງ​ມະ­ນຸດ​ຮ້ອນ​ຂຶ້ນ​ຫຼາຍ ​ຍ້ອນ​ການ​ຫາຄວາມ­ສຸກ​ໃນ​ຊີ­ວິດ​ທີ່​ສັບ­ສົນ ເພາະ­ວ່າຄົນ​ເຮົາ​ເອງ​ຕ້ອງ​ໄດ້ຮ້ອນ­ຮົນ​ຂົນ­ຂວາຍ​ຫາ​ອາ­ຫານ​ກາຍ ແລະ ໃຈ​ ມາ​ປ້ອນຄວາມ​ຢາກ​ຂອງຕົນ​ຢູ່​ສະ­ເໝີ ຖ້າ​ເວົ້າ​ໃນ​ແງ່​ພຸດ​ທະ​ສາ​ສະໜາ​ກໍ່​ສອນ​ວ່າ ການ​ບໍ­ລິ­ໂພກ​ສິນ­ຄ້າ ຕ້ອງ​ບໍ­ລິ­ໂພກແບບ​ເປັນນາຍ ບໍ່​ແມ່ນ​ເປັນ​ທາດ​ຂອງ​ສິນ­ຄ້າ ຫຼື ຫຼົງ​ມົວ­ເມົາ​ກັບ​ຄ່າ​ນິຍົມ ແລະ ຍີ່­ຫໍ້​ຊື່​ດັງ ເຊິ່ງ​ບໍ່ຕ່າງ​ຫຍັງ​ກັບ​ບາງ​ປະ­ເທດ​ໃກ້ຄຽງ ທີ່​ມີ​ຄວາມ​ຢາກ​ເປັນ​ອຸດ­ສາ­ຫະ­ກຳ​ທັນ​ສະ­ໄໝ ​ຈົນ​ຫຼົງ​ລືມຮາກ​ຖານ​ຂອງ​ສັງ­ຄົມ​ແຫ່ງ​ກະ­ເສດ­ຕະ­ກຳ ເຮັດ​ໃຫ້​ໄຟ​ແຫ່ງຄວາມ​ຢາກ​ນັ້ນ​ເຜົາ​ຜານ​ລວກ​ລົນຈິດ­ໃຈ​ໄຫຼ​ໄປ​ຕາມ​ກະ­ແສໂລກ ເພື່ອ​ຈະ​ໃຫ້​ກ້າວ​ທັນ​ເຂົາ ແຕ່​ສຸດ​ທ້າຍ​ກໍ່​ລົ້ມ​ເຫຼວ​ຫຼາຍກວ່າ​ສຳ­ເລັດ.</p> <p style="text-align: justify;"> ດັ່ງ­ນັ້ນ ໄຟ​ສາມ​ກອງ​ທີ່​ເວົ້າ​ມາ​ນັ້ນ​ກໍ່​ຄື: ໄຟ​ແຫ່ງ​ຄວາມທະ­ຍານ​ຢາກ​ເກີນ​ໂຕ ໄຟ​ແຫ່ງ​ຄວາມຢາກ​ທີ່​ຈະ​ສະ­ໜອງຄວາມ​ຕ້ອງ­ການ​ໃນ​ໂຕ​ເອງ​ຢ່າງ​ບໍ່​ມີ​ຂີດ​ຈຳ­ກັດ ແລະ ໄຟກອງ​ສຸດ​ທ້າຍ​ທີ່ອັນ­ຕະ­ລາຍ ​ຜັກ​ດັນ​ໃຫ້​ຊີ­ວິດ​ຍ່າງ​ກ້າວ​ໄປ​ສູ່ຄວາມ​ລົ້ມ​ເຫຼວ ນັ້ນ​ຄື: ໄຟ​ແຫ່ງ​ຄວາມ​ຫຼົງ​ມົວ­ເມົາບໍ່​ຮູ້­ຈັກທາງ​ອອກ.</p> <p style="text-align: justify;"> ບູ­ຮານ​ລາວ​ເຄີຍ​ສອນ​ໄວ້​ວ່າ: ຢ່າ​ຫຼິ້ນ​ກັບ­ໄຟ ເພາະ­ວ່າ​ໄຟເປັນ​ຂອງ​ຮ້ອນ​ຢູ່​ແລ້ວ ແຕ່​ໄຟ​ທີ່​ມັນລຸກ​ໃນ​ໃຈ​ຂອງ​ມະ­ນຸດ​ຍິ່ງຮ້ອນ​ກວ່າ ຈົນ​ເຮັດ​ໃຫ້​ໂລກ​ນີ້​ພິ­ນາດ ແລະ ເກີດ​ບັນ­ຫາ​ໄພ​ພິບັດ​ຂອງທຳ​ມະ​ຊາດ ​ກໍ່​ຍ້ອນ​ໄຟ​ແຫ່ງ​ຄວາມ​ຢາກ​ເກີນ​ຕົວ ດັ່ງນັ້ນ ໃນ​ຕົວ​ມະ­ນຸດ​ເອງ​ຈຶ່ງ​ເປັນ​ໄດ້​ທັງ​ບວກ ແລະ ລົບ ໝາຍຄວາມ​ວ່າ ໂລກ​ຈະ​ດີ​ຂຶ້ນ ຫຼື ວອດ​ວາຍ​ ກໍ່​ຂຶ້ນ​ຢູ່​ກັບ​ມະ­ນຸດ​ເອງ.</p> <p style="text-align: justify;"> ສັງ​ລວມ​ວ່າ ຜູ້​ທີ່​ບໍ­ລິ­ໂພກ​ເປັນ ຈະ​ເປັນ​ບຸກ­ຄົນ​ທີ່​ມີ​ຄວາມສຸກ ມີ​ຄຸນ​ນະ​ພາບ​ຊີ­ວິດ​ທີ່​ດີ ເຂົາ​ຈະ​ມີເວ­ລາ​ທົບ​ທວນ​ກວດສອບ​ຊີ­ວິດ ເພື່ອ​ຮັບ​ມື​ກັບ​ໂລກ​ທີ່​ຮ້ອນ​ອົບ­ເອົ້າ​ ເພາະ​ຖືກ​ໄຟ ​ຄື ໂຕ​ກິ­ເລດຕັນ­ຫາ​ເຜົາ​ໄໝ້​ຢູ່​ຕະ­ຫຼອດ​ເວ­ລາ ມະ­ນຸດ​ຈຶ່ງ​ພະ­ຍາຍາມ​ສະ­ແຫວງ­ຫາ​ອາ­ຫານ​ມາ​ປ້ອນ​ຄວາມຢາກ​ຂອງ​ຕົນ ໄລ່​ຕາມ​ຕົວ​ເອງ​ຢູ່​ຕະ­ຫຼອດ​ເວ­ລາ ທີ່​ນຳ​ມາ​ສະ­ເໜີ​ຕໍ່​ຜູ້​ອ່ານ​ກໍ່ເພື່ອ​ວ່າ​ ຢາກ​ໃຫ້​ຜູ້ຍັງ​ບໍ່​ຕື່ນ​ ອາດ​ຈະ​ໄດ້​ເງີຍ​ຄໍ​ຂຶ້ນ​ມາ​ເບິ່ງ​ໂລກ ເພື່ອ​ກຽມ​ຈະ​ຕື່ນ ກໍ່​ຍັງ​ດີ​ກວ່າ​ທີ່​ຈະ​ຫຼັບ​ໄຫຼ​ຫຼົງ​ລືມຈົນ​ເງີຍ​ຄໍບໍ່​ຂຶ້ນ.</p>

ຂ່າວທີ່ກ່ຽວຂ້ອງ