ຂອບ​ຟ້າ​ແຫ່ງ​ຄວາມ​ຮູ້

1.696 25 ທ.ວ. 2013 ນານາສາລະ

<p style="text-align: justify;"> ຜູ້​ທີ່​ມັກ​ຄວາມ​ກ້າວ­ໜ້າຄົງ​ປະ­ຕິ­ເສດ​ໄດ້​ຍາ​ກວ່າ ຄວາມ​ຮູ້ເປັນ​ປັດ​ໄຈ​ທີ​່ໜຶ່ງຕໍ່​ການ​ປະ­ກອບອາ­ຊີບ ແລະ ກ້າວ​ໄປ​ສູ່​ຄວາມ​ສຳ­ເລັດ ແຕ່​ກ່ອນ​ຈະ​ມີ​ຄວາມ​ຮູ້ ຫຼື ສະ­ຕິ​ປັນ­ຍາ​ຢ່າງ​ເປັນ​ຂະບວນ​ການ ແລະ ຂັ້ນ​ຕອນ​ການ​ໄດ້ມາ​ເຊິ່ງ​ຄວາມ​ຮູ້ ແລະ ການ​ນຳ​ໃຊ້ຄວາມ​ຮູ້​ກໍ່​ແມ່ນ​ປັດໄຈ​ທີ່ສຳ­ຄັນ​ເຊັ່ນ​ດຽວ​ກັນ​ ຫຼາຍ​ຄົນ​ທີ່​ມີ​ຄວາມ​ຮູ້​ຍ່ອມ​ໄດ້​ຜ່ານ​ສະຖາ​ບັນ​ການ​ສຶກ​ສາ ເຊິ່ງ​ບາງຄົນ​ເມື່ອ​ຮຽນ​ຈົບ​ແລ້ວ­ແຕ່​ຂະບວນ​ການ​ສະ­ແຫວງ­ຫາ​ຄວາມ​ຮູ້​ຂອງ​ເຂົາ​ຍັງ​ບໍ່​ຈົບ ສຳ­ລັບ​ຜູ້ມັກຄວາມ​ກ້າວ­ໜ້າ.</p> <p style="text-align: justify;"> ດັ່ງ­ນັ້ນ ການ​ສຶກ​ສາ​ຈຶ່ງ​ເປັນ​ຄຳ​ທີ່​ໜ້າ​ເກັບ​ເອົາ​ມາ​ຄິດ​ຂະຫຍາຍ​ໃຫ້​ເຖິງ​ຮາກ​ເຖິງ​ແກ່ນ ພາ­ສາບາ​ລີ​ວ່າ: ສິກ­ຂາ ໝາຍເຖິງ​ການ​ສະ­ແຫວງ­ຫາ​ວິ­ຊາ ຄື ຄວາມ​ຮູ້​ຕາມ​ສະ­ພາບ​ຄວາມເປັນ​ຈິງ ເພື່ອ​ກຳ­ຈັດ​ຄວາມ​ໂງ່​ໄປ​ພ້ອມ​ກັນ ເມື່ອ​ປັນ­ຍາ​ເກີດຂຶ້ນ​ມັນ​ກໍ​ກຳ­ຈັດ​ຄວາມ​ບໍ່​ຮູ້​ອອກ​ໄປ ເຊິ່ງ​ບໍ່ຕ່າງ​ຫຍັງ​ກັບ​ແສງສະ­ຫວ່າງ​ທີ່​ເກີດ​ຂຶ້ນ​ມາ​ເພື່ອ​ຂັບ​ໄລ່​ຄວາມ​ມືດ​ໃຫ້​ໝົດ​ໄປ ພະພຸດ­ທະ­ເຈົ້າ​ຈຶ່ງປຽບ­ທຽບ​ປັນ­ຍາ​ຄື​ແສງ​ສະ­ຫວ່າງ​ວ່າ: “ບໍ່​ມີແສງ​ສະ­ຫວ່າງ​ໃດໆທີ່ຈະ​ມາ​ທຽບ​ເທົ່າ​ກັບ​ແສງ​ສະ­ຫວ່າງຂອງ​ປັນ­ຍາ” ດວງ​ດາວ​ກໍ​ສະ­ຫວ່າງ​ໃນ​ຍາມ​ກາງ­ຄືນ ສ່ວນດວງ​ອາ­ທິດ​ກໍ່​ໃຫ້​ແສງ​ໃນ​ຍາມກາງ­ເວັນ ສ່ວນ​ແສງ​ສະ­ຫວ່າງຂອງ​ປັນ­ຍາ​ສາ­ມາດ​ສ່ອງ​ໄດ້​ທັງ​ກາງ­ເວັນ ແລະ ກາງ­ຄືນ ທັງທີ່ມືດ ແລະ ທີ່​ແຈ້ງ.</p> <p style="text-align: justify;"> ພາ­ລະ­ກິດ​ຂອງ​ການ​ສຶກ​ສາ​ ຄື​ການ​ສ້າງ​ປັນ­ຍາ​ໃຫ້​ເກີດ​ຂຶ້ນ ເຊິ່ງ​ຄວາມ​ຮູ້ ຫຼື ປັນ­ຍາ​ທີ່​ເວົ້າ​ແມ່ນຄວາມ​ຮູ້​ທີ່​ຈະ​ຕ້ອງ​ຮູ້​ໃຫ້ເຖິງ​ແກ່ນ​ແທ້​ຂອງ​ສິ່ງ​ທັງ­ຫຼາຍ ບໍ່​ວ່າ​ຈະ​ຮຽນ​ເລື່ອງ​ຫຍັງ​ກໍຕາມ​ ຄວາມ​ຮູ້ແບບ​ນີ້​ເອີ້ນ​ວ່າ: ຮູ້​ເຫັນ​ຕາມ​ຄວາມ​ເປັນ​ຈິງ ດັ່ງ­ນັ້ນ ການ​ສຶກ​ສາ​ຈຶ່ງ​ເນັ້ນ​ເລື່ອງ​ການ​ພັດ­ທະ­ນາປັນ­ຍາຫຼາຍ​ກວ່າ​ເລື່ອງ​ອື່ນໆ ເພາະ­ວ່າ​ປັນ­ຍາ​ເປັນ​ຄຸນ​ນະ​ທຳ​ທີ່​ສຳຄັນ​ທີ່​ສຸດ ໝາຍ​ຄວາມ​ວ່າ​ປັນ­ຍາ​ເປັນ​ປະ­ທານ​ຂອງ​ຄຸນ​ນະ​ທຳທັງ­ຫຼາຍ ພະ­ພຸດ­ທະ­ເຈົ້າ​ຈຶ່ງ​ເວົ້າ​ໄວ້​ອີ​ກວ່າ: “ນັກ­ປາດ​ທັງ­ຫຼາຍ​ກ່າວ​ວ່າ ປັນ­ຍາ​ປະ­ເສີດ​ທີ່​ສຸດ ເໝືອນ​ດັ່ງດວງ​ຈັນ​ທີ່​ໂດດ​ເດັ່ນ​ທີ່​ສຸດ​ໃນ​ໝູ່​ດວງ​ດາວ”.</p> <p style="text-align: justify;"> ພວກ​ເຮົາ​ຈຶ່ງ​ສາ­ມາດ​ເຫັນ​ໄດ້​ວ່າ: ປັນ­ຍາ​ກໍ່​ມີ​ຄຸນ​ນະ​ທຳ​ອື່ນ ເປັນ​ບໍ­ລິ­ວານ​ເຊັ່ນ​ດຽວ​ກັນ​ກັບ​ດວງຈັນ ທີ່​ມີ​ດວງ​ດາວ​ເປັນບໍ­ລິ­ວານ ອີກ​ພາ­ລະ­ກິດ​ໜຶ່ງ​ຂອງ​ການ​ສຶກ​ສາ ຄື: ການ​ກຳຈັດ​ຄວາມ​ໂງ່ໃຫ້​ໝົດ​ໄປ ໃນ​ໂລກ​ໄຮ້​ພົມ​ແດນ​ຈຶ່ງ​ເປັນ​ສິ່ງ​ສຳຄັນ​ທີ່​ເຮົາ​ຈະ​ຕ້ອງ​ໄດ້​ຄິດ​ແຍກ​ກັ່ນ​ຕອງ​ເອົາຄວາມ​ຮູ້​ທີ່​ມີ​ປະໂຫຍດ ເພາະ­ວ່າ​ຂໍ້​ມູນ​ຜ່ານ​ທາງ​ສື່ electronic ຫຼາຍ​ຢ່າງ​ກໍແມ່ນ​ຢູ່​ໃນ​ລັກ­ສະ­ນະ​ທີ່​ເປັນ​ບໍ່­ເກີດ​ປະ­ໂຫຍດ​ແກ່​ຜູ້​ເຂົ້າ​ໄປ​ໃຊ້ບໍ­ລິ­ການ ໂດຍ​ສະ­ເພາະ​ຄົນ​ທີ່​ຂາດ​ສະ­ຕິ​ຫຼົງ​ທາງ​ບໍ່ສາ­ມາດແຍກ​ແຍະ​ໄດ້​ວ່າ ອັນ​ໃດ​ເປັນ​ປະ­ໂຫຍດ​ແທ້ ແລະ ອັນ​ໃດ​ເປັນຂອງ​ທຽມ (ປອມ) ທີ່ເວົ້າ​ກ່ຽວ­ຂ້ອງ​ກັບ​ຂໍ້​ມູນ​ຂ່າວ­ສານ​ຜ່ານທາງ​ໂລກ online ນັ້ນ​ກໍ​ເພາະ­ວ່າ​ ຂໍ້​ມູນ​ຂ່າວ­ສານ​ແບບ​ນີ້​ມີທັງ​ບວກ ແລະ ລົບ​ໃນ​ຕົວ ມີ​ທັງ​ຄຸນ ແລະ ໂທດ​ເປັນ​ດາບສອງ​ຄົມ ບາງ​ອັນ​ເປັນ​ຂໍ້​ມູນ​ສົ່ງ­ເສີມ​ໃຫ້​ເກີດ​ປັນ­ຍາ ແລະ ມີບາງ​ອັນ​ເປັນ​ຂໍ້​ມູນ​ທີ່​ຫຼອກ​ໃຫ້​ຫຼົງ​ທາງ.</p> <p style="text-align: justify;"> ດັ່ງ­ນັ້ນ ຜູ້​ຮັກ​ຄວາມ​ກ້າວ­ໜ້າ​ຕ້ອງ​ໄດ້​ຂະ­ຫຍາຍ​ຂອບ​ຟ້າແຫ່ງ​ຄວາມ​ຮູ້​ໃຫ້​ກວ້າງ ແລະ ເລິກ­ເຊິ່ງ ຖ້າ​ເບິ່ງ​ໃນ​ແງ່​ມູມລະ­ຫວ່າງ​ຄູ​ກັບ​ລູກ­ສິດ ​ຍິ່ງ​ເປັນ​ສິ່ງ​ທີ່​ໜ້າ​ຄິດ ເພາະ­ວ່າ​ຖ້າ​ຄູສະ­ຫຼາດ​ຈະພະ­ຍາ­ຍາມ​ສອນ​ວິ­ທີ​ຄົ້ນ­ຄວ້າ​ວິ­ໄຈ​ໃຫ້​ແກ່​ລູກ­ສິດ ໃຫ້​ພວກ​ເຂົາ​ໄດ້​ຮຽນ​ຮູ້​ວິ­ທີ​ຄົ້ນ­ຄວ້າ​ດ້ວຍ​ຕົນເອງ ເພື່ອ​ໃຫ້​ໄດ້ມາ​ເຊິ່ງ​ຄວາມ​ຮູ້ ຍົກ​ຕົວ­ຢ່າງ​ວ່າ: ຄູ​ສະ­ຫຼາດ​ຈະ​ສອນ​ວິ­ທີ​ຫາປາ​ໃຫ້​ແກ່​ລູກ­ສິດ ໂດຍ​ຫຼີກ­ເວັ້ນ​ເອົາ​ປາ​ໃຫ້​ເປັນ​ໂຕ ຖ້າ​ຄູ​ເຮັດວິ­ທີ​ນີ້​ລູກ­ສິດ​ຈະ​ສະ­ຫຼາດ ເພາະ​ເຂົາ​ຈະ​ຮູ້​ວິ­ທີ​ຫາ​ປາກິນ​ຕະຫຼອດ​ຊີ­ວິດ ເຊັ່ນ​ດຽວ​ກັບ​ການ​ສອນ​ໃຫ້​ລູກ­ສິດ (ນັກ­ຮຽນ) ຮູ້ເຖິງ​ວິ­ທີ​ຄົ້ນ­ຄວ້າ​ວິ­ໄຈ ແລະ ໃຫ້​ພວກ​ເຂົາ​ໄດ້​ໃຊ້​ຄວາມ​ຄິດຫາ​ວິ­ທີ​ທາງ​ອອກ ນີ້​ເປັນ​ການ​ປ່ອຍ​ໃຫ້​ພວກ​ເຂົາ​ໄດ້​ຄິດ ເພື່ອໃຫ້ເກີດ​ປັນ­ຍາ ແລະ ຄູ​ທີ່​ສະ­ຫຼາດ​ເຂົາ​ຈະ​ຫຼີກ­ເວັ້ນ​ທີ່​ສຸດເລື່ອງ​ການ​ບໍ່​ສອນ​ໃຫ້​ລູກ­ສິດ​ເຊື່ອ​ທັນ­ທີໂລດ ແຕ່​ເຂົາ​ຈະສອນ​ໃຫ້​ຄິດ​ຫາ​ເຫດ­ຜົນ​ສາ­ມາດ​ສະ­ແດງ​ຄວາມ​ຄິດ​ເຫັນ​ໄດ້ ດັ່ງ­ນັ້ນ ຂໍ້​ມູນຂ່າວ­ສານ​ທີ່​ມີ​ຢູ່​ອ້ອມ​ຕົວ​ນີ້​ ເຮົາ​ຈະ​ນຳ​ໃຊ້​ໃຫ້​ເກີດປະ­ໂຫຍດ​ໄດ້​ແນວ­ໃດ? ນີ້​ຄື​ປະ­ເດັນ​ທີ່​ຕ້ອງໄດ້​ຄິດ ແລະ ກໍຕ້ອງ​ໄດ້​ມີ​ສະ­ຕິ​ຮູ້​ວ່າ: ພາ­ລະ­ກິດ​ຂອງ​ການ​ສຶກ​ສາ ​ຄື​ຂະ​ບວນການ​ສ້າງ​ປັນ­ຍາ​ພັດ­ທະ­ນາ​ຄວາມ​ຮູ້ ຈຶ່ງ​ເປັນ​ພາ­ລະ­ກິດ​ທີ່​ບໍ່​ມີວັນ​ຈົບ.</p> <p style="text-align: justify;"> ສະ­ຫຼຸບ ໃນ​ແງ່​ມູມ​ທາງ​ພຸດ​ທະ​ສາດ­ສະ­ໜາ ຖື​ວ່າ​ຊີ­ວິດ​ຄືການ​ຮຽນ​ຮູ້ ແລະ ໃຫ້​ເບິ່ງ​ວັດ­ຖຸ​ທັງ­ຫຼາຍໃນ​ຫຼາຍ​ແງ່​ມູມ ໂດຍ​ຫຼີກ­ເວັ້ນ​ການ​ເບິ່ງ​ແບບ​ແງ່​ມູມ​ດຽວ ແບບ​ນິ­ທານ​ຕາບອດ​ຄຳ​ຊ້າງ ​ເປັນ​ຄະ­ຕິ​ສອນ​ໄດ້​ດີ ມີ​ຄົນ​ໄປ​ຖາມ​ພະ​ພຸດ​ທະເຈົ້າ​ວ່າ: ການ​ຢູ່​ປ່າ​ດີ ຫຼື ບໍ່​ດີ? ພະ­ພຸດ­ທະ­ເຈົ້າ​ຕອບວ່າ: ຖ້າ​ຢູ່ປ່າ​ຈິດ­ໃຈ​ສະ­ຫງົບ​ແມ່ນ​ດີ ແຕ່​ຖ້າ​ຢູ່​ແລ້ວ​ຈິດ­ໃຈ​ບໍ່​ສະ­ຫງົບແມ່ນ​ບໍ່​ດີ ນີ້​ຄື​ຕົວ­ຢ່າງ​ການສອນ​ໃຫ້​ເບິ່ງ​ຫຼາຍ​ແງ່​ມູມ ໝາຍຄວາມ​ວ່າ ​ບໍ່​ໃຫ້​ເບິ່ງ​ໂລກ​ດ້ານ​ດຽວ.</p> <p style="text-align: justify;"> ກໍ່​ດັ່ງ​ດຽວ​ກັບ​ການ​ຂະ­ຫຍາຍ​ຂອບ​ຟ້າ​ແຫ່ງ​ຄວາມ​ຮູ້​ ຕ້ອງໄດ້​ຊອກ​ຫາ ແລະ updates ຄວາມຮູ້​ຂອງ​ຕົນ​ຢູ່​ເລື້ອຍໆ ທັງໃນ​ແງ່​ບວກ ແລະ ແງ່​ລົບ ບໍ່​ຊັ້ນ​ຈະ​ເປັນ​ຄົນ​ຕົກ​ຂອບ​ຟ້າ​ແຫ່ງຄວາມ​ຮູ້ໄປ​ໃນ​ທີ່​ສຸດ.</p> <p style="text-align: justify;"> <strong>ໂດຍ: ດັ້ນ​ກີບ​ເມກ</strong></p>

ຂ່າວທີ່ກ່ຽວຂ້ອງ