ຍິ່ງ​ແກ່​ຍິ່ງ​ກົ້ມ ເໝືອນ​ເຂົ້າ​ໃນ​ນາ

1.711 25 ພ.ຈ. 2013 ນານາສາລະ

<p style="text-align: justify;"> ບົດ​ນີ້​ຢາກ​ພັນ​ລະ​ນາເຖິງ​ຮູບ​ຮ່າງ​ລັກ­ສະ­ນະຄົນ​ເກັ່ງ ເພາະ­ວ່າ​ສັງ­ຄົມໃດ​ກໍ​ມີ​ຄົນ​ເກັ່ງ​ຮ່ວມ​ອາໄສ​ຢູ່​ນຳ ເຊິ່ງ​ຄົນ​ເກັ່ງ​ທີ່​ເວົ້າ​ນັ້ນ​ອາດ​ຢູ່​ໃນ​ຄາບ​ນັກ­ປາດ ບັນດິດ ຫຼື ປັນ­ຍາ​ຊົນ ທີ່​ຄອຍ​ຊ່ວຍ­ເຫຼືອ​ສັງ­ຄົມ​ບໍ່​ໃຫ້​ເກີດ​ຄວາມສູນ​ເສຍ​ໃນ​ຊັບ​ສິນ ຫຼື ຜົນ​ປະ­ໂຫຍດ​ຂອງ​ສ່ວນ​ລວມ ແຕ່​ກໍອາດຍັງ​ມີ​ສ່ວນ​ໜຶ່ງ​ຂອງ​ຄົນ​ເກັ່ງ​ທີ່​ຜິດ­ພາດຂາດ​ສະ­ຕິ​ບາງຄັ້ງ​ຄາວ ເລີຍ​ຕົກ​ກະ​ປ໋ອງ​ໄປ​ກໍ​ມີ​ ລັກ­ສະ­ນະ​ທີ່​ວ່າ​ນີ້​ ອາດ​ເກີດມາ​ຈາກ​ສ່ຽວ​ເຫີຍ​ເກີຍ​ຮັກ​ບໍ່​ຕັກ­ເຕືອນ ຫຼື ອາດ​ຈະ​ມີ​ກໍ­ລະ­ນີອື່ນ​ອີກ ເຊັ່ນ: ພັກ​ພວກ​ເຕືອນ​ແລ້ວ​ບໍ່​ຟັງ ຈຶ່ງ​ປ່ອຍ​ໃຫ້​ທຳ​ມະຊາດ​ສອນ​ມວຍ.</p> <p style="text-align: justify;"> ຂໍ​ເຂົ້າ​ສູ່​ເນື້ອ​ໃນ​ວ່າ ​ຄົນ​ເກັ່ງ​ອາດ​ມີ​ຫຼາຍ​ປະ­ເພດ ໃນ​ທີ່​ນີ້​ຂໍຍົກ​ມາ​ເວົ້າ​ສູ່​ກັນ​ຟັງ​ພຽງ 3 ປະ­ເພດ ເພື່ອ​ເປັນ​ຫຼັກ​ຄິດ​ຂັ້ນ​ຕົ້ນ ຄື: ປະ­ເພດ​ທີ​ໜຶ່ງ​ແມ່ນ​ເກີດ​ມາ​ເກັ່ງ ໝາຍ​ຄວາມ​ວ່າ​ ເປັນ​ຜູ້​ມີບຸນ​ມາແຕ່​ຊາດ​ກ່ອນ (ນີ້​ເວົ້າ​ຕາມ​ຄະ­ຕິ​ຄວາມ​ຄິດ​ຂອງ​ຄົນລາວ) ຄື​ເປັນ​ຜູ້​ມີ​ມັນ­ສະ­ໝອງ​ຄວາມ​ຈື່​ຈຳ­ເປັນ​ເລີດ ພ້ອມດ້ວຍ​ພອນ​ສະ­ຫວັນ​ພິ­ເສດ​ຕິດ​ໂຕ​ມາ ເມື່ອ​ເວ­ລາ​ໄດ້​ຮ່ຳ­ຮຽນສຶກ​ສາ​ຄົ້ນ­ຄວ້າ ໄດ້ຮັບການສົ່ງ­ເສີມ​ຈາກ​ຄອບ­ຄົວ ແລະ ສັງ­ຄົມ ຈຶ່ງ​ເຮັດ​ໃຫ້​ຄົນ​ປະ­ເພດ​ນີ້​ກາຍ­ເປັນ​ຄົນ​ເກັ່ງ​ຂອງສັງ­ຄົມ ຖື​ໄດ້ວ່າ ປະ­ເພດ​ທີ​ໜຶ່ງ​ນີ້​ໜ້າ​ຄິດ​ພິ­ຈາ­ລະ­ນາ​ສົ່ງ­ເສີມ​ໃຫ້​ພວກ​ເຂົາໄດ້​ສະ­ແດງ​ສີ­ມື​ໃນການ​ເຮັດ​ວຽກ​ງານ.</p> <p style="text-align: justify;"> ຄົນ​ເກັ່ງ​ປະ­ເພດ​ທີ​ສອງ​ ແມ່ນ​ຢູ່​ລະ­ດັບ​ກາງ ຄື​ພໍ​ໄປ​ໄດ້​ກັບສັງ­ຄົມ ສາ­ມາດ​ເຮັດ​ວຽກ​ໃຫ້​ໜ່ວຍງານ ແລະ ສັງ­ຄົມ​ໄດ້ ແຕ່​ອາດ​ບໍ່​ໂດດ​ເດັ່ນ​ເທົ່າ​ປະ­ເພດ​ທີ​ໜຶ່ງ ເພາະ​ລະ­ດັບ​ຂີດຄວາມ​ສາ­ມາດ​ທັງ​ມັນ­ສະ­ໝອງ ແລະ ຮ່າງ­ກາຍ​ບໍ່​ຢູ່​ໃນ​ຂັ້ນຫົວ​ກະ­ທິ ແຕ່​ບໍ່​ເຖິງ​ຂະ­ໜາດ​ວ່າ​ເປັນ​ຫາງ​ກະ­ທິ ຈຶ່ງ​ພໍສົ່ງ­ເສີມຝຶກ​ຝົນ​ໃຫ້​ມີ​ຄວາມ​ກ້າວ­ໜ້າ​ໄດ້.</p> <p style="text-align: justify;"> ຄົນ​ເກັ່ງ​ປະ­ເພດ​ທີ​ສາມ​ນີ້​ໜ້າ​ຄິດ​ ເທົ່າ​ທີ່​ຟັງ​ຫາງ​ສຽງ​ຈາກສັງ­ຄົມ ແລະ ແລກ­ປ່ຽນ​ຄວາມ​ຄິດເຫັນ​ກັບ​ຜູ້​ມີ​ອາ­ຍຸ​ສູງ ​ເພິ່ນໄດ້​ຖ່າຍ​ທອດ​ປະ­ສົບ​ການ ເຊິ່ງ​ພໍ​ອະ­ທິ­ບາຍ​ໄດ້​ວ່າ ​ເກັ່ງ​ປະ­ເພດສາມນີ້ ຖ້າ​ເວົ້າ​ເຖິງ​ມັນ­ສະ­ໝອງ​ແມ່ນ​ຈັດ​ຢູ່​ໃນ​ປະ­ເພດ​ຫາງກະ­ທິ​ເທົ່າ​ນັ້ນ ຫຼື ບາງ​ຄັ້ງ​ກໍ​ຢູ່​ໃນ​ລັກ­ສະ­ນະ​ສະ­ໝອງ​ຂີ້​ເລື່ອຍ ແຕ່​ວ່າ​ມີ​ໄຫວ​ພິບ​ປະ­ຕິ­ພານ​ເອົາ​ຕົວ​ລອດ​ສູງ ໂດຍ​ສະ­ເພາະການ​ສ້າງພາບ​ພົດ​ໃຫ້​ແກ່​ຕົນ​ເອງ ຖ້າ​ເບິ່ງ​ໃນ​ດ້ານ​ວຽກ​ງານກໍ​ເຮັດ​ໄດ້​ແນ່​ບາງ​ອັນ ແຕ່​ພວກ​ນີ້​ຈະ​ມີ​ເທັກນິກ​ພິ­ເສດ​ໃນການ​ຊອຍ​ຜັກ­ຫອມ​ເຂົ້າ​ປາກ​ໂຕ​ເອງ ຫຼື ບໍ່​ດັ່ງ­ນັ້ນ​ເວ­ລາ​ສົນທະ​ນາ​ເວົ້າ​ຈາ​ປາ​ໄສ​ກໍອ້າງ​ແຕ່​ຜູ້​ຫຼັກ​ຜູ້​ໃຫຍ່​ ເພື່ອ​ເປັນ​ການສ້າງ​ຄວາມ​ໜ້າ​ເຊື່ອ​ຖື​ໃຫ້​ແກ່​ຕົນ​ເອງ (ເຊິ່ງ​ຜູ້​ບໍ່​ຮູ້​ເທົ່າ​ທັນ​ກໍຫຼົງ​ເຊື່ອ) ສ່ວນ­ວ່າ​ຜູ້​ຮູ້​ຫຼ່ຽມ​ທັນ​ເຂົາ​ກໍ​ພຽງ​ອົມ​ຍິ້ມ​ຊື່ໆ ນອກຈາກ​ທີ່​ວ່າ​ມາ​ນັ້ນ ຍັງ​ມີ​ອີກ​ຫຼາຍ​ຢ່າງທີ່​ຄົນ​ປະ­ເພດ​ທີ​ສາມຫາງ​ກະ­ທິ​ ອວດ​ລິດ​ເກືອບ​ຕະ­ຫຼອດ​ເວ­ລາ ເຊັ່ນ​ວ່າ ​ສະ­ຫຼາດ ແລະ ເກັ່ງ​ໃນການ​ກິນ​ຜົນ­ງານ​ຄົນ​ອື່ນ ໂດຍ​ສະ­ເພາະ​ເຈົ້າຂອງ​ຜົນ­ງານ​ເຫຼົ່າ­ນັ້ນ​ຕາຍ​ໄປ​ຍິ່ງ​ດີ ເຊິ່ງ​ຜູ້​ຂຽນ​ເຊື່ອແນ່​ວ່າ ທ່ານ​ຜູ້​ອ່ານ​ຫຼາຍ​ຄົນ​ກໍ​ອາດ​ໄດ້​ຮູ້​ເຫັນ​ປະ­ກົດ​ການ​ທີ່​ເວົ້າ​ມານີ້.</p> <p style="text-align: justify;"> ດັ່ງ­ນັ້ນ ຕໍ່​ຫົວ­ຂໍ້​ທີ່​ຍົກ​ເອົາ​ພາ­ສິດ​ລາວ ​ສອນ​ໃຫ້​ຄົນ​ເຮົາ​ເປັນຄົນ​ອ່ອນ​ນ້ອມ​ຖ່ອມ​ໂຕ​ຄື​ດັ່ງ​ເມັດເຂົ້າ​ໃນ​ນາ ​ທີ່​ເຕັມ​ເມັດ​ເຕັມຮວງ​ ຈຶ່ງ​ກົ້ມ​ກ່ອງ​ລົງ​ສູ່​ດິນ ແລະ ບໍ່​ຊີ້​ຟ້າ​ຄື​ດັ່ງ​ຮວງ​ເຂົ້າ­ລີບ ຈຶ່ງ​ພໍ​ອະ­ທິ­ບາຍ​ໄດ້​ຕື່ມ​ອີ​ກວ່າ ຄົນ​ເກັ່ງ​ປະ­ເພດ​ທີ​ໜຶ່ງ ແມ່ນຈັດ​ຢູ່​ໃນ​ພວກ​ຫົວ​ກະ­ທິ ແນ່­ນອນ​ຖ້າ​ໄດ້​ຮັບການ​ສົ່ງ­ເສີມ​ໃຫ້ພວກ​ເຂົາ​ໄດ້​ພັດ­ທະ­ນາ​ສີ­ມື​ສຸດ​ຂີດ​ຄວາມ​ສາ­ມາດ​ຂອງ​ເຂົາ ຈະ​ເປັນ​ຜົນ​ດີ​ຕໍ່ປະ­ເທດ​ຊາດ ແຕ່​ມີ​ຂໍ້​ໜ້າ​ສັງ­ເກດ​ຢູ່​ບ່ອນ​ວ່າ ​ປະເພດ​ທີ​ໜຶ່ງ​ນີ້​ແມ່ນ​ເປັນ​ຄົນ​ບໍ່​ອວດ ເຮັດ​ວຽກ​ສຸດຂີດ​ຄວາມ​ສາມາດ ເພື່ອ​ສ້າງ​ຜົນ­ງານ​ປະ​ໄວ້​ໃຫ້​ແກ່​ສັງ­ຄົມ ແລະ ແຜ່ນ­ດິນເກີດ ສ່ວນ­ວ່າ​ປະ­ເພດ​ທີ​ສອງ ກໍ​ສາ­ມາດ​ພັດ­ທະ­ນາ​ໄດ້​ຕາມກຳ­ລັງ​ຄວາມ​ສາ­ມາດ​ຂອງ​ເຂົາ ຖ້າ​ເບິ່ງ​ໃນ​ແງ່​ຜູ້​ບໍ­ລິ­ຫານ​ກໍແມ່ນ​ຢູ່​ໃນ​ລະ­ດັບ​ກາງ ແຕ່​ທີ່​ໜ້າ​ຄິດ​ກໍ​ຄົງ​ແມ່ນ​ປະ­ເພດ​ສຸດທ້າຍ​ນີ້​ແຫຼະ ເບິ່ງ​ຄື​ວ່າ​ພວກຫາງ​ກະ­ທິ​ນີ້​ກໍ​ພະ­ຍາ­ຍາມ​ຢາກສ້າງ​ໂຕ​ເອງ​ໃຫ້​ເປັນ​ຫົວ​ກະ­ທິ​ ດ້ວຍ​ເທັກ​ນິກ​ສະ­ເພາະ​ໂຕ​ຫຼາຍວິ­ທີ ເຊັ່ນ: <strong>ປີນ​ປ່າຍ ​ໜີບ​ເຕັງ</strong> ແລະ <strong>ຊອຍ​ຫອມ​ເຂົ້າ​ປາກ​ໂຕເອງ</strong> ຫຼື ບໍ່​ດັ່ງ­ນັ້ນ​ກໍ​ຈັດ​ຢູ່​ໃນ​ຕຳ­ນານ <strong>ໝູ​ເຮັດ​ນາ​ ໝາ​ກິນ​ເຂົ້າ</strong> ທີ່​ຜູ້​ຂຽນ​ຍົກ​ເຫດ­ຜົນ​ມາ​ນັ້ນ​ ອາດ​ປະ­ກົດ​ມີ​ໃຫ້​ເຫັນ​ໃນ​ສັງ­ຄົມ ຖື​ວ່າ​ເປັນການ​ແລກ­ປ່ຽນ​ຄຳ​ເຫັນ​ກັບ​ທ່ານ​ຜູ້​ອ່ານ ເຊິ່ງ​ບາງຄົນ​ອາດ​ເວົ້າ​ວ່າ​ມັນ​ຢູ່​ໃນ​ລັກ­ສະ­ນະ​ທິດ​ສະ​ດີ ແຕ່​ກໍ​ຢາກ​ຂໍຝາກ​ຂໍ້​ຄິດ​ຕອນ​ທ້າຍ​ໄວ້​ວ່າ ເຮັດ​ຫຍັງ​ຖ້າ​ບໍ່​ມີ​ທິດ​ສະ​ດີ​ເຍືອງທາງ ​ກໍ​ງົມ​ມືດ​ທໍ່​ນັ້ນ ລອງ​ຄິດ​ເບິ່ງ​ກໍ​ແລ້ວ​ກັນ ! ເລືອກ​ຊ້າງ ມ້າ ງົວ ຄວາຍ ເຂົາ​ກໍ​ມີ​ຕຳ­ລາ ຈະ​ເລືອກ​ຄົນ​ມາ​ເປັນ​ນາຍ</p> <p style="text-align: justify;"> ຫຼື ລູກ​ນ້ອງ​ ເຂົາ​ກໍ​ມີ​ວິ­ທີ​ເບິ່ງ​ຄື​ກັນ.</p> <p style="text-align: justify;"> <strong>ໂດຍ: ດັ້ນ​ກີບ​ເມກ</strong></p>

ຂ່າວທີ່ກ່ຽວຂ້ອງ