ຢ່າ​ຟ້າວ​ຖິ້ມ​ຕຳ­ລາ

<p style="text-align: justify;"> ມີ​ຫຼາຍ​ຄົນ​ຄົງ​ເຂົ້າ­ໃຈ​ນຳ​ກັນ​ວ່າ: ປຶ້ມ​ຕຳ­ລາ​ເປັນ​ສິ່ງທີ່​ສຳ­ຄັນ​ໃນ​ການ​ພັດ­ທະ­ນາ​ວຽກ​ງານ ເພາະ​ເວ­ລານາຍ​ສັ່ງ​ວຽກ​ກ່ຽວ​ກັບ​ການ​ຂີດ​ຂຽນ​ຖ້າ​ໂຕ​ໃດ​ຕິດ​ຂັດ-­ຂ້ອງ​ຄາ​ຕ້ອງ​ໄດ້​ເປີດຕຳ­ລາ​ຊ່ວຍ​ແກ້ໄຂ ນີ້​ແຫຼະ​ທີ່​ບູ­ຮານ​ສອນ​ວ່າ: ສາຍ​ນ້ຳ​ເປັນກຳ­ລັງ​ຂອງ​ປາ ທ້ອງ­ຟ້າ​ເປັນກຳ­ລັງ​ຂອງ​ນົກປຶ້ມ​ຕຳ­ລາ​ກໍເປັນ​ກຳ­ລັງ​ຂອງ​ນັກ­ປາດ ຖ້າ​ພວກ​ເຮົາ​ທັງ­ຫຼາຍ​ເຮັດ​ໄດ້​ຄື​ຍົກມາ​ນີ້​ຄົງ​ດີ​ບໍ່ໜ້ອຍ ແຕ່​ກໍ​ຍັງ​ມີ​ໃຫ້​ເຫັນ​ປະ­ກົດ​ການ​ໃໝ່​ອີກແບບ​ໜຶ່ງ ໂດຍ​ສະ­ເພາະ​ຜູ້ເປັນ​ບັນ­ດິດຜູ້​ຮຽນ​ຈົບ​ໃໝ່ ບາງຄົນ​ບໍ່​ວ່າ​ຈະ​ຮຽນ​ຈົບ​ປະ­ລິນ­ຍາ​ພາຍ​ໃນ ຫຼື ຕ່າງ­ປະ­ເທດ​ກໍແລ້ວ­ແຕ່ມັກ​ເຂົ້າ­ໃຈ​ວ່າ​ພໍ​ຮຽນ​ຈົບ​ຄົງ​ຕ້ອງ​ບອກ​ລາ​ຕຳ­ລາກັນ​ໄດ້​ແລ້ວ.<br /> ທ່ານ​ຜູ້ອ່ານ​ລອງ​ຄິດ​ເບິງ​ວ່າ ຄົນ​ເຮົາ​ເວ­ລາ​ຮຽນ​ຈົບ​ວິ­ຊາຊີບ​ໃດ​ໜຶ່ງ ນັນ​ບໍ່ໄດ້​ໝາຍຄວາມວ່າ​ ພວກ​ເຂົາ​ເຫຼົ່າ­ນັ້ນ​ຈະ​ຈື່ຈຳ​ຄວາມ​ຮູ້​ທິດ​ສະ​ດີ​ທີ່​ຕົນ​ຮຽນ​ມາ​ໄດ້​ໝົດ ຫຼື ບາງ​ຄັ້ງມີ​ບາງກໍ­ລະ­ນີ​ ຮຽນ​ຫຼິ້ນໆ ຫຼື ຮຽນໆ​ຫຼົບໆ​ກໍ​ຈົບ​ໄປ​ເອງ ຄັນ​ເມື່ອ​ສະ­ໝັກ​ເຂົ້າ​ເຮັດ​ວຽກ​ ບາດນາຍສັ່ງ​ວຽກ ​ມີ​ບາງ​ອັນ​ເຮັດ​ໄດ້ ແລະ ມີ​ບາງ​ອັນ​ເຮັດ​ບໍ່​ໄດ້ ຫຼື ບໍ່​ເຂົ້າ­ໃຈ ​ກໍ​ບໍ່​ຮູ້​ວ່າ​ຈະໄປ​ຖາມ​ໃຜ?<br /> ບາງ​ຄົນ​ກໍ​ໄວ້​ລາຍ​ຢ້ານ​ເສຍ­ປຽບ ເພາະ​ຕົນ​ເອງ​ຮຽນ​ຈົບ​ໄດ້ໃບ​ປະ­ລິນ­ຍາ​ມາ​ສູງ​ແລ້ວ ເລີຍ​ເຮັດ​ໄປ​ຕາມ​ທີ່​ຕົນ​ເຂົ້າ­ໃຈ ແຕ່​ໂດຍ​ທົ່ວ​ໄປ​ພັດ​ບໍ່​ຖືກ​ກັບ​ເປົ້າ​ໝາຍ​ຂອງ​ວຽກ ຫຼື ວຽກນັ້ນ ສາ­ມາດ​ແກ້​ໄຂ​ໄລ­ຍະ​ສັ້ນ​ໄດ້ ແຕ່​ເບິ່ງ​ໃນ​ໄລ­ຍະ​ຍາວ​ແລ້ວ ພັດ​ມີ​ບັນ­ຫາ​ເກີດ​ຂຶ້ນ ​ຈົນກາຍ­ເປັນ​ທາງ​ຕັນ ເຊິ່ງ​ປະ­ກົດ​ການແບບ​ນີ້​ຂ້ອຍ​ໄດ້​ຍິນ​ຜູ້​ຮູ້​ບອກ​ວ່າ ນັກ­ວິ­ຊາ­ການ​ເຄິ່ງ​ຜີເຄິ່ງ​ຄົນນີ້ ​ອັນ­ຕະ­ລາຍ ຫຼື ບໍ່​ດັ່ງ­ນັ້ນ​ກໍ​ບໍ່​ເຫັນ­ແກ່​ຫຼັກ​ວິ­ຊາ​ການ​ໃນ​ການແກ້​ໄຂ​ບັນ­ຫາ ແຕ່ພັດ​ໄປ​ເຫັນ­ແກ່​ທະ­ນະ​ບັດ ຍິ່ງ​ເຮັດ​ໃຫ້​ວຽກ​ງານ​ສູນ​ເສຍ ບາງ​ຄັ້ງ​ໄດ້­ຜົນ​ປະ­ໂຫຍດ​ຕົນ ແຕ່​ເສຍ​ຜົນ​ປະ­ໂຫຍດ​ສ່ວນ​ລວມ ຕໍ່​ບັນ­ຫາ​ນີ້​ຄົງ​ເປັນ​ເລື່ອງ​ທີ່​ໜ້າ​ຄິດ​ໃນ​ບາງໜ່ວຍ​ງານຖ້າ­ວ່າ​ມີ​ປະ­ກົດ​ການ​ຄື​ດັ່ງ​ທີ່​ເວົ້າ​ມາ.<br /> ຖ້າ​ໃຜ​ກໍ​ຕາມ​ຖື​ຄະ­ຕິ​ທີ່​ວ່າ ຊີ­ວິດ​ຄື​ການ​ຮຽນ​ຮູ້ ຊີ­ວິດ​ຕ້ອງ​ມີການ​ພັດ­ທະ­ນາ​ຢ່າງ​ຕໍ່​ເນື່ອງເຖິງ​ແມ່ນ​ວ່າ​ຕົນ​ເອງ​ຈະ​ຮຽນຈົບ​ສູງ​ມາ​ກໍ​ຕາມ ແຕ່​ເວ­ລາ​ມາ​ເຮັດ​ວຽກ​ງານ​ຕົວ​ຈິງ​ມັນອາດ​ແຕກ​ຕ່າງ​ກັບ​ທິດ​ສະ​ດີ ຫຼື ຕຳ­ລາ​ທີ່​ຕົນ​ຮຽນ​ມາ ຖ້າ​ເປັນ​ພະ­ນັກ­ງານ​ໜຸ່ມ​ນ້ອຍ​ຄົງຕ້ອງ​ແກ້​ດ້ວຍ​ການ​ເຂົ້າ​ໄປ​ຫາພະ­ນັກ­ງານ​ອາ­ວຸ­ໂສ​ທີ່​ເພິ່ນ​ມີ​ປະ­ສົບ​ການ​ອ່ອນ​ນ້ອມ​ຖ່ອມຕົນ ຮຽນ​ຮູ້​ເອົາ​ບົດ­ຮຽນ ແລະ ປະ­ສົບ​ການ​ນຳ​ເພິ່ນ ໂດຍ​ຫຼີກ­ເວັ້ນການ​ອວດ­ອົ່ງ​ຖື­ໂຕ ຫຼືໄປ​ຫຼົງ​ຢຶດ​ຖື​ເອົາ​ໃນ​ໃບ​ປະ­ລິນ­ຍາ​ທີ່ຕົນ​ຮຽນ​ມາ ຕໍ່​ກັບ​ບັນ­ຫາ​ນີ້ ປະ­ທານ ໂຮ່​ຈິ​ມິນ ເຄີຍຂຽນ​ໄວ້ໃນ​ປຶ້ມ​ການ​ແກ້​ໄຂ​ວິ­ທີ​ເຮັດ​ວຽກ ເຊິ່ງ​ພະ­ນັກ­ງານ​ຫຼາຍ​ທ່ານກໍ​ມີ​ໄວ້​ປະ­ຈຳ​ໜ້າໂຕະເພາະ​ໃນ​ປຶ້ມ​ຫົວ​ນັ້ນ​ມັນ​ໄດ້​ເວົ້າ “ເຖິງ​ພະ­ຍາດ​ຂອງ​ພະ­ນັກ­ງານ​ລັດ​ໄວ້​ຫຼາຍ​ຢ່າງ...”ໃນ​ນັ້ນເວົ້າ​ຮອດ​ການ­ສະ­ແດງ​ທັດ­ສະ­ນະ​ຄະ­ຕິ​ຂອງ​ພະ­ນັກ­ງານ​ບາງ​ຄົນໃນ​ການ​ເຮັດ​ວຽກ ເພາະບາງ­ເທື່ອ​ກໍ​ເອົາ​ອັດ​ຕະ​ວິ­ໄສ​ຂອງ​ຕົນ ໄປ​ປະ​ສົມ­ປົນ​ເປ​ຫຼາຍ​ໂພດ ເຮັດ​ໃຫ້​ວຽກ​ງານບໍ່​ສາມາດ​ແກ້​ໄຂ​ຕາມ​ທິດ​ຊີ້​ນຳ​ຂອງ​ຂັ້ນ​ເທິງ​ໄດ້ ຫຼື ບໍ່​ດັ່ງ­ນັ້ນ ກໍ​ມີ​ພະ­ຍາດເປັນ​ແຕ່​ປາກ ບາດວ່າ​ນາຍ​ສັ່ງ​ວຽກ​ຕົວ​ຈິງ​ແລ້ວ​ພັດ​ເຮັດແປະໆ​ບາງໆ.<br /> ຂໍ​ອະ­ໄພ​ທີ່​ຕ້ອງ​ສະ­ແດງ​ທັດ­ສະ­ນະ​ສ່ວນ​ຕົວ​ຄື​ແນວ​ນັ້ນ ຂ້ອຍ​ໄດ້​ມີ​ໂອ­ກາດ​ໄດ້​ຮູ້­ຈັກ​ກັບພະນັກ​ງານ​ອາ­ວຸ­ໂສຮຸ່ນ​ອ້າຍ​ບໍ່ຫຼາຍ​ຄົນ ພວກ​ເຂົາ​ເຫຼົ່າ­ນັ້ນ​ໄດ້​ວິ­ເຄາະ​ການ​ເຮັດ​ວຽກ​ຂອງແຕ່­ລະ­ຄົນ​ໃຫ້​ຟັງ ສ່ວນ​ໃຫຍ່​ເພິ່ນ​ຈະ​ລົງ­ທ້າຍ​ດ້ວຍ​ເຫດ­ຜົນ​ທີ່​ວ່າ ພວກ​ເຂົາ​ເຫຼົ່າ­ນັ້ນ​ບໍ່​ພັດທະ​ນາ​ຕົນ​ເອງ ​ໃນ​ການ​ສຶກ​ສາ​ຄົ້ນ­ຄວ້າ​ ຊອກ​ຮູ້​ອ່ານ​ຕຳ­ລາ​ ເພື່ອ​ໃຫ້​ຕົນ​ເອງ​ກ້າວ​ທັນ​ກັບໂລກ​ຂອງ​ການ​ປ່ຽນ­ແປງ ເຊິ່ງ​ຍາມ​ໃດ​ຂັ້ນ​ເທິງ​ຍ່ອມ​ຕ້ອງ­ການ​ຄົນດີ​ມີ​ສີ­ມື ນອກ­ຈາກນີ້ ເພິ່ນ​ຍັງ​ໄດ້​ຍົກ​ເອົາ​ບົດ­ຮຽນ​ການ​ເຮັດ​ວຽກ​ຂອງ​ທ່ານ ໄກ­ສອນ ພົມ­ວິ­ຫານ ມາ​ເປັນ​ຕົວຢ່າງ​ວ່າ ເພິ່ນ​ພັດ­ທະ­ນາ​ຕົນ​ເອງ​ຄື​ແນວ­ໃດ ? ນອກ­ຈາກ​ນີ້ ເພິ່ນ​ຍັງ​ໄດ້​ເວົ້າ​ເຖິງ​ການຫ່າງເຫີນ​ຈາກ​ປຶ້ມ​ຕຳ­ລາ ​ອັນ​ເປັນ​ເຄື່ອງ­ມື​ໃນການ​ປະ­ກອບ​ຂອງ​ການ​ເຮັດ​ວຽກ​ທີ່​ສຳ­ຄັນ ລວມທັງ​ມະ­ຕິ​ຄຳ​ສັ່ງ​ແນະ­ນຳ​ຕ່າງໆ ​ຕ້ອງ​ໄດ້​ອ່ານ​ທົບ​ທວນ​ໄປ​ມາເພື່ອ​ໃຫ້​ເຂົ້າ­ໃຈ ກຳ​ໄດ້ແນວທາງ​ນະ­ໂຍ­ບາຍ​ທີ່​ຂັ້ນ​ເທິງ​ວາງ​ອອກ.<br /> ສິ່ງ​ທີ່​ຍົກ​ມາ​ເວົ້າ​ຂ້າງ​ເທິງ​ນັ້ນ​ເຫັນ​ໄດ້​ວ່າ ຄົນ​ເຮົາ​ເຖິງ​ຈະ​ຮຽນ​ຈົບ​ສູງ​ມາ​ກໍ​ຊ່າງ ຖ້າ​ປະຖິ້ມຕຳ­ລາ​ເອ­ກະ­ສານ​ ຄຳ​ສັ່ງແນະ­ນຳ​ຕ່າງໆ​ມາ​ສຶກ​ສາ​ຄົ້ນ­ຄວ້າ ພ້ອມ​ດ້ວຍ​ການ​ຊອກ​ສະແຫວງ​ຫາ​ບົດ­ຮຽນ​ນຳ​ພະ­ນັກ­ງານ​ອາ­ວຸ­ໂສ​ແລ້ວ ກໍ​ຍາກ​ທີ່​ຈະເຮັດ​ວຽກ​ໃຫ້​ມັນ​ບັນ­ລຸຕາມເປົ້າ​ໝາຍ​ໄດ້ ຫຼື ບໍ່ ດັ່ງ­ນັ້ນ ຖ້າ​ມີແຕ່​ການ​ອວດ­ອົ່ງ​ຖື­ໂຕ ຢຶດ​ຖື​ໃນ​ຄຸນ​ນະ​ວຸດ​ໃບ​ປະ­ລິນ­ຍາ​ທີ່ຮຽນ​ມາ ບາດ​ເຮັດ​ວຽກ​ຕົວ​ຈິງ​ຜົນ​ຈຶ່ງ​ອອກ​ມາ​ແບບ​ເຄິ່ງ​ດິບເຄິ່ງ​ສຸກ ຖ້າ​ເປັນແນວ​ນີ້​ຫາງສຽງ​ສັງ­ຄົມ​ເວົ້າ​ວ່າ ນັກ­ວິ­ຊາ­ການ​ເຄິ່ງ​ຜີ​ເຄິ່ງ​ຄົນ​ມັນ​ກໍ​ຖືກ​ແລ້ວ.</p> <p style="text-align: right;"> <strong>ໂດຍ: ດັ້ນ​ກີບ​ເມກ</strong><br />  </p>