ສຳ­ລັບ​ຄໍ​ລຳ ໄອ​ທີນ (IT) ຢາກ​ບອກ ຂອງ​ເວບ​ໄຊ​ວຽງ​ຈັນ​ໃໝ່ ອອນ​ລາຍ​ນັ້ນ ບໍ່​ໄດ້​ອັບ​ເດດ​ໄປ​ດົນ​ເຕີບ ແຕ່​ກໍ​ໄດ້​ມີ​ຜູ້​ອ່ານ​ບາງ​ທ່ານ​ທີ່​ໄດ້​ຕິດ­ຕາມ​ອ່ານ ແລະ ສົ່ງ​ຂໍ້​ສົງ​ໃສ​ມາ ໃນ​ບົດ​ຄວາມ “ RubberDucky  ປັດ​ນ້ອຍ​ຊ່ວຍ​ກວດ­ກາ​ສະ­ພາບ​ຄອມ ” ເພິ່ນ​ຖາມ​ວ່າ ຊ່ວຍ​ບອກ​ວິ­ທີ​ແກ້​ຄອມ​ໃກ້​ຊິ​ແຮ໋ງ​ແນ່...!!! ແລະ​ອີກ​ທ່ານ​ກ່ອນ​ໜ໊າ ບັນ­ຫາ​ຄອມ​ມັກ​ຄ້າງ ຊອກ​ຫາ​ວິ­ທີ​ແກ້​ໄຂ​ແນວ­ໃດ ກະ­ລຸ­ນາ​ຊ່ວຍ​ບອກ??

1.ຊ່ວຍ​ບອກ​ວິ­ທີ​ແກ້​ຄອມ​ໃກ້​ຊິ​ແຮ໋ງ​ແນ່...!!!

ອາ­ການ​ທີ່​ຖາມ​ມາ​ນີ້ ແມ່ນ​ອາ­ການ​ຄອມ​ໄກ້​ຊິ​ແຮ໋ງ ແຕ່​ຍັງ​ບໍ່​ໄດ້​ແຮ໋ງ​ເທື່ອ ອາດ​ຈະ​ຊ້າໆ ກະ­ຕຸກ... ສາ­ເຫດ​ຫຼັກໆ​ກໍ​ຍ້ອນ​ວ່າ ຄອມ​ນັ້ນ​ມີ​ແຣມ​ໜ້ອຍ ແລ້ວ​ເປີດ​ໃຊ້​ຫຼາຍໆໂປຣ​ແກມ​ພ້ອມ​ກັນ ຫຼື ໂປຣ​ແກຣມ​ທີ່​ໃຊ້​ຢູ່​ນັ້ນ​ມີ​ຂະ­ໜາດ​ໃຫຍ່ ຊຶ່ງ​ເຮັດ​ໃຫ້​ເປືອງ​ແຣມ ເຊັ່ນ​ໂປຣ​ແກມ​ຂອງ​ຄ້າຍ Adobeຄື: Photoshop, Indesign... ຫຼື ໂປຣ​ແກມ Multimedia ອື່ນໆ ຫຼື ບາງ­ເທື່ອ​ຄອມ​ຂອງ​ທ່ານ​ອາດ​ມີ​ໄວ​ຣັດ ກໍ​ເປັນ​ໄດ້.

ເມື່ອ​ເກີດ​ອາ­ການ​ແບບ​ນີ້ ທ່ານ​ກໍ​ພຽງ​ອອກ​ໂປຣ​ແກມ​ໃດ​ໜຶ່ງ ເພື່ອ​ປ້ອງ​ກັນ​ບໍ່​ໃຫ້​ຄອມ​ແຮ໋ງ ຫຼື ຄວນ​ເພີ່ມ​ແຣມ (ຕ້ອງ​ໃຫ້​ຊ່າງ​ເປັນ​ຜູ້​ກວດ​ສອບ ແລະ ໃສ່​ແຣມ​ໃຫ້ ຖ້າ​ທ່ານ​ບໍ່​ຊຳ­ນານ).

ແຕ່​ໃນ​ກໍ­ລະ­ນີ​ທີ​ສົງ​ໃສ​ວ່າ​ອາດ​ມີ​ໄວ​ຣັດ ກໍ​ໃຫ້​ລົງ​ໂປຣ​ແກມ Antivirus ແລ້ວ​ກໍ Scan ຫຼື ບາງ​ທ່ານ​ມີ​ຢູ່​ແລ້ວ​ກໍ ສາ​ມາ Scan ໄດ້​ເລີຍ (ໂປຣ​ແກມ Antivirus ຄວນ​ໄດ້​ຮັບ​ການ​ອັບ​ເດດ​ຕະ­ຫຼອດ ເພື່ອ​ມີ​ການ​ປັບ­ປຸງ ແລະ ຮັບ​ຮູ້​ໄວ​ຣັດ​ໂຕ​ໃໝ່ໆ).

2.ບັນ­ຫາ​ຄອມ​ມັກ​ຄ້າງ ຊອກ​ຫາ​ວິ­ທີ​ແກ້​ໄຂ​ແນວ­ໃດ ກະ­ລຸ­ນາ​ຊ່ວຍ​ບອກ??

ບັນ­ຫາ​ຄອມ​ມັກ​ຄ້າງ (ແຮ໋ງ) ນີ້ ມັນ​ກໍ​ມີ​ຫຼາຍໆ​ແບບ ເຊັ່ນ:

1.ຄ້າງ​ແບບ​ບໍ່​ສາ­ມາດ​ເໜັງ​ເມົ້າ​ໄດ້​ເລີຍ

2.ບາງ​ໂປຣ​ແກຣມ​ທີ່​ກຳ­ລັງ​ໃຊ້​ຄ້າງ ແຕ່​ກໍ​ສາ­ມາດ​ເໜັງ​ເມົ້າ​ໄດ້

3.ຄ້າງ​ຈົນ​ເຖິງ​ຂັ້ນ ຣີ​ສະ​ຕາດ ເອງ ຫຼື ເປັນ​ຈໍ​ສີ­ຟ້າ​ເລີຍ

ໃນ​ຂໍ້ 1 ແລະ 2 ນັ້ນ ສາ­ເຫດ​ອາດ​ເກີດ​ຈາກ​ດັ່ງ​ຫົວ­ຂໍ້​ທີ່​ໄດ້​ຕອບ​ໃນ​ຂໍ້ 1 ທີ່​ກ່າວ​ມາ​ນັ້ນ ແຕ່​ໃນ​ເມື່ອ​ຄອມ​ນັ້ນ​ເກີດ​ອາ­ການ​ຄ້າງ​ແລ້ວ ກໍ​ໃຫ້​ປະ­ຕິ­ບັດ​ດັ່ງ­ນີ້:

ກ.ຢ່າ​ຟ້າວ​ກົດ​ປຸ່ມ Restart ຫຼື ກົດ​ປຸ່ມ Power ໃນ​ທັນ­ທີ ເພາະ​ການ​ກະ­ທຳ​ແບບ​ນີ້ ອາດ​ສົ່ງ​ຜົນ​ໃຫ້​ອຸ­ປະ­ກອນ​ຕ່າງໆ ໂດຍ​ສະ­ເພາະ​ແມ່ນ​ຮາດ​ດິ​ສ ມີ​ປັນ­ຫາ ຫຼື ເຊື່ອມ​ສະ­ມັດ​ຕະ​ພາບ​ໄວ (ການ​ກົດ​ປຸ່ມ Power ຄວນ​ເປັນ​ວິ​ທີ່​ສຸດ​ທ້າຍ)

ຂ.ໃຫ້​ພະ­ຍາ­ຍາມ​ປິດ​ໂປຣ​ແກມ ຫຼື ຊອບ​ແວ ທີ່​ຄ້າງ ໂດຍ​ກົດ​ປຸ່ມ Ctrl+Alt+Del ພ້ອມໆ​ກັນ​ທັງ 3 ປຸ່ມ (ໃນ​ກໍ­ລະ­ນີ​ນີ້ WindowsXP ແລະ Windows7 ຈະ​ແຕກ​ຕ່າງ​ກັນ​ເລັກ​ໜ້ອຍ) ເພື່ອ​ຈະ​ເຂົ້າ​ມາ​ໜ້າ Windows Task Manager ໂດຍໃນ​ຊ່ອງ Applications ໃຫ້​ຊອກ​ເບິ່ງ​ໂປຣ​ແກຣມ​ທີ່​ມີ​ຂໍ້­ຄວາມ​ວ່າ Not Responding ກົດ​ເລືອກ ແລ້ວ​ກົດ​ປຸ່ມ End Task ເພື່ອ​ປິດ​ໂປຣ​ແກຣມ​ທີ່​ຄ້າງ

ຄ.ເມື່ອ ຂໍ້ ຂ ສຳ­ເລັດ ກໍ​ໃຫ້​ກົດ Start ເລືອກRestart ກ່ອນ​ໃຊ້​ງານ​ໃໝ່

ງ.ຖ້າ­ວ່າ​ບໍ່​ສາ­ມາດ​ປິດ​ໂປຣມ ຫຼື ຊອບ​ແວ​ຕ່າງ​ໄດ້ (ໃນ​ຂໍ້ ຂ) ໃຫ້​ກົດ​ປຸ່ມ Ctrl+Alt+Del ພ້ອມໆ​ກັນ ຊ້ຳ​ກັນ​ສອງ​ຄັ້ງ (ກົດ Ctrl+Alt ຄ້າງ​ໄວ້ ແລ້ວ​ກົດ Del ສອງ​ຄັ້ງ ເພື່ອ​ໃຫ້​ຄອມ ຣີ​ສະ​ຕາດ)

ຈ.ຫາ​ເຮັດ ຂໍ້ ງ ແລ້ວ ຄອມ​ຍັງ​ຄ້າງ​ຢູ່​ອີກ ໃຫ້​ກົດ Start ເລືອກShut Down

ສ.ຫາ​ເຮັດ ຂໍ້ ຈ ຍັງ​ບໍ່​ໄດ້​ອີກ​ກໍ​ຄົງ​ມີ​ວິ­ທີ​ສຸດ​ທ້າຍ ກໍ​ຄື ກົດ​ປຸ່ມ Power ຄ້າງ​ໄວ້​ປະ­ມານ 10 ວິ­ນາ­ທີ ຄອມ​ກໍ​ຈະ​ມອດ...

ແຕ່​ສຳ­ລັບ​ຂໍ້ 3 ນັ້ນ (ຣີ​ສະ​ຕາດ ເອງ ຫຼື ເປັນ​ຈໍ​ສີ­ຟ້າ) ນັ້ນ ຖ້າ​ຫາກ​ມີ​ອາ­ການ​ແບບ​ນີ້ ກໍ​ຄົງ​ຕ້ອງ​ແມ່ນ​ຊ່າງ​ທີ່​ຊຳ­ນານ​ງານ​ເປັນ​ຜູ້​ປະ­ຕິ­ບັດ ເພາະ​ອາດ​ເປັນ​ໃນ​ສ່ວນ​ຂອງ Hardware ທີ່​ບ່ອນ​ສຽບ​ມັນ​ອາດ​ຈະ​ຫຼົມ ຫຼື ອາ​ຈະ​ເປ​ເພ ກໍ​ເປັນ​ໄປ​ໄດ້...

ນ.ລາຊາ