ປັດຈຸບັນ ຄວາມເຫີ່ ແລະ ແລ່ນນຳຂອງໃໝ່ ຫຼື ກະແສລົດນິຍົມທີ່ແປກໆ ໄດ້ເຮັດໃຫ້ຢູ່ບ້ານເຮົາມີທັງເຝີແຊບເຈົ້າເກົ່າ ແລະ ເຝີແຊບເຈົ້າໃໝ່ ຄົນທີ່ດຳລົງຊີວິດຢູ່ນະຄອນຫຼວງວຽງຈັນ ເວົ້າສະເພາະ ຜູ້ມີອາຊີບໝັ້ນຄົງ ຫຼື ຢຶດຖືຄະຕິທີ່ວ່າ: ເວລາແມ່ນເງິນ ຖ້າວ່າຜູ້ໃດບໍ່ທັນເຄີຍໄດ້ກິນເຝີ ຫຼື ຊີມເຝີຈັກຖ້ວຍ ກໍຕ້ອງຖືວ່າ ຍັງສາມາດຮັກສາເອກະລັກແຫ່ງການດຳລົງຊີວິດ ແລະ ການຢູ່ກິນແບບລາວໆ ໄດ້ດີພໍສົມຄວນ ຍ້ອນວ່າໂລກາພິວັດຂອງວັດທະນະທຳຫຼາຍຮູບຫຼາຍສີ ທີ່ນັບມື້ຫຍັບໃກ້ເຂົ້າຫາກັນ ພົວ ພັນກັນ ຮຽນຮູ້ນຳກັນ ແລະ ແລກປ່ຽນ ກັນທາງດ້ານເສດຖະກິດ ອັນນີ້ແມ່ນ ເງື່ອນໄຂທີ່ເຮັດໃຫ້ "ເຝີແຊບ" ເຂົ້າມາ ປ່ຽນແທນຄາບເຂົ້າສວຍ ຫຼື ອາຫານທ່ຽງຂອງຫຼາຍຄົນ ແລະ ຫຼາຍໆສຳນັກງານອົງການ ສະນັ້ນ ພໍຮອດຍາມເລີກການເວລາໃດ ຫຼາຍໆຄົນກໍຈະຄິດຮອດຖ້ວຍເຝີ ແລະ ຮ້ານຂາຍເຝີ ແລ້ວຊວນກັນ ຫຼື ເອີ້ນເອົາກັນຂຶ້ນລົດຕູ້ໄປຊອກກິນເຝີແຊບ ບາງຄົນເຖິງຈະທຳທ່າຕອບປະຕິເສດໄປວ່າ: ລືມກະແຕັບເງິນໄວ້ເຮືອນ ແຕ່ໝູ່ກໍຍັງອົດສາໃຈດີ ເກ້ຍກ່ອມຕື່ມວ່າ: ໄປ໋ ເຮົາຊິຈ່າຍດອກ.
ເຝີ ແມ່ນຊື່ອາຫານແນວໜຶ່ງ ທີ່ເຮັດດ້ວຍແປ້ງ ເປັນເສັ້ນ ມີທັງເຝີເສັ້ນໃຫຍ່ ແລະ ເຝີເສັ້ນນ້ອຍ ແລ້ວແຕ່ຜູ້ມັກ ມີເຄື່ອງປຸງທີ່ເຮັດດ້ວຍນ້ຳຕົ້ມຊີ້ນງົວ ໝູ ຫຼື ເປັດ ໄກ່... ມີທັງລູກຊີ້ນ ແລະ ສິ່ງປະສົມອື່ນໆ ເອີ້ນ: ເຫຍື່ອເຝີ ສິ່ງປະສົມອື່ນໆ ຫຼື ເຫຍື່ອເຝີນີ້ລະ ທີ່ເຮັດໃຫ້ຄວາມແຊບຂອງເຝີ ມີລົດຊາດທີ່ແຕກຕ່າງກັນ ທັງເປັນກົນລະຍຸດຂອງສິລະປະການແຂ່ງຂັນ ທີ່ຍາດແຍ່ງເອົາຄວາມນິຍົມຂອງລູກຄ້າ ສ່ວນຄຳວ່າ: ແຊບ ມີຄວາມໝາຍວ່າ: ມີລົດດີ ກິນດີ ກິນແຊບ ຢູ່ນະຄອນຫຼວງວຽງຈັນ ມີເຝີແຊບຫຼາຍບ່ອນ ຊຶ່ງເອີ້ນຕາມຊື່ຂອງບ້ານ (ສະຖານທີ່ ຫຼື ຊື່ເຈົ້າຂອງຮ້ານ) ເປັນຕົ້ນ: ເຝີແຊບໂພນເຄັງ ເຝີແຊບບ້ານພິມ ເຝີແຊບສາຍລົມ ເຝີແຊບທາດດຳ ເຝີແຊບສີຫອມ ເຝີແຊບສີໄຄ ເຝີແຊບຫຼັກເຈັດ ເຝີແຊບເມືອງຫຼວງ ເຝີແຊບປາກເຊ ແລະ ເຝີແຊບບ່ອນອື່ນໆອີກ... ສາເຫດທີ່ເຮັດໃຫ້ຄົນຈື່ຈຳ ຫຼື ເອີ້ນຊື່ຮ້ານເຝີຕາມຊື່ບ້ານຫຼາຍກ່ອນຊື່ເຈົ້າຂອງຄົນທີ່ປຸງເຝີນັ້ນ ອາດແມ່ນຍ້ອນວ່າ ເວລານັດກັນໄປກິນເຝີ ຄັນບອກສະຖານທີ່ມັນຊອກງ່າຍກ່ວາ ຄິດອອກທັນທີໂລດ ເພາະຄັນຖ້າໄປໃສ່ຊື່ຄົນຂາຍ ເຊັ່ນ: ເຝີແຊບຕູ້ຈ່ອຍ ຫຼື ເຝີແຊບນາງຄຳ ມັນອາດຈະຫຼົງຮ່ອມກໍເປັນໄດ້ ບາງຄົນອາດຈະສໍ້ໄປຕື່ມອີກວ່າ: ຈ່ອຍໃດນໍ ? ຫຼື ຄຳໃດຫວາ ? ຍ້ອນວ່າຄົນລາວນິຍົມຕັ້ງຊື່ຄືກັນ ແລະ ຊື່ຊ້ຳກັນນັ້ນເອງ
ມີຄົນຖາມມາວ່າ: ຄວາມແຊບຂອງເຝີນັ້ນ ເພິ່ນວັດແທກກັນຢູ່ບ່ອນໃດນໍ້ ບາງຄົນກໍບອກວ່າ: ແຊບນຳນ້ຳຕົ້ມເຝີມັນນົວດີວ່າຊັ້ນ ! ແຕ່ບາງຄົນກໍມັກກິນຖ້ວຍໃຫຍ່ ກິນຕອນສວຍອີ່ມຮອດມື້ແລງ ບາງຄົນກໍບອກວ່າ ເຈົ້າຂອງຮ້ານບໍ່ຂີ້ຖີ່ເຄື່ອງປຸງ ມີຜັກກັບຫຼາຍແນວ ແລະ ຫຼາຍຄົນກໍແຊບນຳບັນຍາກາດ... ມີຄົນໃຫ້ຄຳເຫັນວ່າ ຢາກຮູ້ວ່າ ເຝີຮ້ານໃດແຊບແທ້ຫຼືບໍ່ ? ໃຫ້ເບິ່ງຄົນທີ່ເຂົ້າໄປໃຊ້ບໍລິການ ຫຼື ບ່ອນຈອດລົດ ເພາະຄັນໄປຊ້າແດ່ກໍຕ້ອງລໍຖ້າດົນ ແລະ ຊອກຫາບ່ອນຈອດລົດບໍ່ມີ ຂໍ້ໃດກໍຫາກຖືກເນາະ ຍົກເວັ້ນເຫດຜົນສຸດທ້າຍອາດບໍ່ແມ່ນ 100% ຕິ໋ ! ເພາະມີຮ້ານຫຼາຍບ່ອນ ແມ່ນບໍ່ໄດ້ກະກຽມສະຖານທີ່ໄວ້ຈອດລົດໃຫ້ລູກຄ້າຢ່າງສະດວກສະບາຍ ອາໄສບ່າທາງ ຫຼື ແຄມທາງ ແລະ ເດີ່ນອ້ອມແອ້ມເຮືອນ.
ການກິນເຝີ ແມ່ນຂະບວນວິວັດແຫ່ງຄຸນຄ່າຄວາມນິຍົມຂອງວັດທະນະທຳ ການດຳລົງຊີວິດໜຶ່ງທີ່ກຳລັງປ່ຽນແປງ ຈົນອາດເວົ້າໄດ້ວ່າ: ມັນຂ້າມຜ່ານຊາຍແດນຂອງປະເພນີດັ່ງເດີມ ໄປສູ່ຄວາມທັນສະໄໝນັບມື້ນັບຫຼາຍຂຶ້ນ ໝາຍຄວາມວ່າ ຄົນແລ່ນນຳເວລາຫຼາຍ ຈົນອາດລືມຄວາມຜູກພັນແບບມູນເຊື້ອ ແນວໃດກໍຕາມ: ເຫັນວ່າໄດ້ກິນເຝີແລ້ວ ຂໍຢ່າລືມຖ້ວຍປົ່ນ ໃຫ້ຄິດເຖິງຄົນທີ່ຄອງຄອຍຖ້າໝູ່ເຈົ້າ ແລະ ພາເຂົ້າທີ່ຢູ່ເຮືອນແດ່ເດີ ! ດີແທ້ຕອນຂາກັບເມືອ ກໍຊື້ໄປຕ້ອນແດ່ຈັກຖົງກໍຍັງດີນໍ້ !.
ໂດຍ: ສາຍດາຣາ
ຫົວຂໍ້ຂ່າວອື່ນໆທີ່ໜ້າສົນໃຈ
ຄໍາເຫັນຂອງທ່ານຜູ້ອ່ານ
|
|
