ມີຫຼາຍຄົນເອີ້ນເລື່ອງຕໍ່ໄປນີ້ວ່າ: ຄວັນຫຼົງ ແລະ ກິ່ນເຫຼືອ ຈາກກອງປະຊຸມສະໄໝສາມັນເທື່ອທີ 2 ຂອງສະພາແຫ່ງຊາດຊຸດປັດຈຸບັນ ເຊິ່ງສຳເລັດເຊັດສິ້ນລົງໃນວັນທີ 21 ທັນວາປີຜ່ານມາ ເລື່ອງທີ່ວ່ານັ້ນ ແມ່ນບາງຕອນຂອງຄຳເຫັນຂອງທ່ານລັດຖະມົນຕີ ກະຊວງສຶກສາທິການ ແລະ ກີລາ ທີ່ກ່າວຕໍ່ກອງປະຊຸມສະພາໃນຫົວຂໍ້ ແຜນປະຕິຮູບການສຶກສາແຫ່ງຊາດ ໃນສ່ວນທີ່ພົວພັນກັບການຂັດເລືອກນາງງາມນັ້ນ ທ່ານລັດຖະມົນຕີຊີ້ແຈງເຊິ່ງສາມາດສະຫຼຸບເປັນຂໍ້ດັ່ງລຸ່ມນີ້:
1. ກິດຈະກຳຂັດເລືອກນາງງາມ ບໍ່ແມ່ນທິດທາງສົ່ງເສີມຂອງກະຊວງສຶກສາ ດັ່ງນັ້ນ ກະຊວງສຶກສາທິການ ແລະ ກີລາ ຈະບໍ່ສະໜັບສະໜູນໃຫ້ມີກິດຈະກຳດັ່ງກ່າວ ປະຈຳສະຖາບັນການສຶກສາຕ່າງໆ ບໍ່ວ່າຈະເປັນພາກລັດ ຫຼື ເອກະຊົນ.
2. ກິດຈະກຳຂັດເລືອກນາງງາມ ບໍ່ແມ່ນການສົ່ງເສີມທີ່ມີຜົນດີຕໍ່ການຮຽນຂອງນັກສຶກສາ ກົງກັນຂ້າມຍິ່ງຈະເຮັດໃຫ້ນັກສຶກສາຫັນໄປສົນໃຈຄ່ານິຍົມທີ່ຜິດ.
3. ສະຖາບັນການສຶກສາ ແມ່ນບ່ອນກໍ່ສ້າງຄົນໃຫ້ມີວິຊາຄວາມຮູ້ ຄວາມສາມາດ ເປັນຄົນດີມີຄຸນສົມບັດ ບໍ່ແມ່ນບ່ອນທີ່ຈະມາແຂ່ງຂັນຄວາມງາມກັນ.
4. ກະຊວງສຶກສາທິການ ແລະ ກີລາ ຈະສະໜັບສະໜູນຢ່າງແຂງແຮງ ຕໍ່ສະຖາບັນທີ່ຈັດກິດຈະກຳກ່ຽວກັບການສອນດີ-ສອນເກັ່ງ ຮຽນດີ-ຮຽນເກັ່ງ ແຂ່ງຂັນສິລະປະວັນນະຄະດີ ຫຼື ກີລາປະເພດຕ່າງໆ ທີ່ນອນຢູ່ໃນ 5ຫຼັກການຂອງການສຶກສາ ຄື: ຄຸນສົມບັດສຶກສາ ປັນຍາສຶກສາ ສິລະປະສຶກສາ ພາລະສຶກສາ ແລະ ແຮງງານສຶກສາ.
ນອກຈາກຈິດໃຈທີ່ກ່າວມາເທິງນັ້ນ ທ່ານ ດຣ. ພັນຄຳ ວິພາວັນ ກຳມະການກົມການເມືອງສູນກາງພັກ ລັດຖະມົນຕີກະຊວງສຶກສາທິການ ແລະ ກີລາ ຍັງຕຳນິສ່ອງແສງບາງໂຮງຮຽນ ຫຼື ສະຖາບັນການສຶກສາ ທີ່ຈັດຕັ້ງກິດຈະກຳບາງດ້ານ ທີ່ເປັນການສົ່ງເສີມໃຫ້ນັກຮຽນມີແນວຄິດໄປທາງທີ່ບໍ່ສອດຄ່ອງ ເຊັ່ນ: ການປະກວດນາງງາມ ລວມເຖິງການແຕ່ງໂຕທີ່ບໍ່ສອດຄ່ອງກັບຮີດຄອງປະເພນີ.
ພາຍຫຼັງທ່ານລັດຖະມົນຕີກ່າວຄຳເຫັນຈົບ ກໍມີຄຳຖາມຜ່ານໂທລະສັບສາຍດ່ວນສູ່ກອງປະຊຸມສະພາແຫ່ງຊາດ ໃນກໍລະນີນັກຮຽນ-ນັກສຶກສາສະໝັກເຂົ້າຂັດເລືອກນາງງາມ ທີ່ພາກສ່ວນອື່ນຈັດຂຶ້ນເດ ທາງກະຊວງສຶກສາຈະຫ້າມ ຫຼື ຈະອະນຸຍາດ ?.
ໃນປັດຈຸບັນ ເປັນທີ່ເຂົ້າໃຈກັນຫຼາຍຂຶ້ນໃນສັງຄົມລາວເຮົາວ່າ ຄວາມງາມຂອງແມ່ຍິງລາວ ແມ່ນພອນທີ່ຟ້າແຖນປະທານໃຫ້ສ່ວນບຸກຄົນ ແລະ ບຸກຄົນຜູ້ເປັນເຈົ້າຂອງ ກໍຄວນມີສິດນຳໃຊ້ຄວາມງາມດັ່ງກ່າວ ປະດັບເອ້ສັງຄົມ ໂດຍການປະສົມປະສານຄວາມງາມທີ່ວ່າ ເຂົ້າກັບອ່ອນນ້ອມໂອບອ້ອມອາລີ ທີ່ມີຕິດໂຕແມ່ຍິງລາວມາແຕ່ກຳເນີດ ແລ້ວບວກກັບການນຸ່ງຖືທີ່ເປັນເອກະລັກຂອງແມ່ຍິງລາວ ຫຼາຍຄົນມີຄຳເຫັນວ່າ ນາງງາມລາວສາມາດເປັນຕົວແບບ ເປັນທູດວັດທະນະທຳ ເພື່ອໂຄສະນາດຶງດູດຄວາມສົນໃຈຂອງຕ່າງປະເທດ ແຕ່ສຳຄັນກ່ວານັ້ນ ຫຼາຍຄົນເຫັນວ່າການຂັດເລືອກນາງງາມ ແມ່ນເວທີສົ່ງເສີມຄວາມສາມາດ ຄວາມກ້າຫານໃນການສະແດງອອກຂອງແມ່ຍິງລາວ ຜູ້ຂຽນເອງເຄີຍເຫັນນາງງາມລະດັບປະເທດ ແລະ ສາກົນຫຼາຍຄົນ ໄດ້ຖືກແຕ່ງຕັ້ງຈາກທາງການພາຍໃນປະເທດ ໃຫ້ເປັນທູດວັດທະນະທຳ ເປັນນັກເຄື່ອນໄຫວ ເພື່ອສັນຕິພາບມິດຕະພາບ ເພື່ອແກ້ໄຂບັນຫາສັງຄົມໃດໜຶ່ງ.
ພ້ອມດຽວກັນນັ້ນ ຜູ້ຂຽນກໍເຄີຍອ່ານບົດຄວາມກ່ຽວກັບດ້ານຫຍໍ້ທໍ້ ຂອງຂະບວນການຂັດເລືອກນາງງາມຢູ່ຫຼາຍປະເທດ ຍ້ອນຂາດການຄຸ້ມຄອງ ຂາດການຕີລາຄາຮອບດ້ານ ບໍ່ວ່າຈະເປັນແງ່ເສດຖະກິດ ແງ່ວັດທະນະທຳ ແລະ ແງ່ຈິດຕະສາດ ປຶ້ມ Sex Slave in Asia ຂຽນໂດຍ Louis Brown ໄດ້ຊີ້ໃຫ້ເຫັນຕອນໜຶ່ງວ່າ: ພວກຄ້າມະນຸດ ຄ້າໂສເພນີ ໄດ້ສວຍໃຊ້ຂະບວນການສົ່ງເສີມຄວາມງາມຂອງແມ່ຍິງ ຜ່ານອຸດສາຫະກຳເສີມສວຍ ແລະ ຂັດເລືອກນາງງາມ ໃຫ້ກາຍເປັນເຄືອຂ່າຍເພື່ອຂູດຮີດທາງເພດຢ່າງເປັນລະບົບ.
ຜູ້ຂຽນຄິດວ່າ ກ່ອນຈະຂະຫຍາຍການຂັດເລືອກນາງງາມ ລົງຮອດແຂວງຮອດເມືອງ ແລະ ທ້ອງຖິ່ນ ພາກສ່ວນກ່ຽວຂ້ອງຄວນຕີລາຄາຜົນໄດ້ຜົນເສຍຄັກແນ່.
ໂດຍ: ຄົນແດດດຽວ
ຫົວຂໍ້ຂ່າວອື່ນໆທີ່ໜ້າສົນໃຈ
ຄໍາເຫັນຂອງທ່ານຜູ້ອ່ານ
|
|
