ທ່ານ ສີໜຸກ ສີສົມບັດ ໄດ້ຮັບການແຕ່ງຕັ້ງເປັນປະທານສະມາຄົມໝາກກາເຟລາວ ສະໄໝທີ III ຕິດຕໍ່ກັນ ພາຍຫຼັງກອງປະຊຸມໃຫຍ່ ຄັ້ງທີ VI ຂອງສະມາຄົມໝາກກາເຟລາວ ທີ່ຈັດຂຶ້ນຫວ່າງມໍ່ໆມານີ້ ຢູ່ປາກເຊ ແຂວງຈຳປາສັກ.
ໃນກອງປະຊຸມໃຫຍ່ ຄັ້ງທີ V ສະມາຄົມໝາກກາເຟລາວ ໄດ້ຮັບຮອງເອົາພຽງ 5 ທ່ານ ເຂົ້າເປັນຄະນະສະມາຄົມໝາກກາເຟລາວ ແຕ່ກອງປະຊຸມໃຫຍ່ ຄັ້ງທີ VI ສະມາຄົມໝາກກາເຟລາວ ໄດ້ຮັບເອົາອີກ 4 ທ່ານ ລວມເປັນ 9 ທ່ານ ເຂົ້າມາຈັດການບໍລິຫານພາຍໃນສະມາຄົມ ທັງນີ້ກໍເນື່ອງຈາກການຂະຫຍາຍຕົວຂອງເສດຖະກິດ-ສັງຄົມຢ່າງຕໍ່ເນື່ອງ ເປັນການຈັດຕັ້ງຜັນຂະຫຍາຍ ມະຕິກອງປະຊຸມໃຫຍ່ ຄັ້ງທີ IX ຂອງພັກ ໂດຍສະເພາະ 4 ວິໄສທັດບຸກທະລຸ ແລະ ເປັນການທົບທວນຄືນກ່ຽວກັບທີ່ຕັ້ງ ພາລະບົບດາດ ສິດ ໜ້າທີ່ ແລະ ກົດລະບຽບພາຍໃນຂອງສະມາຄົມ ໃຫ້ສອດຄ່ອງກັບດຳລັດຂອງນາຍົກລັດຖະມົນຕີວ່າດ້ວຍສະມາຄົມ ສະບັບເລກທີ 155/ນຍ ລົງວັນທີ 29 ເມສາ 2009 ແລະ ຂໍ້ຕົກລົງຂອງທ່ານລັດຖະມົນຕີກະຊວງພາຍໃນ ສະບັບເລກທີ 252 ລົງວັນທີ 17 ມິຖຸນາ 2011 ວ່າດ້ວຍການອະນຸມັດສ້າງຕັ້ງສະມາຄົມໝາກກາເຟລາວ.
ທ່ານ ສີໜຸກ ສີສົມບັດ ປະທານສະມາຄົມໝາກກາເຟລາວ ໄດ້ກ່າວວ່າ: ການເພີ່ມຈຳນວນຄະນະບໍລິຫານສະມາຄົມໝາກກາເຟລາວຊຸດໃໝ່ 9 ທ່ານນີ້ ແມ່ນມີຈຸດປະສົງເພື່ອຍົກບົດບາດ-ຖານະໃນການຂະຫຍາຍທຸລະກິດ ແລະ ຕອບສະໜອງການພັດທະນາໃຫ້ກ້ວາງອອກຕື່ມ ໃຫ້ສອດຄ່ອງ ແລະ ແທດເໝາະກັບສະພາບຄວາມເປັນຈິງ ຂອງການພັດທະນາໃນແຕ່ລະໄລຍະ ແລະ ສາມາດຄວບຄຸມທົ່ວປະເທດໄດ້ຢ່າງມີປະສິດທິຜົນ ເຊິ່ງໃນເມື່ອກ່ອນ ສະມາຄົມໝາກກາເຟລາວ ມີບົດບາດ ແລະ ໜ້າທີ່ໃນການຈັດການ-ບໍລິຫານ ໃນເຂດປູກໝາກກາເຟພຽງ 3 ແຂວງຄື: ສາລະວັນ ເຊກອງ ແລະ ຈຳປາສັກເທົ່ານັ້ນ ແຕ່ມາຮອດປັດຈຸບັນ ສະມາຄົມຂອງພວກເຮົາມີສະມາຊິກທັງໝົດ 39 ຫົວໜ່ວຍ ປະກອບມີກຸ່ມຜູ້ຜະລິດ ຜູ້ສົ່ງອອກ ແລະ ຜູ້ປຸງແຕ່ງ ແລະ ມີສິດ ໜ້າທີ່ເຄື່ອນໄຫວ ແລະ ຈັດການ-ບໍລິຫານໃນຂອບເຂດທົ່ວປະເທດ.
ໃນຈຳນວນ 9 ທ່ານ ທີ່ເປັນຄະນະສະມາຄົມໝາກກາເຟລາວຊຸດໃໝ່ນີ້ ປະກອບມີທ່ານ ສີໜຸກ ສີສົມບັດ ເປັນປະທານ ທ່ານ ແສງຈັນ ຄຳມົນທາ ເປັນຮອງປະທານ ທ່ານນາງ ບຸນເຮືອງ ລິດດັງ ເປັນຮອງປະທານ ສ່ວນຄະນະທີ່ຍັງເຫຼືອນັ້ນ ຈະມີບົດບາດ ແລະ ໜ້າທີ່ແຕກຕ່າງກັນ ໃນການຮັບຜິດຊອບໃນຂົງເຂດວຽກງານຕ່າງໆທີ່ກ່ຽວຂ້ອງ.
ທ່ານ ສີໜຸກ ສີສົມບັດ ປະທານສະມາຄົມ ຍັງໄດ້ກ່າວໃນລະຫວ່າງການໄດ້ຮັບຕຳແໜ່ງໃໝ່ ດ້ວຍວິໄສທັດໃນການພັດທະນາກາເຟລາວອີກວ່າ: ຈະສ້າງຊື່ສຽງຂອງກາເຟລາວໃຫ້ຄົນລາວ ແລະ ຊາວຕ່າງປະເທດໃນທົ່ວໂລກ ໃຫ້ຮັບຮູ້ຄຸນນະພາບ ແລະ ລົດຊາດທີ່ເປັນເອກະສັນຂອງກາເຟລາວ ຈະສ້າງໃຫ້ກາເຟລາວກາຍເປັນຕົວແບບໜຶ່ງ ໃນການຜະລິດ ການຊົມໃຊ້ທຳມະຊາດແບບຍືນຍົງ ໂດຍອີງໃສ່ແນວທາງຂອງພັກ ແລະ ລັດຖະບານ ໃນການສ້າງໃຫ້ປະເທດລາວ ກາຍເປັນປະເທດສີຂຽວ ທີ່ອົງການສາກົນໃນທົ່ວໂລກ ໃຫ້ຄວາມສຳຄັນຕໍ່ບັນຫາຫຼຸດພາວະໂລກຮ້ອນ ແລະ ພ້ອມຈະສືບຕໍ່ເຮັດໃຫ້ ສປປ ລາວ ໄດ້ເຂົ້າເປັນສະມາຊິກໝາກກາເຟ ແລະ ສົ່ງເສີມຊຸກຍູ້ໃຫ້ເຂດພັດທະນາໝາກກາເຟ ກາຍເປັນແຫຼ່ງທ່ອງທ່ຽວກະສິກຳແບບອະນຸຮັກສິ່ງແວດລ້ອມ.
ຊຸມປີຜ່ານມາ (2009-2011) ສະມາຄົມໝາກກາເຟລາວ ສາມາດສົ່ງອອກກາເຟໄດ້ 13.000 ກ່ວາໂຕນ ມູນຄ່າ 37 ລ້ານໂດລາສະຫະລັດ ຫຼື ປະມານ 296 ຕື້ກ່ວາກີບ ສ່ວນໃຫຍ່ແມ່ນສົ່ງອອກຕະຫຼາດເອີຣົບ ກວມເອົາ 72% ອາຊີ 25% ແລະ ອາເມລິກາ 3%.
ໂດຍ: ສະບາໄພ
ຫົວຂໍ້ຂ່າວອື່ນໆທີ່ໜ້າສົນໃຈ
ຄໍາເຫັນຂອງທ່ານຜູ້ອ່ານ
ລຳພູນ
ວັນທີ 29 ພະຈິກ 2011 - ເວລາ 18:59:46
115.84.94.xxx
ຂ້າພະເຈົ້າໃນນາມຜູ້ອ່ານຜູ້ໜຶ່ງ ຂໍຂອບໃຈສຳລັບບົດຮຽນກ່ຽວກັບການນຳໃຊ້ພາສາລາວ ມັນມີປະໂຫຍດຫຼາຍ ເພາະປັດຈຸບັນນີ້ ພວກເຮົາມັກນຳໃຊ້ຊັບສົນກັບພາສາຂອງປະເທດເພື່ອນບ້ານ ຈົນຍາກຈະແຍກອອກ ອັນໃດພາສາຂອງຕົນ ອັນໃດພາສາຂອງເພິ່ນ. ຂໍຂອບໃຈ ຢ່າລື່ມມາໃຫ້ຄວາມຮູ້ເລື້ອຍໆ ເດີ ບັນດາທ່ານຜູ້ຮູ້.
ສັນນີ ປຣະສົງສີຣ໌
ວັນທີ 12 ພະຈິກ 2011 - ເວລາ 22:14:52
76.173.101.xxx
I am so happy Vientaine mai newspaper online, because many Laos people who live in other countries to know what's going on in Laos.
ຂ້າພະເຈົ້າດີໃຈຫຼາຍທີ່ມີ ຫນັງສືພີມເປັນພາສາລາວແລະຂ່າວ
ສານໃນເມື່ອງລາວໃຫ້ຄົນລາວທີ່ຢູ່ຕ່າງປະເທດໄດ້ອ່ານແລະ
ຮູ້ຂ່າວຄາວໃນເມືອງລາວເຮົາ.
ສາຍເຊລຳເພົາ
ວັນທີ 15 ກັນຍາ 2011 - ເວລາ 12:30:54
183.182.127.xxx
ສະມາຄົມ(ຄົນ)ຈີນ
ສະມາຄົມ(ຄົນ)ຫວຽດນາມ
ສະມາຄົມ(ຄົນ)ຂະເໝນ
ສະມາຄົມ(ຄົນ)ຍີ່ນປຸ່ນ.
ສະມາຄົມ(ຄົນ)ລາວ
- ອັນວ່າຄົນ ຕັດຖີ້ມໄປເລີຍ ເພາະຄຳມັນສົມບູນໃນຕົວມັນ "ຄົນ" ກະເລີຍເປັນຄຳເຫຼືອ ເວົ້າບໍ່ເວົ້າມັນກະໄດ້ "ລາວ, ເຈັກ, ຫວຽດ" ລ້ວນແຕ່ມີ "ຄົນ" ໃນຕົວ(ໂຕ)ມັນດ້ວຍ, ຈຶ່ງຍັງເຫຼືອແຕ່ :-
ສະມາຄົມຈີນ
ສະມາຄົມຫວຽດນາມ
ສະມາຄົມຂະເໝນ
ສະມາຄົມຍີ່ນປຸ່ນ.
ສະມາຄົມລາວ.
- ລອງອ່ານສົມທຽບກັນເບິ່ງ ລະຫວ່າງທີ່ມີຄົນ ກັບບໍ່ມີຄົນ ມັນສື່ສານສົມບູນເໝືອນກັນບໍ ?
- ການສ້າງປະໂຫຍກ ຫາກຄຳໃດບໍ່ສົມບູນ ຫາມາເພີ່ມ, ຄຳໃດເຫຼືອຕັດຖິ້ມ.
ຕົວຢ່າງຄຳທີ່ວ່າ :
- ສະມາຄົມໝາກກາເຟລາວ ຫຼືສະມາຄົມກາເຟລາວ, ດັ່ງທີ່ໄມ້ຈັນບອກ ບໍ່ສົມບູນໃນຕົວມັນທັງສອງ ຕ້ອງໃຫ້ຄຳ ກຳມະ ຜູ້ກະທຳໃຫ້ມັນ ໃນປະໂຍກເທິງ ມີແຕ່ປະທານ "ສະມາຄົມ" ກັບ ກິຣະຍາ ແລະ ນາມ "ໝາກກາເຟລາວ" ຕ້ອງຫາກຳມະ ມາໃຫ້ມັນ ມັນຈຶ່ງສົມບູນ ຄື "ຜູ້ ຫຼື ຄົນ" ຫາກມີປະໂຫຍກແບບນັ້ນ ເຂົາຈະບໍ່ນິຍົມໃຊ້ "ຄົນ" ເຂົາຈະໃຊ້ "ຜູ້" ແທນ ເຊັ່ນ ສະມາຄົມ(ຜູ້ປູກ) ໝາກກາເຟລາວ ຫຼືສະມາຄົມ(ຜູ້ປູກ)ກາເຟລາວ.
- ອັນວ່າ "ຜູ້ປູກ" ເປັນກຳມະ ຄືກະທຳໃຫ້ກະເຟ ຕ້ອງທຳໜ້າທີ່ຂອງ ມັນໃຫ້ສົມບູນ.
- ທີ່ນີ້ເຮົາຊິເອົາຄຳໃດມາໃຊ້ໃນ ໒ ຄຳ, ບໍ່ຕ້ອງຄິດເອົາ,ຕ້ອງເອົາຕາມ ກົດເກນຂອງໄວຍາກອນ, ສະມາຄົມ(ຜູ້ປູກ) ໝາກກາເຟລາວ ຫຼືສະມາຄົມ(ຜູ້ປູກ)ກາເຟລາວ.
- ຈະເອົາປະໂຫຍກໃດກໍໄດ້ ແຕ່ດີກວ່າ ຕ້ອງ"ສະມາຄົມຜູ້ປູກ ກາເຟລາວ" ເພາະມັນສັ້ນກວ່າ "ເພາະໝາກກາເຟ", ກັບ "ກາເຟ" ຄຳວ່າ "ກາເຟ" ຈະສົມບູນກວ່າ ແລະບໍ່ເປືອງເນື້ອທີ່ປະຫຍັດເຂົ້າໄປອີກ.
- ນີ້ແລ້ວ ຄືຄວາມໝາຍຄວາມສຳຄັນຂອງພາສາລາວ, ຕອນເວົ້າສຳຄັນນ້ອຍກວ່າການຂຽນ ແຕ່ຫາກເວົ້າໃນທາງການ ໃຊ້ໃນທາງການສຳຄັນກວ່າ.
- ອັນວ່າ "ສະມາຄົມ" ມາຈາກ "ສະມະຄະມະ" ແປ ເຂົ້າມາຫາກັນ, ຫຼືໄປມາຫາສູ່ກັນ.
ຂອບໃຈທີ່ໃຫ້ໂອກາດ ຂຽນເດີ
ສາຍເຊລຳເພົາ
ວັນທີ 15 ກັນຍາ 2011 - ເວລາ 12:11:25
183.182.127.xxx
ຫຼຸດຜ່ອນຄວາມທຸກຍາກ (ໜ້າຊິເປັນລົດຜ່ອນຄວາມທຸກຍາກ)
- ຢ່າລືມວ່າ ພາສາທຸກໆພາສາໃນໂລກນັ້ນ ປະຫວັດການເກີດຂອງມັນ ບໍ່ແມ່ນ "ພາສາບັນຍັດ" ແຕ່ຫາກແມ່ນ "ພາສາສັງຄົມບັນຍັດ" ຄື ພາສາມັນເກີດຕາມສັງຄົມມາ ບາດມາໄລຍະຫຼັງໆ ວັດຖຸເກີດ ວຽກງານເກີດ ຈຶ່ງບັນຍັດພາສາມາໃຊ້,(ພຽງແຕ່ຕໍ່ຕື່ມພາສາເກົ່າໃຫ້ຫຼວງຫຼາຍພຽງພໍກັບການໃຊ້ ເທົ່ານັ້ນ, ແຕ່ສຳລັບ "ລົດລາຄາ ກັບຫຼຸດລາຄາ ໃຊ້ຄູ່ມາເຫິງແລ້ວ" ເຮົາຊິມີຕັດຮອນມັນຖິ້ມເຊັ່ນນີ້ເປັນບໍ ?)
ໄມ້້້້ຈັັນ
ວັນທີ 09 ກັນຍາ 2011 - ເວລາ 10:15:55
114.129.31.xxx
ຂໍມີຄວາມເຫັນກ່ຽວເລື່ອງການໃຊ້ພາສາລາວ ຊື່ຢູ່ປ້າຍວ່າ "ສະມາຄົມກາເຟລາວ" ບາດໃນຂ່າວພັດວ່າ "ສະມາຄົມໝາກ ກາເຟລາວ" ເວົ້າຕາມຫຼັກແລ້ວທັງສອງແມ່ນບໍ່ຖືກຕ້ອງ ເພາະໃນນີ້ມີພຽງສາມຄຳບວກກັນຄື ສະມາຄົມ+ ກາເຟ+ລາວ ຕີຄວາມໝາຍຕາມສັບ ອັນນີ້ເປັນການຈັດຕັ້ງຂອງໝາກກາເຟ ແຕ່ໃນຕົວຈິງມັນແມ່ນການຈັດຕັ້ງຂອງຄົນຜູ້ເຮັດກ່ຽວກັບກາເຟ (ຜູ້ຄ້າ ຜູ້ຜະລິດ ຜູ້ສົ່ງເສີມ...) ຄະນະບໍລິຫານງານສະມາຄົມ ກໍແມ່ນຄົນ/ບໍ່ແມ່ນໝາກກາເຟເລີຍ. ດັ່ງນັ້ນຊື່ທີ່ຖືກຕ້ອງຄວນ ເພິ່ມຄົນເຂົ້າໃສ່ ເປັນ: ສະມາຄົມ+ (ຜູ້ຄ້າ/ຜູ້ປະກອບການ/ຜູ້.....)ກາເຟ+ລາວ. ຕົວຢ່າງທີ່ມີແລ້ວຄື ສະມາຄົມນັກຂ່າວ ສະມາຄົມນັກທຸລະກິດໜຸ່ມ ສະມາຄົມນັກປະພັນ... ເປັນຕົ້ນ.
ມີຊື່ຫຼາຍສະມາຄົມ ຫຼາຍສະຫະພັນທີ່ອອກໃນລັກສະນະນີ້ ໃນນັ້ນມີທັງ ສະຫະພັນບານເຕະ ອັນນີ້ຕີຄວາມໝາຍຕາມສັບແມ່ນ ການຈັດຕັ້ງຂອງໜ່ວຍໝາກບານ ແຕ່ໃນຕົວຈິງມັນ ແມ່ນການຈັດ ຕັ້ງຂອງຜູ້ເຮັດວຽກກ່ຽວກັບກີລາບານເຕະ ສະນັ້ນຊື່ທີ່ຄວນເປັນ ແມ່ນ: ສະຫະພັນນັກກີລາເຕະບານ ຫຼື ສະຫະພັນນັກກີລາ ບານເຕະ ຮູ້ຢູ່ວ່າຢາກໄດ້ຊື່ສັ້ນໆ ແຕ່ຖ້າສັ້ນຈົນບໍ່ຄົບເນື້ອໃນ ໃຈຄວາມ ມັນກໍບໍ່ຖືກຕ້ອງ ແລ້ວເຮົາຈະເອົາຄວາມຖືກຕ້ອງ ຫຼືຈະເອົາຕາມໃຈມັກ ?
ຂາຍໝ້ຽງອົມ ກໍມີລາຍຮັບດີ (954)
