ກອງປະຊຸມວຽກງານປະກັນສັງຄົມແຫ່ງລັດ ປະຈຳປີ 2011 ໄດ້ດຳເນີນມາເປັນເວລາ 2 ວັນ ມາຮອດວັນທີ 26 ມັງກອນ 2012 ໄດ້ສຳເລັດໃຫ້ກຽດກ່າວປິດ ໂດຍທ່ານ ພູເພັດ ຄຳພູນວົງ ລັດຖະມົນຕີວ່າການກະຊວງການເງິນ ປະທານສະພາບໍລິຫານອົງການປະກັນສັງຄົມແຫ່ງລັດ (ອປລ).
ຕະຫຼອດໄລຍະຂອງການດຳເນີນກອງປະຊຸມ ຜູ້ເຂົ້າຮ່ວມໄດ້ພ້ອມກັນສຸມໃສ່ປຶກສາຫາລື ແລະ ປະກອບຄຳຄິດຄຳເຫັນຕ່າງໆດ້ວຍບັນຍາກາດຟົດຟື້ນ ສ້າງສັນ ທັງມີເນື້ອໃນເລິກເຊິ່ງ ແລະ ກ້ວາງຂວາງ ໃນການຕີລາຄາສູງຕໍ່ຜົນສຳເລັດທີ່ ອປລ ຍາດມາໄດ້ ໃນຂະບວນການຈັດຕັ້ງປະຕິບັດວຽກງານ ອປລ ໃນສົກປີ 2010-2011 ນັບທັງຢູ່ສູນກາງ ແລະ ທ້ອງຖິ່ນຕ່າງໆ ເຖິງວ່າວຽກງານ ອປລ ເປັນວຽກງານໃໝ່ ແຕ່ກໍມີບັນດາໜໍ່ແໜງທີ່ສະແດງເຖິງການຂະຫຍາຍຕົວອັນເປັນຮູບປະຖຳເທື່ອລະກ້າວ ຕາມທີ່ໄດ້ສະຫຼຸບຕີລາຄາ ແລະ ຖອດຖອນບົດຮຽນໃນສົກປີນີ້ ແລະ ໄດ້ວາງທິດທາງແຜນການສົກປີ 2011-2012 ເຊິ່ງໂດຍລວມແລ້ວເຫັນວ່າວຽກງານ ອປລ ມີລັກສະນະຄ່ອງຕົວ ແທດຕົວຈິງ ແລະ ສອດຄ່ອງກັບແຜນພັດທະນາແຮງງານ ແລະ ສະຫວັດດີການ-ສັງຄົມ 5 ປີຄັ້ງທີ 3 ກໍຄືແຜນພັດທະນາເສດຖະກິດ-ສັງຄົມ 5 ປີ ຄັ້ງທີ 7 ດ້ວຍການເຊີດຊູຄວາມຮັບຜິດຊອບ ແລະ ຈິດໃຈປະຕິບັດບຸກດ້ວຍການສ້າງບາດກ້າວບຸກທະລຸ ດ້ວຍການສ້າງບາດກ້າວບຸກທະລຸທັງ 4 ດ້ານ ຕາມມະຕິກອງປະຊຸມໃຫຍ່ ຄັ້ງທີ IX ຂອງພັກ.
ເພື່ອສືບຕໍ່ເສີມຂະຫຍາຍໝາກຜົນທີ່ພວກເຮົາຍາດມາໄດ້ ພ້ອມທັງຮັບປະກັນໃຫ້ເນື້ອໃນຈິດໃຈຂອງກອງປະຊຸມຄັ້ງນີ້ ໄດ້ຮັບການຈັດຕັ້ງປະຕິບັດເປັນຮູບປະທຳຕົວຈິງ ຜູ້ເຂົ້າຮ່ວມກອງປະຊຸມ ກໍຄືພະນັກງານທີ່ເຮັດວຽກງານປະກັນສັງຄົມທຸກຂັ້ນ ຈົ່ງພ້ອມກັນສືບຕໍ່ອອກແຮງຈັດຕັ້ງປະຕິບັດທິດທາງແຜນການທີ່ໄດ້ກຳນົດໄວ້ ໃຫ້ມີຄວາມເລິກເຊິ່ງກ້ວາງຂວາງໃນທົ່ວປະເທດ.
ຫົວຂໍ້ຂ່າວອື່ນໆທີ່ໜ້າສົນໃຈ
ຄໍາເຫັນຂອງທ່ານຜູ້ອ່ານ
|
|
