ຕາມ​ດຳ­ລັດ​ຂອງ​ປະ­ທານ​ປະ­ເທດ ແຫ່ງ ສປປ ລາວ ສະ­ບັບ​ເລກ​ທີ 279/ປປທ ວ່າ​ດ້ວຍ​ການ​ອະ­ໄພ​ຍະ​ໂທດ​ໃຫ້​ແກ່​ນັກ­ໂທດ ທີ່​ມີ​ຄວາມ​ກ້າວ​ໜ້າ​ໃນ​ທົ່ວ​ປະ­ເທດ ເນື່ອງ​ໃນ​ໂອ­ກາດ​ວັນ­ຊາດ ທີ 2 ທັນ­ວາ ຄົບ­ຮອບ 36 ປີ.

ນັກ­ໂທດ​ທີ່​ໄດ້​ຮັບ​ນະ­ໂຍ­ບາຍ​ອະ­ໄພ​ຍະ​ໂທດ​ທົ່ວ​ປະ­ເທດ​ມີ​ທັງ​ໝົດ 665 ຄົນ ຍິງ 109 ຄົນ ເປັນ​ຄົນ​ຕ່າງ­ປະ­ເທດ 25 ຄົນ ເຊິ່ງ​ໄດ້​ຮັບ​ອະ­ໄພ​ຍະ​ໂທດ​ຜ່ອນ​ໂທດ 538 ຄົນ ຍິງ 85 ຄົນ ຄົນ​ຕ່າງ­ປະ­ເທດ 22 ຄົນ ໃນ​ນີ້​ມີ ມຽນ​ມາ 1 ຄົນ ຫວຽດ­ນາມ 7 ຄົນ ໄທ 1 ຄົນ ຈີນ 3 ຄົນ ແລະ ອາ­ເມ­ລິ­ກາ 1 ຄົນ.

ສ່ວນ​ຜູ້​ທີ່​ໄດ້​ອະ­ໄພ​ຍະ​ໂທດ​ປ່ອຍ​ຕົວ​ມີ 119 ຄົນ ຍິງ 22 ຄົນ ຕ່າງ­ປະ­ເທດ 3 ຄົນ ແລະ ອະ­ໄພ​ຍະ​ໂທດ​ອອກ​ປິ່ນ­ປົວ​ສຸ­ຂະ­ພາບ 8 ຄົນ ຍິງ 2 ຄົນ ໃນ​ນີ້​ສະ­ເພາະ​ຢູ່​ບັນ­ດາ​ຄ້າຍ​ຂອງ​ສູນ​ກາງ​ໄດ້​ຮັບ​ການ​ອະ­ໄພ​ຍະ​ໂທດ​ທັງ​ໝົດ 326 ຄົນ ຍິງ 50 ຄົນ ຄົນ​ຕ່າງ­ປະ­ເທດ 15 ຄົນ ເຊິ່ງ​ໄດ້​ອະ­ໄພ​ຍະ​ໂທດ​ຜ່ອນ​ໂທດ 258 ຄົນ ຍິງ 36 ຄົນ ຄົນ​ຕ່າງ­ປະ­ເທດ 13 ຄົນ ມຽນ​ມາ 1 ຄົນ ຫວຽດ­ນາມ 5 ຄົນ ໄທ 6 ຄົນ ແລະ ອາ­ເມ­ລິ­ກາ 1 ຄົນ ສ່ວນ​ອະ­ໄພ​ຍະ​ໂທດ​ປ່ອຍ​ຕົວ 68 ຄົນ ຍິງ 14 ຄົນ ຕ່າງ­ປະ­ເທດ 2 ຄົນ.

ພິ​ທິ​ປະ­ກາດ​ອະ­ໄພ​ຍະ​ໂທດ​ປ່ອຍ​ຕົວ​ນັກ­ໂທດ​ໃນ​ຄັ້ງ​ນີ້ ໄດ້​ຈັດ​ຂຶ້ນ​ໃນ​ວັນ​ທີ 26 ມັງ­ກອນ 2012 ທີ່​ສະ­ໂມ­ສອນ​ກົມ​ຕຳ­ຫຼວດ​ໂພນ​ພະ​ເນົາ ນະ­ຄອນ­ຫຼວງ​ວຽງ​ຈັນ ເປັນ​ກຽດ​ເຂົ້າ​ຮ່ວມ​ມີ​ທ່ານ​ພົນ​ຈັດ­ຕະ­ວາ ກົງ​ທອງ ວົງ​ວິ­ຈິດ ຄະ­ນະ​ປະ­ຈຳ​ພັກ ລັດ­ຖະ­ມົນ­ຕີ​ຊ່ວຍ​ວ່າ­ການ​ກະ­ຊວງ​ປ້ອງ​ກັນ​ຄວາມ​ສະ­ຫງົບ ພ້ອມ​ນີ້​ມີ​ທ່ານ​ຫົວ​ໜ້າ​ກົມ​ຕຳ­ຫຼວດ​ຄຸມ​ຂັງ-ດັດ​ສ້າງ ບັນ­ດາ​ພະ­ນັກ­ງານ​ຫຼັກ​ແຫຼ່ງ ແລະ ພາກ­ສ່ວນ​ກ່ຽວ­ຂ້ອງ.