ຍີ່ປຸ່ນ ສືບຕໍ່ໃຫ້ການຊ່ວຍເຫຼືອ ພັດທະນາພື້ນຖານໂຄງລ່າງ

154 11 ສ.ຫ. 2017 ຂ່າວໜ້າ​ໜຶ່ງ
ຍີ່ປຸ່ນ ສືບຕໍ່ໃຫ້ການຊ່ວຍເຫຼືອ ພັດທະນາພື້ນຖານໂຄງລ່າງ

ພິທີ​ເປີດ​ໂຄງການ​ກໍ່ສ້າງ​ຂົວເຊ​ກຸມ​ກາມ ແລະ ຂົວ​ເຊ​ທ່າ​ມວກ ຕາມ​ທາງ​ຫຼວງ​ແຫ່ງ​ຊາດ ເລກ 9 ເຊິ່ງ​ເປັນ​ການ​ຊ່ວຍເຫຼືອ​ລ້າ​ຈາກປະເທດ​ຍີ່ປຸ່ນ ມູນ​ຄ່າ 23 ລ້ານໂດ​ລາ​ສະຫະລັດ ຫຼື ປະມານ 204 ຕື້​ກີບ ຈັດ​ຂຶ້ນ​ທີ່​ຂົວ​ເຊ​ທ່າມວກ ເມືອງ​ພິນ ແຂວງ​ສະຫວັນນະ​ເຂດ ໃນ​ວັນ​ທີ 3 ສິງຫາ 2017 ມີ​ທ່ານ ບຸນ​ຈັນ ສິນ​ທະ​ວົງ ລັດຖະມົນຕີ​ກະຊວງ​ໂຍທາ​ທິການ ແລະ ຂົນສົ່ງ ທ່ານ ສັນຕິພາບ ພົມວິຫານ ເຈົ້າແຂວງ​ສະຫວັນ​ນະ​ເຂດ ທ່ານ ທາ​ເຄ​ຊິ ຮິ​ກິ​ຮາ​ຣະ ເອກ​ອັກ​ຄະ​ຣາ​ຊະ​ທູດຍີ່ປຸ່ນ ປະຈຳ​ລາວ ທ່ານ​ຮອງ​ລັດຖະ​ມົນຕີ ກະຊວງ​ການ​ຕ່າງ​ປະເທດ ກະຊວງ​ການ​ເງິນ ທ່ານ​ຫົວໜ້າ​ອົງການ​ໄຈ​ກາປະຈຳ​ລາວ ແລະ ພາກສ່ວນທີ່​ກ່ຽວຂ້ອງ​ເຂົ້າ​ຮ່ວມ.

ທ່ານ ທາ​ເຄ​ຊິ ຮິ​ກິ​ຮາ​ຣະ ກ່າວ​ວ່າ: ປະເທດ​ຍີ່ປຸ່ນ​ໄດ້​ໃຫ້ການ​ຊ່ວຍເຫຼືອ ການ​ເຊື່ອມ​ຈອດແລວ​ເສດຖະກິດ​ພາກ​ພື້ນ​ຕາເວັນ​ອອກ-ຕາເວັນຕົກ ໃນ​ຂົງເຂດ​ອິນດູຈີນ ໂດຍ​ໄດ້​ສ້າງ​ຂົວຂ້າມ​ແມ່ນ້ຳ​ຂອງ​ສາກົນ ລາວ-ໄທ ແຫ່ງ​ທີ​ສອງ ​ທີ່​ມີ​ມູນ​ຄ່າ​ປະມານ 33 ລ້ານ​ໂດ​ລາ ແລະ ປັບປຸງ​ຖະໜົນ​ເລກ​ທີ 9 ທີ່​ມີ​ມູນ​ຄ່າທັງ​ໝົດ​ປະມານ 79 ລ້ານ​ໂດ​ລາ ເປັນ​ຈຳນວນ 3 ຄັ້ງ ທ່ານ​ຍັງ​ໄດ້ສະແດງ​ຄວາມ​ພໍໃຈ​ ຕໍ່​ກັບ​ລະບົບໂຄງ​ລ່າງ​ພື້ນຖານ​ທີ່​ມີ​ຄຸນະພາບສູງ​ຈາກ​ປະເທດ​ຍີ່ປຸ່ນ ​ທີ່​ໄດ້​ມາ​ປະກອບ​ສ່ວນ​ຕໍ່​ການ​ພັດທະນາ​ເສດຖະ​ກິດ-ສັງຄົມ​ໃນ​ລາວ ໂດຍ​ມີການ​ປະຕິບັດ​ຕາມ​ເງື່ອນໄຂ​ການກໍ່ສ້າງ ​ທີ່​ໂຄງການ​ຈະ​ຕ້ອງ​ສ້າງຂົວ​ທີ່​ມີ​ຄວາມ​ທົນ​ທານ ເພື່ອ​ຮັບປະກັນ​ຄວາມ​ປອດ​ໄພ​ໃຫ້​ແກ່​ການຂົນສົ່ງ ແລະ ແຜນການ​ຮ່ວມ​ມືການ​ພັດທະນາ​ຮ່ວມ​ກັນ ລາວ-ຢີ່​ປຸ່ນ ເພື່ອ​ສະໜັບສະໜູນ​ການພັດທະນາ​ຢ່າງ​ຍືນ​ຍົງ​ຂອງ​ປະເທດ​ລາວ ທັງ​ໄລຍະ​ກາງ ແລະ ໄລຍະ​ຍາວ ໄດ້​ຮັບ​ການ​ເຜີຍແຜ່ຮ່ວມ​ກັນ​ຈາກ​ນາຍົກ​ລັດ​ຖະ​ມົນຕີ​ຂອງ​ທັງ​ສອງ​ປະເທດ ໃນ​ກອງປະຊຸມ​ທັງ​ສອງ​ຝ່າຍ ​ເຊິ່ງ​ປະເທດຍີ່ປຸ່ນ​ເອງ​ກໍ່​ມີ​ແຜນທີ່​ຈະ​ສືບຕໍ່​ໃຫ້ການ​ຮ່ວມ​ມື​ໃນ​ຫຼາຍ​ຮູບ​ແບບ ​ໃນຖານະ​ການ​ເປັນ​ຄູ່​ຮ່ວມ​ຍຸດ​ທະສາດ ເພື່ອ​ເຮັດ​ໃຫ້​ປະເທດ​ລາວ ຫຼຸດ​ພົ້ນ​ອອກ​ຈາກ​ສະຖານະ​ພາບການ​ເປັນ​ປະເທດ​ດ້ອຍ​ພັດທະນາ ພາຍ​ໃນ​ປີ 2020.

ຂ່າວທີ່ກ່ຽວຂ້ອງ