ວາງສະແດງຮູບພາບ ແລະ ຜົນງານ ສະຫຼອງວັນສ້າງຕັ້ງສານປະຊາຊົນ

104 11 ສ.ຫ. 2017 ຂ່າວໜ້າ​ໜຶ່ງ
ວາງສະແດງຮູບພາບ ແລະ ຜົນງານ ສະຫຼອງວັນສ້າງຕັ້ງສານປະຊາຊົນ

ສານ​ປະຊາຊົນ​ສູງ​ສຸດ ໄດ້​ຈັດພິທີ​ເປີດ​ງານ​ວາງສະແດງ​ຮູບພາບ ແລະ ຜົນງານ​ການ​ເຄື່ອນໄຫວ ເພື່ອ​ສະເຫຼີມສະຫຼອງ​ວັນສ້າງຕັ້ງ​ສານ​ປະຊາຊົນ​ສູງ​ສຸດ ຄົບຮອບ 35 ປີ (15/8/1972-15/8/2017) ຂຶ້ນ​ວັນ​ທີ 10 ສິງຫາ 2017 ຢູ່​ຫໍ​ວັດທະນະທຳ​ແຫ່ງຊາດ ໂດຍ​ເປັນ​ປະທານ​ຂອງ​ທ່ານ ຄຳ​ພັນ ສິດທິ​ດຳ​ພາ ປະທານສານ​ປະຊາຊົນ​ສູງ​ສຸດ ມີ​ຮອງ​ປະທານ ພະນັກງານ​ອາວຸໂສ​ບຳນານ ພະນັກງານ-ລັດຖະກອນ ແລະ ພາກສ່ວນ​ກ່ຽວຂ້ອງ​ເຂົ້າຮ່ວມ.

ການ​ຈັດ​ງານ​ຄັ້ງ​ນີ້ ເພື່ອ​ທົບທວນຄືນ​ມູນເຊື້ອ ທາດ​ແທ້ ແລະ ການເຄື່ອນໄຫວ​ຂອງ​ສານ​ປະຊາຊົນ ນັບ​ແຕ່​ປະເທດ​ຊາດ​ໄດ້​ຮັບ​ການປົດ​ປ່ອຍ ສະຖາປະນາ​ເປັນ ​ສປປ ລາວ ປີ 1975 ໃນ​ໄລຍະບໍ່​ທັນ​ໄດ້​ສ້າງຕັ້ງ​ສານ​ປະຊາຊົນຢ່າງ​ເປັນ​ທາງ​ການ ສານ​ປະຊາຊົນ​ກໍ່​ໄດ້​ເຄື່ອນ​ໄຫວ​ເຮັດ​ໜ້າທີ່​ ໃນ​ການ​ພິຈາລະນາ​ຕັດສິນ​ຄະດີ​ລົງໂທດ​ຜູ້​ກະທຳ​ຜິດ ແລະ ປົກປັກ​ຮັກສາ​ສິດຜົນປະໂຫຍດ​ຂອງລັດ ແລະ ຂອງ​ປະຊາຊົນ ຈົນຮອດ​ປີ 1982 ພັກ-ລັດ ໂດຍ​ສະເພາະ ສະພາ​ປະຊາຊົນ​ສູງ​ສຸດ ​ຈຶ່ງໄດ້​ປະກາດ​ສ້າງຕັ້ງ​ສານ​ປະຊາຊົນ​ສູງ​ສຸດ​ຂຶ້ນ ເຊິ່ງ​ເປັນ​ເຫດການປະຫວັດສາດ​ແຫ່ງ​ການ​ກຳເນີດຂອງ​ສານ​ປະຊາຊົນ ເຮັດ​ໃຫ້​ສານປະຊາຊົນ​ມີ​ການ​ເຕີບ​ໃຫຍ່​ຂະຫຍາຍ​ຕົວ ໂດຍ​ຜ່ານ​ຂໍ້​ຫຍຸ້ງຍາກແຕ່​ລະ​ໄລຍະ ແຕ່​ຍ້ອນ​ການ​ນຳພາ​ອັນ​ຖືກຕ້ອງ​ຂອງ​ພັກ ຍ້ອນຄວາມ​ບຸກ​ບືນ​ສູ້​ຊົນ ແລະ ຕັດສິນໃຈ​ສູງ​ຂອງ​ຄະນະ​ພັກ ຄະນະ​ນຳ ແລະ ພະນັກງານ​ຂອງ​ສານ​ແຕ່ລະ​ຮຸ່ນ ຈຶ່ງ​ເຮັດ​ໃຫ້​ສານ​ປະຊາຊົນສຳເລັດ​ໜ້າທີ່​ການເມືອງ​ອັນ​ສູງສົ່ງ​ທີ່​ພັກ-ລັດ​ມອບ​ໝາຍ​ໃຫ້ ປະກອບ​ສ່ວນ​ສຳຄັນ​ເຂົ້າ​ໃນ​ການ​ປົກປັກ​ຮັກສາ ແລະ ສ້າງສາ​ພັດ​ທະນາ​ປະເທດ​ຊາດ ກາຍເປັນ​ກຳລັງແຮງ​ທີ່​ຈົງ​ຮັກ​ພັກດີ​ຂອງ​ພັກ-ລັດ ເປັນ​ທີ່​ເພິ່ງ​ໄວ້​ເນື້ອ​ເຊື່ອ​ໃຈ​ຂອງ​ປະຊາ​ຊົນ.

ງານ​ວາງສະແດງ​ຄັ້ງ​ນີ້ ຈັດຂຶ້ນ​ເປັນ​ຄັ້ງ​ທຳ​ອິດ ເຊິ່ງ​ໄດ້​ຮວບຮວມ​ເອົາ​ຮູບ​ພາບ ຜົນງານ​ຂອງສານ​ປະຊາຊົນ​ມາ​ວາງສະແດງໃຫ້​ພະນັກງານ​ຂອງ​ສານ ກໍ່​ຄືປະຊາ​ຊົນ ແລະ ຄົນ​ຮຸ່ນ​ໃໝ່ ໄດ້​ຮັບຮູ້​ເຖິງ​ປະຫວັດສາດ ການ​ເຕີບໃຫຍ່​ຂະຫຍາຍຕົວ ຜົນງານ​ການເຄື່ອນ​ໄຫວ​ຂອງ​ສານ​ປະຊາຊົນແຕ່​ລະ​ຮຸ່ນ ແຕ່​ລະ​ໄລຍະ​ຂອງ​ຄະນະ​ພັກ ຄະນະ​ນຳ ພະນັກງານ ສານ​ປະຊາຊົນ ພາຍ​ໃຕ້​ການ​ຊີ້ນຳ-ນຳພາ​ຂອງ​ພັກ​ໃນ​ແຕ່​ລະໄລຍະ ແລະ ພາຍ​ໃນ​ງານ​ໄດ້​ເປີດໃຫ້​ມວນ​ຊົນ ​ສາມາດ​ເຂົ້າ​ໄປ​ຊົມໄດ້​ເປັນ​ເວລາ 2 ວັນ.

ຂ່າວທີ່ກ່ຽວຂ້ອງ