ສ.ອາ​ເມ​ຣິ​ກາ ປະຕິບັດ​ການ​ໂຈມ​ຕີ​ທາງ​ອາກາດ​ໃນ​ໂຊ​ມາລີ

173 02 ສ.ຫ. 2017 ຂ່າວຕ່າງປະເທດ
ສ.ອາ​ເມ​ຣິ​ກາ ປະຕິບັດ​ການ​ໂຈມ​ຕີ​ທາງ​ອາກາດ​ໃນ​ໂຊ​ມາລີ

ກອງ​ກຳລັງ​ຂອງ​ກອງທັບ ສ.ອາ​ເມ​ຣິ​ກາ ໄດ້​ປະຕິບັດ​ການ​ໂຈມ​ຕີທາງ​ອາກາດ​ໃສ່​ຖານ​ທີ່​ໝັ້ນ​ຫຼາຍ​ແຫ່ງ​ຂອງ​ກຸມ​ມື​ປືນອາ​ລ-ຊາ​ບັບ ໃນ​ເຂດ​ພາກ​ໃຕ້​ປະເທດ​ໂຊ​ມາລີ ແລະ ໄດ້​ສັງຫານ​ມື​ປືນ​ຂອງ​ກຸ່ມ​ກໍ່​ການຮ້າຍ​ດັ່ງກ່າວ​ຫຼາຍ​ຄົນ ໃນ​ຕອນ​ເຊົ້າວັນ​ທີ 30 ກໍລະກົດ​ທີ່​ຜ່ານ​ມາ.

ກອງ​ບັນຊາ​ການ​ຂອງ ສ.ອາເມ​ຣິ​ກາ ​ຢູ່​ໃນ​ທະວີບ​ອາ​ຟຣິກ​ກາ (AFRICOM) ແຈ້ງ​ໃຫ້​ຮູ້​ຢູ່​ໃນ​ຖະແຫຼງການ​ສະບັບ​ໜຶ່ງ​ວ່າ ການ​ປະຕິບັດ​ການ​ໂຈມ​ຕີ​ທາງ​ອາກາດ​ດັ່ງກ່າວ ໄດ້​ທຳລາຍ​ຖານ​ທີ່​ໝັ້ນ​ຈຳນວນ​ໜຶ່ງຂອງ​ກຸ່ມ ອາ​​ລ-ຊາ​ບັບ ແລະ ໄດ້ສັງຫານ​ພວກ​ມື​ປືນ​ຫຼາຍ​ຄົນ ຢູ່​ໃກ້​ກັບເຂດໂຕ​ໂຕ​ໂຣ (ທາງ​ທິດໃຕ້​ໂຊ​ມາລີ).

AFRICOM ໃຫ້​ຮູ້​ວ່າ ປະຕິບັດ​ການນີ້ ​ເປັນການເຄື່ອນໄຫວ​ປະສານ​ງານ​ກັບບັນດາ​ຄູ່​ຮ່ວມ​ມື​ໃນ​ພາກ​ພື້ນ ໃນ​ນັ້ນມີ​ກອງກຳລັງ​ປະກອບ​ອາວຸດ​ຂອງໂຊ​ມາລີ ເພື່ອ​ຕ້ານ​ກັບ​ກຸ່ມ​ກໍ່​ການຮ້າຍ ອາ​​ລ-ຊາ​ບັບ ແລະ ສະກັດ​ກັ້ນການ​ໂຈມ​ຕີ​ຂອງ​ພວກເຂົາ.

ປັດຈຸບັນ​ນີ້ ສ.ອາ​ເມ​ຣິ​ກາ ພວມຮັກສາ​ກອງ​ກຳລັງ​ທະຫານ​ໃນ​ຂະໜາດ​ນ້ອຍ ຊຶ່ງ​ມີ​ພົນທະຫານ​ປະມານ 50 ຄົນ ຢູ່​ໃນ​ໂຊມາລີ ໂດຍ​ມີໜ້າ​ທີ່​ເປັນ​ທີ່​ປຶກສາ ແລະ ເປັນຄູເຝິກ​ໃຫ້ແກ່​ກອງທັບ​ໂຊ​ມາລີ ແລະ ພົນ​ທະຫານ​ທີ່​ຂຶ້ນ​ກັບ​ຄະນະ​ຮັກສາສັນຕິພາບ​ຂອງ​ສະຫະພາບ​ອາ​ຟຣິກ​ກາ ຢູ່​ໃນໂຊ​ມາລີ (AMISOM) ເພື່ອຕໍ່ຕ້ານ​ກັບ​ກຸ່ມ ອາ​​ລ-ຊາ​ບັບ.

ຂ່າວທີ່ກ່ຽວຂ້ອງ