ອັດ­ຕາ​ສ່ວນ​ວ່າງ​ງານ​ຂອງ Eurozone ຢູ່​ໃນ​ລະ­ດັບ​ຕ່ຳ​ສຸດ​ໃນ​ຮອບ 8 ປີ

133 02 ສ.ຫ. 2017 ຂ່າວຕ່າງປະເທດ
ອັດ­ຕາ​ສ່ວນ​ວ່າງ​ງານ​ຂອງ Eurozone ຢູ່​ໃນ​ລະ­ດັບ​ຕ່ຳ​ສຸດ​ໃນ​ຮອບ 8 ປີ

ພື້ນ­ຖານ​ເສດ­ຖະ­ກິດ​ສະ­ຫະພາບ​ເອີ​ຣົບ (EU) ສືບ­ຕໍ່​ຢູ່​ໃນ​ທ່າ​ຟື້ນ​ຟູ​ທີ່​ໝັ້ນ­ຄົງ  ດ້ວຍ​ອັດ­ຕາ​ສ່ວນ​ຄົນວ່າງ​ງານ​ຢູ່​ໃນ​ເຂດ​ໃຊ້ເງິນ​ເອີ​ໂຣ (Eurozone) ໃນ​ເດືອນ​ມິ­ຖຸ­ນາ​ທີ່ຜ່ານ​ມາ ໄດ້​ຫຼຸດ​ລົງ​ສູ່​ລະ­ດັບ​ຕ່ຳ​ສຸດນັບ​ແຕ່​ເດືອນ​ກຸມ­ພາ 2009 ເປັນຕົ້ນ​ມາ  ຊຶ່ງ​ເປັນ​ໄລ­ຍະ​ທີ່​ເອີ​ຣົບ ​ຕ້ອງ​ປະ​ເຊີນ​ກັບ​ຜົນ​ກະ­ທົບ​ຈາກ​ວິ​ກິດການການ​ເງິນ​ທົ່ວ​ໂລກ​ນັ້ນ.

ຕົວ​ເລກ​ຢ່າງ​ເປັນ​ທາງ​ການ​ຂອງ EU ຊຶ່ງ​ນຳ​ອອກ​ມາ​ເປີດ­ເຜີຍ​ເມື່ອວັນ​ທີ 31 ກໍ­ລະ­ກົດ ລະ­ບຸວ່າ ອັດ­ຕາ​ສ່ວນ​ຄົນ​ວ່າງ​ງານຢູ່​ໃນ Eurozone ໄດ້​ຫຼຸດ​ລົງ​ມາ​ຍັງ​ເຫຼືອທີ່ 9,1%  ທຽບ­ໃສ່​ລະ­ດັບ 9,2% ໃນ​ເດືອນ​ພຶດ­ສະ­ພາ.

ເມື່ອ​ຕົວ​ເລກດັ່ງ­ກ່າວ​ຕ່ຳ​ກວ່າ​ລະ­ດັບ 9,2% ຕາມ​ທີ່​ຊ່ຽວ­ຊານ​ໄດ້​ຄາດ​ຄະ­ເນເອົາ​ໄວ້​ກ່ອນ​ໜ້າ​ນັ້ນ ກໍ​ນັບ​ວ່າ​ເປັນການ​ສືບ­ຕໍ່​ປັບ­ປຸງ​ຄວາມ​ເຊື່ອ​ໝັ້ນກ່ຽວ​ກັບ​ຈັງ­ຫວະ​ຟື້ນ​ຟູ​ຂອງ​ເຂດ​ດັ່ງ­ກ່າວ ຫຼັງ​ວິ​ກິດ​ການ​ການ​ເງິນ ​ຂະ­ນະ​ດຽວ​ກັນ ລະ­ດັບ​ເງິນເຟີ້ຂອງ Eurozone ມີ​ຄວາມ​ໝັ້ນ­ຄົງ​ຢູ່​ທີ່​ລະ­ດັບ 1,3% ໃນ​ເດືອນ​ກໍ­ລະ­ກົດ​ທີ່ຜ່ານມາ ນັບ​ວ່າ​ບໍ່​ມີ​ການ​ປ່ຽນແປງເມື່ອ​ທຽບ­ໃສ່​ລະ­ດັບເງິນ​ເຟີ້​ໃນເດືອນ​ມິ­ຖຸ­ນາ ແລະ ແທດ­ເໝາະ​ກັບການ​ຄາດ​ຄະ­ເນ​ຂອງ​ວົງ​ການ​ຊ່ຽວຊານ ເຊິ່ງເງິນ​ເຟີ້​ດັ່ງ­ກ່າວ​ກໍຕ່ຳ​ກວ່າເມື່ອ​ທຽບ­ໃສ່​ຄາດ­ໝາຍ 2% ຂອງ​ທະ​ນາຄານ​ກາງ​ເອີ​ຣົບ (ECB).

ຕົວ​ເລກ​ຕ່າງໆ​ດັ່ງ­ກ່າວມີ​ອອກມາ​ໜຶ່ງ​ອາ­ທິດ​ຫຼັງ​ຈາກ​ທີ່​ອົງ­ການກອງ​ທຶນ​ເງິນ­ຕາ​ສາ­ກົນ (IMF) ຢືນ­ຢັນ​ວ່າ ການ​ຟື້ນ​ຕົວຂອງ​ພື້ນ­ຖານ​ເສດ­ຖະ­ກິດ Eurozone ພວມ​ເກີດ​ຂຶ້ນ​ຢ່າງ​ໝັ້ນ­ຄົງ ແຕ່​ໄດ້​ເຕືອນ​ວ່າ ​ເງິນ​ເຟີ້​ຕ່ຳ ທະ­ນາ­ຄານ​ຕ່າງໆ​ຂາດຄວາມຍືນ​ຍົງ ແລະ ເຫດ­ການ​ທີ່​ອັງ­ກິດ ຖອນ​ອອກໄປ​ຈາກ EU (Brexit) ສືບ­ຕໍ່​ເປັນ­ຄວາມ​ສ່ຽງ​ທີ່​ບົ່ມ​ຊ້ອນ.

ຂ່າວທີ່ກ່ຽວຂ້ອງ