ຊົ່ວໂມງວຽງຈັນສະອາດ ມີບັນຍາກາດຄຶກຄັກເປັນຂະບວນ

238 14 ກ.ກ. 2017 ຂ່າວໜ້າ​ໜຶ່ງ
ຊົ່ວໂມງວຽງຈັນສະອາດ ມີບັນຍາກາດຄຶກຄັກເປັນຂະບວນ

ຊົ່ວໂມງ​ວຽງ​ຈັນ​ສະອາດ ວັນ​ທີ 12 ກໍລະກົດ 2017 ຄຶກຄັກ​ກວ່າອາທິດ​ຜ່ານ​ມາ ມີ​ປະຊາຊົນ​ຫຼາຍບ້ານ​ຕື່ນ​ຕົວ​ໃຫ້​ຄວາມ​ຮ່ວມ​ມື ອອກ​ມາ​ຮ່ວມ​ຂະ​ບວນ​ຊົ່ວໂມງວຽງ​ຈັນ​ສະອາດ​ຄຶກຄື້ນ​ມ່ວນຊື່ນ ພ້ອມ​ກັນ​ເຮັດອະນາໄມ​ຕາມ​ໜ້າເຮືອນ ແລະ ຂອບ​ເຂດ​ຄວາມ​ຮັບຜິດ​ຊອບ​ຂອງ​ຕົນ​ເປັນ​ຈຳນວນຫຼວງຫຼາຍ.

ທ່ານ ອຸດົມ​ໄຊ ວົງ​ພັກດີ ຫົວໜ້າ​ຂະແໜງ​ຄຸ້ມ​ຄອງ ແລະ ກວດກາ​ຄວາມ​ສະອາດ​ຕົວ​ເມືອງ ​ຄບຕ ນວ ແຈ້ງ​ໃຫ້​ຊາບ​ວ່າ: ເພື່ອເປັນ​ການ​ສ້າງ​ຂະ​ບວນ​ການ​ຮ່ວມສະເຫຼີມສະຫຼອງ​ສອງ​ວັນ​ປະຫວັດສາດ​ ລາວ-ຫວຽດນາມ ວັນ​ສົນທິ​ສັນຍາ​ມິດຕະພາບ ຄົບຮອບ 40 ປີ ແລະ ສາຍ​ພົວພັນ​ການ​ທູດ ຄົບຮອບ 55 ປີ ອຳນາດ​ການ​ປົກຄອງ ແລະ ພໍ່​ແມ່​ປະຊາຊົນ​ບ້ານໂພນ​ສີ​ນວນ ເມືອງ​ສີ​ສັດຕະ​ນາກ ພ້ອມ​ກັນ​ອອກ​ມາ​ເຮັດອະນາໄມປັດກວາດ ຕັດ​ຫຍ້າ​ຕາມ​ແຄມ​ຖະໜົນ​ບູ​ລີ​ຈັນ ສ່ວນ​ເມືອງ​ໄຊ​ເຊດຖາ ມີ​ບ້ານ​ສະພັງ​ໝໍ້ ບ້ານ​ໂພນໄຊ ໜອງ​ບອນ ໂພນ​ສະອາດ ໜອງ​ສາງ​ທໍ່ ໂພນ​ເຄັງ ໂພນ​ພະເນົາ ແລະ ບ້ານ​ຈອມ​ມະນີ ພ້ອມກັນ​ເຮັດອະນາໄມຕາມ​ຖະໜົນບູ​ລີ​ຈັນ ໜອງ​ບອນ 23 ສິງຫາ ແລະ ຖະໜົນ ໄກສອນ ພົມ​ວິຫານ ສ່ວນ​ເມືອງ​ສີ​ໂຄດ​ຕະບອງ ມີ​ບ້ານສີ​ໄຄ​ທ່າ-ທົ່ງ ເມືອງ​ວາທົ່ງ-ທ່າ ສີ​ຖານ​ເໜືອ ຂຸນ​ຕາ​ທົ່ງ-ທ່າ ອຸບ​ມຸງ ໜອງ​ປາໄນ ວັດ​ໄຕນ້ອຍ​ທົ່ງ-ທ່າ ແລະ ບ້ານ​ອາກາດ ອະນາໄມ​ຕາມ​ຖະໜົນຫຼວງ​ພະບາງ ແລະ ຖະໜົນສຸ​ພານຸ​ວົງ ເມືອງ​ຈັນທະ​ບູ​ລີ ມີ​ບ້ານ​ຊຽງ​ຍືນ ອາ​ນຸ ມີ​ໄຊ ຫາຍ​ໂສກ ວັດ​ຈັນ ແລະ ບ້ານ​ສີ​ຫອມ ເຮັດອະນາໄມຕາມ​ຖະໜົນ​ສາມ​ແສນ​ໄທ ແລະ ຖະໜົນ​ເຊດ​ຖາ​ທິ​ລາດ.

ໂດຍ​ລວມ​ແລ້ວ ຂະ​ບວນ​ຊົ່ວໂມງ​ວຽງ​ຈັນ​ສະອາດ​ໃນ​ວັນ​ພຸດ​ນີ້ ແມ່ນ​ມີ​ບັນຍາກາດ​ດີ ຍ້ອນຄວາມ​ເອົາໃຈໃສ່​ຂອງ​ຄະນະ​ຮັບຜິດ​ຊອບ​ຂອງ ​ຄບຕ ນວ ກໍ່​ຄື ​ຄບຕ ເມືອງ ລວມ​ທັງ​ອຳນາດການ​ປົກຄອງ ​ພໍ່​ແມ່​ປະຊາຊົນ​ໄດ້ຕື່ນ​ຕົວ​ໃຫ້ການ​ຮ່ວມ​ມື ເຮັດ​ໃຫ້ການຈັດຕັ້ງ​ປະຕິບັດ​ມີ​ບາດກ້າວທີ່​ດີ ຄາດ​ວ່າ​ອາທິດ​ຕໍ່​ໄປ​ຈະ​ມີ​ບັນຍາ​ກາດ​ດີ​ຂຶ້ນ​ກວ່າ​ເກົ່າ.

ຂ່າວທີ່ກ່ຽວຂ້ອງ