ເບິ່ງບ້ານເຂົາ ເອົາບົດຮຽນ - ໂດຍ: ວິເສດ ສະແຫວງສຶກສາ : ສ ເກົາ­ຫຼີ ອິນ​ເດຍ

544 06 ກ.ກ. 2017 ຫົວຂໍ້ຂ່າວອື່ນໆ

ພົບ​ກັນ​ໃນ​ຄໍ​ລຳ​ເກົ່າ​ເຈົ້າ​ເດີມ​ປະ­ຈຳ​ວັນ​ນີ້ ​ມີເລື່ອງ​ກ່ຽວ​ກັບ​ຄວາມ​ສະ­ຫຼາດ​ຂອງ​ຕຳ­ຫຼວດ ສ ເກົາ­ຫຼີ ໃນ​ການ​ປາບ​ພວກ​ຄ້າຢາ​ເສບ​ຕິດ ຕໍ່​ໃສ່ ການ​ຈັບ​ກຸມ​ຊາຍ​ຄາ​ຕະ​ກອນ​ຢູ່​ອິນ​ເດຍ ທີ່​ສັງ­ຫານຄົນ​ອື່ນ​ຍ້ອນ​ຄວາມ​ເຊື່ອ ແລະ ເລື່ອງ​ຂໍ້​ຫ້າມ​ສຳ­ລັບແມ່­ຍິງ​ຖື­ພາ​ກໍ່​ຢູ່​ອິນ​ເດຍ​ຄື​ກັນ.

ທີ່ ສ ເກົາ­ຫຼີ: ຂ່າວ​ຈາກ​ວຽງ​ຈັນ​ທາມ (Vientiane Times)  ໜັງ­ສື­ພິມ​ພາ­ສາ​ອັງ­ກິດ ສະ­ບັບທຳ​ອິດ​ຂອງ​ລາວ​ເຮົາ ປະ­ຈຳ​ວັນ​ທີ 30 ເດືອນ​ມິ​ຖຸນາ​ຜ່ານ​ມາ ໄດ້​ລົງ​ຂ່າວ​ສັ້ນ​ກ່ຽວ​ກັບ​ຕຳ­ຫຼວດ​ນັກສືບ ສ ເກົາ­ຫຼີ ຊື່​ທ້າວ ວູ​ຈຸງ​ຮູນ (Woo Jung-Hoon) ປອມ​ຕົວ​ເປັນ​ແມ່­ຍິງ ແລະ ສາ­ມາດ​ຈັບກຸມ​ຜູ້​ຄ້າ​ຢາ​ເສບ​ຕິດ​ໄດ້​ເຖິງ 20 ຄົນ ເລື່ອງ​ນີ້​ໄດ້ກາຍ­ເປັນ​ຂ່າວ​ເດັດ​ຂ່າວດັງ​ສະ­ເທືອນ​ໄປ​ທົ່ວ​ປະເທດ.

ທ້າວ ວູ​ຈຸງ​ຮູນ ມີ​ລວງ​ສູງ 170 ຊັງ​ຕີ​ແມັດ ແລະ ມີ​ນ້ຳ­ໜັກ 62 ກິ​ໂລ ເປັນ​ຄົນ​ຮູບ​ຮ່າງ​ທີ່​ອໍ­ລະຊອນ​ອ່ອນ​ແອ້ນ​ພໍ​ສົມ­ຄວນ ເມື່ອ​ທຽບ​ລະ­ຫວ່າງລວງ​ສູງ​ກັບ​ນ້ຳ­ໜັກ ດັ່ງ­ນັ້ນ ຈຶ່ງ​ງ່າຍ​ທີ່​ຈະ​ປອມ​ຕົວເປັນ​ແມ່­ຍິງ ເຖິງ​ຈະ​ຈ່ອຍ​ຮຽວ ແຕ່​ທ້າວ ວູ ເປັນແຊ໋ມ​ດ້ານ​ກີ­ລາ​ປ້ອງ​ກັນ​ຕົວ ທີ່​ໄດ້​ຮັບ​ຫຼຽນ​ເງິນຫຼາຍ​ຫຼຽນ​ໃນ​ການ​ແຂ່ງ­ຂັນ​ກິ­ລາ​ວູ​ຊູ ແລະ ມວຍເຕະ​ລະ­ດັບ​ຊາດ ບົດ­ຮຽນ​ນີ້​ສອນ​ວ່າ ການ​ຕໍ່­ສູ້​ຕ້ານພວກ​ຄ້າ​ຢາ​ເສບ​ຕິດ​ນັ້ນ​ຕ້ອງ​ມີ​ໄຫວ​ພິບ ແລະ ເຮັດຫຼາຍ​ຮູບ​ຫຼາຍ​ສີ ການ​ປອມ​ຕົວ​ເປັນ​ແມ່­ຍິງ​ກໍ່​ແມ່ນກົນ​ວິ­ທີ​ໜຶ່ງ​ທີ່​ຕຳ­ຫຼວດ​ຂອງ​ຫຼາຍ​ປະ­ເທດ​ນຳ​ໃຊ້ ເພື່ອ​ຈັບ​ເຫຍື່ອ​ໄດ້​ຢ່າງ​ເລືອດ​ເຢັນ.

ທີ່ ອິນ​ເດຍ: ສອງ​ເຫດ­ການ​ກ່ຽວ​ກັບ​ອິນ​ເດຍ​ນີ້ ຖອດ​ມາ​ຈາກ​ໜັງ­ສື­ພິມ “ເດິ​ເນ​ເຊິນ” (The Nation) ສະ­ບັບ​ວັນ​ທີ 21 ແລະ 25 ເດືອນ​ມິ­ຖຸ­ນາ ຜ່ານ​ມາ ຂໍ​ເລີ່ມ​ຈາກ​ເລື່ອງ​ຄວາມ​ເຊື່ອ​ທີ່​ພາ­ໃຫ້ເກີດ​ມີ​ກໍ­ລະ­ນີ​ຂ້າ​ກັນ​ຕາຍ ແຕ່​ຜູ້​ກໍ່​ເຫດ​ກໍ່​ບໍ່​ສາ­ມາດລອດ​ຈາກ​ກັບ​ມື​ຕຳ­ຫຼວດ​ໄປ​ໄດ້.

ເລື່ອງ​ມີ​ຢູ່​ວ່າ: ທ້າວ ຈູ​ເນດ​ຄານ ຈາກ​ຄອບ­ຄົວທີ່​ນັບ­ຖື​ສາ­ສະ­ໜາ​ອິດ​ສະ​ລາມ ກັບ​ອ້າຍ​ສອງ​ຄົນ ​ຂີ່ລົດ­ໄຟ​ອອກ​ຈາກ​ນະ­ຄອນ­ຫຼວງ ນິວ​ເດລີ ພ້ອມດ້ວຍ​ຖົງ​ເຄື່ອງ​ຂອງ ຢູ່​ໃນ​ລົດ​ໄດ້​ມີ​ຊາຍ ຈຳ­ນວນ 15-20 ຄົນ ລູ່​ມາ​ຫາ​ສາມ​ອ້າຍ​ນ້ອງ ທັງ​ຈົກມີດອອກ​ມາ​ຈີ້ ພ້ອມ​ທັງ​ກ່າວ​ຫາ​ວ່າ​ສາມ​ອ້າຍ​ນ້ອງ​ມີຊີ້ນ​ງົວ​ຢູ່​ໃນ​ຖົງ ດັ່ງ­ນັ້ນ ຈຶ່ງ​ບໍ່​ມີ​ສິດ​ນັ່ງ​ໃນ​ລົດ­ເມ ງົວ​ແມ່ນ​ສັດ​ສັກ­ສິດຂອງ​ຊາວ​ອິນ​ເດຍ ​ທີ່​ນັບ­ຖື​ສາສະ­ໜາ​ຮິນ​ດູ ເຊິ່ງ​ກົດ­ໝາຍ​ໃນ​ລັດ​ຕ່າງໆ​ຂອງ​ອິນເດຍ ​ຫ້າມ​ຂ້າ​ບໍ­ລິ­ໂພກ ແລະ ມີ​ໄວ້​ໃນຄອບ​ຄອງ ເມື່ອ​ຕົກ​ຢູ່​ໃນ​ສະ­ພາບ​ນັ້ນ ສາມ​ອ້າຍ​ນ້ອງ​ໄດ້​ປະ­ຕິເສດ​ວ່າ: ບໍ່​ມີ​ຊີ້ນ​ງົວ​ຢູ່​ໃນ​ຖົງ ແຕ່​ພວກ​ຈູ່​ໂຈມ​ບໍ່ຍອມ​ຟັງ ເລື່ອງ​ເລີຍ​ບານ​ປາຍ ທ້າວ ຈູ​ເນດ​ຄານ ອາ­ຍຸ​ພຽງ 15 ປີ ຖືກ​ປາຍ​ມີດ​ສຸມ​ແທງ​ຈົນ​ເສຍ​ຊີວິດ ສ່ວນ​ອ້າຍ​ຂອງ​ເຂົາ​ທັງ​ສອງ​ໄດ້​ຮັບ​ບາດ­ເຈັບ ແຫຼ່ງ​ຂ່າວ​ບອກ​ວ່າ: ຕຳ​ລວດ​ປະ­ຈຳ​ທາງ​ລົດ­ໄຟ ສາ­ມາດ​ຈັບ​ໜຶ່ງ​ໃນ​ຜູ້​ກໍ່​ເຫດ ອາ­ຍຸ 35 ປີ ຈາກ​ລັດ ຮາ​ຣິຢາ​ນາ (Haryana) ໄດ້​ແລ້ວ.

ໃນ​ສອງ​ປີ­ຜ່ານ­ມາ ຜູ້​ນັບ­ຖື​ສາ­ສະ­ໜາ​ອິດ​ສະລາມ​ໃນ​ອິນ​ເດຍ ​ຖືກ​ຂ້າ​ຕາຍ​ເປັນ​ຈຳ­ນວນ​ສິບ​ປາຍຄົນ​ແລ້ວ ຍ້ອນ​ຂໍ້​ກ່າວຫາ “​ກິນ​ຊີ້ນ​ງົວ” ໃນ​ປີ 2016 ທ່ານ ນາ​ເຣນ ​ດຼາ​ໂມ​ດີ ນາ­ຍົກ­ລັດ­ຖະ­ມົນ­ຕີ​ອິນ​ເດຍ ໄດ້​ອອກ​ມາ​ວິ­ພາກ​ວິ­ຈານ​ພວກ​ຫົວ­ດື້ດ້ານ​ໃນ​ການປົກ​ປ້ອງ​ງົວ​ ທີ່​ໄດ້​ສວຍ​ໃຊ້​ເລື່ອງ​ຄວາມ​ເຊື່ອ​ເພື່ອ​ປົກປິດ​ການ​ກະ­ທຳ​ທີ່​ເປັນ​ອາ​ຊະ​ຍາ​ກຳ.

ອີກ​ຂ່າວ​ໜຶ່ງ​ກ່ຽວ​ກັບ​ອິນ​ເດຍ ແມ່ນ​ເລື່ອງ​ສຽງວິ­ພາກ​ວິ­ຈານ​ຂໍ້​ແນະ­ນຳ​ສຳ­ລັບ​ແມ່­ຍິງ​ຖື­ພາ ທີ່​ຈັດພິມ​ໂດຍ​ສະ­ພາ​ສູນ​ກາງຄົ້ນ­ຄວ້າ​ໂຢ​ຄະ (Yoga) ແລະ ການ​ປິ່ນ­ປົວ​ດ້ວຍ​ວິ­ທີ​ທຳ​ມະ​ຊາດ ສະ­ພາ​ທີ່ວ່າ​ນີ້​ໄດ້​ຮັບ​ການ​ສະ­ໜັບ­ສະ­ໜູນ​ດ້ານ​ງົບ­ປະ­ມານຈາກ​ລັດ.

ຂໍ້​ແນະ­ນຳ​ທີ່​ກໍ່­ໃຫ້­ເກີດ​ມີ​ກະ­ແສ​ຕ້ານ​ຄືນ​ຈາກບັນ­ດາ​ຊ່ຽວ­ຊານ​ດ້ານ​ການ​ແພດ​ນີ້ ຄື: ໃຫ້​ແມ່­ຍິງຖື­ພາ​ຫຼີກ­ເວັ້ນ​ການ​ບໍ­ລິ­ໂພກຊີ້ນ ໄຂ່ ແລະ ຫ້າມ​ມີຕັນ­ຫາ (ແປ​ວ່າ​ຫ້າມ​ມີ​ເພດ​ສຳ­ພັນ​ໃນ​ເວ­ລາ​ຖື­ພາ) ນອກ­ຈາກ​ນີ້ ຂໍ້​ແນະ­ນຳ​ຍັງ​ສະ­ເໜີ​ໃຫ້​ແມ່­ຍິງ​ຖື­ພາສະ­ຫງົບ​ຈິດ​ສະ­ຫງົບ​ໃຈ ໃຫ້​ຄິດ​ແຕ່​ເລື່ອງ​ຈິດ​ວິນຍານ ແລະ ອ່ານ​ກ່ຽວ​ກັບ​ຊີ­ວະ​ປະ­ຫວັດ​ຂອງ​ບຸກຄົນ​ສຳ­ຄັນ (ດ້ານ​ຈິດ​ວິນຍານ) ພໍ​ຂໍ້​ແນະ­ນຳ​ນີ້ອອກ​ມາ ບັນ­ດາ​ຊ່ຽວ­ຊານ​ທາງ​ການ​ແພດ​ກໍ່​ອອກມາ​ກ່າວ​ປະ­ນາມ​ວ່າ: “ເປັນ​ຂໍ້​ແນະ­ນຳ​ທີ່​ໄຮ້​ສາ­ລະ ແລະ ເປັນ​ເລື່ອງ​ຕະ­ຫຼົກ” ໃນ​ປະ­ເທດ​ທີ່​ຜູ້​ເປັນ​ແມ່ເສຍ​ຊີ­ວິດ​ຍ້ອນ​ເກີດ​ລູກ​ເຖິງ 45.000 ຄົນ (ສະ​ຖິຕິ​ໃນ​ປີ 2015 ປີ​ດຽວ) ແມ່­ຍິງ​ອິນ​ເດຍ ​ທີ່​ຖື­ພາຈຳ­ນວນ 174 ຄົນ ໃນ​ຈຳ­ນວນ​ແຕ່​ລະ 1 ແສນ​ຄົນ ເສຍ​ຊີ­ວິດ​ໃນ​ເວ­ລາ​ເກີດ​ລູກ ການ​ຫ້າມ​ກິນ​ຊີ້ນ-ໄຂ່ນັ້ນ ​ຂັດ​ກັບ​ຫຼັກ​ໂພ­ຊະ​ນາ​ການ​ທີ່​ຍິງ​ຖື­ພາ​ຕ້ອງ­ການທີ່​ສຸດ ສຸດ​ທ້າຍ​ພາກ­ສ່ວນ​ພິມ​ປື້ມ​ແນະ­ນຳ​ໄດ້​ອອກມາ​ແກ້­ໂຕ​ວ່າ “ເປັນ​ພຽງ​ຂໍ້​ແນະ­ນຳ​ລວມໆ ຕາມຫຼັກ​ໂຢ​ຄະ ແລະ ການ​ປິ່ນ­ປົວ​ແບບ​ທຳ​ມະ​ຊາດ”.

ຂ່າວທີ່ກ່ຽວຂ້ອງ