ເອົາໃຈໃສ່ເຝົ້າລະວັງພະຍາດອັກເສບຕັບເອ

141 19 ມິ.ນ. 2017 ຂ່າວໜ້າ​ໜຶ່ງ

ກ້າວ​ເຂົ້າ​ສູ່​ລະດູຝົນ ​ນອກຈາກພະຍາດ​ໄຂ້ຍຸງ​ລາຍ​ທີ່​ຄວນ​ເຝົ້າລະວັງ​ແລ້ວ ຍັງ​ມີ​ອີກ​ຫຼາຍ​ພະຍາດ​ທີ່​ຄວນ​ເຝົ້າ​ລະວັງ ເຊັ່ນ: ພະຍາດ​ອັກເສບ​ຕັບ​ເອ (A) ຫຼື ພະຍາດ​ໄຂ້​ເຫຼືອງ ເຊິ່ງ​ພະຍາດ​ນີ້ເຄີຍ​ພົບ 10 ກວ່າ​ປີຜ່ານມາ ແຕ່ປັດຈຸບັນ​ກັບ​ມາ​ກວດ​ພົບ​ອີກ ສະນັ້ນ ຈຶ່ງ​ຄວນ​ຮູ້ ແລະ ຫາ​ວິທີ​ປ້ອງກັນ​ຕັ້ງແຕ່​ຫົວທີ.

ທ່ານ ພອນ​ປະເສີດ ອຸ​ນາ​ພົມ ຫົວໜ້າ​ພະ​ແນກ​ສາທາລະນະ​ສຸກ ນະຄອນຫຼວງ​ວຽງ​ຈັນ ໄດ້​ໃຫ້​ຮູ້ວ່າ: ນອກຈາກ​ພະຍາດ​ໄຂ້ຍຸງລາຍ​ທີ່​ມັກ​ລະບາດ​ໃນ​ໄລຍະ​ລະດູຝົນ​ແລ້ວ ປີ​ນີ້​ຍັງ​ຕ້ອງ​ເຝົ້າ​ລະວັງ ແລະ ກຽມ​ໂຕ້​ຕອບ​ເພື່ອ​ບໍ່​ໃຫ້​ແຜ່ລາມ​ອອກ​ສູ່​ວົງ​ກວ້າງ​ນັ້ນ ກໍ່​ຄືພະຍາດ​ອັກເສບ​ຕັບ​ເອ ຫຼື ພະຍາດ​ໄຂ້​ເຫຼືອງ.

ຕາມ​ການ​ເກັບ​ກຳ​ສະຖິຕິ​ນັບແຕ່​ວັນ​ທີ 1 ເມສາ 2017 ຫາ 12 ມິຖຸນາ 2017 ມີ​ຜູ້​ເປັນ​ພະຍາດ​ນີ້ ທັງ​ໝົດ 82 ກໍລະນີ ເຊິ່ງ​ກວດພົບ​ຢູ່​ແຂວງ​ວຽງ​ຈັນ ແລະ ນະຄອນ​ຫຼວງ​ວຽງ​ຈັນ ໃນ​ນັ້ນຢູ່ ນວ ມີ 40 ກໍລະນີ ໃນ​ຈຳນວນ 11 ບ້ານ​ອ້ອມ​ຂ້າງ ເມືອງ​ໄຊ​ທານີ ທີ່ມີ​ເຂດ​ແດນ​ຕິດ​ກັບ​ເມືອງ​ທຸລະຄົມ ແຂວງ​ວຽງ​ຈັນ.

ພະຍາດ​ອັກເສບ​ຕັບເອ ຫຼື ພະຍາດ​ໄຂ້​ເຫຼືອງ ຖ້າ​ຫາກ​ຄົນ​ເຈັບເປັນ​ພະຍາດ​ນີ້ ຈະ​ມີ​ອາການ​ເບົາບາງ ເຊິ່ງ​ຂັ້ນ​ຕົ້ນ​ອາການ​ຂອງພະຍາດ​ນີ້ ​ຈະ​ມີ​ໄຂ້​ອິດເມື່ອຍ ບໍ່ຢາກ​ເຂົ້າ ຖອກທ້ອງ ປວດຮາກ ທ້ອງ​ເບັງ ຍ່ຽວ​ເປັນ​ສີເຫຼືອງ​ເຂັ້ມ ຜິວໜັງ​ເຫຼືອງ​ເປັນຕົ້ນ ແລະ ຖ້າພົບ​ເຫັນ​ຄົນ​ຢູ່​ໃນ​ຄອບຄົວ ແລະ ເພື່ອນ​ຮ່ວມ​ງານ​ມີ​ອາການ​ຄ້າຍຄື​ລັກສະນະ​ດັ່ງກ່າວ ​ຈົ່ງ​ຮີບ​ດ່ວນພາ​ມາ​ພົບ​ແພດ​ໝໍ​ຕາມ​ສຸກ​ສາລາ ຫຼື ໂຮງໝໍ​ທີ່​ໃກ້​ບ້ານ​ທ່ານ​ໃຫ້ໄວ​ທີ່​ສຸດ ພ້ອມ​ດຽວ​ກັນ​ນັ້ນ ຖ້າພົບ​ເຫັນ​ບຸກຄົນ​ທີ່​ເປັນ​ພະຍາດອັກເສບ​ຕັບ​ເອ ຫຼື ພະຍາດ​ໄຂ້ເຫຼືອງ ​ໃຫ້​ແຍກ​ດ່ຽວ​ຈາກ​ຄົນ​ເຈັບປະເພດ​ອື່ນ ​ຫ້າມ​ກິນ-ດື່ມ ລວມເຖິງ​ເຄື່ອງໃຊ້​ສ່ວນ​ຕົວ​ປະຈຳ​ວັນກໍ່​ບໍ່​ໃຫ້​ໃຊ້​ຮ່ວມ​ກັນ ເພາະ​ພະຍາດ​ດັ່ງກ່າວ​ ສາມາດ​ຕິດຕໍ່​ຫາຄົນ​ອື່ນ​ດ້ວຍ​ການ​ສຳຜັດ​ດ້ວຍ​ນ້ຳ ເຫຍື່ອ ສິ່ງ​ສຳຄັນ​ທີ່​ສຸດ ກໍ່​ຄືປະຕິບັດ​ໃຫ້​ຖືກ​ຕາມ​ຫຼັກ​ສຸ​ຂະ​ອະນາໄມທີ່​ແພດ​ໝໍ​ແນະນຳ​ໃຫ້​ເຂັ້ມ​ງວດ ລ້າງ​ມື​ທຸກ​ຄັ້ງ​ດ້ວຍ​ສະບູ​ພາຍຫຼັງສຳ​ພັດ​ກັບ​ຄົນ​ເຈັບ​ກ່ອນ ແລະ ຫຼັງ​ກິນ​ອາຫານ ຫຼື ເຂົ້າ​ຫ້ອງ​ນ້ຳກໍ່​ສາມາດ​ຕິດແປດ​ພະຍາດ​ດັ່ງກ່າວ​ໄດ້.

ຂ່າວທີ່ກ່ຽວຂ້ອງ