ສົກຮຽນ 2016-2017 ຈັນທະບູລີ ເສັງຈົບຊັ້ນປະຖົມໄດ້ 99,9%

127 19 ມິ.ນ. 2017 ຂ່າວໜ້າ​ໜຶ່ງ
ສົກຮຽນ 2016-2017 ຈັນທະບູລີ ເສັງຈົບຊັ້ນປະຖົມໄດ້ 99,9%

ສົກຮຽນ 2016-2017 ທົ່ວເມືອງ​ຈັນທະ​ບູ​ລີ ນະຄອນຫຼວງວຽງ​ຈັນ ມີ​ນັກຮຽນ​ເສັງ​ຈົບ​ຊັ້ນປະຖົມ​ສຶກ​ສາ (ປ5) ທັງ​ໝົດ 1.444 ຄົນ ຍິງ 738 ຄົນ ມາຈາກ 35 ໂຮງຮຽນ ໃນ​ນີ້ ພາກລັດ ຈຳນວນ 38 ແຫ່ງ ພາກ​ເອກະ​ຊົນ ຈຳນວນ 17 ແຫ່ງ ເຊິ່ງແບ່ງ​ເປັນ 4 ສູນ​ສອບເສັງ ມີ 58 ຫ້ອງ ເສັງ​ໃນ 4 ວິຊາຄື: ວິຊາຫັດ​ແຕ່ງ ຂຽນ​ທວາຍ-ຄຳ​ຖາມ ຄະນິດສາດ ແລະ ໂລກ​ອ້ອມ​ຕົວ.

ວັນ​ທີ 16 ມິຖຸນາ 2017 ຫ້ອງການ​ສຶກ​ສາ​ທິ​ການ ແລະ ກີລາ ເມືອງ​ຈັນທະ​ບູ​ລີ ຈັດ​ພິທີ​ປິດ​ສະຫຼຸບ​ການ​ສອບເສັງ​ຈົບ​ຊັ້ນ​ປະຖົມສຶກ​ສາ ປ5 ທົ່ວ​ເມືອງ​ຈັນທະ​ບູ​ລີ ປະຈຳ​ສົກຮຽນ 2016-2017 ທີ່ໂຮງຮຽນ​ມັດທະຍົມ​ຕອນ​ຕົ້ນຈອມ​ຄຳ.

ຜ່ານ​ການ​ສອບເສັງ​ນັກຮຽນ ສາມາດ​ຍາດ​ໄດ້​ຄະແນນ​ດີເດັ່ນທຸກ​ວິຊາ ໄດ້​ຄະແນນ 9 ຂຶ້ນ​ໄປ ຈຳນວນ 9 ຄົນ ຍິງ 6 ຄົນ ຄະແນນ 7 ຂຶ້ນ​ໄປ ມີ 263 ຄົນ ຍິງ 148 ຄົນ ຄະແນນ 5 ຂຶ້ນ​ໄປ​ມີ 979 ຄົນ ຍິງ 571 ຄົນ ເສັງ​ໄດ້ອະນຸໂລມ 463 ຄົນ ຍິງ 148 ຄົນ ເສັງ​ບໍ່​ຜ່ານ​ຈຳນວນ 2 ຄົນ ເທົ່າກັບ 99,9% ທຽບໃສ່​ສົກຮຽນຜ່ານ​ມາ ລື່ນ 0,21% ນອກຈາກນີ້ ພາຍ​ໃນ​ພິທີ​ຍັງ​ໄດ້​ມອບ​ປະ​ກາສະ​ນິ​ຍະ​ບັດ ແລະ ໃບ​ຍ້ອງຍໍ​ໃຫ້ແກ່​ໂຮງຮຽນ​ທີ່​ມີ​ນັກຮຽນ​ເສັງ​ໄດ້ສົມບູນ 65%-89% ຂຶ້ນ​ໄປ ອຳນວຍ​ການ​ໂຮງຮຽນ​ທີ່​ມີ​ນັກຮຽນເກ່ງ​ຮອບດ້ານ 10% ຂຶ້ນ​ໄປ ຄູ-ອາຈານ​ທີ່​ສອນ​ດີ​ສອນ​ເກ່ງ ແລະ ນັກຮຽນ​ທີ່​ຮຽນ​ດີ-ຮຽນ​ເກ່ງ​ແຕ່ລະ​ປະເພດ​ອີກ​ດ້ວຍ.

ຂ່າວທີ່ກ່ຽວຂ້ອງ