ຫົກ​ປະ­ເທດ​ໃນ G7 ເຫັນ​ດີ​ຊຸກ­ຍູ້​ສັນ­ຍາ​ປາ​ຣີ ໂດຍ​ປາ­ສະ­ຈາກ ສ. ອາ​ເມ​ຣິ​ກາ

121 14 ມິ.ນ. 2017 ຂ່າວຕ່າງປະເທດ
ຫົກ​ປະ­ເທດ​ໃນ G7 ເຫັນ​ດີ​ຊຸກ­ຍູ້​ສັນ­ຍາ​ປາ​ຣີ ໂດຍ​ປາ­ສະ­ຈາກ ສ. ອາ​ເມ​ຣິ​ກາ

ການ​ຕົກ­ລົງ​ຂອງ ສ.ອາ​ເມ​ຣິ​ກາ ໃນ​ການ​ຖອນ​ອອກ​ຈາກ​ສັນ­ຍາປາ​ຣີ ​ວ່າ​ດ້ວຍ​ການ​ຕ້ານ​ການ​ປ່ຽນແປງ​ສະ­ພາບ​ດິນ​ຟ້າ​ອາ­ກາດ ໄດ້ເຮັດ​ໃຫ້ເກີດ​ການ​ແຕກ​ແຍກ​ລະ­ຫວ່າງ ສ.ອາ​ເມ​ຣິ​ກາ ກັບ​ບັນ­ດາ​ຄູ່​ຮ່ວມ​ມື​ຂອງ ສ.ອາ​ເມ​ຣິ​ກາ ຢູ່​ໃນ​ການ​ເຮັດ​ວຽກ​ມື້​ທຳ​ອິດ​ຂອງ​ກອງປະ­ຊຸມ​ລັດ­ຖະ­ມົນ­ຕີ​ສິ່ງ­ແວ­ດລ້ອມ ກຸ່ມ​ປະ­ເທດ​ອຸດ­ສາ­ຫະ­ກຳ​ພັດ​ທະນາ​ຊັ້ນ​ນຳ​ຂອງ​ໂລກ (G7: ອັງ­ກິດ ກາ​ນາ​ດາ ຝຣັ່ງ ເຢຍ​ລະ​ມັນ ອີ​ຕາ​ລີ ຍີ່­ປຸ່ນ ແລະ ສ.ອາ​ເມ​ຣິ​ກາ) ຊຶ່ງ​ມີ​ຂຶ້ນ​ໃນ​ວັນ​ທີ 11-12 ມິ­ຖຸ­ນາ​ນີ້ ທີ່​ນະ­ຄອນ​ໂບ​ລອກ​ນາ (ພາກ​ເໜືອ​ອີ​ຕາ​ລີ) ເຖິງ​ຢ່າງ­ໃດ​ກໍ​ຕາມ ໃນ​ຕອນ​ທ້າຍ​ຂອງ​ກອງປະ­ຊຸມ 6 ປະ­ເທດ​ທີ່​ຍັງ​ເຫຼືອ​ຂອງ G7 ຕ່າງ​ກໍ​ໄດ້​ເຫັນດີ​ເປັນ​ເອ­ກະ­ສັນ​ກັນ ໃນ​ການ​ຊຸກ­ຍູ້ຄວາມ​ພະ­ຍາ­ຍາມ​ຕ້ານ​ກັບ​ການປ່ຽນ­ແປງ​ສະ­ພາບດິນ​ຟ້າ​ອາ­ກາດ ໂດຍ​ບໍ່​ຈຳ­ເປັນ​ຕ້ອງ​ມີ ສ. ອາ​ເມ​ຣິກາ ຮ່ວມ​ນຳ.

ທ່ານ ຊານ ລູ​ກາ ກາ​ລ​ເລັດ​ຕີ ລັດ­ຖະ­ມົນ­ຕີ​ສິ່ງ­ແວ­ດລ້ອມ​ຂອງອີ​ຕາ​ລີ ຊຶ່ງ​ເປັນ​ປະ­ເທດ​ທີ່​ເປັນ​ປະທານ​ໝູ­ນວຽນ​ຂອງ G7 ໃນ​ປີ​ນີ້ ເວົ້າ​ວ່າ ຄວາມ​ແຕກ​ຕ່າງ​ລະ­ຫວ່າງ ສ.ອາ​ເມ​ຣິ​ກາ ກັບ​ບັນ­ດາ​ປະ­ເທດທີ່​ຍັງ​ເຫຼືອ​ຢູ່​ໃນ G7 ກ່ຽວ​ກັບ​ສັນ­ຍາປາ​ຣີ​ ຍັງ​ຄົງ​ມີ​ຢູ່ ແລະ ຍາກ​ທີ່​ທ່າອຽງ​ນີ້​ຈະຕ່າວ​ປີ້ນ​ໄດ້.

ຖະ­ແຫຼງ­ການ​ສະ­ບັບ​ໜຶ່ງ​ທີ່​ມີອອກ​ມາ​ຈາກ​ກອງ​ປະ­ຊຸມ​ດັ່ງ­ກ່າວ ເມື່ອ​ວັນ​ທີ 12 ມິ­ຖຸ­ນາ​ນັ້ນ ອີ​ຕາ​ລີ ໃຫ້​ຮູ້​ວ່າ ສ.ອາ​ເມ​ຣິ​ກາ ໄດ້​ປະ­ຕິເສດ​ລົງນາມ​ໃນ​ຖະ­ແຫຼງ­ການຮ່ວມ​ຂອງ G7 ກ່ຽວ​ກັບ​ບັນ­ຫາ​ການ​ປ່ຽນ­ແປງ​ສະ­ພາບ​ດິນ​ຟ້າ​ອາ­ກາດ ກໍ​ຄື​ແຜນ­ການ​ອື່ນໆ​ເພື່ອ​ຊ່ວຍ­ເຫຼືອ​ທາງ​ດ້ານການ​ເງິນ​ໃຫ້​ແກ່​ການ​ພັດ­ທະ­ນາ​ແບບ​ຍືນ​ຍົງ.

ສັນ­ຍາ​ປາ​ຣີ ວ່າ​ດ້ວຍ​ການ​ຕ້ານການ​ປ່ຽນ­ແປງ​ສະ­ພາບ​ດິນ​ຟ້າ​ອາ­ກາດ ເປັນ​ຂໍ້​ຕົກ­ລົງ​ທົ່ວ​ໂລກ​ສະ­ບັບ​ທຳ​ອິດ ​ກ່ຽວ​ກັບ​ດິນ​ຟ້າ​ອາ­ກາດ ໄດ້ຮັບການ​ລົງ​ນາມ​ຈາກ 195 ປະ­ເທດ ແລະ ມີ​ຜົນ​ບັງ­ຄັບ​ໃຊ້​ນັບ​ແຕ່​ເດືອນພະ­ຈິກ ປີ 2016 ເປັນ­ຕົ້ນ​ມາ ໂດຍ​ມີຄຳ​ສັນ­ຍາ​ອັນ​ແຮງ​ກ້າ​ກ່ຽວ​ກັບການຫຼຸດ​ປະ­ລິ­ມານ​ການ​ປ່ອຍ​ແກ​ັສ CO2 ເພື່ອ​ຄວບ​ຄຸມ​ລະ­ດັບ​ເພີ່ມ​ຂຶ້ນ​ຂອງ​ອຸນ­ຫະ­ພູມ​ທົ່ວ​ໂລກ.

ປັດ­ຈຸ­ບັນ​ນີ້ ສ.ອາ​ເມ​ຣິ​ກາ ເປັນ​ປະ­ເທດ​ທີ່​ມີ​ປະ­ລິ­ມານ​ການ​ປ່ອຍ​ແກ​ັສ​ທີ່​ກໍ່­ໃຫ້­ເກີດ​ປາ­ກົດ­ການ​ເຮືອນ​ແກ້ວ​ລາຍ​ໃຫຍ່ອັນ​ດັບ​ທີ 2 ຂອງ​ໂລກ ໂດຍ​ເປັນ​ຮອງ​ຈາກ​ຈີນ ສັນ­ຍາ​ປາ​ຣີ ລະ­ບຸ​ວ່າ ສ.ອາ​ເມ​ຣິ​ກາ ວາງ​ຄາດ­ໝາຍ​ຮອດ​ປີ 2025 ຈະ​ຕັດ​ຫຼຸດ​ປະ­ລິ­ມານ​ການ​ປ່ອຍ​ແກ​ັ​ສລົງ 26-28% ເມື່ອ​ທຽບ­ໃສ່​ປີ 2005.

ຂ່າວທີ່ກ່ຽວຂ້ອງ