ແກ້ໄຂຄະດີ 2 ຈຸດ ຢຶດຢາບ້າໄດ້ຫຼາຍຮ້ອຍເມັດ

131 14 ມິ.ນ. 2017 ຂ່າວໜ້າ​ໜຶ່ງ

ໃນ​ວັນ​ທີ 12 ພຶດສະພາ 2017 ເຈົ້າ​ໜ້າທີ່​ໜ່ວຍ​ງານ​ສະກັດ​ກັ້ນ ແລະ ຕ້ານ​ຢາ​ເສບ​ຕິດ ​ປກສ ເມືອງ​ສີ​ໂຄດ​ຕະບອງ ນະຄອນຫຼວງ​ວຽງ​ຈັນ ໄດ້​ລົງ​ແກ້​ໄຂ​ຈຸດ​ຄ້າຂາຍ​ຢາ​ເສບ​ຕິດ​ຢູ່​ເຂດ​ບ້ານ​ຈັນສະຫວ່າງ ສາມາດ​ກັກ​ຕົວ ທ້າວ ປີ​ເຕີ ອາຍຸ 20 ປີ ຢູ່​ບ້ານ​ຈັນ​ສະຫວ່າງ ເມືອງ​ສີ​ໂຄດ​ຕະບອງ ພ້ອມ​ຢາ​ບ້າ ຈຳນວນ 400 ເມັດ.

ຜ່ານ​ການ​ສອບ​ສວນທ້າວ ປີ​ເຕີ ຮັບ​ສາລະພາບ​ວ່າ: ຕົນ​ເອງເລີ່ມ​ເສບ​ຢາ​ບ້າມາ​ແຕ່​ປີ 2015 ເສບ​ຄັ້ງ​ລະ 4-5 ເມັດ ເຊິ່ງ​ຢາ​ບ້າທີ່​ນຳ​ມາ​ເສບ​ແມ່ນ​ຊື້​ນຳ​ໄວ​ລຸ້ນ​ຢູ່ພາຍ​ໃນ​ບ້ານ​ດຽວ​ກັນ ຜ່ານ​ມາເຄີຍ​ຊື້​ຈຳນວນ​ຫຼາຍ​ຄັ້ງ ແລະ ຄັ້ງຫຼ້າ​ສຸດ​ໄດ້​ໄປ​ຊື້​ຢາ​ບ້າ​ນຳ​ຜູ້​ເກົ່າ ຈຳນວນ 400 ເມັດ ແຕ່​ກໍ່​ຖືກ​ເຈົ້າໜ້າທີ່​ຈັບ​ຕົວ​ໄດ້​ກ່ອນ.

ໃນ​ວັນ​ທີ 16 ພຶດສະພາ 2017 ເຈົ້າ​ໜ້າທີ່​ໜ່ວຍ​ງານ​ສະກັດ​ກັ້ນ ແລະ ຕ້ານ​ຢາ​ເສບ​ຕິດ ​ປກສ ເມືອງ​ສີ​ໂຄດ​ຕະບອງ ໄດ້​ລົງ​ແກ້ໄຂ​ເປົ້າ​ໝາຍ​ຄ້າຂາຍ​ຢາ​ບ້າ​ຢູ່​ເຂດ​ບ້ານ​ໂນນ​ຂີ້ເຫຼັກ ສາມາດ​ກັກ​ຕົວທ້າວ ຊຽງ​ລົບ ອາຍຸ 53 ປີ ກຳມະກອນ​ຢູ່​ບ້ານ​ໂນນ​ຂີ້ເຫຼັກ ເມືອງສີ​ໂຄດ​ຕະບອງ ນະຄອນຫຼວງວຽງ​ຈັນ ພ້ອມ​ຢາ​ບ້າ ຈຳນວນ 187 ເມັດ.

ຈາກ​ການ​ສອບ​ສວນ ທ້າວ ຊຽງ​ລົບ ຮັບ​ສາລະພາບ​ວ່າ: ໄດ້ເລີ່ມ​ສູບ​ຝິ່ນ​ຢູ່​ບ້ານ​ເກີດ​ທີ່ແຂວງຫຼວງ​ພະ​ບາງ ແຕ່​ອາຍຸ 13 ປີ ພາຍຫຼັງ​ຍ້າຍ​ມາ​ຢູ່​ນະຄອນຫຼວງວຽງ​ຈັນ ໃນ​ປີ 2015 ກໍ່​ເລີ່ມ​ເສບຢາ​ບ້າມື້​ລະ 5 ເມັດ ຢາ​ບ້າ​ທີ່​ນຳມາ​ເສບແມ່ນ​ຊື້​ນຳ​ໄວ​ລຸ້ນຢູ່​ຫຼັງຕະຫຼາດ​ສີ​ໄຄ ຊື້​ຄັ້ງ​ລະ 50-200 ເມັດ ແລ້ວ​ນຳ​ມາ​ເສບ ແລະ ຂາຍ​ພ້ອມ ມາ​ຮອດ​ວັນ​ທີ 14 ພຶດສະພາ 2017 ໄດ້​ໄປ​ຊື້​ຢາ​ບ້າ​ຢູ່ບ່ອນ​ເກົ່າ ຈຳນວນ 1 ຖົງ ເທົ່າ​ກັບ 200 ເມັດ ແລະ ມາ​ຮອດ​ວັນ​ທີ 16 ພຶດສະພາ ກໍ່​ຖືກ​ເຈົ້າ​ໜ້າທີ່ກັກ​ຕົວ​ໄປ​ດຳເນີນ​ຄະດີ.

ຂ່າວທີ່ກ່ຽວຂ້ອງ