ເລີ່ມ​ແລ້ວ! ຄຸມ​ເຂັ້ມ​ການ​ຈັດ​ເກັບ​ລາຍ​ຮັບ - ໂດຍ: ທິດ​ດີ

413 24 ພ.ພ. 2017 ນານາສາລະ

 

ຫຼາຍ​ປີ­ຜ່ານ­ມາ ເຮົາ​ມັກ­ໄດ້​ຍິນ​ຂ່າວ​ກ່ຽວ​ກັບ​ການ​ເກັບ​ລາຍ​ຮັບ​ບໍ່​ໄດ້​ຕາມ​ແຜນ­ທີ່​ສະ­ພາ​ແຫ່ງ​ຊາດ​ໃຫ້­ການ​ຮັບ­ຮອງ ບໍ່​ທໍ່​ນັ້ນ ຍັງ​ມີ​ຂ່າວ​ການ​ຮົ່ວ​ໄຫຼ​ຂອງ​ການ​ຈັດ​ເກັບ​ລາຍ​ຮັບ.

ເພື່ອ​ເປັນ​ການ​ອັດ​ຊ່ອງ​ຮົ່ວ​ໄຫຼ​ທັງ­ຫຼາຍ​ນັ້ນ ພາກ­ສ່ວນ​ກະ­ຊວງ​ການ​ເງິນ​ໄດ້​ວາງ​ມາດ​ຕະ­ການ​ອອກ​ຫຼາຍ​ຢ່າງ ເຊິ່ງ​ໃນ​ນັ້ນ​ມີ​ການ​ແຕ່ງ­ຕັ້ງຄະ­ນະ​ສະ­ເພາະ​ກິດ​ຂຶ້ນ ໂດຍ​ເລີ່ມ​ທົດ​ລອງ​ຈາກ​ນະ­ຄອນ­ຫຼວງ​ວຽງ​ຈັນ.

ອີງ​ຕາມ​ແຫຼ່ງ​ຂ່າວ​ຈາກ ຂປລ ໃຫ້​ຮູ້​ວ່າ: ເພື່ອ​ບັນ­ລຸ​ເປົ້າ​ໝາຍ​ແຜນ​ການ­ຈັດ­ຕັ້ງ​ປະ­ຕິ­ບັດ​ແຜນ​ງົບ­ປະ­ມານ ປະ­ຈຳ​ປີ 2017 ຂອງ​ພະ­ແນກ­ການ​ເງິນ​ນະ­ຄອນ­ຫຼວງ​ວຽງ​ຈັນ 1.100,71 ຕື້​ກີບ ແລະ ລາຍ​ຈ່າຍ 639,39 ຕື້​ກີບ ທ່ານ​ຮອງ​ນາ­ຍົກ­ລັດ­ຖະ­ມົນ­ຕີ ລັດ­ຖະ­ມົນ­ຕີ​ກະ­ຊວງ​ການ​ເງິນ ໄດ້​ອອກ​ຂໍ້​ຕົກ­ລົງ​ສະ­ບັບ​ເລກ​ທີ 0887/ກງ ລົງ​ວັນ​ທີ 28 ມີ­ນາ 2017 ວ່າ​ດ້ວຍ​ການ​ແຕ່ງ­ຕັ້ງ​ຄະ­ນະ​ສະ­ເພາະ​ກິດ​ຕິດ­ຕາມ​ກວດ­ກາ​ການ­ຈັດ­ຕັ້ງ​ປະ­ຕິ­ບັດ​ກົດ­ໝາຍ ແລະ ລະ­ບຽບ​ການ​ສ່ວຍ​ສາ​ອາ­ກອນ​ໃນ​ຂອບ​ເຂດ​ທົ່ວ​ປະ­ເທດ 9 ຄົນ ທີ່​ມາ​ຈາກ​ຫຼາຍ​ພາກ­ສ່ວນ ສະ­ເພາະ​ຢູ່​ນະ­ຄອນ­ຫຼວງ​ວຽງ​ຈັນ (ນວ) ໄດ້​ເລີ່ມ​ຈັດ​ຕັ້ງ​ປະ­ຕິ­ບັດ​ແລ້ວ ພ້ອມ​ທັງ​ສັ່ງ​ເຂັ້ມ​ງວດ​ກວດ​ເຂັ້ມ​ໃນ​ການ​ຕິດ­ຕາມ ໂດຍ​ເລັ່ງ​ໃສ່​ເປົ້າ​ໝາຍ​ພະ​ແນກ​ສ່ວຍ​ສາ​ອາ­ກອນ ຫົວ­ໜ່ວຍ​ທຸ­ລະ​ກິດ​ຈຳ­ນວນ​ໜຶ່ງ​ທີ່​ນຳ​ເຂົ້າ​ນ້ຳ­ມັນ​ເຊື້ອ​ໄຟ ພາ­ຫະ­ນະ ແລະ ອື່ນໆ.

ກອງ​ປະ­ຊຸມ​ກ່ຽວ​ກັບ​ວຽກ​ງານ​ຕິດ­ຕາມ​ກວດ­ກາ ຢູ່ ນວ ຈັດ​ຂຶ້ນ​ວັນ​ທີ 11 ພຶດ­ສະ­ພາ 2017 ທີ່​ພະ­ແນກ­ການ​ເງິນ ນວ ໂດຍ​ເປັນ​ປະ­ທານ​ຂອງ​ທ່ານ ໂພ​ໄຊ ໝັ້ນ​ພິ­ລາ​ວັນ ຜູ້​ຊ່ວຍ​ລັດ­ຖະ­ມົນ­ຕີ​ກະ­ຊວງ​ການ​ເງິນ ຫົວ­ໜ້າ​ຄະ­ນະ​ສະ­ເພາະ​ກິດ​ຕິດ­ຕາມ​ກວດ­ກາ​ຈັດ​ຕັ້ງ​ປະ­ຕິ­ບັດ​ກົດ­ໝາຍ ແລະ ລະ­ບຽບ​ການ​ສ່ວຍ​ສາ​ອາ­ກອນ ນວ ບັນ­ດາ​ພະ­ແນກ­ການ ແລະ ພາກ­ສ່ວນ​ທີ່​ກ່ຽວ­ຂ້ອງ​ເຂົ້າ​ຮ່ວມ.

ທ່ານ ກໍ​ລະ​ກັນ ສິງ​ອຸ­ດົມ ຮອງ​ຫົວ­ໜ້າ​ກົມ​ຈັດ​ຕັ້ງ ຄະ­ນະ​ກວດ­ກາ​ສູນ​ກາງ​ພັກ ຮອງ​ຫົວ­ໜ້າ​ຄະ­ນະ​ສະ­ເພາະ​ກິດ​ຕິດ­ຕາມ​ກວດ­ກາ​ຈັດ​ຕັ້ງ​ປະ­ຕິ­ບັດ​ກົດ­ໝາຍ ແລະ ລະ­ບຽບ​ການ​ສ່ວຍ​ສາ​ອາ­ກອນ​ໃນ​ຂອບ​ເຂດ​ທົ່ວ​ປະ­ເທດ ກ່າວ​ວ່າ: ການ​ປະ­ຕິ­ບັດ​ວຽກ​ງານ​ຂອງ​ຄະ­ນະ​ສະ­ເພາະ​ກິດ ຢູ່ ນວ ມີ​ກຳ­ນົດ 1 ເດືອນ ນັບ​ແຕ່​ວັນ​ທີ 24 ເມ­ສາ 2017 ຫາ 24 ພຶດ­ສະ­ພາ 2017 ໂດຍ​ເລັ່ງ​ໃສ່​ພະ​ແນກ​ສ່ວຍ​ສາ​ອາ­ກອນ ນວ ຄື: ຫ້ອງ­ການ​ຄຸ້ມ​ຄອງ​ເກັບ​ລາຍ​ຮັບ ຫ້ອງ­ການ​ກວດ­ກາ​ບັນ­ຊີ​ວິ​ສາ​ຫະ​ກິດ ຫ້ອງ­ການ​ຄຸ້ມ​ຄອງ​ໃບ​ເກັບ​ເງິນ ແລະ ສິ່ງ​ພິມ ຫ້ອງ­ການ​ອາ­ກອນ​ກຳ­ໄລ ແລະ ຄ່າ​ທຳ­ນຽມ ບັນ­ດາ​ຫົວ­ໜ່ວຍ​ທຸ­ລະ​ກິດ​ຈຳ­ນວນ​ໜຶ່ງ​ທີ່​ນຳ​ເຂົ້າ ແລະ ຈຳ­ໜ່າຍ​ນ້ຳ­ມັນ​ເຊື້ອ​ໄຟ ພາ­ຫະ­ນະ ແລະ ອື່ນໆ ຈຸດ­ປະ­ສົງ​ການ​ແຕ່ງ­ຕັ້ງ​ຄະ­ນະ​ສະ­ເພາະ​ກິດ ເພື່ອ​ຕິດ­ຕາມ​ກວດ­ກາ​ການ­ເຄື່ອນ­ໄຫວ​ຂອງ​ພະ­ນັກ­ງານ ເຈົ້າ​ໜ້າ­ທີ່​ສ່ວຍ​ສາ​ອາ­ກອນ​ໃນ​ການ­ຈັດ­ຕັ້ງ​ປະ­ຕິ­ບັດ​ກົດ­ໝາຍ ລະ­ບຽບ​ການ ແລະ ນິ­ຕິ​ກຳ​ອື່ນໆ ທີ່​ຕິດ​ພັນ​ກັບ​ວຽກ​ງານ​ສ່ວຍ​ສາ​ອາ­ກອນ ເກັບ​ກຳ​ຊອກ​ຮູ້​ຂໍ້​ມູນ​ສະ­ພາບ​ການ​ທີ່​ເປັນ​ຫາງ​ສຽງ​ປາ­ກົດ­ການ​ຫຍໍ້­ທໍ້ ທີ່​ຕິດ​ພັນ​ພະ­ນັກ­ງານ-ຜູ້​ປະ­ກອບ​ການ​ທຸ­ລະ​ກິດ.

ທ່ານ​ຮອງ​ຫົວ­ໜ້າ​ຄະ­ນະ​ສະ­ເພາະ​ກິດ ກ່າວ​ຕື່ມ​ວ່າ: ຕິດ­ຕາມ​ກວດ­ກາ​ໃນ​ການ­ຈັດ­ຕັ້ງ​ປະ­ຕິ­ບັດ​ກົດ­ໝາຍ ແລະ ລະ­ບຽບ​ການ​ສ່ວຍ​ສາ​ອາ­ກອນ ປະ­ສານ​ສົມ­ທົບ​ກັບ​ບັນ­ດາ​ກະ­ຊວງ ຂະ­ແໜງ­ການ​ທີ່​ກ່ຽວ­ຂ້ອງ ເປັນ­ຕົ້ນ ກະ­ຊວງ​ອຸດ­ສາ­ຫະ­ກຳ ແລະ ການ​ຄ້າ ກະ­ຊວງ​ແຜນ­ການ ແລະ ການ​ລົງ­ທຶນ (ສູນ​ສະ­ຖິ­ຕິ​ແຫ່ງ​ຊາດ) ກົມ​ສ່ວຍ​ສາ​ອາ­ກອນ ແລະ ພາກ­ສ່ວນ​ອື່ນໆ​ກ່ຽວ​ກັບ​ການ​ຄຸ້ມ​ຄອງ ແລະ ຊຸກ­ຍູ້​ໃຫ້​ບັນ­ດາ​ຫົວ­ໜ່ວຍ​ທຸ­ລະ​ກິດ​ໃນ​ການ​ນຳ​ໃຊ້​ໃບ​ເກັບ​ເງິນ​ອາ­ກອນ​ຖື​ບັນ­ຊີ​ຢ່າງ​ຖືກ­ຕ້ອງ ແລະ ປະ­ຕິ­ບັດ​ລະ­ບົບ​ອາ­ກອນ​ມູນ​ຄ່າ​ເພີ່ມ ເພື່ອ​ໃຫ້​ແຜນ​ການ­ຈັດ­ຕັ້ງ​ປະ­ຕິ­ບັດ​ເກັບ​ລາຍ​ຮັບ​ເຂົ້າ​ງົບ­ປະ­ມານ​ປີ 2017 ນວ ຕ້ອງ​ບັນ­ລຸ 100%.

ລໍ​ຟັງ​ເບິ່ງ​ວ່າ ຈາກ​ມາດ​ຕະ­ການ​ນີ້ ການ​ເກັບ​ລາຍ​ຮັບ​ຈະ​ເປັນ​ຢ່າງ­ໃດ​ນໍ?.

ຂ່າວທີ່ກ່ຽວຂ້ອງ