ຍທຂ ແກ້ບັນຫາແຕ່ຫົວທີ ບໍ່ໃຫ້ມີນ້ຳຖ້ວມຂັງໃນລະດູຝົນ

537 21 ມ.ສ. 2017 ຂ່າວໜ້າ​ໜຶ່ງ
ຍທຂ ແກ້ບັນຫາແຕ່ຫົວທີ ບໍ່ໃຫ້ມີນ້ຳຖ້ວມຂັງໃນລະດູຝົນ

ປັດຈຸບັນ ກ້າວ​ເຂົ້າ​ສູ່​ລະດູຝົນ ເພື່ອ​ແກ້​ໄຂ​ບັນຫາ​ແຕ່​ຫົວທີ​ເຮັດໃຫ້​ນ້ຳ​ໄຫຼ​ສະດວກ​ສະບາຍ ບໍ່​ໃຫ້ມີ​ນ້ຳ​ຖ້ວມ​ຂັງ ສ້າງ​ຄວາມ​ເສຍຫາຍ​ໃຫ້​ແກ່​ພໍ່​ແມ່​ປະຊາຊົນ ​ທີ່​ດຳລົງ​ຊີວິດ​ໃນ​ນະຄອນຫຼວງ​ວຽງ​ຈັນນັ້ນ ອົງ​ການຈັດຕັ້ງ ແລະ ພະແນກ​ການ​ທີ່​ກ່ຽວຂ້ອງ ໂດຍ​ສະເພາະແມ່ນ​ອົງການ​ໄຈ​ກາ ແລະ ພະ​ແນກ​ໂຍທາ​ທິ​ການ ແລະ ຂົນສົ່ງ ນະຄອນຫຼວງ​ວຽງ​ຈັນ ໄດ້ເອົາໃຈໃສ່​ລວງ​ຄອງເໝືອງ ແລະ ຕິດຕາມ​ກວດກາ​ການ​ຖົມ​ດິນ​ທີ່​ບໍ່ຖືກຕ້ອງ​ຕາມ​ກົດໝາຍ​ວ່າ​ດ້ວຍຜັງເມືອງ ແລະ ລະບຽບ​ຜັງເມືອງຂອງ​ການ​ພັດທະນາ​ນະຄອນຫຼວງ​ວຽງ​ຈັນ ຕາມ​ພາລະ​ບົດບາດ ຂອບ​ເຂດ​ສິດ ແລະ ໜ້າທີ່​ຄວາມ​ຮັບຜິດຊອບ​ຂອງ​ຕົນ ເຊິ່ງ​ຜ່ານ​ມາ​ໄດ້​ຕິດຕາມ​ກວດກາການ​ຖົມ​ດິນ​ຂອງ​ຜູ້​ປະກອບ​ການ ແລະ ຫົວໜ່ວຍ​ທຸລະ​ກິດຕາມທາງ​ຫຼວງ​ແຫ່ງ​ຊາດ ເລກ​ທີ 11 ຕອນ​ເໜືອ ລະຫວ່າງ​ເມືອງ​ສີໂຄດ​ຕະບອງຫາເມືອງ​ສັງ​ທອງ ບຶງ​ທາດຫຼວງ ຢູ່​ດົງ​ຄຳ​ຊ້າງ ເມືອງ​ຫາດ​ຊາຍ​ຟອງ ນະຄອນຫຼວງ​ວຽງ​ຈັນ.

ທ່ານ ບຸນ​ຈັນ ແກ້ວ​ສີ​ທຳ​ມະ ຮອງ​ຫົວໜ້າ​ພະ​ແນກ​ໂຍທາ​ທິການ ແລະ ຂົນສົ່ງ ນະຄອນຫຼວງວຽງ​ຈັນ ໄດ້​ໃຫ້​​​ຮູ້​​ວ່າ: ການ​ຖົມດິນເພື່ອ​ພັດທະນາ​ນະຄອນຫຼວງວຽງ​ຈັນນັ້ນ​ແມ່ນ​ພັດທະນາ​ໄດ້ ແຕ່​ຕ້ອງ​ນອນ​ໃນ​ຂອບ​ເຂດ​ຂອງຕົນ​ເອງ​ທີ່​ພັກ-ລັດຖະບານ ແລະ ກົດໝາຍ​ກຳນົດ​ໃຫ້ຄື: ການຖົມ​ບຶງ​ທີ່​ເປັນ​ບ່ອນ​ກັກ​ເກັບ​ນ້ຳ ໂດຍ​ສະເພາະບຶງ​ທາດຫຼວງ​ທີ່ເປັນ​ບຶງ​ໃຫຍ່ ຕາມ​ກົດ​ລະບຽບຂອງ​ຜັງເມືອງ ກົດໝາຍ​ວ່າ​ດ້ວຍສິ່ງແວດລ້ອມ ກົດໝາຍ​ວ່າ​ດ້ວຍຊັບພະຍາກອນ​ແຫຼ່ງ​ນ້ຳ ແລະ ຂໍ້ຕົກລົງ​ຂອງ​ເຈົ້າ​ຄອງ​ນະຄອນຫຼວງ​ວຽງ​ຈັນ ແຕ່​ລະ​ບຶງ​ໜອງ​ຈະມີ​ເຂດ​ສະຫງວນ​ເພື່ອ​ຮັກສາ​ໄວ້ ເຊິ່ງ​ມີ​ເຂດ​ສະຫງວນ​ແມ່ນ​ຈາກຈຸດ​ໃຈກາງ​ຮ່ອງ​ແມ່​ບຶງ​ທາດຫຼວງ​ ມີ​ໄລຍະ​ເບື້ອງ​ລະ 250 ແມັດ ຈຶ່ງ​ສາມາດ​ຖົມ ແລະ ປຸກ​ສ້າງ​ໄດ້ສ່ວນ​ການ​ຖົມ​ດິນ ເລາະ​ລຽບ​ຕາມ​ເສັ້ນທາງ​ຫຼວງແຫ່ງ​ຊາດ ຕາມ​ລະບຽບ​ການ​ທີ່ກຳນົດ​ໃຫ້​ ແມ່ນ​ມີ​ໄລຍະ​ຫ່າງຈາກ​ຈຸດ​ໃຈກາງ​ທາງ​ຫຼວງ​ແຫ່ງຊາດ ​ອອກ​ໄປ​ເບື້ອງ​ລະ 25 ແມັດ ແລະ ຫ່າງ​ຈາກ​ທາງ​ສະຫງວນອີກ 4 ແມັດ ຈຶ່ງ​ສາມາດ​ປຸກສ້າງ​ໄດ້ ປັດຈຸບັນ ເຫັນ​ຫຼາຍ​ຈຸດທີ່​ຍັງ​ບໍ່​ຖືກຕ້ອງ​ຕາມ​ລະບຽບການ ໃນຕໍ່ໜ້າ​ເມື່ອ​ມີ​ການ​ພັດທະ​ນາ ໂດຍ​ສະເພາະແມ່ນ​ການຂະຫຍາຍ​ເສັ້ນທາງ​ອອກ ເພື່ອເຮັດ​ໃຫ້ການ​ຈະລາຈອນ​ມີຄວາມ​ສະດວກ​ສະບາຍ ແມ່ນ​ຈະບໍ່​ມີ​ການ​ຈ່າຍ​ຄ່າ​ຊົດ​ເຊີຍ​ໃດໆ ສະນັ້ນ ຂໍ​ຮຽກຮ້ອງ​ມາ​ຍັງ​ບຸກຄົນ ນິຕິບຸກຄົນ ຕະຫຼອດ​ຮອດ​ຜູ້​ປະກອບ​ການ​ທຸກ​ທົ່ວ​ໜ້າ ​ໃຫ້​ເອົາໃຈໃສ່​ປະຕິບັດ​ລະບຽບ​ກົດໝາຍ ທັງນີ້ ເພື່ອ​ປົກ​ປ້ອງ​ຜົນ​ເສຍ​ຫາຍ​ທີ່ຈະ​ເກີດ​ຂຶ້ນ​ຕາມ​ມາ ສຳລັບ​ມາດຕະການ​ຕໍ່​ຜູ້​ລະເມີດ​ ແມ່ນ​ຈະ​ຕ້ອງໄດ້​ເອີ້ນ​ຜູ້​ປະກອບ​ການ​ມາ​ອະທິບາຍ​ຊີ້​ແຈງ​ກ່ຽວ​ກັບ​ຂໍ້​ຕົກລົງ ແລະ ລະບຽບ​ກົດໝາຍ​ຕ່າງໆ ເພື່ອ​ໃຫ້​ມີ​ຄວາມ​ເຂົ້າໃຈ ພ້ອມ​ທັງແນະນຳ​ຮື້​ຖອນ​ອອກ​ໃຫ້​ທັນ​ກຳນົດ​ເວລາ ຖ້າ​ບໍ່​ປະຕິບັດ​ຈະ​ຖືກ​ດຳເນີນ​ຕາມ​ຂະ​ບວນ​ການ​ຍຸຕິ​ທຳ.

ຂ່າວທີ່ກ່ຽວຂ້ອງ