ສ ເກົາຫຼີ ສະໜັບສະໜູນກິດຈະກຳຮຽນຮູ້ນອກຫ້ອງຮຽນ

515 20 ມ.ສ. 2017 ຂ່າວໜ້າ​ໜຶ່ງ
ສ ເກົາຫຼີ ສະໜັບສະໜູນກິດຈະກຳຮຽນຮູ້ນອກຫ້ອງຮຽນ

ພິທີ​ເຊັນ​ບົດ​ບັນທຶກ​ຄວາມເຂົ້າໃຈ ລະຫວ່າງຄະນະ​ວິທະຍາສາດ​ສັງຄົມ ຄະນະ​ສະ​ຖາ​ປັດ​ຕະຍະ​ກຳ​ສາດ ແລະ ຄະນະ​ອັກສອນ​ສາດ ມະຫາວິທະຍາໄລແຫ່ງ​ຊາດ ແລະ ບໍລິສັດ​ທີ່​ປຶກສາ​ກວດ​ສອບ​ບັນຊີ ສ ເກົາຫຼີ ພາຍ​ໃຕ້​ໂຄງການ​ຮ່ວມ​ມື ການເສີມ​ສ້າງ​ຂີດ​ຄວາມ​ສາມາດ​ດ້ານການ​ພັດທະນາ​ຊຸມ​ຊົມ-ຊົນ​ນະບົດ ຕາມ​ທິດ​ສາມ​ສ້າງ ແລະ ແຊມາ​ອືນ ອຸນ​ດົງ ຈັດ​ຂຶ້ນ​ວັນ​ທີ 19 ເມສາ 2017 ທີ່​ມະຫາ​ວິທະຍາໄລ​ແຫ່ງ​ຊາດ ຮ່ວມ​ລົງ​ນາມ​ຂອງທ່ານ ອາ​ລຸນ ສີ​ລັດຕະນະ​ກຸນ ຄະນະ​ບໍດີ​ຄະນະ​ອັກສອນສາດ ທ່ານ ບຸນ​ມາກ ອິນ​ທິ​ພອນ ຮັກສາ​ການຄະນະບໍດີ ຄະນະ​ວິທະຍາສາດ​ສັງຄົມ ທ່ານ ດາ​ສັກ ອຸ​ເທນ​ທະ​ປັນຍາ ຄະນະບໍດີ ຄະນະ​ສະ​ຖາ​ປັດຕະ​ຍະ​ກຳ​ສາດ ແລະ ທ່ານ Kim Ho Kyung ປະທານ​ບໍລິສັດທີ່ປຶກສາ​ກວດ​ສອບ​ບັນຊີ ສ ເກົາຫຼີ ໂດຍ​ມີ​ທ່ານ ພຸດ ສິມ​ມາລາ​ວົງ ຮອງ​ອະທິການ​ບໍດີ ​ມຊ ແລະ ພາກສ່ວນ​ກ່ຽວຂ້ອງ​ເຂົ້າ​ຮ່ວມ.

ການ​ຮ່ວມ​ລົງ​ນາມ​ຄັ້ງ​ນີ້ ແມ່ນໜຶ່ງ​ໃນ​ໂຄງການ​ໃຫ້​ທຶນ​ສະໜັບສະ​ໜູນ​ການ​ຈັດ​ກິດຈະກຳ​ອາສາສະໝັກ ແລະ ການ​ຮຽນ​ຮູ້​ນອກຫ້ອງ​ຮຽນ​ດ້ານ​ການ​ພັດທະນາຊຸມ​ຊົນ-ຊົນນະບົດ ລະຫວ່າງ ​ມຊ ບໍລິສັດທີ່​ປືກ​ສາ​ກວດ​ສອບ​ບັນຊີ ສ ເກົາຫຼີ ເພື່ອ​ຊ່ວຍ​ໃຫ້​ນັກ​ສຶກ​ສາ ໄດ້​ຮຽນ​ຮູ້​ສະພາບ​ການ​ພັດທະນາຊົນນະບົດ​ຕົວ​ຈິງ​ຢູ່​ພາກ​ສະໜາມ ແລະ ຮັບ​ຟັງ​ການ​ບັນຍາຍ​ລາຍງານ​ຈາກ​ນັກວິຊາການ ​ໃນ​ການວາງ​ແຜນ​ກຳນົດ​ນະໂຍບາຍ​ພັດທະ​ນາ​ຊຸມ​ຊົນ​ຢູ່​ຂັ້ນ​ທ້ອງຖິ່ນ ພ້ອມນັ້ນ ຍັງ​ເປັນ​ການ​ສະໜັບສະໜູນບັນດາ​ກິດຈະກຳ​ຕ່າງໆ​ຂອງ​ໂຄງການ ເປັນຕົ້ນ​ແມ່ນການ​ໃຫ້​ທຶນແກ່​ນັກ​ສຶກ​ສາ​ທຸກ​ຍາກ​ທີ່​ມີ​ຜົນການ​ຮຽນ​ດີ​ຮຽນ​ເກ່ງ ພາຍ​ໃນພາກ​ວິຊາ​ສັງຄົມ​ສົງເຄາະ ແລະ ການ​ພັດທະນາພາກ​ວິຊາ​ສະພາບ​ແວດ​ລ້ອມ​ຜັງເມືອງ ພາກ​ວິຊາ​ອອກ​ແບບ​ຜະລິດ​ຕະ​ພັນ ແລະ ຕົບແຕ່ງ​ຂອງ​ຄະນະ​ສະ​ຖາ​ປັດ​ຕະຍະ​ກຳ​ສາດ ຍົກ​ລະດັບ​ທັກ​ສະດ້ານ​ການ​ຮຽນແປ​ພາສາ​ຕ່າງປະເທດ ໃຫ້​ແກ່​ພະນັກງານ​ຄູ-ອາຈານ ການ​ຈັດ​ກອງ​ປະຊຸມ​ສຳ​ມະນາ​ວິຊາ​ການ ແລະ ການ​ຄົ້ນຄວ້າ​ວິໄຈ​ດ້ານ​ການ​ພັດທະນາ​ຊຸມຊົມ-ຊົນນະບົດ ແລະ ອື່ນໆ ເພື່ອແນໃສ່​ເຮັດ​ໃຫ້​ພະນັກງານ​ຄູ-ອາຈານ ແລະ ນັກ​ສຶກ​ສາມີ​ຄວາມຮູ້​ສາມາດ​ໃຫ້​ມີ​ຜົນສຳເລັດ​ເທື່ອລະ​ກ້າວ.

ນອກ​ນັ້ນ ໃນ​ພິທີ​ຍັງ​ໄດ້​ມີ​ການມອບ​ທຶນ​ການ​ສຶກ​ສາ​ປະຈຳ​ສົກ​ປີ 2017-2018 ຈຳນວນ 50 ທຶນ ມູນ​ຄ່າ 50 ລ້ານ​ກີບ ໃຫ້​ແກ່​ນັກສຶກ​ສາ​ທຸກ​ຍາກ​ທີ່​ມີ​ຜົນ​ການ​ຮຽນດີ-ຮຽນ​ເກ່ງ ແລະ ຫ້າວຫັນ​ໃນການ​ຮຽນ​ຕື່ມ​ອີກ.

ຂ່າວທີ່ກ່ຽວຂ້ອງ