...ທຶນ​ນິ­ຍົມ​ສາ­ມານ ເລີ່ມ​ແຜງ​ລິດ... - ໂດຍ : ແນວ​ລາວ

1,677 19 ມ.ສ. 2017 ນານາສາລະ

ກ່ອນ​ໜ້າ​ນີ້​ຫຼາຍ 10 ປີ ມີ​ຂ່າວ​ໃຫຍ່​ກ່ຽວ​ກັບການ​ລົ້ມ​ລະ­ລາຍ​ຂອງ​ສະ­ຫະ­ກອນ​ສິນ​ເຊື່ອ​ເມດຕາ... ບໍ່​ສາ­ມາດ​ຈ່າຍ​ເງິນແກ່​ຜູ້​ຝາກ​ ຍ້ອນ​ຫຼາຍ​ສາເຫດ ຄວາມ​ອັບ­ປະ­ຍົດ​ເກີດ​ຂຶ້ນ​ແກ່​ຜູ້​ຝາກ​ເງິນ ເຫດ­ການ​ຄັ້ງ​ນັ້ນ​ຍັງ​ເປັນ​ພາບ​ຕິດ​ຕາ​ຂອງ​ຫຼາຍຄົນຢູ່.

ຫວ່າງ​ມໍ່ໆມານີ້​ກໍ່​ມີ​ຂ່າວ​ກ່ຽວ​ກັບ​ບໍ­ລິ­ສັດ​ທີ່ ​ຮັບຝາກ​ເງິນແບບ​ລະ­ດົມ​ທຶນ ​ໃຫ້​ດອກ​ເບ້ຍ​ສູງ​ກວ່າທະ­ນາ­ຄານ ​ກໍ່​ປິດ​ປະ­ຕູ ​ບໍ່ສາ­ມາດ​ຈ່າຍ​ເງິນ​ໃຫ້​ຜູ້ຝາກ​ຕາມ​ສັນ­ຍາ ແລະ ຍັງ​ມີ​ອີກ​ບັນ­ດາ​ບໍ­ລິ­ສັດ​ທີ່ຮັບ​ເງິນ​ຝາກ​ແບບ​ລະ­ດົມ​ທຶນ ກໍ່​ຈະ​ຄ່ອຍ​ລົ້ມ​ລະລາຍ​ຕາມ​ກັນ​ໄປ.

ຕໍ່​ປາ­ກົດ­ການ​ອັນ​ນີ້ ຜູ້​ຂຽນ​ຢາກ​ສະ­ທ້ອນ​ໃຫ້ເຫັນ​ເຖິງການ​ແຜງ​ລິດ​ຂອງ​ທຶນ​ນິ­ຍົມ​ສາ­ມານ ​ທີ່ມັນ​ເລີ່ມ​ເຂົ້າ​ມາ­ສູ່​ບ້ານ​ເຮົາ...ເວົ້າ​ແນວ​ນີ້​ບໍ່​ແມ່ນທຶນ​ນິ­ຍົມ​ບໍ່​ມີ​ແນວ​ດີ​ເນີ! ອັນ​ດີ​ມັນ​ກໍ່​ມີ ​ແຕ່​ພວກເຮົາ​ຈະ​ຕ້ອງ​ຮູ້​ທັນ​ກົນ​ໂກງ ແລະ ເລ່­ຫຼ່ຽມ​ຂອງ​ມັນ ​ບໍ່ຊັ້ນ​ເຮົາ​ຈະ​ຕົກ​ເປັນ​ເຫຍື່ອ​ອັນ​ແຊບ​ຊ້ອຍ​ຂອງ​ມັນ.

ຜ່ານ​ມາ​ຜູ້​ຂຽນ​ເຄີຍ​ຂຽນ​ວ່າ ພວກ​ເຮົາ​ໂຊກ​ດີ... ປະ­ເທດ​ຊາດ​ຂອງ​ເຮົາ​ກໍ່​ໂຊກ​ດີ ເພາະ­ວ່າ​ປະ­ເທດເພື່ອນ​ບ້ານ​ໃກ້​ຄຽງ​ເຮົາມີ​ລະ­ບອບ​ການ­ເມືອງເດີນ​ຕາມ​ທຶນ​ນິ­ຍົມ ເຊິ່ງ​ເຮົາ​ສາ­ມາດ​ເຫັນ​ໄດ້​ຈຸດ​ດີ ແລະ ຈຸດ​ບົກ​ຜ່ອງ ຈາກ​ການ­ຈັດ­ຕັ້ງ​ປະ­ຕິ­ບັດຂອງປະ­ເທດ​ເພິ່ນ! ເຫັນ​ແລ້ວ​ເຮົາ​ກໍ່​ນຳ​ມາ​ປັບ­ປຸງ​ແກ້ໄຂ​ໃຫ້​ດີ​ ໃຫ້​ເໝາະ​ສົມ ສຳ­ລັບ​ບ້ານ​ເຮົາ​ກໍ່​ເຊັ່ນ​ດຽວກັນ​ກັບ​ການ​ລະ­ດົມ​ເງິນ​ຝາກ ການ​ຫຼິ້ນ​ຫວຍ ແລະ ອື່ນໆ ຖ້າ​ເຮົາ​ຮູ້​ທັນ​ເຮົາ​ກໍ່​ບໍ່​ຕົກ​ເປັນ​ເຫຍື່ອ​ຂອງເຂົາ.

ເບື້ອງ​ການ­ຈັດ­ຕັ້ງເພິ່ນ​ກໍ່​ຕັກ­ເຕືອນ​ມາ​ຕະ­ຫຼອດ ໂດຍ​ສະ­ເພາະແມ່ນ​ທະ­ນາ­ຄານ ແຫ່ງ ສປປ ລາວ ບໍ່​ທໍ່​ນັ້ນ ​ເຈົ້າ​ໜ້າ­ທີ່ບ້ານ​ເມືອງ​ກໍ່​ດຳ­ເນີນ​ມາດ​ຕະ­ການ​ຕາມ​ກົດ­ໝາຍ​ຕໍ່​ຜູ້​ກະ­ທຳ​ຜິດ​ຢ່າງ​ເດັດຂາດ​ເຊັ່ນ​ກັນ ແຕ່​ພວກ​ເຮົາ​ທີ່​ຕົກ​ເປັນ​ເຫຍື່ອ​ນັ້ນຕ້ອງ​ຍອມ­ຮັບ​ວ່າ​ເຮົາ​ຮູ້​ເທົ່າ​ບໍ່​ເຖິງ​ການ ເຊື່ອ​ໄວໂພດ ແລະ ສຸດ​ທ້າຍ ຂໍ​ໂທດ! ​ເຮົາ​ເຫັນ­ແກ່​ໄດ້​ເກີນໄປ... ໃນ­ຕໍ່­ໜ້າ​ນີ້​ບໍ່​ແມ່ນແຕ່​ເລື່ອງ​ການ​ຝາກ​ເງິນ​ທໍ່ນັ້ນ? ຫຼາຍ​ສິ່ງ​ຫຼາຍ​ຢ່າງ​ທີ່​ເປັນ​ຂະ​ບວນ​ການແອບ​ແຝງ... ຕົວະ​ຕົ້ມ​ໄດ້​ເລີ່ມ​ເຂົ້າ​ມາ­ສູ່​ບ້ານ​ເຮົາ ເດັ່ນ​ກວ່າ​ເພິ່ນ​ອີກແມ່ນ​ຢາ​ປົວ​ພະ­ຍາດ ຢາ​ບຳ­ລຸງ ເສີມ​ຄວາມ​ງາມ ແລະ ອື່ນໆ... ປາ­ກົດ​ວ່າ ​ໂຄ­ສະນາ​ເຕັມ​ໜ້າ Face Book ສະ­ນັ້ນ ຈະ​ເຊື່ອ ຫຼື ບໍ່ ເປັນ​ສິດ­ທິ​ສ່ວນ​ບຸກ­ຄົນ​ນໍ? ແຕ່​ບໍ່​ຢາກ​ໃຫ້​ຕົກ​ເປັນເຫຍື່ອ​ຂອງ​ເຂົາ​ເທົ່າ​ນັ້ນ!.

ຂໍ​ເຕືອນ​ດ້ວຍ​ຄວາມ​ຫວັງ​ດີ​ວ່າ: ທຶນ​ນິ­ຍົມ​ສາມານ​ ເລີ່ມ​ແຜງ​ລິດ​ແລ້ວ?.

ຂ່າວທີ່ກ່ຽວຂ້ອງ