ເບິ່ງບ້ານເຂົາ ເອົາບົດຮຽນ - ໂດຍ: ວິເສດ ສະແຫວງສຶກສາ : ຫວຽດ­ນາມ ອິນ​ໂດ​ເນ​ເຊຍ ອັງ­ກິດ

723 19 ມ.ສ. 2017 ຫົວຂໍ້ຂ່າວອື່ນໆ

ຄໍ​ລຳ​ປະ­ຈຳ​ວັນ​ນີ້​ ໄປ​ເບິ່ງ​ການ​ປັບ​ໃໝ​ຜູ້​ລະເມີດ​ລະ­ບຽບ​ຄຸ້ມ​ຄອງ​ແຫຼ່ງ​ນ້ຳ​ແຮ່​ໃນ​ຫວຽດ­ນາມ ເລື່ອງ​ເສລີ­ພາບ​ໃນ​ການ​ເດີນ­ທາງ​ຂອງ​ຊາວ​ອິນ​ໂດເນ​ເຊຍ ສົມ​ທຽບ​ກັບ​ບາງ​ປະ­ເທດ​ໃນ​ອາ​ຊຽນ ແລະ ເລື່ອງ​ລອນ​ດອນ​ຂອງ​ອັງ­ກິດ ຂຶ້ນ​ແຜນ​ພິຊິດ​ມົນ​ລະພິດ.

ທີ່ ສສ ຫວຽດ­ນາມ: ຂ່າວ​ຈາກ​ໜັງ­ສື­ພິມ​ ວຽງຈັນ​ ທາມ (Vientiane Times) ສະ­ບັບ​ວັນ​ທີ 7 ເດືອນ​ເມ­ສາ​ນີ້ ໃຫ້​ຊາບວ່າ: ທາງ​ການ ສສ ຫວຽດນາມ ໄດ້​ປັບ​ໃໝ​ບໍ­ລິ­ສັດ​ຜະ­ລິດ​ນ້ຳ​ແຮ່​ໃນ​ຄະ­ດີ​ລະເມີດ​ລະ­ບົບ​ຄຸ້ມ​ຄອງ ແລະ ນຳ​ໃຊ້​ແຫຼ່ງ​ນ້ຳແຮ່ ຂ່າວ​ບອກ​ວ່າ ລະ­ດັບ​ການ​ປັບ​ໃໝ​ນັ້ນ​ມີ​ຈຳ­ນວນຫຼາຍ-ໜ້ອຍ​ຫຼຸດ​ລື່ນ​ກັນ ຄື: ນັບ​ແຕ່ 250 ລ້ານ​ດົງ (ເທົ່າ​ກັບ 11.125 ໂດ​ລາ​ສະ­ຫະ­ລັດ) ເຖິງ 2 ຕື້​ດົງ (ເທົ່າ​ກັບ 89.000 ໂດ​ລາ​ສະ­ຫະ­ລັດ).

ການ​ລະ­ເມີດ​ດ້ານ​ການ​ບໍ­ລິ­ຫານ​ກ່ຽວ​ກັບ​ແຫຼ່ງນ້ຳ​ແຮ່​ທຳ​ມະ​ຊາດ​ນັ້ນ ​ກວມ​ເອົາ​ຂົງ­ເຂດ​ການ​ກວດກາ ການ​ວາງ​ແຜນ ການ​ສຶກ​ສາ ການ​ຂຸດ​ຄົ້ນ ການ​ນຳ​ໃຊ້​ແຫຼ່ງ​ນ້ຳ​ແຮ່ ການ​ລະ­ເມີດ​ລະ­ບົບ​ອ່າງເກັບ​ນ້ຳ ແລະ ນຳ​ໃຊ້​ອ່າງ­ເກັບ­ນ້ຳ ແລະ ອື່ນໆ  ການ​ລະ­ເມີດ​ດັ່ງ­ກ່າວ​ໄດ້​ສ້າງ​ຄວາມ​ເສື່ອມ​ເສຍ​ໃຫ້​ແກ່​ແຜນ​ນຳ​ໃຊ້​ແຫຼ່ງ​ນ້ຳ​ແຮ່​ແບບ​ຍືນ​ຍົງ.

ທີ່ ອິນ​ໂດ​ເນ​ເຊຍ: ອ້າງ​ຕາມ​ແຫຼ່ງ​ຂ່າວ ເດິ ຈາກາ​ຕາ ໂພ​ສ (The Jakarta Post) ໜັງ­ສື­ພິມຂອງ​ອິນ​ໂດ​ເນ​ເຊຍ ພວກເຮົາ​ຮູ້​ວ່າ ອິນ​ໂດ​ເນ​ເຊຍ ເປັນ​ປະ­ເທດ​ທີ່​ຈັດ​ຢູ່​ໃນ​ລະ­ດັບ​ທີ 7 ທີ່​ມີ​ເສລີ­ພາບໃນ​ການ​ເດີນ­ທາງ ໂດຍ​ຖື​ເອົາ​ຄວາມ​ສະ­ດວກສະບາຍ​ໃນ​ການ​ນຳ​ໃຊ້​ວີ​ຊາ ໜັງ­ສື­ຜ່ານ­ແດນ​ທຳ​ມະດາ ​ເປັນ​ຕົວ​ຊີ້​ວັດ.

ການ​ຕີ​ລາ­ຄາ​ດັ່ງ­ກ່າວ​ໄດ້​ຮ່ວມ​ກັນ​ຂຶ້ນ​ໂດຍ​ບໍ­ລິ­ສັດ ເຣນ​ລິ ພັດ​ເນີ ແລະ ສະ­ມາ­ຄົມ​ການ­ບິນ​ສາກົນ ຕົວ​ຊີ້​ວັດ​ນັ້ນ​ໄດ້​ຖື​ເອົາຜົນ​ສັກ­ສິດ​ໃນ​ການ​ນຳໃຊ້​ວີ​ຊາ ໜັງ­ສື­ຜ່ານ­ແດນ​ທຳ​ມະ​ດາ (ຂອງ​ພົນ​ລະເມືອງ​ທົ່ວ​ໄປ) ໃນ​ປັດ­ຈຸ­ບັນ​ຄົນ​ອິນ​ໂດ​ເນ​ເຊຍ ​ສາມາດ​ໃຊ້​ໜັງ­ສື­ຜ່ານ­ແດນ​ທຳ​ມະ​ດາ​ເຂົ້າ 57 ປະເທດ ໂດຍ​ບໍ່​ຈຳ­ເປັນ​ມີ​ວີ​ຊາ ເຊິ່ງ​ຖ້າ​ສົມ​ທຽບ​ແລ້ວ ຍັງ​ຫຼຸດ​ປະ­ເທດ​ເກີດໃໝ່​ໃຫຍ່​ລຸນ ຄື: ຕີ​ມໍ ເລັດ​ສະເຕ ທີ່​ພົນ­ລະ­ເມືອງ​ທຳ​ມະ​ດາ​ສາ­ມາດ​ເດີນ­ທາງເຂົ້າ 83 ປະ­ເທດ ໂດຍ​ບໍ່​ຈຳ­ເປັນ​ມີ​ວີ​ຊາ.

ໃນ​ອາ​ຊຽນ ພົນ­ລະ­ເມືອງ​ສິງ­ກະ­ໂປ​ ຄອງ​ອັນ​ດັບທີ 1 ດ້ານ​ເສລີ­ພາບ​ໃນ​ການ​ເດີນ­ທາງ ຄື: ປະ­ຊາຊົນ​ທຳ​ມະ​ດາ​ສາ­ມາດເດີນ­ທາງ​ໄປ 173 ປະ­ເທດ ໂດຍ​ບໍ່​ຈຳ­ເປັນ​ຂໍ​ວີ​ຊາ ຖັດ​ມາ​ກໍ່​ແມ່ນ ມາ​ເລ​ເຊຍ 164 ປະ­ເທດ ການ​ທີ່​ປະ­ເທດ​ໜຶ່ງໆ​ມີ​ສັນ­ຍາຍົກເວັ້ນ​ວີ​ຊາ​ສຳ­ລັບ​ພົນ­ລະ­ເມືອງ​ທຳ​ມະ​ດາ​ກັບ​ຫຼາຍປະ­ເທດ​ນັ້ນສະ­ແດງ​ວ່າ ​ປະ­ເທດ​ດັ່ງ­ກ່າວ​ມີ​ເສລີພາບ​ໃນ​ການ​ເດີນ­ທາງ ​ໄປ​ພ້ອມໆ​ກັບ​ການ​ອຳ­ນວຍຄວາມ​ສະ­ດວກ​ໃຫ້​ພົນ­ລະ­ເມືອງ​ປະ­ເທດ​ອື່ນໆ​ເຂົ້າມາ​ປະ­ເທດ​ຂອງ​ຕົນ ເຊິ່ງ​ເປັນ​ຜົນ​ດີຕໍ່​ອຸດ­ສາ­ຫະ­ກຳການ­ທ່ອງ­ທ່ຽວ ການ​ລົງ­ທຶນ ແລະ ການ​ແລກປ່ຽນ​ວັດ­ທະ­ນະ­ທຳ ເສຍ­ດາຍ​ແຕ່​ວ່າ ​ຂ່າວ​ບໍ່​ໄດ້​ຈັດລະ­ດັບ​ໝົດ​ທັງ 10 ປະ­ເທດ​ສະ­ມາ­ຊິກ​ອາ​ຊຽນ ເພື່ອ​ຈະ​ໄດ້​ຮູ້​ວ່າ ​ປະ­ເທດ​ລາວ​ພວກ​ເຮົາ​ເປັນ​ທີ​ເທົ່າໃດ.

ທີ່ ອັງ­ກິດ: ໜຶ່ງ​ປີ­ຜ່ານ­ມາ ນັບ​ແຕ່​ນະ­ຄອນ­ຫຼວງລອນ​ດອນຂອງ​ອັງ­ກິດ ໄດ້​ມີ​ເຈົ້າ​ຄອງ​ຄົນ​ໃໝ່​ໄຟແຮງ ຊື່­ວ່າ ຄານ ຄົນ​ນີ້ ຊາວ​ລອນ​ດອນ​ ມີ​ທາງເລືອກ​ຫຼາຍໆ​ຢ່າງ​ເພື່ອ​ເຮັດ​ໃຫ້​ນະ­ຄອນ­ຫຼວງ​ເປັນເມືອງ​ໜ້າ​ຢູ່ ປາ­ສະ­ຈາກ​ມົນ​ລະ​ພິດ ລົດ​ຕິດ ແລະ ສຽງ​ລົບ​ກວນ​ໜວກ​ຫູ​ຈາກ​ເຄື່ອງ​ຈັກ​ລົດ​ທີ່​ແລ່ນ​ຕໍ່ກົ້ນ​ກັນ​ຮ້າຍ​ກວ່າ​ເສັ້ນ​ເຂົ້າ­ປຽກ.

ແຜນ­ການ​ຂອງ​ທ່ານ ຄານ ນັ້ນ​ເລັ່ງ​ໃສ່​ແກ້​ໄຂບັນ­ຫາ​ມົນ​ລະ​ພິດ​ແບບ​ເຖິງ​ກົກ​ເຖິງ​ຮາກ ຄື: ນັບ​ແຕ່ ປີ 2019 ເປັນ­ຕົ້ນ​ໄປ ຈະ​ມີ​ການ​ເກັບ​ພາ­ສີ​ລົດ​ໃຫຍ່ທີ່​ປ່ອຍ​ມົນ​ລະ​ພິດ​ເກີນ​ມາດ­ຕະ­ຖານ ເປັນ​ຈຳ­ນວນເງິນ 12,5 ປອນ​ຕໍ່​ວັນ ສ່ວນ​ລົດ​ທີ່​ໄດ້ມາດ­ຕະ­ຖານ ຈະ​ບໍ່​ເສຍ​ຄ່າ​ເກັບ​ຫຍັງ​ເລີຍ ນອກ­ຈາກ​ນັ້ນ​ທ່ານ ຍັງ​ຈະ​ຊຸກ­ຍູ້​ໃຫ້​ຄົນ​ນຳ​ໃຊ້​ລົດ​ໂດຍ­ສານ​ສາ­ທາ­ລະ­ນະ​ທີ່​ໃຊ້ພະ­ລັງ­ງານ​ໄຟ­ຟ້າ​ຫຼາຍ​ຂຶ້ນ ຈະ​ສ້າງ​ບ່ອນສາກ​ໄຟ​ຫຼາຍ​ຂຶ້ນ ແລະ ຈະ​ຂະ­ຫຍາຍ​ເຂດ​ປ່ອຍ​ມົນລະ​ພິດ​ຂັ້ນ​ຕ່ຳ​ສຸດ ການ​ເກັບພາ­ສີ​ລົດ​ທີ່​ປ່ອຍ​ມົນລະ​ພິດ​ນັ້ນ​ຈະ​ເນັ້ນ​ລົດ​ທີ່​ໃຊ້​ນ້ຳ­ມັນ​ກາ​ຊວນ ແລະ ນ້ຳ­ມັນ​ແອັດ​ຊັງທີ່​ບໍ່​ຜ່ານ​ມາດ­ຕະ­ຖານ​ເອີ​ໂຣ 4 ແລະ 6 ຕາມລຳ­ດັບ.

ຂ່າວທີ່ກ່ຽວຂ້ອງ