ງວດທຳອິດເກັບລາຍຮັບໄດ້ເກືອບ 5 ພັນຕື້ກີບ

579 12 ມ.ສ. 2017 ຂ່າວໜ້າ​ໜຶ່ງ

ທ່ານ ອາດ​ສະພັງ​ທອງ ສີ​ພັນດອນ ຮອງ​ລັດຖະມົນຕີກະຊວງການ​ເງິນ ​ລາຍ​ງານ​ຕໍ່​ກອງ​ປະຊຸມກະກຽມລາຍ​ງານ​ຕໍ່​ກອງ​ປະຊຸມສະໄໝ​ສາມັນ​ເທື່ອ​ທີ 3 ຂອງ​ສະພາ​ແຫ່ງ​ຊາດ ຊຸດ​ທີ VIII ຈັດ​ຂຶ້ນ ວັນ​ທີ 6 ເມສາ 2017 ທີ່​ກະຊວງ​ການ​ເງິນ ມີ​ທ່ານ ວິໄລ​ວົງ ບຸດ​ດາ​ຄຳ ປະທານ​ກຳມາ​ທິ​ການແຜນການ​ການ​ເງິນ ແລະ ກວດສອບ​ສະພາ​ແຫ່ງ​ຊາດ ພ້ອມ​ດ້ວຍບັນດາ​ກົມ​ອ້ອມ​ຂ້າງ​ກະຊວງ​ການ​ເງິນ​ເຂົ້າ​ຮ່ວມ.

ຜ່ານ​ການຈັດຕັ້ງ​ປະຕິບັດແຜນ​ງົບປະມານ​ແຫ່ງ​ລັດ ປະຈຳປີ 2017 ງວດ​ທີ 1 ນັບ​ແຕ່​ວັນ​ທີ 1 ມັງກອນ-31 ມີນາ 2017 ສາມາດ​ຈັດ​ຕັ້ງ​ປະຕິບັດ​ເກັບ​ລາຍ​ຮັບເຂົ້າ​ງົບປະມານ ໄດ້​ທັງ​ໝົດ 4.621,58 ຕື້​ກີບ ເທົ່າ​ກັບ 77,89% ຂອງ​ແຜນ​ງວດ 1 ຫຼື ເທົ່າ​ກັບ 19,30% ຂອງ​ແຜນການ​ປີ (23.941 ຕື້​ກີບ) ໃນ​ນັ້ນ ມີ​ລາຍ​ຮັບ​ພາຍ​ໃນ 4.183,37 ຕື້​ກີບ ເທົ່າ​ກັບ 77,78% ຂອງແຜນ​ງວດ 1 ແລະ ລາຍ​ຮັບຈາກ​ການ​ຊ່ວຍເຫຼືອ​ລ້າ​ຂອງ​ຕ່າງປະເທດ 438,20 ຕື້​ກີບ ເທົ່າ 78,87% ຂອງ​ແຜນການ​ງວດ 1.

ດ້ານ​ລາຍ​ຈ່າຍ​ງົບປະມານ​ທັງໝົດ​ປະຕິບັດ​ໄດ້ 5.579,32 ຕື້ກີບ ເທົ່າ​ກັບ 75,69% ຂອງແຜນ​ງວດ 1 ຫຼື ເທົ່າ​ກັບ 17,22% ຂອງ​ແຜນການ​ປີ ໃນນີ້ ສະເພາະ​ລາຍ​ຈ່າຍ​ທີ່​ສຳຄັນປະກອບ​ມີເງິນເດືອນ ແລະ ເງິນອຸດ​ໜູນ ປະຕິບັດ​ໄດ້ 58,86% ລາຍ​ຈ່າຍ​ລົງທຶນ​ພາຍ​ໃນ​ປະຕິບັດ​ໄດ້ 49,78% ແລະ ລາຍຈ່າຍ​ລົງທຶນ​ຕ່າງປະເທດ​ປະຕິບັດໄດ້ 55,07% ຂອງ​ແຜນ​ງວດ 1 ດ້ານ​ການ​ດຸນ​ດ່ຽງ ອີງໃສ່​ການຈັດ​ຕັ້ງ​ປະຕິບັດ​ລາຍ​ຮັບ-ລາຍຈ່າຍ​ງວດ 1 ເຫັນ​ວ່າ​ຈະ​ມີ​ການຂາດ​ດຸນ​ງົບປະມານ ຈຳນວນ 957,73 ຕື້​ກີບ ແຕ່​ໃນ​ນີ້ ເນື່ອງຈາກ​ລາຍ​ຈ່າຍ ຈຳນວນ 860,55 ຕື້​ກີບ ແມ່ນ​ໄດ້​ຢືມ​ເງິນຍອດ​ເຫຼືອ​ງົບປະມານ​ສົກ​ປີ​ຜ່ານມາ ເພື່ອ​ຊຳລະ​ລ່ວງ​ໜ້າ​ແລ້ວ ຈິ່ງ​ເຮັດ​ໃຫ້ການ​ຂາດ​ດຸນ​ງົບ​ປະມານ​ໃນ​ງວດ 1 ຍັງ​ເຫຼືອ​ພຽງ 97,18 ຕື້​ກີບ ພ້ອມ​ນີ້ຍັງ​ມີ​ລາຍຈ່າຍ​ອື່ນໆ​ທີ່​ນອນ​ໃນ​ພາກ​ດຸນດ່ຽງ ​ທີ່​ຈຳເປັນ​ຕ້ອງ​ປະຕິບັດຄື: ການ​ຊຳລະ​ຕົ້ນ​ທຶນ​ເງິນ​ກູ້​ຢືມ​ຕ່າງປະເທດ 1.269,76 ຕື້​ກີບ ແລະ ລາຍ​ຈ່າຍ​ຊຳລະ​ພັນທະບັດ​ຄັງເງິນ 193,22 ຕື້​ກີບ ລວມ​ທັງ​ໝົດ 1.559,76 ຕື້​ກີບ ໂດຍ​ລວມ​ແລ້ວ ໃນ​ງວດ 1 ຍັງ​ມີ​ຄວາມ​ຕ້ອງການແຫຼ່ງ​ເງິນ​ຕົວ​ຈິງ​ເພື່ອ​ມາ​ດຸນ​ດ່ຽງງົບປະມານ 1.559,76 ຕື້​ກີບ ປັດຈຸ​ບັນ ມີ​ແຫຼ່ງ​ດຸນ​ດ່ຽງ​ແລ້ວ 2.442,32 ຕື້​ກີບ ຈາກ​ເງິນ​ກູ້​ຢືມຕ່າງປະເທດ​ເປັນ​ໂຄງການ (ຈົດຮັບ-ຈົດ​ຈ່າຍ) 592,34 ຕື້​ກີບ ພັນທະບັດ​ຄັງ​ເງິນ 850 ຕື້​ກີບ ແລະ ທະນາຄານ​ແຫ່ງ ​ສປປ ລາວ 1.000 ຕື້​ກີບ ເຮັດ​ໃຫ້​ຍອດເຫຼືອ​ງົບປະມານ​ໃນ​ງວດ 1 ຈຳນວນ 882,56 ຕື້​ກີບ ເຊິ່ງ​ຈະ​ສາມາດ​ຮອງ​ຮັບ​ແຜນ​ລາຍ​ຈ່າຍ​ໃນງວດ 2.

ຂ່າວທີ່ກ່ຽວຂ້ອງ