ເບິ່ງບ້ານເຂົາ ເອົາບົດຮຽນ - ໂດຍ: ວິເສດ ສະແຫວງສຶກສາ : ອິນໂດ​ເນ​ເຊຍ ມຽນ​ມາ

1,415 04 ມ.ສ. 2017 ຫົວຂໍ້ຂ່າວອື່ນໆ

ມື້­ນີ້​ມີ​ເລື່ອງ​ຄວາມ​ເປັນ​ຫ່ວງ​ຂອງ​ສັງ­ຄົມ ​ອິນໂດ​ເນ​ເຊຍ ກ່ຽວ​ກັບ​ເດັກ­ນ້ອຍ​ທີ່​ຖືກ​ແກ່​ດຶງ​ເຂົ້າຮ່ວມ​ຂະ​ບວນ​ການ​ໂຄ­ສະ­ນາໃຫ້​ແກ່​ພັກ​ຝ່າຍ​ການເມືອງ​ຕ່າງໆ ແລະ ບັນ­ຫາ​ບໍ­ລິ­ສັດ​ຂຸດ​ຄົ້ນ​ຖ່ານ​ຫີນຂອງ​ ໄທ​ ໃນ ​ມຽນ​ມາ.

ທີ່ ອິນ​ໂດ​ເນ​ເຊຍ: ສະ­ຫະ­ພັນ​ອົງ­ການ​ສັງ­ຄົມ​ພົນລະ​ເຮືອນ (Alliance of Civil Society) ເຊິ່ງ​ປະກອບ​ດ້ວຍ​ພາກ­ສ່ວນປົກ​ປ້ອງ​ສິດ ແລະ ສະ​ຫວັດດີ​ພາບ​ຂອງ​ເດັກ ທີ່​ມະ­ຫາ­ວິ­ທະ­ຍາ­ໄລ​ອິນ​ໂດ​ເນເຊຍ ມູນ​ນິ­ທິ​ແສງ​ສະ­ຫວ່າງ​ຂອງ​ບັນ­ດາ​ອາ­ຈານ ແລະ ກຸ່ມ​ປະ­ຕິ­ບັດ​ງານ​ເພື່ອ​ສິດ­ທິ​ມະ­ນຸດ ໄດ້​ຊີ້​ໃຫ້ເຫັນ​ຫຼາຍ​ກໍ­ລະ­ນີ​ທີ່​ເດັກ­ນ້ອຍ​ອິນ​ໂດ​ເນ​ເຊຍ ​ຖືກນຳ​ໃຊ້​ເພື່ອ​ຜົນປະ­ໂຫຍດ​ທາງ​ການ­ເມືອງ​ຂອງ​ພັກຝ່າຍ​ຕ່າງໆ ຕົວ­ຢ່າງ ເດັກ​ນັກ­ຮຽນ​ປະ­ຖົມ​ຈຳ­ນວນໜຶ່ງ​ຖືກ​ໃຊ້​ເປັນ​ເຄື່ອງ­ມື​ໂຄ­ສະ­ນາໃຫ້​ສັງ­ຄົມ​ຮູ້​ວ່າ  ສັນ­ຍະ­ລັກ​ຫຼາຍໆ​ຢ່າງ​ຂອງ​ສາ­ສະ­ໜາ​ອິດ​ສະ​ລາມນັ້ນ​ບໍ່​ມີ​ສ່ວນ​ພົວ­ພັນ​ກັບ​ການ​ກໍ່​ການ​ຮ້າຍ.

ມີ​ອີກ​ກໍ­ລະ­ນີ​ໜຶ່ງ​ທີ່​ເດັກ­ນ້ອຍ​ຖືກ​ໃຊ້​ໃຫ້​ຮ້ອງ­ເພງການ­ເມືອງ ຊື່ “ຢາກ​ຮູ້” (Curious) ທີ່​ຖາມ​ປະ​ທານາ​ທິ​ບໍ­ດີ ໂຈ​ໂກ ວິ​ໂດໂດ ແລະ ທ່ານ ກູ​ໂມ​ໂລ ລັດ­ຖະ­ມົນ­ຕີ​ພາຍ​ໃນ ​ວ່າ: ເປັນ​ຫຍັງ​ຈຶ່ງ​ມີ​ການ​ປະ­ຕິບັດ​ແບບ​ພິ­ເສດ​ຕໍ່​ທ່ານ ອາ​ຮົກ ເຈົ້າ​ຄອງນະ­ຄອນຫຼວງຈາ​ກາ​ຕາ ໃນ​ຄະ­ດີ​ໝິ່ນ­ປະ­ໝາດ​ສາ­ສະ­ໜາອິດ​ສະ​ລາມ ຜູ້­ນຳ​ສະ­ຫະ­ພັນ​ອົງ­ການ​ສັງ­ຄົມ​ພົນລະ​ເຮືອນ​ບາງທ່ານ​ມີ​ຄຳ​ເຫັນ​ວ່າ: ເດັກ​ຕ້ອງ​ມີ​ອິດສະ­ຫຼະ​ພາບ​ດ້ານ​ຄວາມ​ຄິດ ນີ້​ຄື​ສິ່ງ​ທີ່​ສຳ­ຄັນ​ທີ່​ສຸດ ອິດ­ສະ­ຫຼະ­ພາບ​ດ້ານ​ຄວາມ​ຄິດ​ຈະຊ່ວຍ​ໃຫ້​ເດັກເຂົ້າ­ໃຈ​ສິ່ງ​ທີ່​ດີ​ຕໍ່​ພວກ​ເຂົາ​ເອງ ແລະ ຕໍ່​ສັງ­ຄົມແວດ​ລ້ອມ​ອ້ອມ​ຕົວ.

ຜູ້­ນຳ​ອີກ​ທ່ານ​ໜຶ່ງ​ມີ​ຄຳ​ເຫັນ​ວ່າ: ທາງ​ສະ­ຫະພັນ​ບໍ່​ມີ​ຈຸດ­ປະ­ສົງ​ວິ­ຈານ​ກ່ຽວ​ກັບ​ສັນ­ຍະ­ລັກ​ຂອງສາ­ສະ­ໜາ ພຽງ​ແຕ່​ຢາກບອກ​ວ່າ ການ​ໃຊ້​ເດັກເຄື່ອນ​ໄຫວ​ອະ­ທິ­ບາຍ​ເລື່ອງ​ນີ້​ຜ່ານ​ຟີມ​ວີ​ດີ​ໂອ​ນັ້ນ ເຮັດ​ໃຫ້​ສັງ­ຄົມ​ເຂົ້າ­ໃຈ​ບັນ­ຫາ​ອິດ​ສະ​ລາມ​ໃນ​ວົງແຄບ​ຊື່ໆ ຂ່າວ​ກ່ຽວ​ກັບ​ເລື່ອງ​ນີ້​ລົງ​ພິມ​ໃນ​ໜັງ­ສືພິມ ​ວຽງ​ຈັນ​ ທາມ ສະ­ບັບ​ວັນ​ທີ 30 ເດືອນ​ມີ­ນາຜ່ານ​ມາ.

ທີ່ ມຽນ​ມາ: ຫວ່າງ​ບໍ່​ດົນ​ມາ​ນີ້ ທາງ​ການ​ມຽນມາ ​ໄດ້​ສັ່ງ​ຢຸດ​ການ­ເຄື່ອນ­ໄຫວ​ຂອງ​ບໍ­ລິ­ສັດ​ຂຸດ​ຄົ້ນບໍ່​ຖ່ານ​ຫີນ​ໄທ ​ໃນ​ມຽນ​ມາ ໃນ​ເນື້ອ­ທີ່​ສຳ​ປະ­ທານ 850 ເຮັກ­ຕາ ທາງ​ພາກ​ໃຕ້​ຂອງ​ປະ­ເທດ ຍ້ອນ​ບັນຫາ​ທີ່​ເປັນ​ອັນ­ຕະ­ລາຍ​ຕໍ່​ສິ່ງ­ແວ­ດລ້ອມ ພາ­ໃຫ້​ເກີດມົນ​ລະ​ພິດ​ທາງ​ອາ­ກາດ ແລະ ຄວັນ​ໝອກ​ຈາກການ​ເຜົາ​ໄໝ້​ສິ່ງ​ເສດ​ເຫຼືອ.

ຄຳ​ສັ່ງ​ຢຸດ​ການ​ປະ­ຕິ­ບັດ​ງານ​ຂອງ​ບໍ­ລິ­ສັດ​ ໄດ້​ມີຂຶ້ນ​ໃນ​ວັນ​ທີ 27 ເດືອນ​ກຸມ­ພາຜ່ານ​ມາ ບໍ­ລິ­ສັດຂຸດ​ຄົ້ນ​ດັ່ງ­ກ່າວ​ຕັ້ງ​ຢູ່​ເຂດຕາ​ນິນ­ທາ​ຍີ (Taninthayi) ຕາມ​ຊາຍ​ແດນ​ຕິດ​ຈອດ​ກັບ​ປະ­ເທດ​ໄທ ແລະ ໄດ້​ເຄື່ອນ​ໄຫວ​ມາ​ແຕ່​ປີ 2012 ແຕ່​ໃນ​ຫຼັງໆ​ມາ​ນີ້ ປະ­ຊາ­ຊົນ​ໃນ​ເຂດ​ດັ່ງ­ກ່າວ​ໄດ້​ຮ້ອງ­ທຸກ​ກ່ຽວ​ກັບຄວັນ​ພິດ​ ຈາກ​ການ​ຈູດ​ສິ່ງ​ເສດ​ເຫຼືອ ນອກ­ຈາກ​ນັ້ນ ຍັງ​ມີ​ການ​ປ່ອຍສິ່ງ​ເສດ​ເຫຼືອ​ລົງ​ແມ່­ນ້ຳບັນ​ຈອງ (Banchaung).

ຜ່ານ​ການ​ສອບ​ສວນ​ເຫັນ​ວ່າ​ ບໍ­ລິ­ສັດ​ບໍ່​ແຮ່ ເມ ຟລາວ​ເວີ ຂອງ​ໄທ​ ຂາດ​ການ​ປະ​ເມີນ​ຜົນ​ເສຍຫາຍ​ຕໍ່​ສິ່ງ­ແວ­ດລ້ອມ ສ່ວນອິສ ​ສະ​ຕາ (East Star) ອີກ​ບໍ­ລິ­ສັດ​ໜຶ່ງ​ຂອງ​ໄທ​ນັ້ນ ໄດ້​ສວຍ­ໂອ­ກາດ​ຂຸດ​ຄົ້ນຖ່ານ​ຫີນ​ເກີນ​ທີ່​ໄດ້​ຮັບ​ອະ­ນຸ­ຍາດ 3 ບໍ່ ແລະ ໄດ້​ລັກລອບ​ວ່າ​ຈ້າງ​ແຮງ​ງານ​ໄທ ​ຢ່າງ​ຜິດ​ກົດ­ໝາຍ​ເຂົ້າໄປ​ເຮັດ​ວຽກ ທັງ​ສອງ​ບໍ­ລິ­ສັດ​ເຈົ້າ​ບັນ­ຫາ​ນີ້​ອາດ​ໄດ້ຮັບ​ອະ­ນຸ­ຍາດສືບ­ຕໍ່​ເຄື່ອນ​ໄຫວ ພາຍ­ຫຼັງ​ໄດ້​ປະ­ມວນຜົນ​ເສຍ​ຫາຍ​ຕໍ່​ສິ່ງ­ແວ­ດລ້ອມ.

ຂ່າວທີ່ກ່ຽວຂ້ອງ